میكانیزمی هەڵبژاردنی خانەی ڕاپەڕاندن ناڕازیەكانی ناو گۆڕان ئاوت دەكات

گۆڕان، خانەی ڕاپەڕاندن بە پاسەوانە كۆنەكان هەڵدەبژێرێتەوە

میكانیزمی هەڵبژاردنی خانەی ڕاپەڕاندن ناڕازیەكانی ناو گۆڕان ئاوت دەكات

1097 خوێندراوەتەوە

جڤاتی نیشتیمانی بزوتنەوەی گۆڕان بڕیاریدا بە هەڵبژاردنی ڕێكخەر و خانەی ڕاپەڕاندن لە 14 ی ئەیلولی داهاتوو، بەڵام كۆنفرانسی گشتی دوادەكەوێت بۆ كۆتاییەكانی ئەمساڵ.

 

بەپێی ئەو بڕیارەی جڤاتی گشتی بێت بزوتنەوەی گۆڕان، رێكخەر و خانەی ڕاپەڕاندن لەلایەن جڤاتی نیشتیمانیی ئێستاوە هەڵدەبژێردرێن لەبری ئەوەی جڤاتی نیشتیمانی نوێ‌ بەو ئەركە هەڵبسێت.

بزوتنەوەی گۆڕان لە 25/7/2009 لەلایەن نەوشیروان مستەفا و هاوڕێكانییەوە دامەزرا .

،،

گۆڕان، ویستى بە گۆڕینى ناوى ئۆرگانەکانى حزب خۆى دوور بخاتەوە لە حزبى تەقلیدى.

 

گۆڕان لەسەرەتادا بزوتنەوەیەكی جەماوەری بوو تا حیزبێكی سیاسی، هەر لەبەر ئەوەش پێویست بوو لە قۆناغەكانی دواتردا لە چوارچێوەی حیزبێكی سیاسی خاوەن پەیڕە وپرۆگرمی تایبەتدا خۆیان رێكبخەن.

نەوشیروان مستەفا بۆخۆی ئۆرگان و پۆستە حیزبیەكان و ناوەكانیانی داڕشتەوە بەجۆرێك كە جیاواز بێت لەو ئۆرگان و پۆست و ناوانەی كە لەحیزبیە كوردیەكانی دیكەدا هەبوو. بەنمونە لەبری سەرۆك و سكرتێر رێكخەر و لەبری مەكتەبی سیاسی خانەی راپەڕاندن و لەبری سەركردایەتی جڤاتی نیشتیمانی و لەبری ئەنجومەنی گشتی جڤاتی گشتی و لەبری مەڵبەندو لق مەكۆ و لە بەرامبەر كۆمیتەكان بازنە و رایەڵەی دانا.

 
لەساڵی یەكەم كۆنگرەی بزوتنەوەی گۆڕان سازكرا كە لەسەر راسپاردەی ئەو، ناو نرا كۆنفرانسی نیشتیمانی.
ئامانجی نەوشیروان مستەفا لە گۆڕینی ئەو ناوانە ئەوەبوو كە لە رابردودا ئەو ناوانە لای خەڵك بێزراو بون و باوەڕی وابوو كە پێویستە شتێكی نوێ‌ دروست بكات كە دابڕاوبێت لە نەریتەكۆنەكانی حیزبی كوردی بەتایبەتی پارتی و یەكێتی.

 

،،

نەوشیروان موستەفا، دەستورى گۆڕانى بۆ دواى خۆى نوسیبوو، چونکە تاکو مرد پابەند نەبوو پێوەى.

 


نەوشیروان مستەفا هەر لەسەرەتاوە هەیكەلێكی رێكخستنی ئاسۆیی دانا بۆ بزوتنەوەی گۆڕان. بەپێچەوانەی رێكخستنی حیزبەكانی دیكەوە كە شێوەیەكی ستونی و هەرەمیان هەبوو.
بەڵام نەوشیروان مستەفا بەپێی دەستوری بزوتنەوەكە هەڵبژاردنەكانی رێكخەر و جڤاتی نیشتیمانی و گشتی لە كۆنفرانسی گشتییەكان دورخستتەوە و كۆنگرەی كرد بە تەنها شوێنی موناقەشەی پەیڕەو لەبری دەسكاریكردنی هەیكەلی حیزب و هەڵبژاردنی سەركردایەتیەكەی.

نەوشیروان مستەفا باوەڕی وابوو لەبەر ئەوەی كە كۆنگرەی حیزبەكان شوێنی هەڵبژاردنی سەركردایەتی نوێییە بۆیە هەمیشە كێشەكان لە كۆنگرەكاندا دەتەقنەوە و بەو هۆیەشەوە حیزبی كوردی ناوێرێت كۆنگرە بكات.

 

نەوشیروان مستەفا بەم هەنگاوەی ویستی حیزبەكەی لە تەقینەوەی بەرمیللە باروتی كۆنگرە و باڵباڵێنی ناو كۆنگرە بپارێزێت.
لەبری ئەمە شێوازێكی دیكەی پەیڕەوكرد كە بریتیی بوو لە هەڵبژاردنی سەركردایەتی حیزبەكە لە رێگەی كۆنفرانسە ناوخۆییەكان و بەرپرسی ژور و سەرۆك فراكسیۆنەكانەوە.
پێكهاتەی سەركردایەتی گۆڕان بەجۆرێكە كە ئەندامانی خانەی راپەڕاندن و باژێڕوانەكان و بەرپرسی ژورەكانی بزوتنەوەكە و سەرۆكی فراكسیۆنەكانی گۆڕان و بەرپرسە پلەباڵاكانی حكومەت دەبنە ئەندامی جڤاتی نیشتیمانی.
بەپێی ئەم هەیكەلە تەنها باژێڕوانەكان بە هەڵبژاردنی ناوخۆیی شارەكانیان دەهاتنە پێشەوە و سەرجەم ئەندامەكانی دیكە دانراو یان تەعین بوون.
تائێستا یەكێك لە كەموكوڕیەكانی دەستوری گۆڕان بریتییە لە شێوازی دانانی بەرپرسی ژورەكان كەراستەووخۆ دەبنە ئەندامی جڤاتی نیشتیمانی.
ئەمانە كێ‌ دایان دەنێت رێكخەری گشتی یان رێكخەری ژورەكان؟ ئەمانە لەسەر چ بنەمایەك دادەنرێن یان لادەبرێن؟

نەوشیروان مستەفای رەحمەتی هەتا خۆی لەژیاندابوو بەشێكی گەورەی دەستوری گۆڕانی جێبەجێنەكرد، ئەوەش نیشانی دەدا كە ئەو دەستورەكەی بۆ سەردەمی خۆی نەنوسیبوو بەڵكو بۆ سەردەمی دوای خۆی نوسیبوو.
بە نمونە هەتا خۆی لەژیاندابوو خانەی راپەڕاندن هەڵنەبژێردرا.

لە دوای كۆچی دوایی نەوشیروان مستەفا و هەڵبژاردنی خانەی راپەڕاندن و هەڵبژاردنی رێكخەرێكی نوێ‌ بۆ بزوتنەوەكە وردە وردە كێشە ناوخۆیەكانی بزوتنەوەكە تەقینەوە.
راستە گۆڕان سەركەوتوبوو لەوەدا كە بەماوەیەكی كەم خانەی راپەڕاندن و رێكخەری هەڵبژارد بەڵام ئەم بابەتەش هەروا بێ‌ كێشە نەبوو. تەنانەت زۆربەی كێشەكانی ناو بزوتنەوەی گۆڕان لەدوای هەڵبژاردنی خانەی راپەراندن و رێكخەرەوە سەریهەڵدا.

،،

دواى مردنى نەوشیروان موستەفا و تەقینەوەى کێشەکان، لەبرى چارەسەر، دەنگە نارازییەکان ناچار بە دەرکردن کران.

 
گەورەترین شكستی خانەی راپەڕاندن و رێكخەری نوێ‌ بەتەنها ئەوە نەبو كە دوو هەڵبژاردنیان دۆڕاندوو نیوەی دەنگەكانی بزوتنەوەكەیان لەدەستدا،بەڵكو شكستی گەورە ئەوەبوو كە لەسەردەستی ئەوان بزوتنەوەی گۆڕان لەیەكتراز و لانی كەم دابەشبوو بۆ دوو بەرەی سەرەكی گۆڕانی گردەكە و بەرەی نارازییەكان.
كە لەچەندین سەركردە و هەڵسوڕاوی دیاری بزوتنەوەكە پێكدێن.
كاتێكیش ناكۆكیەكان قوڵ بونەوە، لەبری گەڕان بەدوای چارەسەر و پاراستنی یەكڕیزی هەڵسوڕاوە ناڕازیەكان دەركران و ناچار بە بەجێهێشتنی گردەكە كران تا ئەو ئاستەی بەتواوی پاكیان كردنەوە.

لەناو ئەم هەموو كێشمەكێشەدا جڤاتی نیشتیمانی كە سەركردایەتی حیزبەكە و خاوەنی بڕیاری سیاسییە بەپێی دەستوری بزوتنەوەكە نەیتوانی رۆڵی خۆی بگێڕێت لە نەترازانی بزتنەوەكەدا، بەڵكو خۆیان بونە بەشێك لە ململانێكان و ئەوانەشی نارازی بون كۆبونەوەكانی جڤاتیان بەجێهێشت و دەستیان لەكاركێشایەوە.
تەنها ئەوانە مانەوە كە لایەنگری رێكخەر و خانەی راپەڕندن و باس لەوەش دەكرێت بەشی زۆری ئەمانە بە بەڵێنی وەرگرتنی پۆست لە كابینەی حكومەت رازیكرابێتن.
بەپێی زانیاریەكانی دیبلۆماتیك لە كۆی 46 ئەندامی جڤات 29 كەسیان سیڤیان بۆ پۆستەكانی جێگری وەزیر و راوێژكار و بەڕێوەبەری گشتی پڕكردۆتەوە.
لەم دۆخەی ئێستادا جڤاتی نیشتیمانی نەك ناتوانێت چاودێر بێت بەسەر خانەی راپەڕاندنەوە بەڵكو بەتواوی لەژێر كۆنترۆڵ و هەیمەنەی خانەی راپەڕندن و رێكخەر و ناوەندەكانی بڕیاردان لەناو بزوتنەوەی گۆڕان.

 
هەربۆیە هەڵبژاردنەوەی خانەی ڕاپەڕاندن و رێكخەر لەسایەی ئەم جڤاتی نیشتیمانیەی ئێستادا كە گروپی ناڕازیەكانی تێدا تەسفییە كراوە جگە لە بەیعەتدانەوە بە خانەی راپەڕاندن و رێكخەری ئێستا هیچی دیكە نییە.
تەنها ئەو گۆڕانكارییەی دەكرێت ئەوەیە جێگاكەی عوسمانی حاجی مەحمود و حەمە تۆفیق بە دوو كەسی دیكە لە گەنجەكانی نزیك لە ماڵی كاك نەوشیروان پڕدەكرێتەوە و ئەوەش هەموو گۆڕانكاریەكە دەبێت.
ئەمەش بەمانای دەركردنی یەكجارەكی ناڕاییەكان و داخستنی دەرگای گفتوگۆ و ئاشتبونەوە دێت لەگەڵیاندا.

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری