ده‌رباره‌ی بانگخوازی ئایینیی جنێوده‌ر!

ده‌رباره‌ی بانگخوازی ئایینیی جنێوده‌ر!

251 خوێندراوەتەوە

 هه‌میشه‌ گوته‌یه‌كی بیرمه‌ندی میسری (سه‌یید قوتب)م له‌ بیره‌، كه‌ ده‌ڵێت ئامانجی به‌رز به‌ ئامرازی په‌ست به‌دی نایه‌ت، ئاخر ئه‌و كاره‌ ڕێك وه‌ك ئه‌وه‌یه‌، بمانه‌وێت به‌ناو قوڕاودا به‌ره‌و شوێنێكی پاك بڕۆین! وه‌ختێ تۆ به‌ سه‌روبچمێكی قرێژ و جلوبه‌رگێكی پیسه‌وه‌، ڕیكلام بۆ پاكوخاوێنی بكه‌یت، كه‌س به‌ فلسێك لێت ده‌كڕێت؟ كه‌ به‌ جنێودان شیعر به‌ باڵای ده‌مپاكیدا بڵێیت، كه‌س گوێت لێ ده‌گرێت؟

 

،،

جنێو هیچ شوێن و جێگه‌یه‌كی له‌نێو ئاینی ئیسلامدا نییه‌، به‌ڵام به‌شێك له‌مامۆستاو بانگه‌شه‌كارانی ئاینی پیرۆزی ئیسلام زۆر كات له‌موناقه‌شه‌و تێگیرانه‌كانیاندا په‌نای بۆده‌به‌ن!.

 

 له‌م زه‌مانه‌دا كه‌ هیچ شتێك له‌ جێی خۆیدا نه‌ماوه‌، تایپێك له‌ بانگه‌شه‌كه‌ری ئایینی په‌یدا بوونه‌ و شوێنكه‌وتووگه‌لێكی فره‌شیان وه‌دوو كه‌وتوون، به‌ قسه‌ی خۆیان بانگه‌وازی ئیسلام بڵاو ده‌كه‌نه‌وه‌ و خه‌ڵكی بۆ ئیسلام بانگ ده‌كه‌ن.

 كه‌چی وه‌ختێ له‌گه‌ڵ كه‌سێكی (بێباوه‌ڕ)دا ده‌كه‌ونه‌ چه‌له‌حانێ، بینه‌ر ته‌نیا به‌وه‌ڕا ده‌گات جنێوان بژمێرێت، كه‌سێك كه‌ پێشتر كه‌سیانی نه‌ناسیوه‌، نازانێت كامیان باوه‌ڕداره‌كه‌ و كامیان بێباوه‌ڕه‌كه‌ن!

  هه‌ڵبه‌ت پێویست ده‌كات من به‌كورتی و به‌ ڕاشكاوی، باوه‌ڕی خۆمتان له‌سه‌ر بێباوه‌ڕی و بێباوه‌ڕان پێ بڵێم، بۆ ئه‌وه‌ی دواتر ناچار نه‌بم، وه‌ڵامی پرسیاران بده‌مه‌وه‌. بێباوه‌ڕانیش هه‌ر وه‌ك بڕواداران، یه‌ك جۆر نین، مرۆڤ هه‌یه‌ له‌ پای نه‌دۆزینه‌وه‌ی وه‌ڵامی پرسیاره‌كانیدا بێبڕوا بووه‌، هه‌یه‌ له‌ دۆخی گوماندایه‌ و ڕه‌نگه‌ تا ده‌یشمرێت هه‌ر وا بمێنێته‌وه‌..

 

 

 هه‌یه‌ بێبڕوایه‌ به‌ڵام بۆ خۆی بێبڕوایه‌ و له‌ مامه‌ڵه‌ و هه‌ڵسوكه‌توتدا هه‌تا بڵێی نیان و ئارامه‌ و هه‌قی به‌سه‌ر كه‌سه‌وه‌ نییه‌، بێباوه‌ڕیش هه‌یه‌ تێكده‌ر (فاسد)ه‌، هه‌یه‌ له‌وه‌یش بانتره‌، خراپه‌ بڵاو ده‌كاته‌وه‌ (مفسد)ه‌... بابه‌تی بێباوه‌ڕی هه‌ر وا سانا نییه‌، تا یه‌كێك بێت و فێرمان بكات، چۆن به‌رانبه‌ر بێباوه‌ڕ بووه‌ستینه‌وه‌ و چۆن به‌ره‌ی له‌ دژ دروست بكه‌ین!

 به‌تایبه‌ت له‌ دنیای ئه‌مڕۆدا كه‌ هه‌موو شتێك هێنده‌ ئاڵۆز و تێكچڕژاو بووه‌، هه‌ر هه‌نگاونانێك پێویستی به‌ ده‌ جار بیركردنه‌وه‌یه‌... له‌م نووسینه‌دا لایه‌نگری بڕوادار یان بێباوه‌ڕ ناكه‌م و مه‌به‌ستیشم نییه‌ ئه‌و كاره‌ بێنمه‌ به‌ر باس، كرۆكی بابه‌ته‌كه‌ لاكردنه‌وه‌یه‌ به‌ لای شه‌رعییه‌تی ئه‌و جۆره‌ -بانگخوازه‌ ئاینییه‌-دا!

 هه‌ربۆیه‌ به‌ زمان و بیركردنه‌وه‌ی دنیابینییه‌كه‌ی ئه‌وانیش ده‌نووسم و پرسیار ده‌كه‌م.. هه‌ر به‌ ڕاست، منی مسوڵمان كاتێ بانگه‌شه‌ بۆ ئایینه‌كه‌م ده‌كه‌م، ئامانجم له‌و كاره‌م چییه‌؟ ده‌مه‌وێت ئیسلام بڵاو بكه‌مه‌وه‌؟ بۆ ئه‌وه‌ ده‌كه‌م؟ چونكه‌ پێم وایه‌ ئیسلام ئایینێكی باشه‌ و خه‌ڵكی باش په‌روه‌رده‌ ده‌كات؟ ئه‌گه‌ر وه‌ڵام تا ئێره‌، به‌ڵێیه‌، كه‌ وای بۆ ده‌چم، وا بێت.

 

 

  پرسیاری دیكه‌ قوت ده‌بنه‌وه‌.. ئایا پێم وایه‌ منی بانگخوازی مسوڵمان كه‌سێكی باشم كه‌ گه‌یشتووم به‌وه‌ی بانگه‌شه‌ بۆ ئایینه‌كه‌م بكه‌م؟ ئه‌گه‌ر به‌ڵێ، ئایا ده‌مه‌وێت خه‌ڵكییش ببن به‌ مسوڵمان تا ببن به‌ كه‌سێكی وه‌ك من؟ له‌وسه‌ره‌وه‌، ئایا منی بڕوادار باوه‌ڕم وایه‌ ئه‌وی بێباوه‌ڕ خراپه‌؟ ئه‌گه‌ر به‌ڵێ، ده‌مه‌وێت ببێت به‌ مسوڵمان تا وه‌ك منی لێ بێت؟ باشه‌ ئه‌وی بێباوه‌ڕ خراپییه‌كه‌ی له‌ چیدایه‌؟ ده‌مه‌وێت چی له‌ودا بگۆڕم؟

 ئه‌گه‌ر وای داده‌نێم خراپییه‌كه‌ی ئه‌وه‌یه‌ دڵڕه‌قه‌، كه‌واته‌ ده‌بێت من میهره‌بان بم، ئه‌گه‌ر خراپییه‌كه‌ی ئه‌وه‌یه‌ سته‌مكاره‌، ئه‌وا ده‌بێت من دادپه‌روه‌ر بم، ئه‌گه‌ر خراپییه‌كه‌ی ئه‌وه‌یه‌ مرۆكوژه‌، ئه‌وا ده‌بێت من سڵ له‌ كوشتن بكه‌مه‌وه‌، ئه‌گه‌ر خراپییه‌كه‌ی ئه‌وه‌یه‌ زمانپیسه‌، ئه‌وا ده‌بێت من خۆ له‌ زمانپیسی بگرمه‌وه‌....

 باشه‌ تۆی بانگه‌شه‌كه‌ری ئایینی، كه‌ له‌وی به‌ بێباوه‌ڕی ده‌زانیت، دڵڕه‌قتر، سته‌مكارتر، زوانپیستر...یت، پێمان ناڵێیت چیت له‌ خۆتدا دیوه‌، كه‌ پێت وایه‌ له‌ بێباوه‌ڕه‌كه‌ خاستریت؟ كێ مژده‌ی به‌هه‌شتی وێ داوی؟ كاری دیكه‌ت ده‌ست نه‌كه‌وت، ئه‌وه‌ نه‌بێت خۆت بكه‌یته‌ ده‌ست و چاوی دین و زمانی خوداوه‌نده‌؟

 

،،

جنێو زمانی شه‌یتانه‌، جامسوڵمانێك بیكات یان نامسوڵمانێك چاوه‌ڕێی ئه‌وه‌ نه‌بیت خوای گه‌وره‌ له‌سه‌ر ئه‌م فڵته‌فڵته‌ت پاداشتت بداته‌وه‌، له‌به‌ر ئه‌وه‌ی وابزانێت  به‌حسابی خۆی به‌رگری له‌ئاینه‌كه‌ی خوا ده‌كات.

 

 تۆ خۆت باریت به‌سه‌ر دینه‌وه‌، هه‌موو ئایینه‌كان بانگه‌شه‌یان بۆ پاككردنه‌وه‌ی مرۆڤایه‌تی له‌ خووی خراوی وه‌ك ئه‌وانه‌ی تۆ كردووه‌، چۆنه‌ تا ئێستا ئه‌مه‌ت نه‌زانیوه‌ و هه‌ر سووری له‌سه‌ر ئه‌وه‌ی جنێوه‌كانی تۆ گه‌وهه‌رن و جنیوی بێباوه‌ڕان ته‌نه‌كه‌ن؟

 چۆنه‌ وا ده‌زانیت خودا له‌سه‌ر ئه‌و فڵته‌فڵت و قسه‌ بێسه‌روبه‌رانه‌ت خه‌ڵاتت ده‌كات؟ تۆ كه‌ هێشتا نازانیت ماڵی جوانی ڕووی به‌ كام لاوه‌یه‌ و به‌ زمانی شه‌یتان ده‌دوێیت، بۆ ده‌بێت ئێمه‌ به‌ نوێنه‌ری ڕه‌حمانت بزانین؟ ئه‌دی مه‌گه‌ر به‌نده‌كانی ڕه‌حمانێ، زمانی خۆ له‌ خراوگوتن ناگرنه‌وه‌ و به‌ سڵاوكردن خۆ له‌ نادانان نابوێرن و به‌ بێده‌نگی به‌ لای فڵته‌فڵتدا ڕه‌ت نابن؟

  (وَعِبَادُ الرَّحْمَٰنِ الَّذِينَ يَمْشُونَ عَلَى الْأَرْضِ هَوْنًا وَإِذَا خَاطَبَهُمُ الْجَاهِلُونَ قَالُوا سَلَامًا 63..... وَالَّذِينَ لَا يَشْهَدُونَ الزُّورَ وَإِذَا مَرُّوا بِاللَّغْوِ مَرُّوا كِرَامًا 72). سورة الفرقان تۆ خۆت له‌ زومره‌ی ئه‌و نادانانه‌ی كه‌ ده‌بێت خه‌ڵكی باش به‌ لاتدا تێپه‌ڕ ببن و ئاوڕت وه‌سه‌ر نه‌ده‌نه‌وه‌، كه‌چی خۆتت لێ گۆڕاوه‌ و وا ده‌زانیت خودا جگه‌ له‌ تۆ كه‌سی دیكه‌ی نییه‌ و پێویستی به‌ جنێوه‌ مزره‌كانی جه‌نابته‌، بۆ ئه‌وه‌ی پێگه‌ی له‌ق نه‌بێت! (قُلْ هَلْ نُنَبِّئُكُم بِالْأَخْسَرِينَ أَعْمَالًا 103 الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا 104). سورة الكهف إن في ذلك لعبرة!

 

author photo

تایبه‌ت به‌ دیپلۆماتیك