ئێـمە سەرەتامانەو عەرەب كۆتاییانە

ئاڵا وەك كاڵا

ئێـمە سەرەتامانەو عەرەب كۆتاییانە

679 خوێندراوەتەوە

ئاڵای كورد لە كەركوك هەڵكراو پاشان لابرا، گەشییارە كوردەكان لەسەر ئاڵا دیپۆرتكرانەوە، پەرلەمانتارێكی كورد لەسەر ئاڵا لە پەرلەمانی عیراق دەیكاتە شەر، گەنجیك لەسەر ووشەی كوردستان تێزی دكتۆراكەی جێهیشت.

 

،،

هەبوونی ئاڵا و نیشتمان و زمان ئەمانە بوونی سروشتین و بنەماكانی دروستبوونی نەتەوەیەكی لەسەر بنیات نانرێت، بەڵكو هۆشیاری بە خود و بوونی مەعریفەیەكی تۆكمە كە لە نەتەوەكانی ترت جیا بكاتەوە دەتكاتە نەتەوە.

 

 

 هەموو ئەمانەو چەندین هەواڵیتر لە پەیوەست بە مەسەلەی ئالای كوردەوە هەر هەمووی سروشتی رووكاری دەرەوەی كۆمەڵە خەلكێكن پییان ئەوتریت كورد، لەوانەیە بەلاتانەوە سەیر بێت كە دەڵیم كۆمەڵە خەڵكێك و لەباتی ئەوە وشەی نەتەوەم بەكارنەهینا بۆ كورد، چون لەمنەوە وا دەردەكەوێت كورد هەر بە سروشت نەتەوەیە نەك بە بوون.

 

هەبوونی ئاڵا و نیشتمان و زمان ئەمانە بوونی سروشتین و بنەماكانی دروستبوونی نەتەوەیەكی لەسەر بنیات نانرێت، بەڵكو هۆشیاری بە خود و بوونی مەعریفەیەكی تۆكمە كە لە نەتەوەكانی ترت جیا بكاتەوە دەتكاتە نەتەوە، ئەم لە ناو كورددا هێشتا تۆوی خۆی نەچاندووە گەر تۆوەكەش هەبێت خاكەكەی ناتوانێت ئەو تۆوه‌ سەوز بكات، چون پێووستی بە گۆرینی خاكەكەی هەیە، واتە گۆرینی ئەو زەمینە و عەقلیەتەی كە سەدان ساڵە كورد ئەبات بەڕێوە لە هەمبەر بۆچونیان بۆ چەمكی شۆڕش، ئەم عەقڵیەتە نەگۆڕیت سەرلەبەری ئەو تۆوە لەباردەچێت كە دەیەویت شۆڕش لە مەفهومێكیتر و بە خەباتیكیتر و لە رێبازیكی تردا درێژە پێبدات.

 

 

 

 لێرەدا دەوەستم و دەمەوێت ئەوە بڵیم كیشەی ئاڵا كێشەی نەتەوەیەك نییە، چونكە نەتەوە بوونی نییە تا كیشەیەكی هەبێت بە ناوی ئاڵا بەڵكو كێشەی ئاڵا كێشەیەكە پەیوەندی بە فرۆشتنی كاڵاوە هەیە، واتە ئەوانەی ئەیانەوێت كێشەی ئاڵا بكەنە كێشەیەكی نەتەوەیی، لە بناغەدا كێشەكە پەیوەندی بە كڕینەوەی ئایدۆلۆژیاكانی خۆیانە بۆ سەلماندنی بوونی خۆیان، كە ئەو سەلماندنە ئه‌وه‌نده‌ى پەیوەندی بە حاڵەتێكی سایكۆلۆژییەوە هەیە ئەوەندە پەیوەندی بە مەعریفەیەكی پاك و بێگەردەوە نییە كە مرۆڤ خۆی لەسەر بنیات بنێت.

 

 

 

 

كورتەی قسە ئەوەیە كێشەی ئاڵاو ورژاندنی سۆزی كوردایەتی لەلایەن ئیسلامی دژ بە شیعەی عیراق و عه‌لمانی دژ بە سوننەی توركیا دەرخەری ئەو راستییەن كە هێشتا کورد لە ناو مێژووی کوردایەتیدا گیرۆدەی ئایدۆلۆژیای رابردووی خۆیەتی، دەرگای جیهانبینی نوێی بە ڕووی خۆیدا داخستووەو پەردەیەكی لە نێوان خۆی‌و هەقیقەتدا دروستكردوەو ئەشكەوتەكەی سوقراتی نەك جێنەهێشتوە بەڵكو سێبەری خۆشی لە ڕووناكی دەرەوە لە ناو ئەشكەوتەكەشەوە نەبینیوە.

 

،،

كورد ئەم گیرۆدەبوونەی لا بۆتە سەربەخۆی‌و ڕزگاربوون بەوەشەوە نەوەستاوە سەركردەكانی خۆی ناوناوە شۆرشگێڕ، بەڵام نازانن تاوەکو لەم بەندبوونە ئازاد نەبێ، ئەو سەربەخۆبوونە بەدی نایەت.

 

 ئەمە ڕاستیەكی تاڵە كە كورد بە عەقڵیەتی كوردایەتی خۆی، بەدەستی خۆی، خۆی بەندكردووەو سەركردە سیاسیەكانیش تا بێت ئەو قوفڵە توند ئەكەن، چونكە دەزانن كورد ئەو گیرۆدەبوونەی لا بۆتە سەربەخۆی‌و ڕزگاربوون بەوەشەوە نەوەستاوە سەركردەكانی خۆی ناوناوە شۆرشگێڕ، بەڵام نازانن تاوەکو لەم بەندبوونە ئازاد نەبێ، ئەو سەربەخۆبوونە بەدی نایەت.

مرۆڤ تا لەناخەوە سەربەخۆ بیرنەكاتەوە مەحاڵە بەسروشت بتوانێ ئازاد بێ، با خاك و ئاڵا و نیشتمانیشی هەبێت.

 ئەوانە هەمووی سروشتی مرۆڤن نەك بوونی مرۆڤ، تاكی كورد كاتێك بوونی دەخولقێ كە مەعریفەیەكی قووڵی جەوهەری لە خۆیا وەدی بێنێ، سەرەتای چاندنی ئەو مەعریفەیەش بە لابردنی خاكی بێپێزی كوردایەتی دەستپیدەكات، پاشان ئازادكردنی كورد كە بۆتە كۆیلەی ئاڵاو خاكەكەی تا چیتر لەو ڕێگەیەوە هەڵنەخەڵەتێنرێ و بە ئاقاری هەڵەدا نەبرێ.

 

 

 

ئیتر ئەو وروژاندنە سۆزگەراییە ئیسلامی بیكات، یا عەلمانی، بۆ ئیمە هیچ فەرقی نییە، چونكە هەردووكیان لەیەك سەرچاوەوه‌ ئاو دەخۆنەوە كە لای ئیمە زۆر لیخنە ئەویش ئەو سەرچاوە كوردایەتییەی كە چەندین سەدەیە كورد بە هەڵە ئاوی لێدەخواتەوە، ئەویش بینینی شۆرش لە لوولەی تفنگەوە كە لای من وەك بەردەكەی فەلەستین وایە زۆر ناڕوا.

 

ئەوەتا ئیسرائیل لە ڕێگەی عەقڵەوە بۆتە بەهیزترین وڵات لە بچوكترین وڵاتدا، عەرەبیش لەزۆرترین جوگرافیادا بوونەتە بێهیزترین وڵات لە دونیادا بەهۆی فەرامۆشكردنی هۆشیارییان‌و پەیوەستبونیان بەڕابردوو، بۆیە ئیمەو عەرەب یەك دەردمان هەیە، بەڵام ئێمە سەرەتامانەو عەرەب كۆتاییانە.