بە " وێنە " کردنی گۆڕی بە کـۆمەڵ

بە " وێنە " کردنی گۆڕی بە کـۆمەڵ

444 خوێندراوەتەوە

 بێجگە لە توێژێکی کەم، دەمێکە بەشێکی زۆر لە خەڵك تاقەتی باس کردنی "ئەنفال" و کۆمەڵکوژی نەماوە لەبەر هۆی جیاواز. یەکێك لە هۆکارەکان ئەوەیە کە ئینتیما بوون بۆ سیاسەت و پرەنسیب و ئامانجە بەرزەکان توایەوە لە نێو وون بوونێك لە نێو قەیرانە سیاسی و ئابوریە موزمینەکانی دەسەڵاتی ناسیۆنالیزم، کێشەی شوناس بەرەو شەقاربوونی نادیار ڕۆیی.

 

،،

ئێستا تەکنەلۆژیا جێ ی بە "مەراسیمی جەماوەریی فراوان" لەق کرد و "وێنە" شوێنی گرتەوە لە نێو جەماوەرو حەشامەتێکی گەورەی ڕەمزیی نێو سۆشیال میدیا.

 

 لە بەرامبەر حیزبە ناسیۆنالیستەکان بە گشتی توێژێك هەیە ئۆپۆزسیۆنی یان بەشێك لە ناسیۆنالیزمە، یان بە ڕێژەیی لایەکی لەم ناسیۆنالیزمە قبوڵە. ئەم توێژە ڕاستە لە گەڵ دۆزینەوەی گۆڕی بەکۆمەڵ بە زمانی ناسیۆنالیزم نادوێ، بەڵام بە زمانی مامەڵەی "وێنەیی" ئەم دۆزینەوەیە بژار دەکا.

  گونجاوترین وێنە دەکات بە بابەتێکی ئەدەبی، ویژدانیی، تەنانەت شەخسی چەشنی دەربڕینی سۆزی مرۆیی چەشنی گریان لەبەرامبەر پاشماوەی جل و ئێسقانی قوربانیەکان، هەموو ئەم هەڵس و کەوت و پەرچەکردارنە ئاسایین و تەعبیر لە ڕاستگۆیی کەسەکان دەکات.

 

 

 

 بەڵام، مامەڵەی وێنەیی هەمیشە هەڵگری دووڕەهەندی دژ بە یەکە، کەم نین ئەو کەسانەی لەو باوەڕەن کە ساتی بە "وێنە" کردن، ساتی ئیبراز کردنێکی کاتیە، تیشکێك دەخاتە سەر کارەسات یان بۆنە یان پارچەیەك لە مێژوو دواتر هەر ئەم وێنەیە دەبێتە ڕۆتین و ناوەڕۆك وبوعدەکانی تری دەکوژێت.

  ڕەهەندی دووەم پۆزەتیڤانە لۆژیکی دۆکیۆمێنت کردنی لە پشتەو وەکو بەڵگەی یاسایی و مرۆیی و مێژوویی سودی لێ دەبینرێ . لە کوردستان؛ لە چارەکە سەدەیەك زیاتری فەرمانڕەوایی ناسیۆنالیزمی کورد میکانیزمی "بۆنەسازی" لە شیوەن و یادی سەرکردەکان و بۆنە قەومیەکان و ئایکۆنە پیرۆزکراوەکاندا "وێنە" بووە بە کارگەیەکی خاڵیی کردنەوەی بەهاکانی پشتی هەموو ئەو شتانەی "وێنەیان" دەگیرێت.

 

 

 

  چونکە سیستەمێکی ئایدیۆلۆژی گەورە سنوری مامەڵەی وێنەیی دیاریکردووە کە زیاتر نزیکە لە هەمان میتۆدی "پڕۆپاگەندەی" کاتیی، نزیکە لەبزنسی هەواڵسازی، هەندێ جاریش نزیکە لە خاڵیی کردنەوەیەکی لیبرالیانەی نوقم بووی زاتی.

 ئەم سیستەمە خەریکە هەموو نوزەیەك دەبڕێ لە هەموو نیازە پاکەکانی مامەڵەی وێنەیی بە تایبەتی ئەگەر بە ووریایی مامەڵەی لە گەڵ نەکرێت، کەیسی ئەنفال لەنەوەدەکان وامان دەزانی ئەجێندایەکی زۆر گەورەی ئیلتیزامی کۆمەڵگەی ئێمەیە.

 

  

  

ئێستا کە ئاوڕ لە نەوەدەکان دەدینەوە بە ئاشکرا دیارە کە ئیلتیزامەکە گەورە نەبوو بەڵکو بالۆنی "بۆنەسازی" و "پروپاگاندەی سوود پەرست" قەبارەکەی سەدان جار گەورەتر بوو لە ئیلتیزامەکە!

 ئێستا تەکنەلۆژیا جێ ی بە "مەراسیمی جەماوەریی فراوان" لەق کرد و "وێنە" شوێنی گرتەوە لە نێو جەماوەرو حەشامەتێکی گەورەی ڕەمزیی نێو سۆشیال میدیا، بەڵام میتۆدەکە بە دەست لێنەدراوی لە شوێنی خۆی ماوە ئەویش بەشی زۆری کوشتنی ناوەرٶکە لە ژێر ڕەحمی کاتی کورت، تا شتێکی دێتە پێشەوەو وێنەی شتی تازە شوێن بە وێنەکانی "گۆڕی بە کۆمەڵ " لەق دەکەن.