توركیا هەناسەی ژیانەوەی بە داعش و تیرۆرستان دایەوە

توركیا هەناسەی ژیانەوەی بە داعش و تیرۆرستان دایەوە

480 خوێندراوەتەوە

توركیا تاكو ئێستا سێ ئۆپراسیۆنی سەربازی لە سوریا ئەنجامداوە و برەوەی یەكەم لەم ئۆپراسیۆنانە گروپە تیرۆرستیەكان و داعش بوون،زەرەمەندی یەكەمیش كورد و هاوڵاتیانی سڤیل بوون، هەروەها ئۆپراسیۆنی ئەمجارە بە بەراورد بە ئۆپراسیۆنەكانی پێشووتر بە برەو تر بووە و هەناسەی ژیانەوەی بە داعش دایەوە و بووە هۆی هەڵاتنی كەسوكاریان و دەركەوتنەوەی چەكدارەكانی گروپەكە.

رۆژی 8ی ئۆكتۆبەری ئەمساڵ دەوڵەتی توركیا بە هاوكاری گروپە چەكدارە توندڕەوەكانی سوریا ئۆپراسیۆنی بە ناو (كانی ئاشتی) بۆ داگیركردنی خۆرئاوای كوردستان ڕاگەیاند، هەرچەندە ماوەی پێنج ڕۆژە شەڕێكی توند لە نێوان توركیا و چەكدارەكان لەلایەك و شەڕڤانان لەلایەكی دیكەوە بەردەوامی هەیە، بەڵام تاكو ئێستا پێشڕەویەكی ئەوتۆیان نەكردوە و تەنها هەشت گوندو شارۆچكەیەكیان داگیر كردووە.

بەرفراوانی ئۆپراسیۆنەكە وای لە هەسەدە كرد كە جەنگی دژی داعش ڕابگرێت و پاسەوانی گرتوخانەكان كەم بكاتەوە كە نزیكەی 12 هەزار چەكداری داعشی تێدا زیندانی كراون، ئەمەش بۆتە هۆی ئەوەی لەلایەك داعش دەست بە جموجۆڵ بكاتەوە و لەلایەكی دیكەشەوە خۆیان و كەسوكاریان لە زیندانەكان هەڵبێن،هەلاتنی ئەم چەكدارانە گومانی لەسەر ئامانجی ئۆپراسیۆنەكانی توركیا دروست كردەوە و لێكدانەوەی ئەوەی بۆ دەكرێت ،كە ئامانجی ڕزگاركردنی چەكدارە داعشەكانە، بەتایبەت دوای ئەوەی توركیا بە توندی هێرشی كردە سەر سەرێ كانی و كۆبانی و گردە سپی،چونكە ئەم ناوچانە زۆرترین زیندانی داعشی تێدا بەندكراوە و پێشتریش داعش ئەم ناوچانەی بۆ ماوەیەك كۆنترۆڵ كردبوو. دیاریەكی بێ وێنە بۆ داعش: ڕووداوەكانی ئەم پێنج ڕۆژەی ئۆپراسیۆنەكە،ئەوەی دەرخست كە توركیا دیاریەكی بێ وێنەی بە داعش بەخشیوە و بۆتە هۆی ئازادكردنی چەكدارەكانی،ئەوەتا ڕۆژی هەینی ڕابردوو هەسەدە ئاشكرای كرد، كە پێنج چەكداری داعش لە زیندانی (نفكۆر)ی نزیك قامیشلی هەڵاتوون،ئەمەش دوای ئەوەی سوپای توركیا بە چەند موشەكێك نزیك زیندانەكەی كردە ئامانج. لەلایەكی دیكەوە، هەسەدە توانی ڕێگا لە ڕاكردنی كەسوكاری چەكدارە داعشەكان بگرێت، كە بە نیاز بوون لە كەمپی (هۆل) هەڵبێن،كە ئەو كەمپە هەزاران كەسوكاری داعش لەخۆ دەگرێت ، هاوكات لە نزیك گرتوخانەیەكی شاری حەسەكە تەقینەوەیەك ڕوویدا و بەهۆیەوە بۆ ماوەیەك پشێوی دروست بوو.

دواین ڕووداویش ئەمڕۆ لە كەمپی عەین عیسا ڕوویدا، كە بە گەورەترین هەڵاتنی بە كۆمەڵی كەسوكاری داعشەكان دادەنرێت، كە زۆرترین كەس توانیان هەڵبێن، لەوبارەیەوە نوسینگەی كاروباری مرۆیی لە بەڕێوەبەرایەتی خۆسەر لە ڕاگەیاندراوێكدا ئاشكرای كرد، ئەمڕۆ (785) كەس توانیویانە لە كەمپەكە هەڵبێن. لە بەشێكی دیكەی ڕاگەیاندراوەكەدا، بەڕێوەبەرایەتی خۆسەر ئاشكرای كرد، ئێستا كەمپەكە بێ پاساوان ماوەتەوە ،چونكە چەند ئەندامێكی داعش بە هەماهەنگی لەگەڵ گروپێكی بەكرێگیراوی توركیا و بە خۆپاراستنیان لە ژێر چەتری موشەكی توركیادا، هێرشێكی دڕندانەیان كردە سەر پاسەوانانی كەمپەكە و دەرگایان بۆ ئەندامەكانیان كردەوە و توانیان هەڵبێن.

داعش دەركەوتەوە: میدیاكان بڵاویان كردەوە، كە لە چەند گوندێكی دەوروبەری عەین عیسا، چەكدارانی داعش ئاڵای خۆیان هەڵداوە ، سەرهەڵدانەوەی داعش دوای ئەوە دێت كە هەسەدە داوای لە كۆمەڵگەی نێودەوڵەتی كرد، كە چیتر بێدەنگ نەبن و خەریكە دۆخەكە لە كۆنترۆڵ دەردەچێت و داعش دەگەڕێتەوە. هۆكاری دەركەوتنەوەی داعش بەهۆی بۆشایی ئەمنیەوەیە كە هێرشەكانی توركیا دروستی كردووە ،كە هەسەدە ناچاربووە شەڕڤانان ڕەوانەی بەرەكانی جەنگی دژی توركیا و گروپە تیرۆرستیەكان بكات و شەڕی دژی داعش و پاسەوانی كردنی گیراوەكان بكاتە كارێكی لاوەكی. بە سەیركردنی ئەم ڕووداوانە و كردنە ئامانجی گرتوخانەكان لەلایەن توركیاوە،دەتوانین بڵێین داعش دووبارە بەهۆی توركیاوە سەری هەڵدایەوە و ئەنكەرە ریسەكەی چەند ساڵەی كوردو هاوپەیمانانی كردەوە بە خوری و دووبارە هەناسەی ژیانەوەی بە داعش دا، ئەمە جگە لەوەی بە ئاشكرا هاوكاری گروپە تیرۆرستیەكان دەكات، كە مەترسی ئەوانیش هیچی كەمتر نیە لە داعش،هەروەها ئ بە ئاڵۆزبوونی زیاتری دۆخەكەش داعش زیاتر پەرە دەسێنێت و دووبارە دەست بە كردەوە تیرۆرستیەكانی دەكاتەوە.

 

author photo

نوسەر و رۆژنامەنوس

 بروانامەی بەکالۆریۆس لە زمان و ئەدەبی عەرەبی