لە "دڵ" و "قودس"ەوە بۆ " کەرکوکی کوردستانی‌"

تێرتان لە دروشمبازی نە خوارد؟

لە "دڵ" و "قودس"ەوە بۆ " کەرکوکی کوردستانی‌"

289 خوێندراوەتەوە

 مه‌حمود ڕه‌زا ئه‌مین

رۆژی ٩ی ٩، حیزبە کوردستانییەکانی کەرکوک، لە کۆبونەوەیەکا لەسەر دوو شت رێکەوتن:

١. لە هەڵبژاردنی داهاتووی ئەنجومەنی پارێزگاکانی سەر بە حوکمەتی ئیتیحادی‌دا، بۆ کەرکوک، بە یەک لیست دابەزن.

٢. دروشمی لیستەکەیان بریتی بێ لە " کەرکوک کوردستانییە".

 

،،

دروشمەکانی " کەرکوک دڵی کوردستان" و "کەرکوک قودسی کوردستانە" چەن خزمەتی کەرکوک‌ و خەڵکەکەیان کرد، ئەم دروشمەش هەر ئەوەنە خزمەت ئەکا.

 

ئاخۆ ئەم دروشمە شتێ لە هەلومەرجی کەرکوک ئە گۆڕێ؟

ئاخۆ خزمەتێ بە حیزبە کوردستانییەکان و کوردی کەرکوک ئەکا؟

خزمەتێ بە پێکەوەژیانی پێکهاتە جیاوازەکان ئە گەیەنێ؟

قەرەبوی دۆڕانەکەی ١٦ی ئۆکتۆبەر و رۆژانی دوایی ئە کاتەوە؟

 

ئەوی راستی بێ، دروشمەکانی " کەرکوک دڵی کوردستان" و "کەرکوک قودسی کوردستانە" چەن خزمەتی کەرکوک‌ و خەڵکەکەیان کرد، ئەم دروشمەش هەر ئەوەنە خزمەت ئەکا.

 

ئەگەر کوردانی کەرکوک هێشتا لەوە تێ نە گەیشتبن کە "حیزبی دڵ" و "حیزبی قودس" کەرکوکیان تەنیا بۆ نەوتەکەی ویستوە، کارەساتە.لێ، لەوە کارەساتبار تر ئەوەیە دوای ئەو هەمو ساڵە لە تاڵانکردنی نەوت و خەڵەتاندن، هێشتا دروشمبازی لە لای کوردانی کەرکوک، رەونەقی خۆی لە دەس نە دابێ.

 

کاربەدەستانی کورد لە دوای روخاندنی رژێمی بەعس، بە دروستی لە دوای پەسەندنی دەستوری هەمیشەیی عیراق لە راپرسی‌ی گشتی دا، دو هەلی مێژویی‌یان لەدەس داین کە قابیلی دوبارەبونەوە نین:

 

،،

پارتی و یەکێتی خەمی خاک و خەڵکی کەرکوک و ناوچەجێناکۆکەکانی تریان بوایە، ئەبوایە خاوەنی دیدگا و پلانی ستراتیجی بونایە سەبارەت بە چۆنێتی گێڕانەوەی ئەو ناوچانە بۆسەر هەرێمی کوردستان.

 

یەکەم: روخاندنی پردی متمانە بە ئەنقەست.

 

دوەم: سەرپاخستنی حوکمی قەرەقوشی لە ناوچەکانی جێناکۆک.

 

لەباتی ئەوەی خەو و خەیاڵیان هەر لە لای نەوتەکەی کورکوک بوایە، بیانخستایەتە سەر خاکەکەی، رۆژمان بەم رۆژە نە ئەگەیشت.

ئەگەر پارتی و یەکێتی خەمی خاک و خەڵکی کەرکوک و ناوچەجێناکۆکەکانی تریان بوایە، ئەبوایە خاوەنی دیدگا و پلانی ستراتیجی بونایە سەبارەت بە چۆنێتی گێڕانەوەی ئەو ناوچانە بۆسەر هەرێمی کوردستان کە، ئەکرا بە گرتنەبەری ئەم رێگایانە، یەک لە دوای یەک، بگەیشتینایەتە مەنزڵ:

 

١. دروستکردنی متمانەی پتەو لە نێوان هەولێر و بەغا، لە رێگەی پیشاندانی نیازباشی‌ی کردارەکی‌یەوە بۆ بیناکردنەوە و بەهێزکردنی عیراق وەکو دەوڵەتێکی فیدراڵی- دیمۆکراتی- پەرلەمانی.

 

٢. دروستکردنی متمانە لەنێوان کورد و باقی پێکهاتە نە-کوردی‌یەکانی کەرکوک و ناوچەجێناکۆکەکان کە، سیازدە ساڵ یەکێتی و پارتی حوکمیان کردن، لە رێگەی حوکمی رەشید و بەشداری پێ کردنی راستەقینەی پێکهاتەکان لە دروستکردنی بڕیار و بەڕێوەبردن و سامان دا.

 

٣. دیاریکردنی سنور بۆ ناوچەی جێناکۆک، بۆ ئەوەی لە ریفراندۆمەکەی مادەی ١٤٠ی دەستورا سنور دیار بێ، لە کوێ کێ دەنگ ئەدا؟

 

٤. هەنگاوەکانی ١ و ٢ زەمینەی متمانە و پێکەوەژیان‌یان خۆش ئەکرد بۆ ئەوەی لە قۆناغی ٣ دا، نە بەغا ترس و نە پێکهاتەکانی ناوچەی جێناکۆک بیمیان لە دیاریکردنی سنور هەبێ.

 

،،

دروشمی "کەرکوک کوردستانی‌یە"ـی حیزبە کوردستانی‌یەکانی کەرکوک بۆ هەڵبژاردنی ئایندە، سەلماندی کە سیاسی‌ی کورد نەک پەند لە مێژوی گەلان وەر ناگرێ، بەڵکو دەرس لە شکستەکانی خۆشی دەر نا هێنێ.

 

٥. بەو مەرجانەی سەرەوە سیاسەت بکرایە، هەر ٣ قۆناغەکەی مادەی ١٤٠: ئاسایی کردنەوە، ئامار و راپرسی، لە کاتی دەستوری‌ی خۆشیانا نە بوایە، بە یەک- دو ساڵ دواکەوتن، بە بێ گرێ یاخود بە بڕێ گرێ‌ی کەمەوە (فیتی بێگانە) جێبەجێ ئە بون.

 

بەڵام چونکە نە خەمی خاک و نە هی خەڵکیان هەبو، یەکسەر پەلاماری دۆسێ‌ی نەوتیان دا. بە ئەنقەست، کەوتنە روخاندنی هەمو پردەکانی متمانە، چ لەگەڵ بەغا و چ لەگەڵ باقی پێکهاتە نە-کوردەکانی ناوچەی جێناکۆک.

 

هەڵە کوشندەکانی کاربەدەستە دروشمبازەکانی کورد کارەساتی ١٦ی ئۆکتۆبەری بەرهەم هێنا کە، ئەبو دەرس و پەندیان لێ وەر بگرتایە.

بەڵام دروشمی "کەرکوک کوردستانی‌یە"ـی حیزبە کوردستانی‌یەکانی کەرکوک بۆ هەڵبژاردنی ئایندە، سەلماندی کە سیاسی‌ی کورد نەک پەند لە مێژوی گەلان وەر ناگرێ، بەڵکو دەرس لە شکستەکانی خۆشی دەر نا هێنێ.

 

ئەبو ١٦ ئۆکتۆبەر سەلمێنەری ئەو راستی‌یە بوایە کە شوێنکەوتنی عەنتەریات و دروشمبازی بێجگە لە رەنجەڕۆیی هیچ خێرێک نا داتەوە. بەڵام کۆبونەوەکەی ٩ی ٩ی حیزبە کوردستانی‌یەکانی کەرکوک و دروشمەکەی، سەلماندیان کە دروشمبازی و کوردایەتی‌ی موزەیەف تاقە کاڵای بازاڕی بازرگانەکانی سیاسەتە.

 

هێشتا دەرفەتێک ماوە تا بڕێ لە متمانە بگەڕێتەوە بۆ نێوان کورد و پێکهاتەکانی تر. ئەوەش بە بەرزکردنەوەی دروشمی پێکەوەژیان و بوغزاندنی وتاری بوغزاندن یەتە دی نەک بە دروشمی شەڕەنگێزانە. ئاخۆ پدک و ینک بە تایبەتی و هەمو حیزبە کوردستانیەکان بە گشتی، پەندێکی وایان لە ۱۳ ساڵ حوکمڕانیی قەرەقوشی و شکستەکەی ۱٦ی ئۆکتۆبەر وەر گرتوە؟

 

لە بەیەکادانی پێکهاتەکانی کەرکوک و ناوچەکانی جێناکۆکا، کوڕی هیچ "سەرکردە!"ـیەکی حیزبەکانی کورد نا کوژرێ، رۆڵەی کەرکوکی تیا ئەچێ.

،،

ئەی تێر نەخۆرەکان لە کورسی و سامان و دەسەڵات!تێرتان لە شەڕ و خوێن یش نە خوارد؟

 

ئێوە خۆتان بۆ شەڕی پێکهاتەکان ئامادە ئەکەن، یان بۆ هەڵبژاردنی دیمۆکراتی؟

ئەم دروشمە، دروشمی شەڕێکی دۆڕاوە. هەتا کۆمیسیۆنی باڵای هەڵبژاردنەکانی عیراق ناچاری نە کردون، باش وایە خۆتان بی گۆڕن...

ئەی تێر نەخۆرەکان لە کورسی و سامان و دەسەڵات!تێرتان لە شەڕ و خوێن یش نە خوارد؟

لە هەزارا یەکی ئەوەی بۆ هەڵگیرساندنی شەڕ ئەی کەن، بۆ ئەفراندنی ئاشتی بتان کردایە، ئێستا لە وەزعێکی ترا بوین! هەرگیز هیچ شەڕێ باش و، هەرگیز هیچ ئاشتی‌یەک خراپ نیە.

 

درود بۆ گیانی ئاشتی و پێکەوەژیان

نەفرەت لەوانەی بۆ قازانجی تایبەتی ئامادەن خاک و خەڵک بکەنە قوربانی