سه‌ردار پشده‌رى بۆ دیبلۆماتیك: ئه‌گه‌ر به‌ سه‌رۆك كۆمارى ئێران هه‌ڵبژێردرامایه‌ ئێرانم دابه‌ش ده‌كردو ئیمپراتۆریه‌تى میدیام ده‌ژیانده‌وه‌

سه‌ردار پشده‌رى بۆ دیبلۆماتیك: ئه‌گه‌ر به‌ سه‌رۆك كۆمارى ئێران هه‌ڵبژێردرامایه‌ ئێرانم دابه‌ش ده‌كردو ئیمپراتۆریه‌تى میدیام ده‌ژیانده‌وه‌

2152 خوێندراوەتەوە


" کاک فواد مەعسوم‌و کاک جەوهەر نامیق بەمنیان وت تۆ بۆت نییە باسی نەوتی کوردستان بکەیت"

دیدارى، سالار مه‌حمود


پێشمه‌رگه‌ى شۆڕشى ئه‌یلووله‌و خۆى به‌ خاوه‌نى بیرۆكه‌ى ده‌رهێنان‌و خۆماڵیكردنى نه‌وتى كوردستان ده‌زانێت، دووجار هه‌وڵیدا خۆى بۆ پۆستى سه‌رۆككۆمارى ئێران كاندید بكات، به‌ڵام وه‌كو خۆى ده‌ڵێت ده‌وڵه‌تى ئێران ناوی ئه‌وى نەخستووه‌ته‌ ناو لیستى ئەوانەی کە خۆیان هەڵبژاردووە.


له‌م دیداره‌یدا له‌گه‌ڵ " دیبلۆماتیك مه‌گه‌زین" سه‌ردار پشده‌رى كه‌ ئێستا له‌ له‌نده‌ن نیشته‌جێیه‌، ئاماژه‌ به‌وه‌ ده‌كات كه‌ له‌ ساڵى ١٩٦٤وه‌ مەلا مستەفا لوقمانی کوڕی بێدەسەڵات کردووه‌و دەسەڵاتی داوه‌ته‌ ئیدریسی کوڕی‌و ده‌شڵێت هەر کارێکی نارێک و پێک کرابێ دوای ١٩٦٤ ئەوا کاک ئیدریس بەرپرسیارەو کاک ئیدریس و ماڵی شێخ ئەحمەدی برای، مەلا مستەفایان هەڵپێچا بۆ ئەوەی هه‌ره‌سى شۆڕشى ئه‌یلوول ڕابگه‌یه‌نێت.


دیبلۆماتیک مەگەزین: پێمانخۆشە دەربارەی سەرەتای ژیان و تێکەڵاوبوونت بەکایەی سیاسی و پێشمەرگایەتی بۆمان بدوێیت؟ کەی و چۆن پەیوەندیت بە شۆڕشی ئەیلوولەوە کردو کەی وازت لە پێشمەرگایەتی هێنا؟.


سه‌ردار پشده‌رى: لەبەر ئەوەی بنەماڵەکەمان خاوەن رابردویه‌کی شۆڕشگێری و کوردایەتین، ئەوە وایکردوە کە من هەر لە مناڵییەوە لای لایەی شۆڕشگێریم بۆ کراوەو بەردەوام گوێم لە داستانی شۆڕشگێری بووە، ئەوەش وایکردووە لە قوتابخانە بچمە ناو یەکیەتی قوتابیانی کوردستانەوەو کە شۆڕشی ئەیلولیش هاتە کایە، لە ساڵی ١٩٦٣ وەک بچوکترین تەمەنی پێشمەرگە، بووم بە پێشمەرگە لە شوێنی باوکم، دوای گەرانەوەی لەشکری عێراقی بۆ قەڵادزە لە ١٩٦٥و کرانەوەی قوتابخانەکان، مەلا ماتۆڕ کە ئەو کاتە بەرپرسی ناوچەی پشدەر بوو، تەماحی کردە تفەنگەکەم و داوای لێکردم کە بگەرێمەوە بۆ قوتابخانەو بەردەوامبم لە خوێندن، منیش بەقسەم کردو بەردەوام بووم لە خوێندن تاکو کۆتایی ساڵی ١٩٦٦ و لەو کاتەدا سەرۆکی یەکیەتی قوتابیانی قەڵادزە بووم، بە دروستبوونی باڵی جەلالی، گڕۆڵەم کەوتە لێژی و لە کاتی تاقیکردنەوەی سەری ساڵدا لەسلەیمانی منیان گرت و نەیانهێشت تاقیکردنەوەکە بکەم، دوای دوو مانگ زیندانی لە بەکرەجۆ منیان گۆڕیەوە لەگەڵ رزگاری ئاورەحمانە ڕووتە (ئاورەحمانە ڕووتە خەڵکی کۆیە بوو و بەرپرسی بەکرەجۆ بوو)، رزگاری کوڕیشی لەدەرەوە لە لای هێزی رزگاری گیرابوو، دوای ئازاد کرانم، گەرامەوە قەڵادزەو بۆ سەرەتای ساڵی داهاتوو ١٩٦٧، من لە ماڵەوە لەگەڵ هەرسێک میوانمان (شەوقی کوێخا سمایلی تەلان، شێخ کەریمی کاکە حەمەی شەدەڵە و شێرکۆی شێخ عەلی شەدەڵە) دانیشتبووین، لەناکاو هێزێکی جەلالیەکان هاتبوونە قەڵادزەو هاتنە سەر ماڵی ئێمەو منیان گرت و بردیانم بۆ لای رەئیس حەمەدەمین، بەڵام شەوقی کوێخا سمایلی تەلان، شێخ کەریمی کاکە حەمەی شەدەڵە و شێرکۆی شێخ عەلی شەدەڵە هەرسێکیان لەگەڵم هاتن و منیان لە رەئیس حەمەدەمین وەرگرتەوە، کە بەرەڵا بووم، لەژێر چاودێری و قسەی ناشیرن دابووم و منیش نەمتوانی بەو شێوە دابنیشم و دوای مانگێک رۆیشتمە دەرەوەو بوومەوە پێشمەرگە لە ساڵی ١٩٦٧، لە ساڵی ١٩٦٨ هەندێ ئەکادیمیای شۆڕش کرایەوەو منیش بەشداریم کردو لە هەمووشیان پلەی یەکەمیم بەدەست هێنا (ئاکادیمیای تۆپ، ئەکادیمیای تەقەمەنی، ئەکادیمیای مامۆستای شۆڕش)، لەسەرەتادا بووم بە مامۆستای شۆڕش لە گوندی بێتواتە، دوای شەش مانگ دەرس گوتنەوە، شەڕ دەستی پێکردەوەو منیش بە عەلی شەعبانی فەرماندەی ناوچەی بیتوێن و خۆشناوەتیم وت، شەڕ هەڵگیرساو منیش وەک شۆڕشگێرێکی بەتوانا ناتوانم بەشدار نەبم، وازم لە مامۆستایەتی هێناو رۆیشتمە ناو سەنگەری پێشمەرگایەتیەوە، خەڵکی بیتوێن ئاگاداری چاپوکی منن لەشەڕەکاندا، لەسەرەتای ساڵی ١٩٦٩ گەرامەوە بۆ ناوچەی پشدەرو هێزی کاوە، لەوێش رۆڵێکی زۆر گەورەم بینی، بەتایبەتی لەشەڕی دۆڵی شەهیدانی پشتی سەنگەسەر کە لەشکری عێراقی دەویست لەوێوە بڕوات ماڵی مەلا مستەفای بارزان داگیر بکات لە دیلمان، من لەگەڵ پێنج پێشمەرگە سەنگەری خۆم چۆل نەکردو بەرگریم کرد تاکو مەلا مستەفای بارزانی پاسەوانەکانی خۆی ناردە هاوارم، پاسەوانەکان کاتێک چاپوکی و ئازایەتی و تۆپچیەتی منیان بینی، سەرسام بوون و هەموو ئەو چاپوکیانەیان بۆ مەلامستەفا گێڕابۆوەو مەلامستەفاش منی بە شیرینی بینی و دوای تێشکانی لەشکری عێراقی و هاتنەکایەی ١١ ی ئازار، مەلا مستەفا بەدوای داناردم لەبەر دەمی کاک ئیدریس و کاک مەسعودو و ٢٠ بەرپرسی تر، رێزێکی زۆری لێم گرت و خەڵاتی شۆڕشگێری کردم، لە پێکهێنانی ئەو ١٢ فەوجەی پاسەوانی سنور لەساڵی ١٩٧٠ کرامە ئەفسەر، لە هەڵگیرسانەوەی شەڕ لە ١٩٧٤ ناردیانم بۆ هێزی باڵەک و لە ناوچەی گەلی عەلی بەگ، بێخاڵ، کۆڕەک، هەندرێن، زۆزک، گۆرەز و سەرتیز، بە هەموو چەکێک بەشداری شەڕەکانم کردوەو لە مانگی ١١ ی ١٩٧٤یش کەوتمە ناو بێستانی ئەلغام و بە ٣٥ پارچە بریندار بووم، بەبرینداری ناردیانم بۆ ئێران و لەنەخۆشخانەی سەردەشت بووم کە لە مانگ ٣ی ١٩٧٥ شۆڕش هەرەسی هێناو بەدەست‌و پێی شکاو و باخەڵی بەتاڵ گەرامەوە قەڵادزە، لەو بەدواوە بارودۆخی تەندروستیم رێگای نەدام بەشداری لە پێشمەرگایەتی بکەمەوە.

دیبلۆماتیک مەگەزین: سەرنجت دەربارەی شۆڕشی ئەیلوول و خودی مەلا مستەفای بارزانی چییە؟.


سه‌ردار پشده‌رى: بۆ هەموو شۆڕشێک و سەرکردەی شۆڕشەکە، بەشی باشەی هەیەو بەشی خراپەشی هەیە، دەکرێ شۆڕشی ئەیلول وەک شۆڕشێکی نەتەوەی چاو لێبکرێ بۆ جوڵاندنەوەی هەستی نەتەوەیی، چونکە دوای هەرەسی کۆماری کوردستان هەستی نەتەوەیی لاواز بوو بوو، لەچاو شۆڕشەکانی تر، شەهیدو وێرانکاری کوردستان کەمتر بوو، ئەوەش دەگەرێتەوە بۆ زانایی و بەپەرۆشی مەلا مستەفای بارزانی کە سەرکردەی ئەو شۆڕشە بوو، من چەند جارێک لە نزیکەوە مەلا مستەفای بارزانی و هەردو کوڕەکەی (کاک ئیدریس و کاک مەسعود)، مام جەلال، دکتۆر قاسملوم دیوە، بەڵام ئەو هەیبەت و هەستە نەتەوەیی و ویژدانەی لە مەلا مستەفام دا دیوە، لەوانی تردا نەم دیوە، زۆرینەی خەڵکی کوردستانی گەورە مەلا مستەفای بەسەرۆکی خۆی دەزانێ و مەلا مستەفاش وەک سەرۆکێکی نەتەوەی هەڵسوکەوتی دەکرد، ئەوەی من ئاگادارم لە دوای ئەوەی کە مەلا مستەفا لوقمانی کوڕی بێدەسەڵات کردو دەسەڵاتی دایە کاک ئیدریسی کوڕی لە ١٩٦٤، کاک ئیدریس شۆڕشەکەی بەرێوە دەبرد، مەلا مستەفا وەک پەیکەرێکی نەتەوەیی بوو و میوانداری میوانە بێگانەو ناوخۆییەکانی دەکرد، هەر کارێکی نارێک و پێک کرابێ دوای ١٩٦٤ ئەوا کاک ئیدریس بەرپرسیارە، نەک مەلا مستەفای بارزانی، بێجگە لە بڕیارەی هەرەسی شۆڕش لە ١٩٧٥ کە مەلا مستەفا بڕیاریدا، کە ئەوەش کاک ئیدریس و ماڵی شێخ ئەحمەدی برای مەلا مستەفایان هەڵپێچا بۆ ئەوەی وا بکات، چونکە دەیانگوت بارزان و بارزانیەکان و زۆرینەی شۆڕشگێران لەناو دەچن، بەڵام کاک مەسعود بارزانی بە پێچەوانەی ئەوان بیری دەکردوەو جەرجیس فەتحوڵا بۆی گێرامەوەو وتی کاک مەسعود هەوڵی خۆ کوشتنی دا لەسەر ئەو بڕیارە.

دیبلۆماتیک مەگەزین: کەی ڕووتکردە کاری بازرگانی و بوویتە سەرمایەدارێکی ناودار؟


سه‌ردار پشده‌رى: دوای هەرەسی شۆڕشی ئەیلول و باشتر بوونم لەبریندارییەکەم لە ١٩٧٦ و ١٩٧٧، دوو پڕۆژەی (بەربەست ئاو و رێگاو بانم) لە دۆڵی شەهیدان و بەری مەرگەو ماوەت بۆ گەڵاڵەم وەرگرت بەبێ رکە بەر، چونکە شوێنەکە عاسی بوو و کەس نەیدەوێرا بچێتە ئەوێ و بەپارەیەکی باش بەدەستم هێنا، بە نەترسی و چاپوکی و زانایم لە کارەکەدا چونکە باوکم وەستا بوو و زۆر شتی لێ فێر بووبووم، توانیم پڕۆژەکان تەواو بکەم و بێجگە لەوەی داهاتێکی باشیشم بۆ ناوچەکە پەیدا کردو یارمەتیەکی زۆری خەڵکم دا، بۆ خۆشم خێروبێرێکی زۆرم پێ بڕا و بوومە سەرمایەدارێکی بەویژدان.

دیبلۆماتیک مەگەزین: تۆ خۆت بە خاوەنی پرۆژەی نەوتی کوردستان دەزانیت، و باس لەوە دەکەیت کە دەرهێنانی نەوت لە هەرێمی کوردستان بیرۆکەی تۆ بووە، ئەمە چۆن بوو؟


سه‌ردار پشده‌رى: داستانی ئەو پڕۆژە دوورو درێژە، من وەک کوردێکی نەتەوەی پڕئێش و ئازار، لەهەڵگیرسانی شەڕی عێراق و ئێران دا، خۆم بەدوور گرت لە لایەن بازی نێوان عێراق و ئێراندا، چونکە خەڵکانی ناسراو نەیان دەتوانی بێلایەن ببن، من بەناوی تیماری ئازارەکانم لە ساڵی ١٩٨٠ هاتم بۆ لەندەن، بێ ئومێدی لەو سەرکردە کوردانە کە کەوتبوونە دەستی داگیرکەران بەتایبەتی عێراق و ئێران، کەوتمە پەلەقاژەی دیپلۆماتی و پەیوەندیکردن بە دەسەڵاتدارانی دنیای دەرەوە، توانیم کۆمەڵێک دۆستی باش بۆ کورد پەیدا بکەم و داوایەکی تازەیان پێ رابگەیەنم کە داوای یەک گرتنەوەو سەربەخۆیی کوردستانی گەورەیە، چونکە ئەوانیتر تەنها باسی مافی کوردیان دەکرد، نەیان دەوێرا باسی سەربەخۆیی کوردستان بکەن، پەیتا پەیتا دۆستەکانم دەدیتن و هەڵم دەپێچان بۆ هاوکاریکردنی سیاسیم لەو بارەوە، کۆڕەوەکەی کورد لە ١٩٩١، بارودۆخی داواکەی منی بەرەوپێش بردو دۆستەکانم کاتی زیاتریان بۆ دادەنام بۆ باسکردن لە چارەسەرێک، هەمومان دەزانین بارو دۆخی ئابوری کوردستان چەند خراپ بوو لەو کاتەداو چوار یەکی خواروی کوردستان وێران کرابوو، ئەوەش پێویستی بە سەرمایەیکی گەورەیە بۆ بوژاندنەوەی خەڵک وڵات

،،

منیش بە دۆستەکانم وت باشترین چارەسەر ئەوەیە یارمەتیم بدەن بۆ دەرهێنانی نەوتی کوردستان و بە بازاڕ گەیاندنی بۆ ئەوەی وڵاتی پێ ئاوەدان بکەمەوەو خەڵکەکەی پێ ببوژێنمەوە.

داوام لێکردن با لە نەتەوە یەکگرتوەکانەوە دەست پێ بکەین و روخسەتی نەتەوەیەکگرتوەکانم بۆ وەربگرن، چونکە دەستکاری نەوتی کوردستان دور لەدەسەڵاتی بەغدا دەبێتە سەنگەری سەربەخۆیی کوردستان، ئەوانیش بۆچونەکەی منیان بە دڵ بوو و بردیانمە ناو نەتەوە یەکگرتوەکان و لەویشدا پڕۆژەکەم ئاشکرا کرد، بەچرای سەوزی دۆستەکانم بۆ نەتەوەیەکگرتوەکان، ئەوانیش بەنوسین پشتیوانی خۆیان دەربڕی، منیش هەر لەوێ کۆنفڕانسێکی رۆژنامەوانیم گێراو پڕۆژەکەم بۆ دنیا ئاشکرا کرد، ڕۆژنامەکان هەواڵەکەیان بڵاو کردەوەو منیش گەرامەوە کوردستان و سیمینارم لە شارەکان و زانکۆی سەلاحەدین گێراو پڕۆژەکەم بۆ نەتەوەکەم شیکردوە، سەردانی سەرکردایەتی حیزبەکانیشم کردو ئەوانیشم لە پڕۆژەکە ئاگادار کردەوە.

دیبلۆماتیک مەگەزین: بۆچی دواتر لە پرسی دەرهێنانی نەوتدا تۆ بەرکەنار کرایت و ڕۆڵت نەبوو؟


سه‌ردار پشده‌رى: بەرچاوتەنگی هەندێ لە سەرانی حیزبەکان دزو موفتەخۆرەکانی کورد، منیان بەرکەنار کردو لەکوردستانیان دوور خستمەوە، کاک مەسعودو مام جەلالیش لەژورەوە بەمنیان دەگوت پڕۆژەکە پڕۆژەیەکی پیرۆزەو ئێمە پشتیوانیت لێ دەکەین، لەدەرەوەش بە ئەندامانی خۆیانیان دەگوت لێی دوورکەونەوەو رێگری لێبکەن، لەکۆتایدا دوای دروستکردنی دەوڵەت و پەرلەمانی دووقۆڵی، کاک فواد مەعسومی سەرۆک وەزیرو کاک جەوهەر نامیقی سەرۆک پەرلەمان بەمنیان گوت تۆ بۆت نییە باسی نەوتی کوردستان بکەی، منیش بۆ خۆ دوورگرتن لە خوێن رێژی وڵاتم بۆ بەجێهێشتن، خۆ ئەگەر منیش وەک ئەوان خوێنی کوردم لا سوک بایە، تورکیا پشتیوانی خۆی بۆ من دەربڕی و پێیان گوتم لەشکر و ئەندازیارانت لەگەڵ دەنێرین و وەڵامیان مەدەوە، بەڵام من دەمزانی ئەوە خوێنرێژی لێ دەکەوێتەوەو نەمکرد.

دیبلۆماتیک مەگەزین: چۆن لە سیاسەتی نەوتی هەرێمی کوردستان دەڕوانیت، بۆچی نەتوانراوە نەوت برێتە حزمەتی خەڵکی کوردستانەوە؟


سه‌ردار پشده‌رى: بەداخەوە سیاسەتی نەوتی کوردستانیان بەرەو هەڵدێر برد، لە ئومێدی دروستکردنی دەوڵەتی کوردیان دوور خستەوەو کردیان بەبەرنامەی باخەڵ پڕکردنی دزەکان، دزەکان و کوردفرۆشانیان پێ دەوڵەمەند کردو شۆڕشگێران و زۆرینەی کوردیان کەم بەش یان بێ بەش کرد، لەرووی سیاسیشەوە هەر بەو نەوتە پشتی کوردیان شکاند و ریسەکەی منیان کردەوە خۆری.



دیبلۆماتیک مەگەزین: تۆ هەمیشە خۆت بە غەدرلێکراو دەزانیت و دەڵێیت حکومەتی هەرێم ستەمی لێکردوویت، لە چیدا ستەمت لێکراوەو کێ ستەمی لێکردوویت؟.


سه‌ردار پشده‌رى: خۆم دەزانم کۆمەڵگای نێونەتەوەیی چیان بۆ کورد بڕیار دابوو، رێگاگرتن لە بڕیاری کۆمەڵگای نێو نەتەوەیی بەغەدرێکی گەورە دەزانم بەرامبەر بە خۆم و نەتەوەکەم، بەدوای ئەوانەشدا وەک لەسەروو تر باسم کردوە، پێشمەرگەی ١٩٦٣م، مامۆستای قوتابخانەی ١٩٦٨م، ئەفسەری ١٩٧٠م، بەهیزترین برینداری شۆڕشی کوردم، بۆچ دەبێ کەس هیچ حسابێک بۆ من نەکات و تاکو ئێستا دینارێکی کوردم پێنەبرابێت؟ کام لەوانەی بەسەرۆک وه‌زیرو سەرۆک پەرلەمان خانەنشین کراون لەمن زیاتر خزمەتی کوردیان کردووە؟.



دیبلۆماتیک مەگەزین: چەند ساڵێک لەمەوبەر ڕاتگەیاند کە خۆت بۆ پۆستی سەرۆک کۆماری ئێران دەپاڵێویت، چۆنبوو کە خۆت کاندید نەکردو پەشیمان بوویتەوە؟.


سه‌ردار پشده‌رى: ئێمە هەروەک لە شاخ بە هەموو چەکێک شەڕمان کردوە، لەرووی دیپلۆماتیشەوە بەهەموو چەکێک شەڕ دەکەین، خۆتان باش دەزانن دوای تیرۆری دکتۆر قاسملو، لالەی ڕووناکی سیاسی رۆژهەڵاتی کوردستان خامۆش کرابوو، خۆ هەڵبژاردنم بۆ سەرۆکایەتی ئێران، بۆ بەهێز کردنەوەی لالەی ڕوۆناکی کورد بوو لە ئێران، خۆ ئەگەر هەڵیش ببژێررابایەم ئێرانم دابەش دەکردو ئیمپراتۆری میدیام دەژیاندەوەو پشتیوانی نێونەتەوەیشم بەدەستهێنابوو، من خۆم نەکشاندەوە لە خۆ هەڵبژاردن، ئەوە دەوڵەتی ئێران بوو ناوی منی نەخستە ناو لیست ئەوانەی کە خۆیان هەڵبژاردووە، لەرویی یاسایشەوە ئەوە نیشان دەدات کە من نەدۆڕاوم.


دیبلۆماتیک مەگەزین: جاروبار وەکو مژدە ڕایدەگەیەنیت کە دەبیت بە سەرۆکی کوردستانی گەورەو ئاسودەیی و خۆشبەختی بۆ کورد دێنیت، لەمکارەدا کێ پشتگیریت دەکات و بەربەستەکانی گەشتن بە سەرۆکی کوردستانی گەورە لە ئێستادا چین؟.


سه‌ردار پشده‌رى: ڕابردووی هەموو کەسێک، داهاتووشی نیشاد دەدات، ئەوەی من بناسێ زۆر باش ئاگادارە کەمن لە باخەڵی خۆم دەردەهێنم دەیدەم بە نەتەوەی خۆم، نەک لەباخەڵی نەتەوەکەم دەربهێنم و بیخەمە باخەڵی خۆم، خۆ ئەگەر باخەڵی دەوڵەتی کوردیم لەبەر دەست بێت، 

،،

هەموو کەس دەکەمە خاوەن خانووی خۆی، پارەی نەوتی سپی و غازو کارەبا لەکەس وەرناگرم، مووچانە نزیک بە یەکسانی دەبێت، موچانە بۆ هەژارو کەم دەرامەت دابین دەکەم، کچ و کوڕی کورد بەیەک دەگەیەنم و موچانەو خانویان بۆ دابین دەکەم

خۆ ئەگەر ئێستاش ئەو پارەی کە دزەکان دزیویانە لێیان وەر بگیرێتەوە بەشی ئەو کارانە دەکات، دەربارەی پشتگیری بۆ دەوڵەتی کوردستانی گەورە، وەک پێشتر باسم کرد، من ٣٠ ساڵە کاری لێدەکەم و دۆستێکی زۆرم لەو ڕوەوە پەیدا کردوەو ئەوا هەر ئەوانن کە کە نایانەوێ من پەشیمان ببمەوە لەداوەکەم و پێم دەڵێن ئەو پڕۆژەی خۆتەو پشتگیریت دەکەین، خۆ ئەگەر ئەوانیش لەبەر بەرژەوەندی خۆیان ئەو هەوڵە بدەن، ئەوا ئێمە بەشی زیاترمان دەست دەکەوێت و کورد هیچ ڕووناکییەکی تر شک نابات بێجگە لە پڕۆژەکانی من، ئەوەی بۆ تە بەربەست و رێگر لەپێش پڕۆژەکانم، سەرکردایەتی ئەو حیزبانەن و دزو نۆکەرانی داگیرکەرانن.

سه‌ردار پشده‌رى:

سەردار پشدەری، كه‌ خۆى وه‌كو شۆڕشگێرێکی نەتەوەیی ده‌ناسێنێ، لە هاوینی ساڵی ١٩٤٨ لە کوێستانی کێلێی نێوان سەردەشت و قەڵادزە لەدایکبووە، لەهەردووک دیوی عێراق و ئێران ناونوس کراوەو ناسنامەی هەردوو لاشی هەیە.
خوێندنی سەرەتایی و ناوەندی لە قەڵادزە تەواو کردووە، دەرچووی سێ ئەکادیمیای شۆڕشی ئەیلوولە (ئەکادیمیای مامۆستای قوتانبخانە، تۆپ و تەقەمەنی)، دوو دیبلۆمی نەوتی هەیەو سێ ساڵیش لەزانکۆی کوردستانی ئەلەکترۆنی ئەڵمانیا دەرسی عولومی سیاسی خوێندووە، وەک بازرگانێک بژێوی ژیانی خۆی دابین دەکات‌و خاوەنی پڕۆژەی نەوتی کوردستانیشە.

 

author photo

ڕۆژنامەنوسی سیاسی و دیكۆمێنتەری سیاسی و مێژویی