بۆچی کورد نەیتوانیووە سوود لە مێژوو وەربگرێت ؟

" كورد ناتوانێت دوژمنى دوژمنه‌كه‌ى بکاتە دۆست "

بۆچی کورد نەیتوانیووە سوود لە مێژوو وەربگرێت ؟

836 خوێندراوەتەوە

كورد ده‌ڵێت:" دوژمنی دوژمنه‌كه‌م دۆستمه‌" ئه‌مه‌ ئه‌و په‌نده‌یه‌ كه‌ كورد خۆی له‌ مامه‌ڵه‌ سیاسیه‌كانیدا جێبه‌جێی ناكات‌ و سود له‌ ناكۆكییه‌كانی دوژمنەكانی بۆ به‌رژه‌وه‌ندیی خۆی وه‌رناگرێت، له‌وه‌ش زیاتر نه‌ك ئه‌م ناكۆكیانه‌ ناقۆزێته‌وه‌، به‌ڵكو ده‌بێته‌ به‌شێكی ئه‌م ناكۆكیانه‌و له‌ كۆتایدا به‌ زیانی خۆی ده‌شكێته‌وه‌و بێ هیچ ده‌ستكه‌وتێك له‌ هاوكێشه‌كه‌ ده‌رده‌كرێت.

له‌م ڕاپۆرته‌دا ده‌مانه‌وێت ئاماژه‌ به‌ ریشه‌ی مێژووی‌و هۆكاری ئه‌م لایه‌نه‌ گرنگه‌ بده‌ین‌ و بزانین بۆچی كورد سوود له‌ ده‌رفه‌ته‌كان وه‌رناگرێت، چ وایكردووه‌ به‌و شێوه‌یه‌ مامه‌ڵه‌ بكات ئه‌ی ده‌رئه‌نجامی ئه‌م مامه‌ڵه‌ی چی بووه‌؟

 

چه‌ند نموونه‌یه‌ك له‌ سود وه‌رنه‌گرتن له‌ ناكۆكییه‌كان

ناكۆكی عوسمانی‌و سه‌فه‌وییه‌كان


ده‌وڵه‌تی عوسمانی ئیمپراتۆریه‌تێكی ئیسلامیبوو، له‌ ساڵی 1299ه‌وه‌ تا ساڵی 1923 حوكمی كردووه‌، واته‌ نزیكه‌ی 600 سال به‌رده‌وام بووه‌ له‌ ده‌سه‌ڵاتدارێتی، هه‌روه‌ها سه‌فه‌وییه‌كان ده‌وڵه‌تێكی به‌هێزی شیعه‌ بوون كه‌ له‌ ساڵانی 1501 هه‌تا 1736 ده‌سه‌ڵاتیان هه‌بووه‌، ئه‌م دوو ئیمپراتۆره‌ به‌هۆی هاوسنوریان‌و جیاوازی مه‌زهه‌بیان‌و حه‌زی داگیركاریان، به‌رده‌وام له‌ شه‌ڕی یه‌كتردا بوون‌و چه‌ندین جه‌نگیان له‌ دژی یه‌ك ئه‌نجام داوه‌، عوسمانی‌و سه‌فه‌وییه‌كان له‌ سه‌ره‌تادا به‌ ئامانجی ڕاكێشانی سه‌رنجی كورد به‌ نه‌رمی مامه‌ڵه‌یان له‌گه‌ڵ میرو سه‌رۆكه‌ كورده‌كان ده‌كردو هه‌ریه‌كه‌یانیان له‌ شوێنی خۆی ده‌هێشته‌وه‌، ته‌نها به‌ گوێڕایه‌ڵی‌و دیاری‌و سه‌رانه‌ ڕازییان ده‌كردن.

،،

عوسمانی‌و سه‌فه‌وییه‌كان له‌ سه‌ره‌تادا به‌ ئامانجی ڕاكێشانی سه‌رنجی كورد به‌ نه‌رمی مامه‌ڵه‌یان له‌گه‌ڵ میرو سه‌رۆكه‌ كورده‌كان ده‌كردو هه‌ریه‌كه‌یانیان له‌ شوێنی خۆی ده‌هێشته‌وه‌، ته‌نها به‌ گوێڕایه‌ڵی‌و دیاری‌و سه‌رانه‌ ڕازییان ده‌كردن.


به‌ڵام دوای ئه‌وه‌ی ده‌سه‌ڵاتیان به‌ سه‌ر كوردستاندا جێگیر ده‌بوو، به‌بێ هیچ بیانویه‌ك میره‌كانیان له‌ زیندان ده‌كردو قزڵباشیان له‌ جێگه‌یان داده‌نا، بۆیه‌ كورد له‌ كۆتایدا سودی له‌ شه‌ره‌كانیان وه‌رنه‌گرت‌و ئه‌وه‌بوو له‌ جه‌نگی چاڵدێراندا (1514ز) به‌ كرداریی كوردستانیان له‌ نێوان خۆیاندا دابه‌شكردو تا جه‌نگی جیهانی یه‌كه‌م‌و ڕوخانی عوسمانییه‌كان كوردستان به‌م شێوه‌یه‌ مایه‌وه‌.

 

cvt
دیمەنێک لە جەنگی یەکەمی جیهانیی ١٩١٤ ـ ١٩١٨

 

جه‌نگی جیهانی یه‌كه‌م‌ و ململانێی ڕووسیاو فه‌ره‌نسا و به‌ریتانیا

به‌ریه‌ك كه‌وتنی زلهێزه‌كانی جیهان له‌ ڕۆژهه‌ڵاتی ناوه‌ڕاست به‌ تایبه‌ت له‌ نێوان به‌ریتانی‌و ڕووسه‌كان، به‌ خراپ به‌سه‌ر پرسی كوردا شكایه‌وه‌و داهاتووی زیاتر نا ڕوون كردو پرسه‌كه‌ی له‌ كێشه‌یه‌كی هه‌رێمیه‌وه‌ كرد به‌ كێشه‌یه‌كی نێوده‌وڵه‌تی.


ڕووسه‌كان له‌ سه‌ره‌تادا به‌ گڕو تینه‌وه‌ په‌یوه‌ندیان به‌ كورده‌وه‌ ده‌كرد، ئه‌مه‌ش بووه‌ هۆی ترس له‌لای به‌ریتانیه‌كان، چونكه‌ به‌ریتانیا نه‌یده‌ویست روسیا بگاته‌ عێراق‌و وڵاته‌كانی تری ناوچه‌كه‌، كوردیش خۆی ده‌یوویست له‌ وڵاته‌ بیانییه‌كان، به‌تایبه‌ت له‌ به‌ریتانیا نزیك بێته‌وه‌، واته‌ به‌بێ هیچ به‌رنامه‌یه‌كی دیاریكراو له‌ نێوان وڵاتاندا مامه‌ڵه‌ی ده‌كرد، بۆ نموونه‌ شه‌ریف پادشا له‌ ساڵی 1914هه‌وڵێكی زۆری دیپلۆماسی دا تا بگات به‌ به‌ریتانیه‌كان، كاتێكیش به‌ریتانیا عێراقی داگیركرد داوای لێكرد بێته‌ شاری مارسیلیا تا گوێ له‌ وته‌كانی بگرێت، له‌ كۆتایدا وڵاتانی زلهێزی به‌ریتانیاو فه‌ره‌نساو ڕوسیا، به‌پێی به‌رژه‌وه‌ندی خۆیان‌و گوێ نه‌دان به‌ خواستی كورد، رێكه‌وتنامه‌ی سایكس پیكۆیان ئیمزا كرد، واته‌ كورد له‌مه‌شدا هیچ سودێكی له‌ ناكۆكیه‌كانی ڕووس‌و به‌ریتانیاو فه‌ره‌نسا نه‌بینی.

 

كۆماری كوردستان له‌ مه‌هاباد

له‌ 22ی كانوونی دووه‌می 1946 قازی محه‌مه‌د كۆماری كوردستانی له‌ شاری مهاباد دامه‌زراند، به‌ڵام كۆماره‌كه‌ ته‌مه‌نی نه‌گه‌یشته‌ ساڵێك‌و به‌ چه‌ند هۆكارێك هه‌ره‌سی هێنا، (ئارچیبالد بۆلۆچ رۆزڤلت) كوڕه‌زای سه‌رۆكی پێشووی ئه‌مریكا له‌ كتێبه‌كه‌یدا به‌ ناوی ( كۆماری كوردی مه‌هاباد ) ده‌ڵێت:" كێشه‌ی سه‌ره‌كی كۆماری كوردستان ئه‌وه‌بوو كه‌ كورده‌كان پێویستیان به‌ سۆڤیه‌ت هه‌بوو، به‌ڵام ئه‌م په‌یوه‌ندییه‌ نزیكه‌یان له‌گه‌ل ستالین‌و سۆڤیه‌ت وایكرد هێزه‌ رۆژئاواییه‌كان پشتی ئێران بگرن، له‌ كۆتایشدا ڕووسیا پشتی كوردی به‌ردا".

،،

(ئارچیبالد بۆلۆچ رۆزڤلت) كوڕه‌زای سه‌رۆكی پێشووی ئه‌مریكا له‌ كتێبه‌كه‌یدا به‌ ناوی ( كۆماری كوردی مه‌هاباد ) ده‌ڵێت:" كێشه‌ی سه‌ره‌كی كۆماری كوردستان ئه‌وه‌بوو كه‌ كورده‌كان پێویستیان به‌ سۆڤیه‌ت هه‌بوو، به‌ڵام ئه‌م په‌یوه‌ندییه‌ نزیكه‌یان له‌گه‌ل ستالین‌و سۆڤیه‌ت وایكرد هێزه‌ رۆژئاواییه‌كان پشتی ئێران بگرن، له‌ كۆتایشدا ڕووسیا پشتی كوردی به‌ردا".


لێره‌شدا ناكۆكی ڕووس‌و رۆژئاواییه‌كان نه‌ك نه‌بووه‌ هۆی به‌هێزبوونی كورد به‌ڵكو كۆماره‌كه‌شی له‌ناو برد.

 

له‌ ڕووخانی كۆماری كوردستانه‌وه‌ تائێستا


دوای ئه‌وه‌ی كۆماری كوردستان له‌ مهاباد ڕووخا، دابه‌شكردنی كوردستان له‌ نێوان وڵاتانی عێراق‌و ئێران‌و توركیاو سوریا به‌ ته‌واوی چه‌سپاو وڵاتانی رۆژئاواش كشانه‌وه‌و به‌ شێوه‌ی ناڕاسته‌وخۆ درێژه‌یان به‌ داگیركاری خۆیاندا، ئه‌و چوار وڵاته‌شی كه‌ كوردستانیان به‌سه‌ردا دابه‌شكرا، هه‌رچه‌نده‌ به‌رده‌وام ناكۆكیان هه‌بوو، به‌ڵام له‌سه‌ر پرسی كورد یه‌كیان ده‌گرت، ئه‌م سیاسه‌ته‌شیان تاكو ئێستا به‌رده‌وامی هه‌یه‌و كوردستانیش هه‌ر به‌ دابه‌شكراویی و به‌بێ بوونی كیانێكی سه‌ربه‌خۆ ماوه‌ته‌وه‌.

 

vg
ڕاگەیاندنی کۆماری کوردستان لە مەهاباد ـ ٢٢ی کانونی دووەمی ١٩٤٦

 

هۆكاره‌كانی شكستی كورد له‌ ململانیه‌كان

وه‌ك ئاماژه‌مان پێكرد، كورد نه‌یتوانیوه‌ سوود له‌ ململانێی زلهێزه‌كان وه‌ربگرێت، هۆكاری ئه‌مه‌ش بۆچه‌ند خاڵێكی سه‌ره‌كی ده‌گه‌ڕێته‌وه‌ كه‌ گرنگترنیان ئه‌م هۆكارانه‌ن:

خیانه‌ت‌و ناكۆكی ناوخۆیی

شوناسی سیاسی مێژووی كورد به‌ درێژایی مێژوو، خاوه‌نی دوولایه‌نی سه‌ره‌كی بووه‌، ئه‌ویش لایه‌نی ده‌ره‌كی‌و ناوخۆیی بوون، هه‌ر وه‌ك چۆن شه‌ڕكردن‌و ئازایه‌تی‌و به‌رگری جوامێرانه‌ به‌شێكه‌ له‌ شوناسی كورد، دژ به‌ یه‌ك بوون‌و له‌ به‌رامبه‌ر یه‌ك وه‌ستان‌و خیانه‌ت له‌ یه‌ك كردن به‌شێكی تری مێژووی كورد بووه‌.


ئه‌م ناكۆكی‌و خیانه‌ته‌ش هۆكاری سه‌ره‌كی بووه‌ كه‌ كورد نه‌توانێت بگاته‌ ئامانجی خۆی‌و وڵاتانی داگیركه‌ریش بۆ به‌رژه‌وه‌ندی خۆیان سودیان له‌م لایه‌نه‌ سلبییه‌ وه‌رگرتووه‌.


گه‌ر بمانه‌وێت نموونه‌ بۆ ئه‌م خاڵه‌ بهێنینه‌وه‌، ئه‌وه‌ زۆر به‌ ئاسانی ده‌توانین ئاماژه‌ به‌ چه‌ندین نموونه‌ بكه‌ین هه‌ر له‌ میرنیشینه‌كان‌و دواتر بۆ كۆماری كوردستان‌و بۆ سه‌رده‌می دوا شۆڕشه‌كانی كورد، به‌رده‌وام خیانه‌ت‌و شه‌ری ناوخۆیی هاوته‌ریبی شۆڕشه‌كان بوون، كه‌ ئه‌مه‌ش بۆته‌ هۆی لاوازی‌و هه‌ره‌سهێنانی شۆڕشه‌كان.

،،

ئه‌حمه‌د پاشا کە دواهه‌مین میرنشینی بابان بووه‌ به‌ ( كڵۆدیس جێمس ریچ) ده‌ڵێت:" تیاچوونی ئێمه‌ هه‌میشه‌ له‌ ئه‌نجامی دووبه‌ره‌كییه‌كانی خۆمان بووه‌، ئه‌گه‌ر عوسمانی‌و ئێرانیه‌كان ئه‌م دووبه‌ره‌كیانه‌یان نه‌كردایه‌ته‌ هه‌ل‌و دارده‌ست به‌ ده‌ست خۆیانه‌وه‌، هه‌رگیز ده‌ره‌قه‌تمان نه‌هاتن"


باشترین نموونه‌ بۆ ئه‌مه‌ش وته‌یه‌كی ئه‌حمه‌د پاشایه‌ كه‌ دواهه‌مین میرنشینی بابان بووه‌ به‌ ( كڵۆدیس جێمس ریچ) ده‌ڵێت:" تیاچوونی ئێمه‌ هه‌میشه‌ له‌ ئه‌نجامی دووبه‌ره‌كییه‌كانی خۆمان بووه‌، ئه‌گه‌ر عوسمانی‌و ئێرانیه‌كان ئه‌م دووبه‌ره‌كیانه‌یان نه‌كردایه‌ته‌ هه‌ل‌و دارده‌ست به‌ ده‌ست خۆیانه‌وه‌، هه‌رگیز ده‌ره‌قه‌تمان نه‌هاتن".

 

هۆكارى ئاینی

وڵاتانی داگیركه‌ری كوردستان زۆرینه‌ی كات به‌رگی ئاینیان به‌به‌ری كاره‌كانی خۆیان كردووه‌و وه‌ك خه‌لیفه‌و دڵسۆزی ئاین خۆیان ده‌ناساند، به‌ڵام له‌ ڕاستیدا ئامانجیان داگیركاری و فراوانكردنی قه‌ڵه‌مڕه‌ویان بووه‌، به‌ڵام به‌هۆی دڵسافی‌و دینداری كورده‌وه‌ ئه‌م لایانه‌یان ده‌قۆسته‌وه‌، بۆ نموونه‌ عوسمانیه‌كان وه‌ك خه‌لافه‌ت خۆیان ده‌رده‌خست‌و دژایه‌تی كردنی عوسمانیان به‌ دژایه‌تی كردنی ئیسلام‌و قورئان لێكده‌دایه‌وه‌، هه‌روه‌ها سه‌فه‌ویه‌كانیش وه‌ك ده‌وڵه‌تێكی ئاینی له‌سه‌ر مه‌زهه‌بی شیعی، به‌رگری كردنیان له‌ ئاین كردبووه‌ دروشمی سه‌ره‌كی خۆیان.


ئەگه‌ر سه‌یر بكه‌ین له‌ ئێستاشدا ئه‌م دیارده‌یه‌ هه‌ست پێده‌كه‌ین، بۆ نموونه‌ ئێران خۆی به‌ پارێزه‌ری ئاین‌و توركیاش خۆی به‌ میراتگری خه‌لافه‌ت ده‌زانێت.

 

ناڕاستگۆیی زلهێزه‌كان

ئه‌و وڵاتانه‌ی كه‌ مامه‌ڵه‌یان له‌گه‌ڵ كورد كردووه‌، هیچ كات ڕاستگۆ نه‌بوون له‌گه‌ڵیداو ته‌نها بۆ مه‌به‌ستی خۆیان به‌كاریان هێناو دواتر له‌ به‌ڵێنه‌كانیان په‌شیمان بوونه‌ته‌وه‌، كێشه‌یه‌كی تری كوردیش ئه‌وه‌ بووه‌ كه‌ ڕێكه‌وتنامه‌كان هه‌مووی به‌ زاره‌كی بووه‌و هیچ نوسراو و ڕێكه‌وتنامه‌یه‌ك له‌ نێوانیان ئیمزا نه‌كراوه‌، بۆیه‌ وڵاتانی زلهێز زۆر به‌ ئاسانی له‌ به‌ڵێنه‌كانیان په‌شیمان ده‌بوونه‌وه‌.

هۆكارێكی تریش هه‌ر تایبه‌ت به‌ وڵاتانی داگیركه‌ر ئه‌وه‌ بووه‌ كه‌ ئه‌وان پرسی كوردو گه‌یشتن به‌ مافه‌كانی كورد له‌ ئه‌جێنده‌ی كاره‌كانیان نه‌بووه‌و وه‌ك لایه‌نێكی سه‌ره‌كی سه‌یری پرسی كوردیان نه‌كردووه‌.

 


شۆڕشه‌كانی كورد تۆكمه‌ نه‌بوون

زۆربه‌ی هه‌ره‌ زۆری شۆڕشه‌كانی كورد عه‌فه‌وی بوون‌و له‌سه‌ر بنه‌مایه‌كی پته‌و نه‌هاتوونه‌ته‌ بوون، كورد به‌ درێژایی مێژوو كه‌ چه‌كی هه‌ڵگرتووه‌، نه‌یزانیوه‌ بۆچی چه‌ك هه‌ڵده‌گرێت و بۆچی شه‌ر ده‌كات و له‌ پێناو چیدا گیانی خۆی به‌خت ده‌كات.

،،

شۆڕشه‌كانی كورد " گروپ، خێڵ، ده‌سته‌یه‌ك... هتد) هه‌وڵی ئه‌وه‌یان داوه‌ له‌ ده‌سه‌ڵاتی ئه‌و كاته‌ یاخی ببن‌و دواتر ناوی شۆڕشیان لێناوه‌، هه‌روه‌ها ئه‌م شۆڕشانه‌ زۆر لۆكاڵی بوون‌و ته‌نها له‌ ناوچه‌یه‌كی دیاری كراودا چالاكیان هه‌بووه‌و خاوه‌ن بنه‌مایه‌كی به‌هێزو ستراتیژیه‌كی درێژ خایه‌ن نه‌بوون، بۆیه‌ به‌ ساناترین هۆكار ڕوخاون


شۆڕشه‌كانی كورد " گروپ، خێڵ، ده‌سته‌یه‌ك... هتد) هه‌وڵی ئه‌وه‌یان داوه‌ له‌ ده‌سه‌ڵاتی ئه‌و كاته‌ یاخی ببن‌و دواتر ناوی شۆڕشیان لێناوه‌، هه‌روه‌ها ئه‌م شۆڕشانه‌ زۆر لۆكاڵی بوون‌و ته‌نها له‌ ناوچه‌یه‌كی دیاری كراودا چالاكیان هه‌بووه‌و خاوه‌ن بنه‌مایه‌كی به‌هێزو ستراتیژیه‌كی درێژ خایه‌ن نه‌بوون، بۆیه‌ به‌ ساناترین هۆكار ڕوخاون.

 

لاوازیی كورد و به‌هێزی داگیركه‌ران

كورد به‌ درێژایی مێژوو، خاوه‌ن هێزێكی گه‌وره‌ی سه‌ربازی‌و ئابووری‌و په‌یوه‌ندی ده‌ره‌كی نه‌بووه‌، هه‌میشه‌ پشتی به‌ وڵاتانی تر به‌ستووه‌، له‌ به‌رامبه‌ریشدا وڵاتانی دژی له‌ ڕووی سه‌ربازی و ئابوری و په‌یوه‌ندییه‌وه‌ به‌هێز بوون‌و له‌ كاتی شه‌ڕو ناكۆكییه‌كاندا زۆر به‌ ئاسانی به‌سه‌ر كورددا زاڵ ده‌بوون.

ئه‌وان سه‌ره‌وه‌ كۆمه‌ڵێك هۆكاری سه‌ره‌كین، به‌ڵام ده‌توانین چه‌ندین هۆكاری تری ( ئابووری‌و سیاسی‌و كۆمه‌لایه‌تی‌و هه‌ژاری‌و نه‌بونی رۆشنبیری پێوویست... هتد ) وه‌ك هۆكاری شكستی كورد سه‌یر بكه‌ین.

چاره‌سه‌ر

كورد پێوویسته‌ به‌ دیدگایه‌كیتر و له‌ ڕوانگه‌كانی تره‌وه‌ مامه‌ڵه‌ له‌گه‌ڵ وڵاتانی هه‌رێمی‌و نێوده‌وڵه‌تی بكات و سود له‌ هه‌ڵه‌ مێژووییه‌كان وه‌ربگرێت، ئه‌ویش خۆی له‌ چه‌ند خاڵێكی گرنگدا ده‌بینێته‌وه‌ كه‌ ئه‌مانه‌ن:


1- هه‌موو ئه‌و له‌مپه‌رو كێشانه‌ی كه‌ له‌ بڕگه‌ی دووه‌مدا ئاماژه‌مان پێكردووه‌و بوونه‌ته‌ هۆی له‌بار بردنی به‌دیهاتنی خواسته‌كانی كورد نه‌هێڵێت دووباره‌ ببێته‌وه‌.


2- زۆر گرنگه‌ كورد نێو ماڵی ناوخۆیی خۆی ڕێك بخات و په‌رته‌وازه‌یی نه‌هێڵێت كه‌ به‌ درێژایی مێژوو زیانی له‌ خه‌باتی داوه‌، چونكه‌ ناوخۆییه‌كی به‌هێز زامنی سه‌ركه‌وتنی ده‌ره‌وه‌یه‌.


3- پێویسته‌ كورد، ستراتیژیه‌تیه‌كی درێژخایه‌ن دابڕێژێت و خۆی نه‌داته‌ ده‌ست قه‌ده‌ر و به‌پێی به‌رنامه‌و سیاسه‌تی خۆی مامه‌ڵه‌ بكات و له‌ ئامانجه‌ گرنگه‌كانی خۆی لانه‌دات.

،،

پێویستە کورد به‌ وریایه‌كی زیاتره‌وه‌ مامه‌ڵه‌ له‌گه‌ڵ ئه‌و وڵاتانه‌ بكات كه‌ ئه‌زمونێكی تاڵی له‌گه‌ڵیدا هه‌یه‌، بۆ نموونه‌ ڕووسه‌كان زۆرترین زیانیان له‌ پرسی كورد داوه‌و زۆرترین كات له‌ پشت هه‌ره‌سهێنانی شۆڕش‌و حوكمی كورده‌وه‌ بوون.


4- له‌گه‌ڵ هاوپه‌یمانه‌كانی چیتر ڕێكه‌وتنامه‌ی ژێر به‌ژێرو زاره‌كی نه‌كات و به‌ شێوه‌یه‌كی روون و نوسراو ڕێكه‌وتنامه‌ له‌سه‌ر به‌رژه‌وه‌ندی دوولایانه‌ ئیمزا بكات.


5- ئامانجی سه‌ره‌كی خاك‌و گه‌لی كوردستان بێت و به‌ هه‌ندێك سودی مادی رازی نه‌بێت.


6- له‌ حوكڕانیدا مۆدێلێكی نوێ پێشكه‌ش بكات كه‌ جیاواز بێت له‌ مۆدێله‌ دیكتاتۆرییه‌كانی ڕۆژهه‌لاتی ناوه‌ڕاست.


7- به‌ وریایه‌كی زیاتره‌وه‌ مامه‌ڵه‌ له‌گه‌ڵ ئه‌و وڵاتانه‌ بكات كه‌ ئه‌زمونێكی تاڵی له‌گه‌ڵیدا هه‌یه‌، بۆ نموونه‌ ڕووسه‌كان زۆرترین زیانیان له‌ پرسی كورد داوه‌و زۆرترین كات له‌ پشت هه‌ره‌سهێنانی شۆڕش‌و حوكمی كورده‌وه‌ بوون.

 

author photo

 بروانامەی بەکالۆریۆس لە زمان و ئەدەبی عەرەبی

ئەزمونی پێنج ساڵ کاری ڕۆژنامەوانی و وەرگێڕان