پارتى و یەکێتى، خیانەتەکانیان بەیەکترى دەفرۆشنەوە

میدیا سێبەرەکانیان جێگەى قەڵەمەکانى شەڕى ناوخۆ دەگرنەوە

پارتى و یەکێتى، خیانەتەکانیان بەیەکترى دەفرۆشنەوە

375 خوێندراوەتەوە

 

لەیادەکانى ٣١ ئاب و ١٦ ئۆکتۆبەردا، پارتى ویەکێتى لەرێگەى مۆدێلێکى نوێ لە قەڵەمى شەڕى ناوخۆوە، خیانەتەکانیان بە یەکترى دەفرۆشنەوە.

 

هەرچەندە لەلاى هاوڵاتیان و راى گشتى ٣١ ئابى ساڵى ١٩٩٦ى پارتى و ١٦ى ئۆکتۆبەرى ساڵى ٢٠١٧ى یەکێتى، دوو خیانەتن کە بە ئاسانى لە زاکیرەى تاکى کورد بیر ناچنەوە، بەڵام ئەمرۆ هەردولا دەیانەوێت لەرێگەى هەندێ بەرپرس و میدیا سێبەرەکانیانەوە وەک شانازییەک باس لەوەى خۆیان و وەک خیانەتێکیش باس لەوەى بەرامبەر بکەن.

 

،،

 ٣١ ئاب و ١٦ ئۆکتۆبەر جیاوازییەکانیان لە چەندێتیدایە نەک چۆنییەتى.!

بەراوردى نێوان خیانەتەکان

روداوى ٣١ى ئاب و ١٦ى ئۆکتۆبەر لە ساڵەکاندا جیاوازیان هەیە، گەرنا ئەگەر بەوردى لێکۆڵینەوەیان لەبارەوە بکەین، دەبینین هەردوو رووداوەکە شەرى شکاندنى ئیرادەى نێوان دوو هێزى سیاسی ( یەکێتى و پارتى) دەردەخات.

 

٣١ ئاب، پارتى ویستى تەنها لەرووى مادیی و عەسکەرییەوە یەکێتى نەشکێنێت، بەڵکو ویستى لەرووى مەعنەویشەوە گورزێکى واى لێ بدرێت کە لەهیچ شوێنێکى کوردستان جێگەى نەبێتەوە و هەژموونى نەمێنێت.

 

٣١ ئاب، بەردەم پارێزگاى هەولێر

 

لە ١٦ى ئۆکتۆبەریش بەهەمان شێوە، هێزەکانى یەکێتى بەجۆرێک پشتى پارتیان بەردا، کە ئەگەر جیاوازى بارودۆخى سیاسی سەردەم نەبوایە، نزیک بوو نەک تەنها لە کەرکوک بەڵکو لە هەولێریش پارتى بونى نەمێنێت.

 

هەروەها، لەهەردوو رووداوەکە (٣١ ئاب و ١٦ ئۆکتۆبەر) لەدەستدانى خاک و هاتنى هێزى عێراقى بۆ خاکى کوردستان بەدى دەکرێت، کە دواتر لەگەڵ هاوڵاتى مەدەنیدا، پێشمەرگەکان باجەکەیان داوە و بەرپرسە باڵاکان بە ئاسانى دەرچوون.

 

،،

لە ٣١ ئاب دا یەکێتى، پارتى بەوە تۆمەتبار کرد کە دەستى بەعس گرتووە بۆ سەر کوردستان، پارتیش بیانووى ئەوەبوو کە یەکێتى دەستى پاسدارى ئێرانى گرتووە بۆ کوردستان.

 

یەکێتى و پارتى بۆ شکاندنى یەکدى، پشتیان بەهێزى دەرەکى و بێگانە بەستووە، کە هەم لە زارى سەرکردەکانى هەردوولا هەم بەڵگەنامە مێژوویەکانیش ئەم راستییە دەردەکەوێت کە چۆن و لەهەندێ قۆناغدا پشتیان بەهێزى وڵاتانى دراوسێ بەستووە.

 

٣١ ئاب هەولێر

کامیان بەرپرسیارە؟

"ئەگەر دادگایەکى بێ لایەن هەبێت من و بارزانى بە بێتاوان دەردەچین"

ئەمە ئەو وتەیەى کۆچکردو جەلال تاڵەبانییە کە دواى کۆتایی هاتنى ٣١ ى ئاب و شەرى ناوخۆى نێوانیان، بوو بە بەشێک لە ئەدەبیاتى سیاسی یەکێتیش. واتە شەرەکە بەرپرسى یەکەمى حزبەکان لێى بەرپرسیار نین، بەڵکو هەندێ ئەندامى باڵا و ئاسایی بەشەکانى خوارەوەى حزب و قەڵەمەکانى شەڕ هۆکار بوون.

 

هەر ئەمەشە وایکردووە کە تاوانبارو خیانەتکارەکانى نێوانیان بەئاسانى دەربازیان ببێت و بەرپرسانى یەکەم نەک رووبەرووى لێکۆڵینەوە ناکرێنەوە بەڵکو لەناو حزبەکەشیاندا رێزى زۆرتریان لێ دەگیرێت.

 

،،

 ئەوساو ئێستاش، کۆمەڵێک وەک قەڵەمى شەڕى ناوخۆ رۆڵێکى خراپ دەبینن، کە موچەو نانى مانگانەیان لەسەر پارتى و یەکێتییە.

قەڵەمەکانى شەرى ناوخۆى ئەوساو ئێستا

ئەوسا قەڵەمەکانى شەڕى ناوخۆ کەم و دیار بوون، بەڵام ئەمرۆ دەیان پەیج و ئەکاونتى بێ دایک و باوک رۆژانە لە جەنگێکى ساردو ململانێییەکى ناشەریفانەدا یەکێتى و پارتى بۆ ناشریکردنى یەکدى بەکاریان دێنن.

 

قەڵەمەکانى شەڕى ناوخۆ لە ساڵانى نەوەدەکان، چۆن هۆکارێکى سەرەکى هەڵگیرسانى شەڕو ئاژاوەگێران بوون، ئەمرۆش بەهەمان شێوە دەردێکى کوشندەن و بارودۆخێکیان خوڵقاندووە، کە هەموو چرکەیەک لەبار بێت بۆ هەڵگیرسانەوەى شەڕێکى دیکە و خیانەتێکى دیکە.

 

 ١٦ى ئۆکتۆبەرى ٢٠١٧ کەرکوک

جیاوازى قەڵەمەکانى ئەوساو ئێستاى شەرى ناوخۆ تەنها ئەوەیە، جاران بە قەڵەم و بەنوسین و مرەکەب ئاگرەکەیان خۆش دەکرد، بەڵام ئەمرۆ لەرێگەى تایپ و فیدۆو وێنەو گرافیک و دەنگەوە ئەم شەڕە دەکرێت و خیانەتەکەى خۆیان بە شانازییەوە باس دەکەن.

کە ئەمەى دووەمیان ترسناکتر و کارەساتبارترە، چونکە بە ئاسانى و خێراتر هەستى بەرامبەر دەوروژێنێت و دەتوانێ بەرامبەر بکات بە شەیتان و خۆى بکات بە فریشتە.

 

بۆیە دەکرێت ئەوە بڵێین هەرچەندە بەردەوام تاوانبارە سەرەکیەکانى شەڕو (خیانەت) ون بوون کە بووەتە هۆى دووبارەکردنەوەى هەمان هەڵە، بەڵام دەکرێت لانى کەم ئەم مۆدێلە نوێیەى قەڵەمى شەڕى ناوخۆ لەرێگەى وەزارەتە مەعنییەکانەوە بەرپرسیارانە، خامۆش بکرێن، تاکو هاوڵاتى بێ تاوان، هەمیشە کوردستان وەک مەیدانى جەنگ سەیر نەکات.

 

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان