قوربانییەکانی قەندیل، قەیرانی ئەخلاقیی فەشەلی ئۆردۆغانی فاشیست و خەونی بچووکی کوردگەل

قوربانییەکانی قەندیل، قەیرانی ئەخلاقیی فەشەلی ئۆردۆغانی فاشیست و خەونی بچووکی کوردگەل

213 خوێندراوەتەوە

 هەندرێن

ماوەیەکە ڕژێمی فاشیلی ئۆردۆغان لە پەراوێزی ملکەچی بەناو حکومەتی کوردستان و قەیرانی ئەمەریکا لەگەڵ ئێراندا، بە رێگەی سەربازیی و بۆردومانکردنەوە ڕەشەکوژانە بنار و شاخەکانی هەڵگورد و هاووڵاتییانی دەڤەری برادۆست و قەندیل دەسووتێنێ و دەکوژێت، هەر ئەمڕۆش خێزانێکی مەندەنی کردە قوربانی خولیا وەحشی و دۆڕاندنەکەی لە هەڵبژاردندا.

 

،،

نووسه‌ر و ڕۆشنبیر و قه‌ڵه‌م به‌ده‌سته‌كانی هه‌رێمی كوردستان له‌ئاست پێویستدا نین چجای هاوڵاتیانی ئاسایی.!

 

  بەڵام ئەوەی جێگەی تێڕامانە، لە کاتێکدا ئەو رەفتارە وەحشییانەی تورکیا لە پەرەسەندن دان، کەچی هێشتا ئەوە چەند رۆژە حەشاماتگەل لە کاسب، نووسەر و ئەکادیمی و دینداری کورد هێشتا شەڕ و خۆڕنینەوە لە پێناو مافی مرۆڤ و دینداریی لەسەر غەدرکردن لە خاتوو زەینەبی باڵا داپۆشراو و هەڵەی زمانەوانی مامۆستایان لە پرسیاری تاقیکردنەوەکانی بواری پەروەردە بەری نەداون.

 بۆیە مرۆڤ وای دێتە بەرچاو کە خەلکی ئەم مەملەکەتەی ئێمە خۆیان لە ژیانی رۆژانەدا زۆر مافپاریزاراو بن و رۆژانە بە رێز و ئەدەبەوە لە دائیرە و جادە و بانەکانیاندا مامەڵەیان لەگەڵدا دەکرێت و لەوپەری خۆشگوزەرانی و ئارامیدا دەژین، بۆیە هەموویان ئەرکیان بووەتە پسپۆڕ و پاسەوانی مافی گەردوونیی مرۆڤ لە جیهاندا.

 

،،

كۆمه‌ڵگه‌ی خۆمان له‌ بازنه‌ی بچوكدا له‌ژیان ده‌ڕوانن و ورد و دوور له‌ئاسۆ ناڕوانن.

 

ئەوەی راستیی بێت، ئەو دیمەن و رووداوانەی کە رۆژانە و حەفتانە خەڵکی ئێرە بە بەزمێکەوە سەرقاڵ دەکا، سەرچاوەکەی لە نەزانیی و نەداریی و دەمچەفتی کۆمەڵگە و ژیانی لە بەها داماڵراوی ئێمەوە هەڵقووڵاون.

 کۆمەڵگەیەک کە خۆی ئەهلی ئەم واقیعی ژیانی رۆژانەی ئەم کوردستانەدا بێت و تا ئێستاش لە خۆی تێنەگەیشتبێت کە بێبەریی و بێبەشە لە سادەترین بنەمای مافی مرۆڤ و رەفتار، کە خۆی بەرهەمهێنەرییەتی، ئەوها هەڵیت و پەڵیت دەژیت.

 کۆمەڵگەی ئەوهاش، هەمیشە خۆی بە شت و دیاردە بچووکەکانەوە خەریک دەکا، چونکە ژیانی لە سنووری خەیاڵێکی بچووکدا دەخوولێتەوە.

 

،،

پرسی دۆزی كورد، لای هاوڵاتیانی كوردی له‌پشت ته‌واووی ئامانج و ویسته‌كانی تریانه‌وه‌یه‌.

 

 مرۆڤی ئەو جۆرە کۆمەڵگەیە، وازی لەوە هێناوە چۆن بژیت، بۆیە کوشتەی ئەوەیە رۆژانە بەچی بخافڵێت و بژیت. مرۆڤگەلی کۆمەڵگەی دەستکورت لە خەون و خەیاڵی مەزن، هەمیشە خەیاڵ و کردەی بچووک و دەستکەوتی سەرەتایی بە سەرکەوتنی گەورە دەزانێت.

 بۆیە ئەو جۆرە کۆمەڵگەیە هەمیشە لە دونیایەکی بچووکدا قەتیس دەمێنێت. بە پێچەوانەی ئەمەوە، مرۆڤی کۆمەڵگەی خودان بەها و خەیاڵی گەورە، خولیای ئامانجی لە بن نەهاتوو و کردەی مەزنە.

 ئەگەر وانەبێت، بۆچی ئەو حەشامەتگەلە لە خەڵک هێندە سەرگەرمن بە هات و هوت و خۆڕینەوە بۆ مافی مرۆڤانەی قوتابییەکی سەرپۆش، کە کەسیش نازانێ کیشەکەش چی بووە.

 

 

 

 کەچی ئەو حەشاماتە لە خەڵک و ئەکادیمیی و نووسەر و دیندارە مافپەروەرانە نەک هەر بە خوێنساردییەوە سووتاندنی دەغل ودانی جوتیارانی گەرمیان و کەندێناوە بە دەستی کۆنە بەعسیی و عەشدی شەعبیی داعشیەکان و قەیرانە ئەخلاقییەکانەوە مامەڵەی کردووە.

  بەڵکو ئەوە مانگێک زیاترە بە شکاندی شکۆی چیا و کوشتن و بڕینی زیاتر لە دەیان خەڵکی مەدەنی دەڤەری بادینان، برادۆست و قەندیل بە دەستی هێرشی فڕۆکەکانی رژێمی فاشیلی ئۆردۆغان، تەقەی سەریان دێت؟

 

 

 

 من لای خۆمەوە هیچ چاوەروانییەکم لە حکومەت و حیزبی کوردیی نییە، چونکە ئەوە تێپەڕی رەخنەو داواکاری بێ ئەنجام و ئامانج دووبارە بکرێنەوە، بەڵام ئاخۆ جێگەی تێڕامان و تێدامان نییە.

  کوردستانێک حەشاماتێکی بێهەژماری لە رۆژنامەنووس، دکتۆر و پرۆفیسۆر و پسپۆڕی ئەکادیمیی، نووسەر و شاعیر و بەندبێژی مشە، چاودێری سیاسیی، ئۆپۆزیسیۆنی ئەفەندی و ئەدا و ئەتوار مۆدێرنی هەبێت.

 

 

 

 کەچی وەک ئەوەی ئەرکیان تەنێ خەریکی قسەی رۆژانەی بچووک، لەقەبی قۆقز و بابەتی بچووک، پڕکردنەوەی بەرنامەی تەلەفزیۆنەکانیان بە کەسانی لووس، شیعر و بەندی فشۆڵ و ... تاد بێت؟

  زانیمان حکومەتی کوردستان بە هۆی شەکلبوونی حیزبەکان لەسەر کەین و بەینی نەزانراو هێشتا تەشکیل نەبووەو لەبەر کەین و بەینی پارە و پوول و بەرژەوەندی نادیار و ئاشکراشی لەگەڵ تورکیا و ئێران و دەورو جیراندا هەیە، بۆیە ناتوانێت یان لە خۆی رانابینێت بە قسەش نارەزایی بەرانبەر تورکیا دەرببڕێت،.

 لێ ئەو هەموو حەشاماتە لە ئۆپۆزیسیۆن و پسپۆڕ و پرۆفیسۆرە لە مافی گەردوونیی مرۆڤ، لە جیاتی ئەو هەموو قیڕە و قیڕی رۆژانەیان لە پەنا و پێچ و مێدیایەکانەوە لەسەر مافی مرۆڤ و عەیبە و عاری سواوی گەندەڵی بەرپرسەکان و نووسین کەفەژیلەکە و ئیمزا بۆ هەرزانفرۆشی کتێبە وەرگیێراو و وەرگێڕدراو و لەقەبە قەبەکانیان.

 

 

 

 دەتوانن بە خۆ رێکخستن رۆژانە بە دژی ئەو کەڵەگاییەی ئۆردۆغان و رژێمەکەی لە بەرانبەر کۆنسوڵی ئەمەریکی و ئەوروپیی کۆببنەوە و داوای مافی گوندنیشینە مەدەنییەکانی ئەو دەڤەرانە و چارەسەرییەکی بەپەلەی ئەو قەیرانە و مەترسییەکانی رژێمی ئۆردۆغان بکەن.

 ئاخر سوودی ئەو هەموو کۆنسول و نوێنەرە ئەوروپیی و جیهانییانە چین، ئەگەر نەتوانرێ خاوەن هەڵوێستێکی مافی مرۆڤانەنەی هاووڵاتییانی مەدەنی کورد نەبن ،کە رۆژانە تورکیا و ئێران بە دژیان ئەنجامی دەدەن؟ هەر چۆنێک بێت.

 

 

 

 دەبا قەوم و قیلە هەر لە قەیرانی قەوانی سووای رۆژانە و خەیاڵی بچووک بخوولێتەوە، لێ هەڵگورد و قەندیل هەمیشە بە بوونە سەرمەست و سەربەرزەکانیانەوە، هەمیشە داغکەری دوژمنەکانییەتی و هێمای مافی گەردوونی خۆیەتی.

 

author photo

تایبه‌ت به‌ دیپلۆماتیك