شێرکۆ جەودەت: جیاکردنەوەی دەعوەو سیاسەت لەناو یەکگرتوودا بڕیاری لەسەر نەدراوە

شێرکۆ جەودەت: جیاکردنەوەی دەعوەو سیاسەت لەناو یەکگرتوودا بڕیاری لەسەر نەدراوە

451 خوێندراوەتەوە

وابڕیارە لەکۆتایی ئەم مانگەدا یەکگرتووی ئیسلامی کوردستان کۆنگرەی خۆی ببەستێت، دکتۆر شێرکۆ جەودەت ئەندامی سەرکردایەتی ئەو حیزبە بۆ دیبلۆماتیک مەگەزین دەدوێت و باسلەوە دەکات کە پرسی جیاکردنەوەی دەعوەو سیاسەت لەناو یەکگرتوودا بڕیاری لەسەر نەدراوە.

سەبارەت بە ئامادەکاریەکانی کۆنگرەی یەکگرتووی ئیسلامی کوردستان، ئەو ئەندامەی سەرکردایەتی یەکگرتوو وتی:

" ئامادەکارییەکان دیارە، هەروەک کۆنگرەیەکی تری حیزبی سیاسی دەکرێت، چوار ساڵ جارێک بەپێی پەیڕەوی ناوخۆی یەکگرتووی ئیسلامی کوردستان، هەڵبژاردنی ئەندامانی کۆنگرە لەسەر ئاستی مەڵبەندەکان ئەنجام دراوە، ئامادەکاری ئیداری کراوە، پەیڕەو و پڕۆگرامی نوێ و ڕەشنووسی نوێ ئامادەکراوە بۆ ئەوەی لەکۆنگرە بڕیاری لەسەر بدرێت، ئەمانە هەموو ئەو ئامادەکارییانەن کە لەقۆناغی ڕابوردو ئەنجامدراوە، ڕێژەی ئەندامانی کۆنگرەش نزیکی ٩٠٠ کەس دەبن".

سەبارەت بەگۆڕانکارییانەی کە بڕیارە لەکۆنگرەدا بکرێت، دکتۆر شێرکۆ جەودەت وتی:

" گۆڕانکاری تەبعەن لە هەیکەلیەت دەکرێت، گۆڕانکاری لە پەیڕەو و پڕۆگرام دەکرێت، گۆڕانکاری لەشێوازی ئیدارەدان ئەکرێت، ئەولەویات بۆ قۆناغی داهاتوو، بۆ پەروەردەو گەشەپێدانی کۆمەڵگەو چاکسازی کۆمەڵایەتی دەبێت، ئەوە گرنگترین ئەو گۆڕانکاریانەیە کە کۆنگرەی ئەمجارە دەیکات".

دکتۆر شێرکۆ جەودەت، باسلەوەش دەکات کە جیاکردنەوەی دەعوەو سیاسەت جارێ بڕیاری لەسەرنەدراوەو دەڵێت:

" خۆی یەکگرتووی ئیسلامی کوردستان جەمعی ئیسلاحە، وە پسپۆڕی چاکسازیە، دروشمی یەکگرتووی ئیسلامی کوردستانە ئەمێنێتەوە سەر ئەوەی جیاکردنەوەی سیاسەت و مومارەسەی سیاسی لەوەعزو ئیرشاد و گەشەپێدانی خەڵکدا، ئەوە یەکێکە لەفیکرەکان، کە لەناو یەکگرتووی ئیسلامی کوردستان تەبەنی نەکراوەو بڕیاری لەسەر نەداوە".

دەربارەی بوونی ناکۆی لەناو یەکگرتووشدا، شێرکۆ جەودەت دەڵێت:

" یەکگرتوو حیزبێکە، خەڵکەکەی لە پەیوەستییەوە کاری تێدا دەکات، هیچ جۆرە بەرەیەک لەناو یەکگرتووی ئیسلامی کوردستان نییە، بەڵام جیاوازی بۆچوون و بیرکردنەوە تێگەیشتنەکان شتێکی سروشتیە".

 

author photo

ڕۆژنامەنوس