شەڕى پۆستەکان، ئاگرى نێو باڵەکانى یەکێتى گەرم دەکاتەوە

شاڵاو کۆسرەت رەسوڵ هەڕەشە دەکات

شەڕى پۆستەکان، ئاگرى نێو باڵەکانى یەکێتى گەرم دەکاتەوە

1631 خوێندراوەتەوە

 

دواى رێکەوتنى کۆتایى لەگەڵ پارتى، شەڕى باڵەکانى یەکێتى سەر هەڵدەداتەوە، تاکو ئەمرۆش یەکێتى لەسەر هیچ کاندیدێک بریارى کۆتایی نەداوە و پێ ناچێت بە ئاسانیش بتوانێ بڕیار بدات.

 

بریارە ئەمرۆ، کۆمیتەى ئەنجومەنى سەرکردایەتى یەکێتى، لەبارەى یەکلاکردنەوەى ناوى کاندیدەکانى بۆ پۆستەکان کۆببێتەوە و بریارى یەکلاکەرەوە بدەن، بەڵام  بەهۆى هەندێ گۆڕانکارى و پێشنیارو شەڕى نێو باڵەکان رێگە دەگیرێت لە بریارى کۆتایی.

 

،،

ئەگەرى زۆرە پۆستى جێگرى سەرۆکى هەرێم یەکێک لە مەکتەب سیاسییە بەتەمەنەکانى یەکێتى وەرى بگرێت.

 

جێگرى سەرۆکى هەرێم بۆ کێ دەبێت؟

هەرچەندە لەسەرەتاوە بەپێى رێکەوتنى نێوان پارتى و گۆڕان جێگرى سەرۆکى هەرێم بۆ گۆڕان بوو، بەڵام دواتر بەهۆى نیگەرانى و داواکاریی یەکێتییەوە جێگرێکى دیکە بۆ پۆستەکە زیاد کراو بریارە بدرێت بە یەکێتى.

 

بەڵام تاکو ئێستا یەکێتى هیچ کاندیدێکى بە رەسمى دیارى نەکردووە بۆ ئەو پۆستە، لەم نێوەندەشدا سێ ناوى دیار دەهێنرێن بۆ وەرگرتنى پۆستەکە، لەنێویاندا: سامان گەرمیانى و عومەر فەتاح و شێخ جەعفەر.

 

وا باس دەکرێت ئەگەرى زۆرە شێخ جەعفەر بەهۆى دۆستایەتى و نزیکى لەماڵى بارزانییەوە ئەو پۆستە وەر بگرێت، دواى ئەوەى سەرکردایەتى حزبەکەى بەنهێنى دەنگى پێدا.

 

جێگرى سەرۆکى حکومەت بۆ کام باڵ؟

 هەرچەندە تاکو ئێستا قوباد تاڵەبانى وەک کاندیدێکى بەهێز ناوى دەهێنرێت بۆ وەرگرتنەوەى جارێکى دیکە  پۆستى جێگرى سەرۆکى حکومەت، بەڵام لە ئێستادا باس لە خۆ کاندیدکردنى شاڵاو کۆسرەت رەسوڵ دەکرێت بۆ هەمان پۆست.

 

کاندیدبونى شاڵاو وەک کوڕى کۆسرەت رەسوڵ بۆ ئەو پۆستە، تەنها بۆ ئەوەیە جەنگێکى سیاسی لەگەڵ ماڵى مام جەلال و ئیبراهیم ئەحمەد بکات، تاکو یەکێتى بەبێ دەنگە دەنگ، پۆستى سەرۆکى پەرلەمان بدات بە باڵەکەى کۆسرەت رەسول کە رێواس فائیق کاندیدیانە بۆ ئەو پۆستە.

 

چونکە ماڵى کۆسرەت رەسوڵ، دەزانن کە ماڵى بارزانى و خودى مەسعود بارزانى جگە قوباد تاڵەبانى هیچ کەسێکى دیکە ناکەن بە جێگرى کوڕەکەیان کە مەسرور بارزانییە و پۆستى سەرۆکى حکومەتى لایە.

 

،،

پۆستى سەرۆکى پەرلەمان لەنێوان رێواس فائیق و بێگەرد تاڵەبانى تاکو ئەمرۆ یەکلاى نەبۆتەوە.

 

پۆستى سەرۆکى پەرلەمان بۆ کێ؟

لەسەرەتاى ناو هێنانى یەکێتى بۆ وەرگرتنى ئەم پۆستە، ناوى دوو کاندید دەهێنرێت بۆ پۆستەکە، ئەوانیش رێواس فائیق و بێگەرد تاڵەبانى، کە هەریەکەیان لەسەر باڵێکى نێو یەکێتى ئەژمار دەکرێن. یەکەمیان ماڵى کۆسرەت رەسوڵ و دووەمیان ماڵى مام جەلال.

ماڵى مام جەلال دەیانەوێت لەگەڵ جێگرى سەرۆکى حکومەت سەرۆکى پەرلەمانیش وەر بگرن، بەڵام هەرچى ماڵى کۆسرەت رەسوڵە رێگرن لەمەو دەیانەوێت، هەروا جێگرى سەرۆکى هەرێمیان بەر نەکەوت بتوانن سەرۆکى پەرلەمان بەدەست بهێنن و جارێکى دیکە دوو پۆستى سیادى لاى ماڵى مام جەلال نەبن.

 

 

دەرهاویشتەى هەڵگیرسانى شەڕى نێو باڵەکان چین؟

دەرەنجامى گەرمبوونەوەى شەڕى نێوان باڵەکان، هەندێ گۆڕانکارى و پێشنیارى نوێ لەنێو حزبەکە هاتوونەتە ئاراوە گرنگترینیان، ئەمانەن:

 

یەکەم: لایەنگرانى ماڵى مام جەلال

لایەنگرانى ماڵى مام جەلال قوباد تاڵەبانى دەیانەوێت لەرێگەى کۆکردنەوەى دەنگ و لۆبى بۆ مامى بچوک ئەم دوو کارەى خوارەوە بکەن: ئەوانیش:

١/ دەیانەوێت شەرعیەتى ئەنجومەنى سەرکردایەتى یەکێـتى نەهێڵن، چونکە دەزانن ماڵى کۆسرەت رەسوڵ لە ئێستادا لە ئەنجومەنەکە زۆرینەیان لەگەڵدایە و هەر بریاردانێک بە نهێنى لە بەرژەوەندى ئەوان کۆتایی دێت.

بۆیە دەیانەوێت ئەم کارە بکەن، پاڵ پشت بەو بڕگەى نێو پیرەوپرۆگرامى یەکێتى کە دەڵێت: لەکاتى دواکەوتنى کۆنگرەو ئەنجامنەدانى لەکاتى خۆیدا، ئەنجومەنى سەرکردایەتى حزب بە هەڵوەشاوەیی دەمێنێتەوە و هیچ بریارێکى کارى پێ ناکرێت.

 

،،

هەوادارانى قوباد تاڵەبانى، دەیانەوێت بە بیانووى دەنگەکانى هەڵبژاردنەوە مامى بچوکیان ببێت بە جێگرى سەرۆکى حکومەت.

 

٢/ هەروەها لایەنگرانى ماڵى مام جەلال، دەیانەوێ ئەو بابەتە گەرم بکەنەوە کە مامى بچوک ١٨٠٠٠٠ هەزار دەنگى هەڵبژاردنەکانى بەدەست هێناوە و دەبێت رێزیان لێ بگریت و هیچ کاندیدێک لەبەرامبەریدا نەوەستێتەوە بۆ وەرگرتنى جێگرى سەرۆکى حکومەت.

 

ئەم باڵە ماڵى مام جەلال و ئیبراهیم ئەحمەد (شاناز ئیبراهیم ئەحمەد) و مەلا بەختیار و رێبەرایەتى دەکەن و هەوڵ دەدەن دەنگى رێکخستنەکانى بۆ کۆبکەنەوە.

 

 

،،

 پێشنیارەکەى ماڵى کۆسرەت رەسوڵ، دژى مامى بچوکە.

 

دووەم: لایەنگرانى ماڵى کۆسرەت رەسوڵ

هەرچى لایەنگرانى ئەم باڵەشە، سەرقاڵى چەند شتێکن بۆ ئەوەى یارییەکە لەماڵى مام جەلال ببنەوە و لە بەرژەوەندى ئەوان کۆتایی بێت، ئەویش:

١/ پێشنیاریان کردووە تاکو هەرکەسێک لە کابینەکانى پێشوو پۆستى حکومى وەر گرتووە لەسەر پشکى یەکێتى، بکشێتەوە و جێگە بۆ کەسانى دیکە چۆڵ بکات.

ئەمەش تۆپێکە راستەوخۆ دەنێرێت بە ماڵى مام جەلالەوە، چونکە ئەگەر پێشنیارێکى لەم شێوەیە سەر بگرێت دەبێت راستەوخۆ قوباد تاڵەبانى بکشێتەوە. ئەوکاتە کۆسرەت رەسوڵ دەتوانێ شاڵاوى کورى دابنێت کە تاکو ئێستا هیچ پۆستێکى وەر نەگرتووە.

 

٢/ شاڵاو کۆسرەت رەسوڵ، بەپێى زانیارییەکان هەرەشەى ئەوەى کردووە ئەگەر ئەمرۆ یەکێتى خۆى یەکلاى نەکاتەوە و رێک نەکەون بۆ وەر گرتنى پۆستەکان، ئەوان قبوڵى ناکەن سبەینێ پارتى بەتەنها حکومەت را بگەینێت بۆیە، کوڕەکەى کۆسرەت رەسول گوتویەتى: وەک هاوڵاتیش بێت سى ڤییەکى رادەستى مەسرور بارزانى دەکات تاکو پەسەند بکرێت.

 

بەرهەم ئەحمەد ساڵح و لاهور شێخ جەنگى هاوکارى تەواوى ئەم باڵە دەکەن، وا باس دەکرێت سامان گەرمیانیش کە کاندیدە بۆ پۆستى جێگرى سەرۆکى هەرێم لەسەر ئەم باڵە ئەژمار دەکرێت.

 

 

،،

هەر پۆستێکى کە بریارە یەکێتى وەرى بگرێت، زیاد لە کاندیدێک خۆى ئامادە کردووە بۆى.

سێیەم: پۆستەکانى دیکەش کێشەیان بۆ درووست دەکرێت

جگە لە سێ پۆستە سیادى و گرنگەکەى (سەرۆکى پەرلەمان و جێگرانى سەرۆکى هەرێم و حکومەت) پۆستەکانى دیکەش کە بریارە یەکێتى وەریان بگرێت زیاد لە کاندیدێک شەڕى بۆ دەکەن کە دووبارە رەنگدانەوەى باڵەکان تێدا دەبینرێت.

بۆ نموونە هەرچى وەزیرى خوێندنى باڵایە کە تا ئێستا ناوى یوسف گۆران دەهێنرێت بۆ وەرگرتنەوەى ئەو پۆستە، پۆڵا خانەقا لەبەرامبەر ناوبراودا خۆى کاندید دەکات بۆ وەرگرتنى هەمان پۆست. 

هەروەها، هەرچى وەزیری پێشمەرگەیە هەریەک لە: شۆڕش ئیسماعیل، سیروان كوێخا نەجم، مستەفا چاوڕەش، جەبار یاوەر کاندیدن بۆ ئەم پۆستە.

وەزیری كشتوكاڵیش: ئاسۆس عەلی، حاكم سەمەد، سەعدی پیرە ، عیزەت سابیر، و وەزیری هەرێم بۆ پەیوەندییەكانی هەرێم و عێراق: رەوەند مەلا مەحمود، دلێر كەركوكی كە ناسراوە بە دلێری تەوزیع.

 

بۆیە تا ئێستا دیار نییە، ئایا ئەمرۆ سەرکردایەتى یەکێتى دەتوانێ بە دەنگدانى نهێنى ئەم پلەو پۆستانەى پەرلەمان و حکومەت بۆ یەکێتى یەکلایی بکاتەوە، یاخود ئاگرەکە گەرمتر دەبێت و خامۆشکردنى ئاسان نابێت. 

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان