ئایا ناڕازیەكانی ناو گۆڕان حیزب دروست دەكەن؟

بۆچی بزوتنەوەی گۆڕان حەزدەكات بەرەی ناڕازیەكان حیزب دروست بكەن

ئایا ناڕازیەكانی ناو گۆڕان حیزب دروست دەكەن؟

1445 خوێندراوەتەوە

هەفتەیەكە بەگەرمی دەنگۆی دروستكردنی حیزبی نوێ‌ لەلایەن ناڕازیەكانی ناو بزوتنەوەی گۆڕانەوە بەگەرمی باسی لێوەدەكرێت،بەڵام بەپێی بەدواداچونەكانی دیبلۆماتیك مەگەزین ئەو دەنگۆیانە سەرچاوەكەی زیاتر گۆڕانی سەر گردەكەیە و لە بنەرەتدا لەخوار گردەكەوە هیچ هەوڵێك لەئارادا نییە بۆ دروستكردنی حیزبێكی نوێ‌.

 

هەفتەی رابردوو بە مانشێتی دەنگی دەهۆڵی حیزبی نوێ‌ لە خوار گردەكەوە دێت هەندێك لە میدیاكانی كوردستان باسیان لە راگەیاندنی حیزبێكی نوێ‌ كرد لەلایەن گروپی ناڕازیەكانی ناو بزوتنەوەی گۆڕانەوە.

بەڵام سەركردەكانی ناو ئەو بەرەیە بە توندی رەتی دەكەنەوە كە لەئێستادا نیەتی دروستكردنی حیزبێكی نوێیان هەبێت. قادر حاجی عەلی یەكێك لە دیارترین سەركردەكانی بەرەی ناڕازی پێی وایە:" لە ئێستادا حیزب ناشیرین و قێزەون بوە لەناو خەڵكیدا،بۆیە زەمینەی دروستكردنی حیزبی نوێ‌ لەئارادا نییە، بەڵام كاری هاوبەش و ئاگا لەیەكبون هەیە لەنێوان ئەو خەڵكانەی كە لەم بارودۆخە ناڕازین و مەرج نییە ئەوە لە چوارچێوەی حیزبدا بێت،چونكە خەڵك بێزارە لە حیزبایەتی" 

،،

دەنگدەران نارازین لە سیاسیەتى ئێستاى بزووتنەوەى گۆڕان

 

سەركردە ناڕازیەكانی گۆڕان كە پێیان وایە بەهۆی هەڵە ستراتیژیەكانی بەرپرسانی گۆڕانەوە، زۆرینەی قاعیدەی جەماوەری بزوتنەوەی گۆڕانیان لەگەڵدایە و دەنگدەری گۆڕان بەهەمان شێوە ناڕازین لە سیاسەتەكانی ئەو گروپەی كە لەئێستادا بزوتنەوەكە بەڕێوە دەبەن.

 

بۆچی گۆڕانی گردەكە پێیان خۆشە ناڕازیەكان حیزبی نوێ‌ دروست بكەن؟

هێشتا دیار نییە سەرچاوەی هەواڵە فەیكەكە لەبارەی دروستكردنی حیزبە نوێیەكەوە لە كوێوە سەرچاوەی گرتووە، ئایا تەنها دروستكراوی خەیاڵی چەند رۆژنامەنوسێك بووە یان لە كۆمپیوتەری حیزبێكی سیاسییەوە نێردراوە، هەركامێكیان بێت بەدڵنیایەوە هەواڵەكە لەلایەن بزوتنەوەی گۆڕانەوە پێشوازی لێدەكرێت.ئەگەر هەر لە بنەرەتەوە خۆیان سەرچاوەی هەواڵەكە نەبوبن.

،،

گۆڕانى گردەکە پێیان خۆشە گۆڕانى خوار گردەکە حزب درووست بکەن.

بەرپرسانی ئێستای بزوتنەوەی گۆڕان پێیان خۆشە ناڕازیەكان حیزب دروست بكەن و ماڵی خۆیان جیابكەنەوە و پەیوەندیان بە گۆڕانەوە نەمێنێت، بەڵام بەدڵنیایەوە ناڕازیەكان شەڕی ئەوە دەكەن كە گۆڕانی راستەقینە ئەوانن و ئەو گروپەی ئێستا دەستی گرتوە بەسەر بزوتنەوەكەدا لایداوە لە هێڵە سەرەكیەكانی گۆڕان.

ناڕازیەكان شەڕی شەرعیەتی گۆڕان و خاوەندارێتی بزوتنەوەكە دەكەن و خۆیان بە بەرپرسیار دەزانن لە بەرامبەر جەماوەرەكەی گۆڕاندا و لە باشترین حاڵەتدا تا ماوەیەكی درێژ وەكو ئاراستەیەكی جیاواز لەناو گۆڕاندا درێژە بەخۆیان دەدەن،مەگەر ئەوەی كە لەلایەن خانەی راپەڕاندن یان جڤاتی نیشتیمانیەوە بەفەرمی هەمویان دەربكرێن لە بزوتنەوەكە، ئیتر ئەوكات قسەیەكی تریان دەبێت.

هەروەها لە ئێستادا لەگەڵ ئەوەی زۆرێك لەسەركردە ناڕازیەكانی گۆڕان لە دەرەوەی گردەكەن و لەماڵەوە دانیشتون، بەڵام هێشتا ژمارەیەكی بەرچاو لە هەڵسوڕاوان هەیە كەلەناو گردەكە ماون، یاخود پەرلەمانتارن و هەمان بۆچونی ناڕزایەكانیان هەیە.

،،

دروستكردنی حیزبی سیاسی پێویستی بە توانای دارایی بەهێز هەیە لەئێستاشدا گروپی ناڕازیەكان ئەو توانا مادیەیان لەبەردەستدا نییە كە بتوانن حیزبەكەی پێ‌ بەڕێوەبەرن

هۆكارەكانی دروستنەكردنی حیزب لەلایەن ناڕازیەكانی گۆڕانەوە

لە دیدی ئەواندا لەبەر چەند هۆكارێك دروستكردنی حیزب لەئێستادا كارێكی ئاسان نییە و مەحكومە بە شكست

یەكەم: خەڵك متمانەی بە حیزب نەماوە و چەند جارێك دەنگی داوە بە حیزبگەلێك كە هیوای پێیان هەبووە بەڵام هەموو جارێك بێ‌ ئومێدیان كردووە

دووەم: لەئێستادا بێ‌ ئومێدیەكی گەورەی باڵی كێشاوە بەسەر خەڵكی كوردستان و گەشبینین بە گۆڕانكاری و باشبونی دۆخەكە، بەتایبەتی دوای ئەوەی بەهەموو توانایان پشتیوانی هێزەكانی ئۆپۆزسیۆنیان كرد، بەڵام لەكۆتایدا بێ هیوایان كردن

سێیەم: دروستكردنی حیزبی سیاسی پێویستی بە توانای دارایی بەهێز هەیە لەئێستاشدا گروپی ناڕازیەكان ئەو توانا مادیەیان لەبەردەستدا نییە كە بتوانن حیزبەكەی پێ‌ بەڕێوەبەرن

چوارەم: حیزبی سیاسی پێویستی بە میدیای بەهێز هەیە و ئەوەش بە پارەی خەیاڵی دروست دەكرێت كە لەدەستی ئەواندا نییە

پێنجەم: هاوكێشەی سیاسی ئیقلیمی و نێودەوڵەتی هاوكار نییە بۆ دروستبونی حیوبی نوێ‌

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری