خیانـەت‌و ئەقڵی حیزب

خیانـەت‌و ئەقڵی حیزب

439 خوێندراوەتەوە

 ئومێد حەمە عەلی

بیرکردنەوە دەربارەی جەوهەرو واتای ئەم چەمکە پێویستی بە وریایی هزریی و قووڵبینیی‌و ئەخلاقی دیموکراسییانە هەیە لەداوەریکردنا، ئەمەش بۆ ئەوەیە لەلایەک تێگەیشتنمان بۆ خیانەت دووربخەینەوە لە حوکمی ئایدۆلۆژیی موتڵەق و میزاجی کەسی، یان دەستەجەمعیی، گروپی دیاریکراو و حیزبی، کە وادەکەن واتایەکی دیاریکراو و روون بۆ خیانەت نەمێنێتەوە.

 

،،

بۆ یەکلاکردنەوەی ململانێ و مانەوە بێ سڵەمینەوە حزبه‌كان خیانه‌ت ئەنجام دەدەن،  تەنانەت بە ئاشکرایی لەپرۆسەی خیانەتکردندا بەشداردەبن‌و خەریکی ماکیاژکردنی سیاسی خیانەتن و پاساو و ئەرگۆمێنتسازیی بۆ ئەکەن.

 

  دۆخی خیانەت لەکوردستان بەو ئاستە گەیشتووە، کە خەریکە بەتەواوی مانای خۆی لەدەستدەدات‌و دەبێتە چەک‌و ئامڕازێکی لاستیکی بەدەست گروپ و حیزبەکانەوەو هەرچۆن بەرژەوەندییان بیخوازێت بەو شێوەیە بەکاریی دەهێنن‌و لێکدانەوەی بۆ ئەکەن. 

 

  

 

 بەرئەنجامی ئەم شێواندنەی مانای خیانەت دوو شت دروستبووە:

یەک، خیانەت لە دیاردەیەکی بێزلێکراو و قەدەغەکراوی مێژووییەوە گۆڕاوە بۆ ڕێگایەکی پەنابۆبراوی حیزبی، بەشێوەیەک بۆ یەکلاکردنەوەی ململانێ و مانەوە بێ سڵەمینەوە ئەنجامی دەدەن.

 دوو، حیزب‌و هێزە سیاسییەکان لەم ماناشێواندنەی چەمکی خیانەتدا، زۆر ئاسان و تەنانەت بە ئاشکرایی لەپرۆسەی خیانەتکردندا بەشداردەبن‌و خەریکی ماکیاژکردنی سیاسی خیانەتن و پاساو و ئەرگۆمێنتسازیی بۆ ئەکەن.

 

،،

خیانەت و هەڵەکوشندە سیاسیی و نیشتمانییەکانی حیزبەکەی خۆت وەک حیکمەت‌و پێویستی مێژوویی‌و هۆکاریی پێشکەوتن و نیشانەی بەهێزیی گروپ و حیزبەکەت دەبینیت. 

 

 لەڕاستیدا ئەم حاڵەتە لەروویەکەوە هێمایە بۆ داڕووخانی تەواوەتی ئەخلاقی و پرەنسیپی سیاسی و ئینسانیش لە هێزە سیاسییەکاندا، چونکە بوونی ئەخلاق و پرەنسیپ و هۆشیاریی دژ بە فۆرمە جیاوازەکانی خیانەت ڕێگە بە دەرکەوتنی دیاردەکە نادات.

 لەدۆخی سیاسەتی حیزبیدا لە کوردستان، ناڵێم بەگشتی و بە موتڵەقی، بەڵام لەئاستێکی فراواندا خیانەت تەنیا لەچەند ئاستێکدا وەک خیانەت ڕەخنەی لێدەگیرێ و وەک خیانەت تەماشدەکرێت:

 

  یەکەم، لەکاتێکدا حیزبە رکەبەرەکەت خیانەتی ئەنجام دابێت، یان ئەنجامی بدات، ئەوە خیانەتەو تۆ وەک نوسەریی دژی خیانەت، وەک سیاسی دژی خیانەت، تۆ وەک چالاکوانی دژی خیانەت خۆت نیشاندەدەیت,

 بە پێچەوانەوە خیانەت و هەڵەکوشندە سیاسیی و نیشتمانییەکانی حیزبەکەی خۆت وەک حیکمەت‌و پێویستی مێژوویی‌و هۆکاریی پێشکەوتن و نیشانەی بەهێزیی گروپ و حیزبەکەت دەبینیت. ئەمە جیا لەوەی ئاماژەیە بۆ دووڕوویی و دووپێوەریی هزریی و ئەخلاقی,

 

 

 

 ئاماژەشە بۆ ئەوەی حەقیقەت لەم نێوانەدا تێکشکێندراوە و ئەوەی لە گەڕەکی حیزبێکدا خیانەتە، لە گەڕەکی حیزبێکی تردا وەک شەرەفمەندی باسیدەکرێت. دووەم، یەکێک لە کێشە گەورەکانی حیزبی کوردی نادیموکراتیبوونەکەیەتی لەنێوان خۆیانداو لەناو خودی خۆیاندا، بەئەندازەیەک زۆرجار جیاوازبوونیان لەیەکتر و بیروبۆچوونی جیاوازیی ناوخۆی خۆیان بە خیانەت پێناسەدەکەن.

  حیزبەکان لەئێستادا هێندە نوقمی بێ روئیایی سیاسی و نیشتمانی بوون زۆربەکەمی کێشەجەوهەرییەکان دەبێتە پرسی گفتوگۆ و دیالۆگی ناوخۆیییان و، گیرۆدەی ڕووبەڕووبونەوە و تەخوینکردنی ئەو ڕەخنەو بیروبۆچوونە جیاوازانەن کە لەهەناوی خۆیانەوە دەردەکەون.

 ئەقڵی حیزبی بەتەواوی دژی ئەقڵ و ئەخلاقی دیموکراتییە لەدەڤەریی ئێمەدا و ئەمەش بووەتە پەروەردەیەکی سیاسیی ڕووکەشی و فاشییانە، بەشێوەیەک دونیا بڕوخێت نابێتە پرسیاری جیددی بۆی,

 

،،

حزبەکان لەئێستادا هێندە نوقمی بێ روئیایی سیاسی و نیشتمانی بوون، زۆربەکەمی کێشە جەوهەرییەکان دەبێتە پرسی گفتوگۆ و دیالۆگی ناوخۆییان.

 

 وڵات تەسلیمی شەیتان بکرێ ڕاناچڵەکێت، چون تەنیا خەریکی عیبادەتی بتە سیاسی و وەهمە سیاسییەکانێتی. بۆ ئەوەی کەمێک ئەم ئەقڵییەتە حیزبییە راچڵەکێنیت و پەلامارتبدات، ئەوەندە بەسە ڕەخنە لە سەرۆکە فشەڵ و وەهمە سیاسییە پوچەکانی بگریت.

  بۆ ئەم ئەقڵییەتە خیانەت ئەوەیە پێی بڵێیت سەرۆکەکانت و حیزبەکانت فشەڵ و بێناوەرۆکن، یان بێ ناوەرۆکبوون، وە ئەوەی تۆ وەک حەقیقەت دەیبینیت جگە لەوەهمێک هیچی ترنییە. رەنگە گرینگترین بیرکردنەوە ئەوەبێت چەمکی خیانەت لەم شێواندن و بەلاڕێدابردن و بینین و پێناسەکردنە ئایدۆلۆژی و حیزبییە ڕزگاربکات.

 

author photo

تایبه‌ت به‌ دیپلۆماتیك