میدیای گۆڕان راپۆرتێكی لەسەر مەسرور بارزانی سڕییەوە

چی لەپشت روداوەكە دەخوێنرێتەوە

میدیای گۆڕان راپۆرتێكی لەسەر مەسرور بارزانی سڕییەوە

938 خوێندراوەتەوە

سایتی knn زمانحاڵی بزوتنەوەی گۆڕان راپۆرتێكی رۆژنامەوانی لەسەر مەسرور بارزانی و ئاشتی هەورامی سڕیەوە.

دوێنێ‌ ماڵپەڕی ناوباو راپۆرتێكی بڵاوكردەوە لەسەر رادەستنەكردنی پارەی نەوتی هەرێم بە وەزارەتی دارایی لەلایەن ئاشتی هەورامییەوە.

ماڵپەڕەكە ئاماژەی بەوەشكردووە كە بۆ پڕكردنەوەی پارەی موچەی فەرمانبەران مەسرور بارزانی خۆی پارەی داوەتە وەزارەتی دارایی لەسەر داهاتی فرۆشی نەوتی عەین زالە كە بەپێی میدیای گۆڕان تائێستا لەلایەن مەسرور بارزانی خۆیەوە دەفرۆشرێت و پارەكەی هەڵدەگیرێت.

بە چەند كاتژمێرێك دوای بڵاوبونەوەی راپۆرتەكە وەزیری دارایی حكومەتی هەرێم كە لەسەر پشكی بزوتنەوەی گۆڕانە، لە دیدارێكدا رەتی كردەوە كە ئاشتی هەورامی پارەی نەدابێت و سەر لەبەری راپۆرتەكەی میدیای گۆڕانی رەتیردەوە و رایشیگەیاند كە ئاگاداری داهاتی نەوتە.


ئەمڕۆ ش ماڵپەڕەكە ی گۆڕان بەتەواوی هەواڵەكەی سڕیییەوە.

بزوتنەوەی گۆڕان بەشدارە لە كابینەی حكومەتی هەرێم بە سەرۆكایەتی هەرێمم و چەند وەزارەتێكیان لەلایە، یەكێك لەو وەزارارەتانەش وەزارەتی دارایی و ئابورییە.

دەكرێت ئەو پرسیارە بكرێت چی لەپشت بڵاوبونەوەی راپۆرتەكە و وەڵامدانەوەی وەزیر و دواتریش لابردنی راپۆرتەكەوە هەبوو.

لێرەدا چەند گریمانە و سیناریۆیەك دەخەینە ڕوو

یەكەم: كۆی بڵاوكردنەوەی زانیاریەكە و وەڵامەكەی وەزیریش بە پلان لەلایەن بزوتنەوەی گۆڕانەوە رێكخراوە وەك ئاگاداركردنەوەی پارتی و سەرۆكی حكومەت كە نابێت بەهۆی ململانێی باڵەكانەوە دەسەڵاتەكانی وەزیری دارایی كەم بكرێتەوە و پارەی موچە نەخرێتە بەردەستی.

لەم رێگەیەشەوە بەشێوازێكی دیبلۆماسی هەم پەیامەكەیان گەیاند و هەم وەزیریش رەتیكردەوە كە ئەو دەستی لەو فابریكە ئیعلامیەدا هەبێت و دوای گەیاندنی پەیامەكەشیان راپۆرتەكەیان لابرد.

دوەم: ئاراستەیەكی ناو بزوتنەوەی گۆڕان ئۆكەی دابێت لەسەر دابەزاندنی ئەو راپۆرتە و وەزیری ئاگاداری نەبێت.

ئەگەر ئەم سیناریۆیە راست بێت ئەوا یەكەمجارە وەزیرێكی گۆڕان میدیای حیزبەكەی بەدرۆدەخاتەوە.

لەم سیناریۆیەدا میدیای گۆڕان بەرگری لەخەڵك دەكات بەڵام وەزیری دارایی بەرگری لە حكومەت دەكات و كێشەكانی ناو حكومەت و پارتی پەردەپۆش دەكات.

بەپێچەوانەشەوە ئەگەر هەواڵەكە راست نەبێت ئەوا دەردەكەوێت ئاراستەیەك لەناو ئەو بزووتنەوەیە هەیە كەدژی رێكەوتنی پارتی و گۆڕان و بێدەنگ بونە لەئاست كەموكوڕییەكان.

لەڕوی پیشەیشەوە چاوەڕێ‌ دەكرا لەژێر هیچ گوشارێكدا میدیای گۆڕان راپۆرتە رۆژنامەوانیەكانی سانسۆر نەكات و راستی نەكرێت بە قوربانی رێكەوتن و موجامەلەی سیاسی

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری