چیی له‌گه‌ڵ فه‌رهاد پیرباڵ بكرێت؟

چیی له‌گه‌ڵ فه‌رهاد پیرباڵ بكرێت؟

724 خوێندراوەتەوە

د. هێمن خورشید

هه‌ركه‌سێك له‌م وڵاته‌دایه‌ و كه‌مێك هۆشی به‌ شتاندا ده‌شكێت، خه‌ریكه‌ كاره‌ سه‌یر و كتوپڕه‌كانی دكتۆر فه‌رهاد پیرباڵ مێشكی داگیر ده‌كه‌ن و لێی ده‌بنه‌ مه‌ته‌ڵ.

 

،،

بۆ ئه‌وه‌ی خوێندنه‌وه‌یه‌ك بۆ كه‌سایه‌تی و هۆكاری كاره‌كانی پیرباڵ بكه‌ین، پێویسته‌ له‌نزیكه‌وه‌ بیدوێنین و بزانی فه‌رهاد نه‌خۆشی ده‌رونی هه‌یه‌ یان ته‌نها ڕه‌فتاری خۆیه‌تی و موماره‌سه‌ی حه‌زو ویسته‌كانی خۆی ده‌كات.

 

 

ئایا پیرباڵ ئه‌م كارانه‌ بۆ ده‌كات؟

 

ده‌یه‌وێت به‌م ئیشانه‌ چیی به‌ ده‌وروبه‌ر بگه‌یه‌نێت؟ ئه‌و كه‌ له‌ چه‌ندین بواری جوداجودادا نووسین و توێژینه‌وه‌ی هه‌ن و ساڵانێكی زۆر مامۆستای زانكۆ بووه‌ و كاری باشی به‌رچاو و دیارن.

 

ئێستا بۆ وا له‌پڕ گۆڕاوه‌؟

 

 هۆی چییه‌ خۆی ڕووت ده‌كاته‌وه‌ و جنێو و په‌لامار ده‌دات و خۆی به‌ لێدان ده‌دات، گاهێ ده‌چێته‌ نێو به‌رنامه‌ی ڕاسته‌وخۆی كه‌نالێكی ئاسمانییه‌وه‌ و گاهێ له‌ ڕێی كردنه‌وه‌ی به‌رنامه‌ی ڕاسته‌وخۆی ئه‌كاونته‌كه‌ی فه‌یسبوكییه‌وه‌، ده‌سه‌ڵاتداران جنێو باران ده‌كات.

 

 

 

 

  به‌ ماشێنه‌وه‌ خۆی ده‌كاته‌ نێو باڵه‌خانه‌ی به‌ڕێوه‌به‌رایه‌تیی په‌روه‌رده‌دا و دواجاریش ئاگر له‌ ناوه‌ندێكی وه‌شانی كتێب به‌ر ده‌دات؟ ئایا ئه‌و كارانه‌ ئه‌نجامی تێكچوونی پیرباڵن یان هه‌ر سروشتی خۆی وایه‌ و حه‌زی له‌ پشێوینانه‌وه‌ و فه‌رته‌نه‌یه‌؟ ئه‌ی ئایا ئه‌وه‌ی ئه‌و پیاوه‌ ده‌یكات.

 

  له‌ ڕووی یاساییه‌وه‌ چۆن ده‌كه‌وێته‌وه‌ و ده‌بێت چۆنی مامه‌ڵه‌ له‌ته‌كدا بكرێت؟ له‌م لایشه‌وه‌، ئایا بێده‌نگیی ده‌سه‌ڵاتدارانی هه‌ولێر به‌رانبه‌ر به‌ دكتۆر فه‌رهاد، نیشانه‌ی ڕێزگرتن له‌ ئازادیی ڕاده‌ربڕین و خۆبه‌یانكردنه‌ یان شتێكی تر؟ ئه‌گه‌ر شتێكی دیكه‌یه‌، ئه‌و شته‌ چییه‌ و مه‌به‌سته‌كانی پشتی چین؟

 

 به‌نده‌ نه‌ ده‌توانم و نه‌ مافم هه‌یه‌، له‌ مینبه‌رێكی گشتییه‌وه‌، دۆخی ده‌روونیی پیرباڵ هه‌ڵبسه‌نگێنم، له‌به‌ر دوو هۆ: منیش وه‌ك ئه‌ودوای خه‌ڵكه‌كه‌، ته‌نیا له‌ دووره‌وه‌ ئاگاداری هه‌ڵسوكه‌وته‌كانی ناوبراوم و له‌ دووریشه‌وه‌ هیچ شتێك ڕوون نابێته‌وه‌.

 

 

 

 

دووه‌م: له‌ ڕووی یاساكانی ده‌روونپزیشكییه‌وه‌، هیچ پزیشكێك بۆی نییه‌ ده‌ردی كه‌سێك ده‌ستنیشان بكات كه‌ خۆی یان كه‌سوكاری وه‌ها داوایه‌كیان لێی نه‌كردبێت یان به‌ مه‌به‌ستی چاره‌سه‌ر نه‌هاتبێت -نه‌هێنرابێت-ه‌ لای، له‌ باری هاتنی كه‌سێكیشدا بۆ لای، ئه‌گه‌ر ده‌ركه‌وت كه‌سه‌ نه‌خۆشییه‌كی ده‌روونییشی هه‌یه‌، دیسان پزیشك بۆی نییه‌ ڕازی نه‌خۆشیی كه‌سێك له‌ شوێنێكی گشتیدا بڵاو بكاته‌وه‌.

 

 ئه‌و په‌ره‌گرافه‌ی سه‌ره‌وه‌م بۆیه‌ نووسی، تا كه‌س پرسیاری له‌و جۆره‌م ئاراسته‌ نه‌كات. دوو خاڵ جێی له‌سه‌روه‌ستانن:

 

یه‌كه‌م: خه‌ڵك به‌گشتی و ئه‌وانه‌ی خۆیان به‌ خوێنده‌وار و ئه‌وانه‌یشی خۆیان به دژه‌ده‌سه‌ڵات ده‌زانن به‌تایبه‌تی، له‌گه‌ڵ بڵاوبوونه‌وه‌ی هه‌ر ڤیدیۆیه‌كی نوێی فه‌رهاددا، وه‌ك هه‌نگیان له‌ كلۆره‌ داردا دۆزیبێته‌وه‌.

 

 

،،

مامه‌ڵه‌ی پارتی ده‌ستڕۆیشتووی سنوری زۆنی زه‌رد، جێی پرسیار و تێڕامانه‌، چونكه‌ ئه‌وه‌ی ته‌نها له‌ماڵی خۆیه‌وه‌ بكۆكێنێ دوای چه‌ند سه‌عاتێ چوار ده‌وری ده‌گرن، ئه‌وه‌ خێره‌ بۆ ئه‌م دكتۆره‌ هیچ ناڵێن؟!

 

  ده‌گه‌شێنه‌وه‌ و پێی پێده‌كه‌نن و گرته‌ ڤیدیۆییه‌كان بۆ یه‌كتر ده‌نێرن و له‌سه‌ر ئه‌كاونته‌كه‌یشی كۆمێنت ده‌نووسن و هانی ده‌ده‌ن و ده‌ستخۆشیی لێ ده‌كه‌ن تا زیاتر بكات!

 

 بنیاده‌م نازانێت له‌ هه‌مبه‌ر وه‌ها دیارده‌یه‌كدا چ هه‌ڵوێستێكی هه‌بێت؟ حه‌شاماتی گه‌لێك چه‌پڵه‌ بۆ كه‌سێك لێ ده‌ده‌ن كه‌ خۆیشیان به‌ كاره‌كانی پێده‌كه‌نن؟ ناوی چی له‌مه‌ بنێین؟

 

 دووه‌م: ده‌سه‌ڵاتدارانی زۆنی زه‌رد، كه‌ بنیاده‌م ئه‌گه‌ر له‌ ماڵی خۆیشیدا بكۆكێت و ده‌نگی كۆكه‌كه‌ی وه‌ك ناوی یه‌كێكی سه‌ر به‌ بنه‌ماڵه‌ی ده‌سه‌ڵاتدار بێته‌ به‌رگوێ، له‌ دوو سه‌عاتدا ده‌وری ماڵه‌كه‌ی ده‌ده‌ن و شوێنبزری ده‌كه‌ن، خێره‌ به‌رانبه‌ر پیرباڵ، كه‌ شه‌و و ڕۆژ جنێو به‌ هه‌ندێ ڕه‌مزی ئه‌و بنه‌ماله‌یه‌ ده‌دات، بوون به‌ كه‌ڕه‌ی شه‌ربه‌ت؟!

 

 

 

 

  به‌ ڕای من، ئه‌گه‌ر ئێمه‌مانان گوێ له‌ ڕامان بگیرێت، حكوومه‌ت له‌سه‌رییه‌تی ئه‌م هه‌نگاوانه‌ بگرێته‌ به‌ر:

 

یه‌كه‌م: به‌ شێوه‌یه‌كی نه‌رمونیان، دكتۆر فه‌رهاد پیرباڵ ببردرێت له‌ جێگه‌یه‌كی هێمن و دوور له‌ ژاوه‌ژاو و دوور له‌ كامێرا و میدیادا دابنرێت، ڕێزی لێ بگیردرێت و شوێنی حه‌وانه‌ی بۆ دابین بكرێت و چاوه‌ڕوانی هه‌نگاوی داهاتوو بكرێت.

 

 دووه‌م: لیژنه‌یه‌كی پزیشكی له‌ سێ پزیشكی ده‌روونی و دوو پزیشكی ده‌مارزانیی كارامه‌ و خودانمتمانه پێك بهێنرێت و دكتۆر فه‌رهاد پیرباڵی پیشان بدرێت، ئه‌گه‌ر ده‌ركه‌وت پیرباڵ نه‌خۆشه‌ و نه‌خۆشییه‌كه‌ی ده‌ستنیشان كرا، ئه‌وا وه‌ك نه‌خۆشێك مامه‌ڵه‌ی له‌ته‌كدا بكرێت، سه‌ره‌تا داخلی نه‌خۆشخانه‌یه‌ك بكرێت و ده‌ست به‌ پێدانی چاره‌سه‌ر بكرێت، تا ورده‌ ورده‌ دێته‌وه‌ سه‌ر خۆی و چاك ده‌بێته‌وه‌.

 

 

 

 

 -ئه‌گه‌رچی ده‌زانم، گرفتی سه‌ره‌كیی له‌م دۆخه‌دا ئه‌وه‌یه‌، تا ئه‌م ساته‌، نه‌ خه‌ڵكی ئێمه‌ له‌ زانستی ده‌روونپزیشكی تێگه‌یشتوون و نه‌ ده‌سه‌ڵاتداران. خه‌ڵك نه‌خۆشیی ده‌روونی وه‌ك جنێو حاڵی بوون و وا ده‌زانن كاتێ پزیشك به‌ كه‌سێك ده‌ڵێت تووشی نه‌خۆشی ده‌روونی بووه‌، ئه‌وا ڕقی لێیه‌تی و ده‌یه‌وێت ناشیرینی بكات!

 

 - ئه‌گه‌ر ده‌ریش كه‌وت نه‌خۆش نییه‌ و له‌ خۆڕا ماڵی خه‌ڵك ده‌سووتێنێت و پشێوی ده‌نێته‌وه‌، ئه‌وا به‌گوێره‌ی یاسا مامه‌ڵه‌ی له‌گه‌ڵدا بكرێت. ئاخر ناكرێت كه‌سێك ته‌نیا له‌به‌ر ئه‌وه‌ی نووسه‌ره‌ یان مامۆستای زانكۆیه‌، ئیتر ده‌ستی كراوه‌ بێت هه‌رچییه‌كی پێ خۆش بوو بیكات!

 

 

 

  ئه‌مه‌ سه‌ر ده‌دات بۆ هه‌ركێبۆخۆیی و تێكچوونی شیرازه‌ی كۆمه‌ڵگه‌. ئه‌گه‌ر ڕێگه‌ بدرێت كێ چیی ویست بیكات، ئه‌و وه‌خت حكوومه‌ت و یاسا و دادگا چ واتایه‌كیان ده‌مێنێته‌وه‌ و بۆ چ باشن؟

 

  بابه‌ته‌كه‌ له‌وه‌ی نووسراوه‌ ئاوكێشتره‌، ده‌ستی ئێمه‌یش له‌وه‌ی نووسراوه‌ كراوه‌تر نییه‌. بۆیه‌ ئه‌گه‌ر تینوێتیتان نه‌شكاوه‌، هه‌وڵ بده‌ن له‌ دۆخه‌كه‌ تێبگه‌ن.