ئەو لێدوانانەی کۆمەڵگە دەهەژێنن

لە پەراوێزی لێدوانەكانی سەرۆكی حكومەتی هەرێمی کوردستان

ئەو لێدوانانەی کۆمەڵگە دەهەژێنن

869 خوێندراوەتەوە

مرۆڤی سیاسی لە ڕوانگەی بیرکردنەوەکانی خۆی نابێ ڕووداوەکان بخوێنێتەوە، دەبێ لە گەڵ ڕووداوەکان بە ژیرانە مامەڵە بکات. هەندێ کات پێویست دەکات پیاوی سیاسی بێدەنگی هەڵبژێرێ کە، بێدەنگ نەبێت و خوێندنەوەیەکی لۆژیکیانە بۆ پێشهاتەکان نەکات ئەوا خۆی و میلەتەکەی توشی کێشەی مەزن دەبن، کاتێ بمانەوێ کۆمەڵگەیەک ڕابهێنێین لەسەر ژیانێکی دیموکراسیانەو ڕێز گرتن لە بەهاکانی مافی مرۆڤ، دەبێت پرەنسیپەکانی دەوڵەت داری پەیڕوە بکەین، هەڵەیەکی بچوک ڕەنگە کارەساتێکی خراپ بقەومێنێ .

لە دوای ڕووداوەکانی 17ی شوباتی ساڵی 2011 و خۆپێشاندانەکانی سلێمانی هەرێمی کوردستان کەوتە دۆخێکی ترەوە ، دۆخێک هێشتا ئاسەوارەکانی بە ناجێگیری ماونەتەوە، چارەسەر نەبونی ئەو دۆخە ناجێگیرە ڕەنگە بەشێکی فراوانی پەیوەندی بەو جۆرە سیاسەتە ڕەق و زبرە هەبێ کە، حزبەکانی کوردستان لەسەرەتای دامەزراندنی سیستەمی حکومڕانی هەرێم کاریان لەسەر کردو بۆ دەست گرتن بەسەر کۆی جومگەکانی هەرێم ،ئامادە نین لە پێناو باشتر کردنی دۆخەکە هیچ سازشێک لەسەر ئەوعەقڵیتە بکەن کە لەسەرەتاوە دەستیان بەکار کرد.

،،

کاتێ لێدوانێک لە بەهای ئەو کەسانە کەم دەکاتەوە کە، پێیان وایە مافیان خوراوە ئەوا لە ناخیان رق و توڕەیی زیاتر هەڵدەگرن ئەمەش وا دەکات ئاسایشی کۆمەڵایەتی بکەوێتە مەترسیەوە کە خزمەت بەهیچ لایەک ناکات، بۆیە لێدوانی سیاسی و پیاوی دەوڵەت ئەبێت خوێندنەوەی جدی بۆ بکرێ بەر لەوەی ببێتە هۆکاری ئاشوب و ناڕەزایی .

لەگەرمەی روداوەکانی 17 ی شوباتدا دەستەواژەی تێکدەر لە رێگەی بەیانامەی حزبەکان گوێبیست بوین، لەبەر ڕانەهاتنی دەستەڵاتدارانی هەرێم بە ڕێزگرتنی مافی هاووڵاتی بوون، هێندەی نەبرد ڕووی ئەو دەستەڵاتەی زیاتر دەرخست کاتێ وەزیری پێشمەرگەی ئەو کاتی حکومەت لەبەردەم پەرلەمان ووتی " هێزمان نەجوڵاندووە بەخوێنی شەهیدان دەبابەمان نەبردوە ئەوەی بردراوە ناقیلەی ئەشخاسە" ئەو وتانە لەوکات میدیای ئۆپۆزیسیون وەک تەنزێک شەوانە لە رێگەی تیڤیەکانیانەوە چەند بارەیان دەکردەوە.

کاتێک سکرتێری مەکتەبی سیاسی پارتی دەڵێت ئەو دەستانە دەبڕین بیانەوێ پەلاماری بارەگاکانمان بدەن، ئەمە وادەكەوێتەوە پیرۆزی بارەگا لە پیرۆزیەکانی مرۆڤ گەورەتر بن، ئەمەش دەمانخاتە بەردەم ئەو پرسیارەی ئەرێ لە سیستەمی دیموکراتی دەست بڕین لەکوێ ی داد گەری جێی دەبێتەوە ؟

لەگەرمەی بڕیار دانی سەربەخۆیی ئابوری هەرێم سەرۆکی حکومەت موفلیس بونی بەغدای ڕاگەیاند، و جێگرەکەشی بەسەر لەقاندن ڕاستی قسەکانی دوپات كردەوە،ئەمەش وای کرد تا ئێستاش ئەو لێدوانە لە بەرچاومان ون نەبوبێ، ئەو لێدوانە کاریگەریەکی خراپی لەسەر بەشێک لە هاووڵاتیانی هەرێم دروست کرد و پێیان وابوو ڕەنگە عێڕاق توشی ئیفلاس و دارووخانی ئابوری بێتەوە، بەڵام هێندەی پێ ناچێ ئەو لێدوانە پێچەوانە دەبێتەوە، کاتێ بەرپرسانی عێراق ئەوە ڕەت دەکەنەوەو هاووڵاتیانی خۆیان دڵنیا دەکەنەوە کە، بەهیچ شێوەیەک دەست بۆ قوتی ژیانیان نابردرێت، کەچی لە هەرێم دوای سێ ساڵ لەو لێدوانە هێشتا هاووڵاتیان ڕۆژانە ئەو وتەیەی سەرۆک حکومەت و سەر لە قانەکەی جێگرەکەی شرۆڤە دەکەن .

له دواین لێدواندا مامەڵە کردنی خۆپیشاندەران بەچەقۆو دەمانچە لە سەرۆکی حکومەت گوێبست دەبین ، هەرزوو کاردانەوەکان فراوان دەبن و لە سۆشیال میدیا دەبێتە جەنگێکی دووبەرە، دەکرا لە شوێنی چەقۆو دەمانچە یاسا بەرکارەکانی حکومەت وەڵامی پێشێلکاریەکان شوێنی خۆی گرتبا، ئەوانەی کە داوای مافەکانی خۆیان دەکەن چینێکی هەژار و گیرفان بەتاڵی بەوەفای ئەو وڵاتەن، برسی بوون ئازارێکی جەستەیی و فشارێکی دەرونی ئاڵۆز دروست دەکات، کاتێ لێدوانێک لە بەهای ئەو کەسانە کەم دەکاتەوە کە، پێیان وایە مافیان خوراوە ئەوا لە ناخیان رق و توڕەیی زیاتر هەڵدەگرن ئەمەش وا دەکات ئاسایشی کۆمەڵایەتی بکەوێتە مەترسیەوە کە خزمەت بەهیچ لایەک ناکات، بۆیە لێدوانی سیاسی و پیاوی دەوڵەت ئەبێت خوێندنەوەی جدی بۆ بکرێ بەر لەوەی ببێتە هۆکاری ئاشوب و ناڕەزایی. 

 

author photo

 

نوسەر و ڕۆژنامەنوس