کەى قەرار بوو ژیان وا ناخۆش بێت؟

"نەخۆشخانەى هیوا ساڵانە پێشوازى لە ٤٠٠٠ نەخۆش دەکات"

کەى قەرار بوو ژیان وا ناخۆش بێت؟

482 خوێندراوەتەوە

 

ـ لە ڤیدۆیەکدا هاوڵاتییەک هاوار دەکات شوتى نەخۆین دەرمانى ژەهراوى پێوەیە، ئەندام پەرلەمانێک دەڵێت: وریابن بازرگانەکان هێلکەیەکیان هێناوە بەسەرچووە، باس لەوەش دەکرێت ئاوى پاڵفتەى کارگەکان رمڵ دروست دەکات، ئەمە جگە لەمانەش کە هەر رۆژەو جۆرە ماست و پەنیرێک قەدەغە دەکرێت.

 

ـ نازانى ئەمانەى باس دەکرێن، سیاسەت و ریکلامى بازرگانەکانە دژى یەک، یاخود بەشێکى زۆر لە فاکتى تێدایەو حکومەت و حزب سەرقاڵى یەکترن و ئاگادارى نین لە کۆمەڵگا چى دەگوزەرێت، بەڵام دواجار ریسکێک لەناخى هاوڵاتى دروست بووە کە هەر ئەویشە باجەکەى دەدات.!

 

،،

رۆژانە چەندان چیرۆکى ترسناک دەرەنجامى خواردنى پیس و بەسەرچوو رووبەرووى ئەم کوردستانە دەبێتەوە؟

 

ـ ئەگەر پەیوەندى بکەى بە لیژنەکانى قائیم قامییەتى سلێمانى ئەو چیرۆکە ترسناکانەت بۆ باس دەکەن (لە بوارى خواردەمەنى پیس و بەسەرچوو) کە شەوو رۆژ رووبەروویان دەبێتەوە، و ئەگەر لەگەڵ یەک دوو بەرپرس و ئەندام پەرلەمانى بێ دەسەڵات کە هێشتا ویژدانیان ئیش دەکات دابنیشیت، ئەوەت پێدەڵێن: کە رۆژانە چ زەهرێک دەکرێت بە گەرووى ئەم خەڵکەدا.

 

ـ ئاخر مەعقول نییە لەهەفتەیەکدا میوەو شیرەمەنى و ئاو و بەنزین و جۆرە برنج و رۆنێکت لێ قەدەغە بکەن کە رۆژانە هاوڵاتى پێویستى پێى دەبێت، ئەمە چ کارەساتێکى سامناکە روو دەدات؟ کەى قەرار بوو ژیانى تاکى کورد ئاوا بێ قیمەت بکرێت؟

 

ـ نەخۆشخانەى هیوا لە ساڵیادى نەخۆشى شێرپەنجەدا رایگەیاند: ساڵانە نەخۆشخانەکەیان پێشوازى لە ٤٠٠٠ هەزار نەخۆشى توشبوو بە شێرپەنجە دەکات، کاتێک بەرپرسە دەسەڵاتدارەکانیش وەڵامى ئەم پرسیارە خەماوییە دەدەنەوە زۆر بە ئازایانە و روو قایمانە دەڵێن: هێشتا هۆکارى سەرەکى شێرپەنجە دیار نییە..!

 

،،

 بریار بوو ژیانى تاکى کورد لەسایەى حکومەتى کوردى باشتر بێت لە چاو سەردەمى سەدام و بەعس.

 

 

ـ ئێمە بەدەستى خۆمان خەریکى کوشتنى خۆمان و کۆمەڵگاین، بەرپرسە دزو مافیاو چەتەکان چەندە تاوانبارن، هەندێ وردە تاجرو بەرپرسى نمرە دووش تاوانبارن کە بۆ ئەوەى لەرێگەى گەورەکانەوە دوو فلسیان دەست بکەوێت چاو دادەخەن لە ئاست هەموو نادادى و بەد ئەخلاقییەک کە دژ بە ژیانى رۆژانەى هاوڵاتى داماو دەکرێت.

 

ـ هاوڵاتى، پێش ئەوەى دەوڵەتى بوێت، ژیانى تەندروستى دەوێت، پێش ئەوەى حزب و حکومەتى بوێت .. دەیەوێت دڵنیا بێت ئەو شتانەى بەکاریان دەهێنێت ژیانى خۆى و منداڵەکانى بەرەو مەرگ نابات.

 

ـ کەى قەرار بوو ژیان ئاوا ناخۆش بێت لە سایەى حکومەتى کوردىدا؟، دەسەڵاتدارەکان شەرم ناکەن کە هاوڵاتى باس لە پاک و خاوێنى شیرەمەنى و خواردنى سەردەمى سەدام دەکات لە ساڵانى هەشتاکان؟  واتە ئێمە لەرووى تەندروستیشەوە هێشتا سی ساڵێک لەدواین؟!.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان