غیابی عەقڵ لە دنیای دین و سیاسەتماندا

غیابی عەقڵ لە دنیای دین و سیاسەتماندا

459 خوێندراوەتەوە

دوای ساڵانێکی تاقەتپڕوکێن لە جەنگەڵی پۆپۆلیزم و ڕیاکاریی ناو کۆمەڵگاکەماندا، کاتی ئەوەیە عەقڵ قسە بکات، کاتی ئەوەیە زۆر قوڵیش نا، بەڵکو تەنیا توێکێك لەو پێستە و کەمێك لەو ڕووکارگەراییە لابەین، هەست ئەكەم هەمووان بارتەقای چەند سەدە ئەم خۆنمایش کردن و پاڵەوانبازییەی ناو سۆشیالمیدیا ماندووی کردین و جوانییە ڕاستەقینەکەی بردین.

 

 ئەمە ماڵوێرانییە بهێڵین بەم سەقەتییە مل بەرەو ناشوێن بنێین، تازە کۆمەڵگا ناگەڕێتە دواوە و تۆڕە کۆمەڵایەتییە جۆربەجۆرەکان و میدیاش بە هەموو ڕەهەندەکانییەوە قوڵتر بە هەناوی ئێمەدا ڕۆئەچێت، بەڵام لایەنی کەم ئەتوانین عەقڵانیانە بەرخوردی لەگەڵدا بکەین.

 

 

 

 

 هەر ئەم تۆڕانە بە دیقەیەکی بەرزەوە بیرمان ئەخەنەوە چەند ساڵ لەمەوبەر چیمان وت و کامە هەنگاومان هەڵگرت، لەتەنیشت یاداوەریی و میمۆرییە بایۆلۆژییەکەی خۆماندا، یادگەیەکی ئۆنلاینیشمان هەیە، ببینن هەڵا و بڕم بڕمی ناو ئەم تۆڕانە چی بوون و ئێستا چیمان چنییەوە؟!

 

  کاتی ئەوەیە لەسیاسەتی ئێمەدا دەست بۆ چارەسەری ڕیشەیی ببەین نەك گۆڕەپان تەخت بکەین بۆ موزایەداتی کۆمەڵێك خۆپەرست، لەبری کەس خۆی بەپاڵەوان بکات بە بەخشینی پێنج سەد هەزار یان تەنانەت زۆرینەی ڕەهای موچەی پەرلەمانتارییەکەی بە ئەم و ئەو و زیندوو هێشتنەوەی کەلتوری سواڵکەریی و دەست پانکردنەوە، فەرموو بجەنگن لەپێناوی نادادیی و کەمکردنەوەی سپەیسی نێوان بەرزترین موچە و نزمترین موچە!

 

 

 

 

 

  لەبنەڕەتدا فەرموو بجەنگن لە پێناوی ئەوەی کە فیعلەن پەرلەمان دەزگایەکی کارا و خاوەن سومعە و متمانەبێت، دەزگایەك بێت بۆ دەستدرێژیی وڵاتانی هەرێمایەتی بۆ سەر خاکی کوردستان و شەهیدکردنی وڵاتیانی سڤیل حەشر بەرپا بکات نەك پاشکۆی دەسەڵاتی جێبەجێکردنی دەستەمۆکراوی تورکیا و ئێران بێت.

 

  کەواتە بوون و نەبوونی تۆی پەرلەمانتار چیە، سەرت کز راگرە و بەشێکی کەم لە موچەکەت دەرمانی دەردی کەس ناکات، تۆیەك بەم هەموو نادادیی و تەحقیرکردنەی تاك بە تاکی ئەم کۆمەڵگایە ڕازیت، کڕبە و دانیشە شاتە شاتی بەخشینی دوو فلست ئەوەندەیتر دۆخەکە نالەبار ئەکات!

 


بەشێك لەپارتە سیاسییە باڵادەستەكانی هەرێمی كوردستان، كار لەسەر بێ هیواكردن و دەستەمۆكردنی هاوڵاتیان و تەنانەت سیاسییەكانیش دەكەن.

 

 ئەمە لەکاتێکدا کە لەم خولەدا پەرلەمانتارانی پارتی ئەم جۆرە فیعلەشیان قۆرخ کرد و حەسرییەن بەرنامەیان هەیە بوار بۆ کەسیتر نەهێڵنەوە! بە یەك ڕاگوزەری خێرا بیرێك لە تایتڵ و دروشمە سەرەکییەکانی هەڵمەتی بانگەشەی هەڵبژاردنی ئەم هێزانە بکەرەوە.

 

  بزانە چەندە بەتوندیی داویانە لە تەلاری متمانەی هەموومان و خاپوریان کردووە، ئێ هێشتا تۆ شەوانە ڕۆژی خزمەتی درۆ و پاساوەکانی حیزب ئەکەیت، چۆن لە ڕووت هەڵدێت چاوت ببڕیتە چاوی دەنگدەرەکانت و درۆیتریان بۆ کەڵەکە ئەکەیت؟!

 

 

 

 

 

 خاوەنی زۆرترین کورسی پەرمانی بێدەنگ و ڕەنگ کراو، کە پارتییە و بە ساختە و زەبروزەنگ و پەلهاویشتن ٤۵ و بەوەی سۆشیالیستەوە ٤٦ کورسی کۆکردەوە، خولی پێشوو نێچیرڤان لە بانگەشەدا ووتی: کاتی ئەوەیە لەداهاتی نەوت هەموو ماڵێکی کوردستان مانگانە ۵٠٠ دۆلار بنێرینە ماڵەکانیان بۆیان، کەچی موچەی فەرمانبەرانیشی دزی و دەنگدەرەکانی چاوەڕێن وەك سەرۆکی هەرێم ببێتە فریادڕەسیان!

 

  ئەمە کەیسە (بە ڕەنگ و دەنگ و نووسراویش هەیە) دەزگایەك نیە هەستێت بە جوڵاندنی و بڵێت نێچیرڤان بارزانی کوا ئەم بەڵێنەت؟! لەسەر ئاستی بازرگان و کۆمپانیا چاوچنۆکەکان، ((ئاسیاسێڵەکەی فاروقی مەلامستەفا بەناوی ئۆڤەرێکی تایبەتیی بۆ موچەخۆرانی دەوڵەت بەهەزاران سیمکارتیان فرۆشت.

 

،،

لەبەر بەرژەوەندی خۆیان، بەرپرسان و سیاسییەكانی ئەم وڵاتە، هەموو ڕێگایەكی جۆر و ناجۆر دەگرنەبەر بۆ دۆزینەوەی بازاڕ بۆ كۆمپانیاكانیان، بێ ئەوەی گرنگی بە هاوڵاتی و تەنانەت كارمەندو بەكاربەریان بدەن، كەسێكیش نییە لێیان بپرسێتەوە.

 

 

  بەفێڵ گوایە مانگی تەنیا شەش هەزار دینار شارجی دەکەیتەوە و پاشان پەیوەندی فریی و بە بڕێکیش ئەنتەرنێتەوە، دوای ئەوەی قۆڵی هەزارانیان بڕی بەدوو قوناغ بەشداری مانگانەیان گەیانده دوانزە هەزار دینار واتە دوو بەرامبەری ئەوەی کە ڕێکەوتنی لەسەرکراوە

.

  دیاره ئەم فێڵە پێشێلکردنی مافی بەکاربەرە لەڕووی یاساییەوە و بەهەڵخەڵەتاندن و فێڵ حسابی بۆئەکرێ)) ئەمە کاك ئیسماعیل گەڵاڵی پەرلەمانتاری پێشووتر نووسیویەتی، دیسان ئەمەش کەیسێکی تەواو ڕوونە،بزانە توانرا ئەو کۆمپانیایە بخرێتە ژێر پرسیارەوە و مافی بەکاربەر تا ڕادەیەك وەربگیرێتەوە، یان زیاتر و خەستتر ماستاوی بۆ ئەکرێت؟

 

 کەواتە ڕۆڵی حکومەت و پەرلەمان و دادگا چیە لەم هەرێمەدا؟! هەرچی بابەتی ئاینی خەڵکە، دەیان جار بەرامبەری سیاسەت کاتی بەخۆداچوونەوەیە، ئاین کە لە جەوهەردا پڕیەتی لە تێکست و دەقی زۆر شێلگیر لە بەرگرییکردن و ڕێزگرتن لە بەها باڵا و گەردوونییەکان.

 

 

 

 

  لە دژایەتیکردنی گەندەڵیی(فساد)، لە دژی خوێنڕێژیی و دەستدرێژی بۆ سەر کەرامەتی مرۆڤایەتیی(( إِنَّ فِرْعَوْنَ عَلَا فِي الْأَرْضِ وَجَعَلَ أَهْلَهَا شِيَعًا يَسْتَضْعِفُ طَائِفَةً مِّنْهُمْ يُذَبِّحُ أَبْنَاءَهُمْ وَيَسْتَحْيِي نِسَاءَهُمْ ۚ إِنَّهُ كَانَ مِنَ الْمُفْسِدِينَ)) کەچی ئاینداران شەڕی مان و نەمان لەسەر شتە ڕووکار و بێبایەخەکان ئەکەن!

 بازاڕی دەیان بانگخواز و واعیزیان گەرمکردووە بەم چەلەحانێی و شەڕەدەنوکی مەلابەزێنەوە، چەند ڕۆژ بە پرسێکی زۆر لابەلاوە کۆمەڵگا سەرقاڵ ئەکەن، بەڵام هەر نیوەی ئەو لەشکرە پێداگریی لە شەڕی ڕەوای نادادیی بکەن، ئێستا کۆمەڵگاکەمان لەقۆناغێکی زۆر باشتردا ئەبوو!