شەوی هێرشەكەی ئێران... لە كۆشكی سپی چی گوزەرا؟

شەوی هێرشەكەی ئێران... لە كۆشكی سپی چی گوزەرا؟

579 خوێندراوەتەوە

وەرگێرانى:گۆران قادر

كەناڵی (CNN)ی ئەمریكا لە ڕاپۆرتێكیدا،وتوێژی نهێنی بەرپرسانی باڵای ئەمریكای دوای هێرشە موشەكیەكەی ئێران بۆ سەر بنكەكانی ئەمریكا لە عیراق ئاشكرا كرد، هەروەها باسی لە كۆبوونەوەی سەرۆك و بەرپرسانی باڵای ئەمریكا كردووە، كە ئەگەر سەربازێك كوژرابێت چۆن وەڵام بدەنەوە،هەروەها ئەوەش ئاشكرا دەكات كە ترامپ وتارە ئامادەكراوەكەی دەستكاری كردووە،ئەمە جگە لەوەی باس لە پەیامێكی ئێران بۆ ئەمریكا دەكات، كە لە ڕێگای چەند وڵاتێكەوە ناردوویەتی .


كەناڵەكە لە سەرەتای ڕاپۆرتەكەیدا ئاماژە بەوە دەكات، كە مانگە دەستكردەكانی هەواڵگری ئەمریكا پێش هێرشەكە جوڵەی ئێرانیان ئاشكرا كردووە، كە نیازی هێرشی موشەكی بالیستی كورت مەودایان هەیە، بۆیە ئەمریكا هەستی بەوە كردووە، كە ئێران بە زوترین كات هێرشێكەی ئەنجام دەدات، هەروەها حكومەتی عیراقیش پێش وەختە ئەمریكای لەم هێرشە ئاگادار كردبوەوە، زانیاری مانگە دەستكردەكان و فڕۆكەكانی ئەمریكاش ئەوەیان پشت ڕاستكردەوە، كە ئێران هەردوو بنكەی عەین ئەسەد و بنكەیەكی دیكە لە هەولێر دەكاتە ئامانج.


سەرچاوەیەك بۆ كەناڵە ئەمریكەكەی ئاشكرا كردووە، كەدوای ئەم زانیاریانە بە چەند خولەكێكی كەم هۆشداری بە بنكەكان دراوە، كە بكەونە ئەو پەڕی ئامادەباشیەوە،بۆیە ئەوانیش كەوتنە ئەوپەڕی خۆ ئامادەكردن و خۆیان گەیاندۆتە شوێنی خۆحەشاردان.


كاتژمێر 7:30 خولەك بە كاتی ئەمریكا، ڕاگەیاندنی فەرمی ئێران ئاشكرای كرد كە: ئێران بە زیاتر لە دە موشەكی بالیستی هێزەكانی ئەمریكا و هاوپەیمانانی لە عیراق كردۆتە ئامانج.
لێرەدا ئەو پرسیارە لای هەمووان دروست دەبێت، كە ئیدارەی ئەمریكا هەڵوێستی چی دەبێت، لەم كاتەدا بۆ وەشاندنی گورزی سەربازی كۆبوونەوەیەك لە نێوان خاوەن بڕیارەكانی كۆشكی سپی بە خێرایی ڕێكخرا.


لە كاتی كۆبوونەوەكەدا كە تەنها دوو خولەك بوو دەستی پێكردبوو،پەیامێكی ئێران گەیشت، كە هەڵوێستی ئەمریكای لە هێرشێكی دراماتیكی بۆ پاشگەزبوونەوە گۆڕی، ئێران لە ڕێگای كەناڵەكانی پەیوەندییەوە دووپاتی كردبووەوە كە زیانەكان زۆر سنوردار دەبن.


ترامپ لە بەیانی ڕۆژی چوار شەممەدا وتی:" وا دیارە ئێران دەوەستێت، ئەمەش بۆ هەموولایەك كارێكی باشە، هەروەها بۆ جیهانیش شتێكی زۆر زۆر باشە".
كەناڵی (CNN) لە ڕاپۆرتەكەیدا ئاماژە بەوە دەكات، كە چەندین گفتوگۆ و پەیوەندی لە نێوان بەرپرسانی كۆشكی سپی و بەرپرسانی بیانی ئەنجامدراوە، ئەمە جگە لەوەی كە لە نێوان خۆشیاندا بیروبۆچوونیان ئاڵوگۆڕ كردووە.

 

لایەنە پەیوەندی دارەكان ئاگادار كرانەوە:
دوای یەك كاتژمێر لە هێرشەكە، بەرپرسانی ئەنجومەنی نوێنەران لە دۆخەكە ئاگادار كرانەوە، هەروەها نانسی پیلۆسی سەرۆكی ئەنجومەنەكە لەگەڵ ژمارەیەكی زۆری دیموكراتەكان گفتوگۆیان لەسەر دۆخەكە كردووە، هەروەها ئەوەشی پێڕاگەیاندوون كە ئێران هێرشی موشەكی كردۆتە سەر بنكە سەربازییەكانی ئەمریكا لە عیراق.


لە نێو ئامادەبواندا دانكیلدی ئەندامی ئەنجومەنی نوێنەران هەبووە، كە بە كەناڵی (CNN)ی ڕاگەیاندووە، نانسی بۆ زانینی دواین گۆڕانكایەكان گفتوگۆی لەگەڵ ئامادەبواندا ڕاگرتووە، پەیوەندی بە مایك پێنس جێگری سەرۆكەوە كردووە و زانیاریەكانی هێرشەكەی پێداوە.
هەر لەو كاتەدا چاك شومەر سەركردەی كەمینەكان لەلایەن مایك پێنسەوە پەیوەندی پێوە كراوە و لە هێرشەكە ئاگادار كراوەتەوە.
لەم كاتەدا ئەندامانی كۆمارییەكان ڕاستەخۆ لەلایەن سەرۆك ترامپەوە زانیارییەكانیان پێدەدرا.


لە پنتاگۆن، مارك ئیسپەر وەزیری بەرگری ئەمریكا چاوی بە فەرماندەكانی ئەركانی هاوبەش و بەرپرسانی باڵای وەزارەتی بەرگری كەوت، ئەو لەو چاوپێكەوتندا تەنها زانیارییەكانی پێدابوون.
دوای كەمتر لە یەك كاتژمێر نوسینگەی ئیسپەر پەیوەندی بە عادل عەبدولمەهدی سەرۆك وەزیرانی عیراقەوە دەكات، كە لە چەند ڕۆژی ڕابردوودا ڕەخنەی لە هێرشی ئەمریكا گرتبوو ڕایگەیاندبوو:" هێرشەكەی ئەمریكا پێشێلكاری تەواوی مەرجی مانەوەی ئەمریكایە لە عیراق".


ژووری بڕیار:
كاتژمێر 7:30 خولەك مایكپۆمپیۆ یەكەمین كەس بوو كە گەیشتە كۆشكی سپی، لە ڕێگادا پۆمپیۆ پەیام و زانیاریەكانی لە دوو مۆبایلەكەیەوە دەخوێندەوە، دواتریش دوو ئۆتۆمبێلی دیكە گەیشتن كە ئیسپەر و میلی تێدابوو.
دوای كاتێكی كەم بەرپرسانی باڵا لە ئیدارەی ترامپ لە ژووری بڕیاردان كۆبوونەوە،لە پاڵ پۆمپیۆ و ئیسپەر و میلی،ڕۆبەرت ئۆپراین ڕاوێژكاری ئاسایشی نەتەوەیی و جۆزیف ماگوایر بەڕێوەبەری دەزگای هەواڵگری نەتەوەیی و میك مۆڵفانی سەرۆكی ئەركان بەوەكالەت ئامادەبوون.


ئامانجی یەكەمی كۆبوونەوەكە ئەوەبوو، چی بكرێت ئەگەر سەربازێكی ئەمریكی كوژرابێت، سیناتۆرێك كە لە كۆبوونەوەكەدا ئامادەبووە وتی: "سەرۆك بە تەواوی ئامادە بوو هێرش بكاتە سەر دامەزراوە ئێرانیەكان، ئەگەر بێتو یەك ئەمریكی كوژرابێت، هەرچەندە دڵنیابوون لە كوژرانی سەربازی ئەمریكی كاتێكی زۆری دەویست ، بەڵام زانیاریە سەرەتاییەكان ئەوەیان ئاشكرا كرد، كە هیچ سەربازێك نەبۆتە قوربانی".


نەكەوتنەوەی زیانی گیانی وای لە ئامادەبووانی كۆبوونەوەكە كرد، كەمێك ئارام ببنەوە، هەرچەندە كەسانێكی دیكە پێیان گرنگ بوو، هەر ئەو شەوە وەڵامی ئێران بدرێتەوە، بەڵام زۆرینەیان لەسەر ئەوە ڕێك كەوتن، كە تاوەكو زانیارییەكان بە تەواوی دەگات، وەڵامدانەوەی ئێران دوا بخرێت.
هەروەها سەرچاوە ئاگادارەكانی كۆبوونەوەكە ئاماژە بەوە دەكەن، كە ئامادەبوانی ژووری بڕیاردانەكە، توشی موفاجەئە بوون، چونكە ئێرانیەكان موشەكی كەم مەودایان هەڵداوە، بۆیە پێیان وابووە، ئێران لە هێرشەكانی بەردەوام دەبێت، ئەمەش وایكردووە كە ئارام گرتن بە پێویست بزانن.


دوای چەند كاتژمێرێك لە هێرشەكە، سەرۆك ترامپ دەیەوێت وتارێك بۆ ڕای گشتی پێشكەش بكات، بۆیە دەستی كردووە بە نوسینی ئەو قسانەی كە دەیەوێت لە وتارەكەیدا باسیان بكات، لەگەڵ بەردەوامی كۆبوونەوەی ترامپ لەگەڵ ڕاوێژكارەكانی لە ژووری بڕیارەكاندا، ئامادەكاری بۆ وتارەكەی ترامپ لە كۆشكی سپی دەستی پێكرد.


نزیكەی كاتژمێر 9ی شەو بە كاتی واشنتن، ترامپ پەیوەندی بە شارەزایانی یاسایی لە پارتی كۆماریەوە دەكات ، لە كاتژمێر 9:45 خولەكدا ترامپ تویتێكی بڵاو كردەوە كە نوسی بووی:" هەموو شتێك وەكو خۆی دەڕوات، موشەكەكان لە ئێرانەوە بە ئاراستەی دوو بنكەی سەربازی لە عیراق تەقێندراون،دیاری كردنی زەر و زیانەكان تاكو ئێستا، زۆر باشە!بەهێزترین سوپامان هەیە كە لە سەرانسەری جیهاندا لە هەموو شوێنێك بە باشی ئامادەن، سبەی بەیاننامەیەكمان دەبێت".

 
كەناڵەكان لەگەڵ ئێراندا:
ئێوارەی ڕۆژی سێ شەممە تاوەكو بەیانی چوار شەممە، ئێران لە ڕێگای سێ وڵاتەوە پەیوەندی بە ئیدارەی ترامپەوە دەكرد، یەكێك لەو وڵاتانە سویسرا و چەند وڵاتێكی دیكە بوون، پەیامەكانی ئێران ڕوون بوون: ئەوە یەكەمین وەڵامیان بوو، ئەوان لە ئێستاوە چاوەڕێن بزانن ئەمریكا چۆن وەڵامیان دەداتەوە.
وەك بەشێك لە وەڵامدانەوەكان،ئەمریكا بە ئێرانی ڕاگەیاندووە كە باش دەزانێت لە ڕێگای وەكیلەكانیەوە كۆنتڕۆلی ناوچەكەی كردووە، لە ناویاندا حزبوڵڵا.
سەرچاوەیەك بۆ كەناڵی (CNN) ئاشكرای كردووە، كە ئێران بە ئەمریكای وتووە ئەو بەرپرس نیە لە كاردانەوەی ئەو لایەنانە، بەڵام ئەمریكا بە ئاشكرا و ڕوونی بە ئێرانی ڕاگەیاندووە، كە ئەوان باوەڕ بە بیانووە ناكەن.


كاتژمێر یەكی بەیانی بە كاتی ڕۆژهەلاتی ئەمریكا هەواڵە گرنگەكە لە مەیدانی جەنگەوە گەیشت:" هیچ سەربازێك نەكوژراوە"
سەرلەبەیانی ڕۆژی دواتر، بۆ ئاشكرا كردنی زیانەكان،دووبارە كۆبوونەوە دەستی پێكردەوە، هەر لەو كۆبوونەوەیەدا ترامپ بڕیاری دا كە وەڵامی ئەمریكا بۆ هێرشەكەی ئێران سزای زیاتر دەبێت.


دواتر ترامپ دەست دەكات بە چاك كردنی ئەو قسانەی كە ویستی لە وتارەكەیدا پێشكەشی بكات، ڕۆژنامەنوسان لە بەردەم كۆشكی سپی بوون، ژمارەیەكی زۆری فەرمانبەرانی كۆشكی سپی ئامادەبوون، هەروەها فەرشی سوریش راخرا، بەرپرسانی ئاسایشی نەتەوەیی سەرۆك بە جلی سەربازیەوە لای مەنەسەی قسە كردنەكەوە بە ڕیز وەستان، دەرگا تەختەییەكە كرایەوە و سەرۆك دەركەوت و دەستی بە وتاردان كرد.