عوسمان خان لە خەونی تەقاندنەوەی توالێتەوە بۆ شەڕە چەقۆ

عوسمان خان لە خەونی تەقاندنەوەی توالێتەوە بۆ شەڕە چەقۆ

341 خوێندراوەتەوە

تایبەت دیبلۆماتیك

دوای نیوەرۆی رۆژی هەینی رابردوو خەڵكی سەرقاڵی وێنەگرتن و كەیفسازی بوون لە سەر پردی لەندەن كە هەر دوو بەشی شارەكە بە یەكەوە دەبەستێتەوە لە سەر رووباری بەناوبانگی تایمز لە ناكاو گەنجێك بە چەقۆ پەلاماری خەڵكیدا لە ئەنجامدا دوو كەسی كوشت و سێ دیكەی بریندار كرد، بەڵام خەڵكی زوو پەلاماریاندا و بە زەویاندادا تا هێزەكانی پۆلیس گەیشتنە شوێنی رووداوەكە و تەقەیان لە هێرشبەرەكە كرد.

بەردەوام هێرش و پەلامار و شەڕە چەقۆ لە لەندەنی پایتەختی بەریتانیا روودەدات كە ژمارەی دانیشتووانەكەی زیاتر لە 8 ملیۆن كەسە، بەڵام هەمیشە میدیاكانی ئەو وڵاتە بە پێی ناسنامەی هێرشبەرەكە مامەڵە لەگەڵ ناونانی رووداوەكە دەكەن ئەگەر موسڵمان بێت ئەوا هێرشێكی تیرۆرستییە ئەگەر سپی پێست بێت هێرشێكی رەگەزپەرستییە ئەمەش بە پێی قسەی رێكخراوە ئیسلامییەكان و رەوندی موسڵمانی بەریتانیا، بەڵام دەسەڵاتدارانی لەندەن ئەو قسانە رەتدەكەنەوە باشترین بەڵگەش شارەداری لەندەن سدیق خان كە موسڵمانەو بە رەگەز پاكسانییە.

 

لە ژێر چاودێری پۆلیسیش بووە


هەر زوو ناسنامەی هێرشبەرەكە ئاشكرا بوو كە گەنجێكی بەرەگەز كشیمری- پاكستانییە ناوی عوسمان خانە و تەمەنی 28 ساڵە لە ساڵی 2012 بە تۆمەتی هەوڵدان بۆ تەقاندنەوەی بۆرسەی لەندەن دادگا سزای دابوو بەڵام لە رێگای پارێزەرەوە پێداچوونەوەی بە بڕیارەكە كرا، بۆیە دادگا لە كۆتای ساڵی رابردوو عوسمان خانی ئازاد بەڵام پۆلیس بۆ سەلامەتی ئاسایشی كۆمەڵگا ئامێرێكی ئەلیكترۆنی لە قاچی بەستبوو بوو كە بەردەوام لە ژێر كۆنترۆڵی پۆلیس بووە.

 

ئەو گەنجەی ویستی یارمەتی عوسمان خان بدا بە دەستی ئەو كوژرا


یەكێك لە قوربانییەكان ناوی (جاك مارێیت) تەمەنی 25 ساڵە دەرچووی زانكۆی كامبرێجە و رێكخەری كۆنفرانسێكی تایبەت بوو بۆ ئاشتكردنەوە و تێكەڵكردنەوەی زیندانییەكان بە كۆمەڵگای بەریتانیا یەكێك لەو كەسانەی بەشداری كۆنفرانسەكەی كرد بوو عوسمان خان بوو، كە كۆنفرانسەكە لە لایەن پەیمانگایەكی سەر بە زانكۆی بەناوبانگی كامبرێج سازكرا بوو كە لە دوای تەواو بوونی كۆنفرانسەكە عوسمان خان دوو كەسی كوشت كە یەكێكیان ئەو گەنجە بوو كە دەنگدانەوەی گەورەی لە میدیای بیندراو نووسراو خوێندراوی بەریتانیا لێكەوتەوە كە ئامانجی ئەو گەنجە هاوكاری و یارمەتیدانی عوسمان خان و هاوشێوەیەكانی بووە تا تێكەڵی كۆمەڵگا ببنەوە كەچی یەكەم قوربانی دەستی عوسمان خان ئەو بوو.

هەر لە چركە ساتی روودانی تاوانەكە پۆلیس دەستی بە لێكۆڵینەوە و ماڵەكەی عوسمان خان كردو رایگەیاند هیچ بەڵگەو سەرەداوێكیان لە بارەی رووداوەكە دەست نەكەوتووە. لە لایەن خۆشییەوە بۆریس جۆنسۆن، سەرۆكوەزیرانی بەریتانیا بە خێرای لە كەمپینی هەڵبژاردنی حیزبەكەی گەرایەوە لەندەن و قسەی بۆ رۆژنامەنووسان كرد و گوتی:" نابێ‌ هەرگیز ئەو تاوانبارانە ئازاد بكرێن كە بە تاوانی گەورە سزا دراون".

 

پیلانی تەقاندنەوەی بۆرسەی لەندەنی هەبوو


ساڵی 2010 بە رێكەوت دەزگا ئەمنییەكانی بەریتانیا گوێ لە گفتوگۆی دوو هاوڵاتی بەریتانی دەگرن كە گفتوگۆ لە سەر دروستكردنی بۆمب دەكەن، دواتر 9 كەس كە بە رەگەز پاكستانی، بەنگلادشی و كشمیر دەستگیر دەكرێن كە سەرجەمیان رەگەزنامەی بەریتانیا هەیە لە بەردەم دادگا دان بەوە دەنێن كە پلانی تەقاندنەوەی بۆرسەی ئاڵوگۆری دراوی لەندەنیان دارشتووە لە رێگای دانانەوەی بۆمب لە توالێتی بۆرسەی لەندەن، چەند كەسێكی دیكەش پارەیان كۆكردووتەوە بۆ دروستكردنی سەربازگە لە كشمیر بۆ راهێنانی بەكارهێنان و تەقاندنی چەك هەروەها پلاندینان هەبووە بۆ ناردنی پۆستی بۆمبرێژكراو بۆ باڵیۆزخانەی ئەمریكا لە لەندەن، هەر بۆیە دادگا هەر 9 كەسەكەی سزادا كە سزای هەموویان دەگەیشتە 120 ساڵ یەكێك لەو كەسانەی سزادرا بوو عوسمان خان بوو كە سزاكەی دیاریكراو نەبوو واتە هەتاوەكو مەترسی لە سەر كۆمەڵگا هەبێت ئازاد ناكرێت بەڵام لە ساڵی 2011 دیڤید كامیرون سەرۆكوەزیرانی ئەو كاتەی بەریتانیا یاساكەی هەڵوەشاندنەوە بۆیە عوسمان خان سوودی لەو یاسایە بینی لە مانگی 12ی ساڵی رابردوو ئازاد كراوە.

 

خوێندنی تەواو نەكردووە


دوای تێپەڕینی كەمتر لە 24 كاژمێر رێكخراوی داعش لە تیگرامەوە بەرپرسیارییەتی خۆی لە هێرشەكەی لەندەن بریج راگەیاندن وەكو تۆڵەیەك لە دژی ئەو هێرشانەی هاوپەیمانان دەكەینە سەر موسڵمانان لە سووریا، ئەگەرچی عوسمان خان ساڵی 2010 ئەندامی رێكخراوی قاعیدە بووە بە پێی لێدوانی بەرپرسانی ئەمنی بەریتانیا عوسمان خان پەیوەندی لەگەڵ سەركردەیەكی قاعیدە هەبووە كە بەرپرسی پەیوەندییە دەرەكییەكانی ئەو رێكخراوە بووە.
عوسمان خان خوێندنی تەواو نەكردووە و هیچ بروانامەیەكی بە دەستنەهێناوە كاتێك باوكی نەخۆش بووە لە پاكستان لای ئەو بووە پاشان گەراوەتەوە شاری ستون، جگە لەوە عوسمان خان كەسی نزیكی داعی ئیسلامی (ئەنجەم چۆدری) بوو كە لە ساڵی 2016 بە تۆمەتی تیرۆر و هاوسۆزی بۆ داعش سزای پێنج ساڵ و نیوی سزای بە سەر سەپاندن كە دوای تەواوكردنی نیوەی سزاكەی بە مەرج لە ساڵی 2018 ئازادكرا كە بەلای بەرپرسانی بەریتانیا داعی داعشی و گەورەترین مەترسییە لە سەر ئاسایشی بەریتانیا بۆیە بەردەوام لە ژێر چاودێری پۆلیس و دەزگا ئەمنییەكانی ئەو وڵاتەیە.