شێركۆ بێكەس: زیاد ئەسعەد لە نەورەسێکی سپی دەچێت

شێركۆ بێكەس: زیاد ئەسعەد لە نەورەسێکی سپی دەچێت

1553 خوێندراوەتەوە

شێركۆ بێكەس

لە ئەمڕۆدا ئاواز و گۆرانی كوردی بەگشتی ئەوەندەی لە چەند و ژمارەدا زۆ بووە، لە چۆنایەتیدا كزەو، مەگەر دەگمەن ئاوازی بەشی زۆری ئەو گۆرانیانە ببیستی لە ئاستێكی موزیكی و هونەری بەرزدابێت.

 

،،

گۆرانییه‌كانی زیاد، مۆركی كوردیان پێوه‌یه‌ و خۆی له‌ناو هونه‌ری وڵاتانی دراوسێدا ون نه‌كردووه‌.

 

  بەشی زۆری ئەو گۆرانیانە تێكەڵەیەكی بێسەر بەرە لەگۆرانی توركی و فارسی و عەرەبی و، بەشی هەرە زۆری گۆرانیبێژەكانیش ئاگایان لە كەلتوری گۆرانی و موزیك نییە.

 دیارە من لێرەدا مەبەستم ئەوە نییە كە ئەبێ گۆرانی كوردی بەدەر بێ لەكاریگەرێتی گۆرانی و میوزیكی دەورو بەر، بەڵام نابێ مۆرك و تایبەتمەندی گۆرانی كوردی  ون بكرێ، واتە ئەو كاریگەریەتییە نابێ بگاتە ئەو شوێنەی كە لە کلتوری دەورووبەردا بتتوێنێتەوە.

 

زیاد ئه‌سعه‌د هونه‌رمه‌ند

 

 لە نێو شەپۆلە تازەكانی گۆرانی مۆزیكی كوردیدا، لەو ساڵانەی دواییدا، ( زیاد ئەسعەد) بە گوڕوتین و تۆنێكی تاسە شكێنەوە هاتە نامانەوەو هەندێ سنوری تەقلیدی بەزاندو دڵ و گوێچكەمانی بەریتمی تازەو داهێنەرانە زاخاو دایەوە، چۆن و بۆچی ؟!

 یەكەم : لەبەر ئەوەی لاسایكەرەوەو تەقلیدی نەبوو، واتە هەمان سەدای گۆرانییەكانی رابردووی نەدایەوە بەگوێچكەماندا، فۆلكلۆریشی بۆ خۆی نەكرد بە بەندینخانە.

دووەم : هونەرمەند ( زیاد ئەسعەد) بە تەنها هەر بەهرەو سەلیقە نییە، بەڵكو لە هەمانكاتدا شارەزایی دنیای موزیك و مەقاماتەو ئەزانێت چی ئەكات و عاشقانە لەگەڵ كارەكەی خۆیدا هەڵس و كەوت ئەكات، یان ئەتوانم بڵێم ( مۆسیقاو گۆرانی بووە بەدڵدار و تەنانەت – هاوسەری ئەو).

 زیاد ئەسعەد، هەموو ژیانی خۆی داوە بە هونەرەكەی و تەنانەت بۆ چركە ساتێ لێی دوور نەكەوتۆتەوە. بەشی زۆری گۆرانییەكانی تری ئەم سەردەمە، گۆرانییەكانیان تەمەنیان كورتە زۆر زوو بیر ئەچنەوە.

 

 

 

 بەڵام بە شێكی باشی گۆرانییەكانی هونەرمەند زیاد ئەسعەد، وا لەسەر زاری گەنجەكانەوەو ئەوترێنەوە، كە ئەمەیش بۆ خۆی بەڵگەیەكی زیندووە بۆ زیندوێتی ئەو گۆرانیانە، زیاد جگە لەوەی خۆی دەنگی خۆشە، لەهەمان كاتدا ئاوازدانەرێكی بەتوانایە، چەندیین گۆرانی بۆ گۆرانیبێژە ناسراوەكانی ئەم سەردەمە داناوە.

 زیاد ئەسعەد، بەچاكی ئاگای لەكەلتوری گۆرانی كوردییە، ئاگای لەگۆرانی كۆن و تازەی میللەتەكانی دەوروبەرە، تەنانەت هەناسەكانیان لەیەكتری جیا ئەكاتەوە. من لەنزیكەوە كاك (زیاد) ئەناسم و تێكەڵین و لەسەردمێكدا لە سوید رۆژانە یەكترمان ئەبینی و بۆ یەكەمجاریش لە رێگەی هونەرمەند (پەیوەند جاف)ـی زاوامەوە لەماڵی خۆمان ناسیم.

 هونەرمەند زیاد ئەسعەد، وەك مرۆڤیش پیاوێكی ناسك و رووخۆش و دڵپاكە، ئەو مۆسیقا و گۆرانی كردووە بەنان و ئاو، تا سەر ئێسقان عاشقی هەموو گۆرانییەكی جوانە، هەر ئەم عەشقیەش وای لێكردووەكە نەوەستێ و هەمیشە بەخشندە بێ.

 

 

 

 جارێكیان باسی ئەو هەموو موزیكە گەورەیەی بۆ كردم كە لە (حەسەن زیرەك)ـدا هەبووە، ئەیگوت (حەسەن زیرەك لەهەندێ حاڵەتدا لە ئاڵوگۆڕی هەندێ تۆنی دەنگدا كاری وایكردووە، كە جێگای سەروڕمانە !!) دیارە من رووبەروو هەندێ رەخنەم لە هونەرمەند (زیاد ئەسعەد) گرتووە.

 بەتایبەتی كە ئەو لە ژیانی خۆییدا پەرش و بڵاوەو پەرت پەرتەو دوورە پەرێزییەكەی لەخەڵكەوە تاڕادەیەك كاری كردۆتە سەر قەتیسبوونی چالاكییەكانی، من پێموایە ئەبوایە تا ئێستا ( زیاد) چەندینجار سەردانی كوردستانی بكردایە.

  ئەو لە نزیكەوە تێكەڵ بە عاشقانی گۆرانییەكانی خۆی ببوایەوەو لەنزیكەوە گوێی لەخواست و داواكانیان بگرتایە و چەندیین كۆنسێرتی پێشكەش بكردایە، لەم ڕووەوە (زیاد) زۆر تەمبڵە و مەگەر هەلیكۆپتەرێ لەماڵەكەیدا بنیشێتەوە بیڕفێنێ و بیهێنێتەوە!! ئێ ئەمەیش چۆن ئەكرێ ؟!

 

 

 

 لە ڕووی هەڵبژاردنی ئەو تێكستی شیعریانەوە كە بۆ ئاوازەكانی هەڵیان ئەبژێرێت، تێكستەكان روون و بێگرێ و گۆڵن، بەتەواوی لەگەڵ ئاوازەكاندا ئەیگونجێنێ، ئەویش بۆتە هۆی ئەوەی كە لەلایەن گوێگرانەوە زوو لەبەر بكرێن.

 هەڵبەت شیعری گۆرانی ئەبێ سادەو رەوان بن و زوو بگەنە ئاستی تێگەیشتنی خەڵكەكە، ئەگەر وانەبێت جۆرە دابڕانێك ئەكەوێتە نێوان وشە و ئاوازەوە.

  هونەرمەند (زیاد ئەسعەد) لە دنیای گۆرانی و مۆسیقای مندا لە نەورەسێكی سپی ئەچێ كە لەبەر هەتاوی ژیاندا دەبرسیكێتەوە. لەدوایشدا لە دڵەوە سڵاوم بۆ هونەرمەند (زیاد ئەسعەد) و چاوی ماچ ئەكەم. شیركۆ بێکەس