ڕاپۆرتێكی ئه‌مەریكی: سامانی به‌رپرسانی عێراق 700 ملیار دۆلاره‌

۳۰۰ ملیاری سامانی ۱٥ بەرپرسی کوردە

ڕاپۆرتێكی ئه‌مەریكی: سامانی به‌رپرسانی عێراق 700 ملیار دۆلاره‌

1609 خوێندراوەتەوە

ئه‌ندامێكی په‌رله‌مانی عێراق ڕاپۆرتێكی باڵیۆزخانه‌ی عیراق پشت ڕاست ده‌كاته‌وه‌، كه‌ په‌یوه‌سته‌ به‌ قه‌باره‌ی سامانی به‌رپرسانی عیراق، كه‌ خۆی له‌ 700 ملیار دۆلاری ئه‌مریكی ده‌بینێته‌وه‌و به‌ ڕێژه‌ی جیاواز به‌سه‌ر پارته‌ سیاسییه‌كان و په‌رله‌مانتاران و وه‌زیره‌كاندا دابه‌شكراوه‌.

میسال ئالوسی ئه‌ندامی په‌رله‌مانی عیراق له‌ هاوپه‌یمانێتی مه‌ده‌نی دیموكراتی ئاشكرای كرد، كه‌ ده‌سته‌ی ده‌سپاكی ڕاپۆرتێكی وردو پڕ زانیاری له‌ باڵیۆزخانه‌ی ئه‌مەریكا له‌ به‌غداد به‌ ده‌ستگه‌یشتووه‌، كه‌ باس له‌ سامانی یه‌ك به‌یه‌كی به‌رپرسانی عیراق ده‌كات، كه‌ خۆی له‌ پاره‌ی كاش و سامانی نەگوازراوه‌(غیر منقوله‌)ی وه‌ك خانوبه‌ره‌ و سه‌ندات و پشكیان له‌ كۆمپانیاكان ده‌بینێته‌وه‌.

ئالوسی له‌ په‌یجی خۆی له‌ تۆڕی كۆمه‌لایه‌تی فه‌یسبووك ئاماژه‌ به‌وه‌ ده‌كات، كه‌ هاوپه‌یمانێتی كوردی به‌ بڕی 300 ملیار دۆلار پله‌ی یه‌كه‌می وه‌رگرتوه‌ ، كه‌ 15 به‌رپرسی كوردی له‌خۆ ده‌گرێت، دوای ئه‌وه‌ش هاوپه‌یمانێتیه‌كه‌ی نوری مالیكی سه‌رۆك وه‌زیرانی پێشوتر دێت به‌ بڕی 210 ملیار دۆلار. ئالوسی ده‌شڵێت:" لیستی عێراقی به‌ سه‌رۆكایه‌تی ئه‌یاد عه‌لاوی خاوه‌نی 180 ملیار دۆلاره‌، له‌ كاتێكدا ئه‌نجومه‌نی باڵا به‌سه‌رۆكایه‌تی عمار حكیم و ڕه‌وتی سه‌در به‌سه‌رۆكایه‌تی موقته‌دا سه‌در خاوه‌نی 150 ملیار دۆلارن، ئه‌م سامانه‌ زۆره‌ بۆته‌ هۆی ئه‌وه‌ی كه‌ پارته‌ سیاسیه‌كان ڕه‌زامه‌ندی له‌سه‌ر یاسای پارته‌ سیاسیه‌كان نه‌دات

،،

چونكه‌ له‌ ماده‌یه‌كیدا باس له‌ ڕوونی سه‌رچاوه‌ی داهاته‌كان ده‌كات.

به‌رپرسێك له‌ به‌ڕێوه‌به‌رایه‌تی لێكۆڵینه‌وه‌ی به‌غدای سه‌ر به‌ده‌سته‌ی ده‌ستپاكی، ئاماژه‌ به‌ كه‌موكورتیه‌كان ڕێكاره‌ كارپێكراوه‌كانی ئێستا ده‌دات و ده‌ڵێت:" لیستی ده‌ستپاكی خۆی له‌ تۆماركرنی مومته‌له‌كاتی به‌رپرسانی عیراق پێش وه‌رگرتنی پۆست ده‌بینێته‌وه‌، بۆیه‌ ناتوانرێت هیچ زیاده‌یه‌ك له‌ سامانی به‌رپرسه‌كه‌ تۆمار بكرێت، چونكه‌ زۆر به‌ ئاسانی ئه‌و به‌رپرسانه‌ ده‌توانن سامانه‌كانیان له‌ ناوی خۆیانه‌وه‌ بۆ خزم و كه‌سوكار و كۆمپانیاكانیان بگوازنه‌وه‌،جا له‌ ناوخۆی عیراق بێت یان له‌ده‌ره‌وه‌".

ده‌شڵێت:" سیاسه‌تی پشك پشكێنه‌ی عیراق له‌ دابه‌شكردنی پۆسته‌كاندا وایكردووه‌ كه‌ نه‌توانرێت هیچ گه‌نده‌ڵیه‌كی گه‌وره‌ ئاشكرا بكرێت. به‌رپرسێكی دیكه‌ی ده‌سته‌ی ده‌ستپاكی ئاماژه‌ به‌وه‌ ده‌كات، كاتێك به‌پرسانی عیراقی فۆڕمی ئاشكرا كردنی سامان و ماڵیان وه‌رده‌گرن له‌ كه‌ناڵه‌كانی ڕاگه‌یاندا پڕوپاگه‌نده‌ی بۆ ده‌كه‌ن، كه‌ وه‌ك به‌ڵگه‌یه‌كی باشی هه‌ڵسوكه‌وت سامانیان ناوزه‌ندی ده‌كه‌ن، به‌ڵام له‌ ڕاستیدا ئه‌وا هه‌موو شتێك نیه‌.

ده‌شڵێت:" ده‌ركه‌وتووه‌ زۆرینه‌ی كاری خانوبه‌ره‌ و كۆمپانیاكان له‌ ده‌ره‌وه‌ی عیراقن، خاوه‌ندارێتیان بۆ خزمی وه‌زیر و په‌رله‌مانتار و به‌رپرسانی عیراقی ده‌گه‌ڕێته‌وه‌، بۆیه‌ له‌به‌ر هه‌ستیاری دۆخی سیاسی عیراق زه‌حمه‌ته‌ به‌و كه‌یسانه‌ بگه‌ین".

له‌لایه‌كی دیكه‌وه‌ عه‌بدولره‌حمان ئه‌لمه‌شهه‌دانی پسپۆڕی بواری ئابووری ده‌ڵێت:" زۆرینه‌ی پارته‌ سیاسیه‌كانی عیراق له‌ شۆردنه‌وه‌ی پاره‌ تێوه‌ گلاون، به‌شێوه‌یه‌كی ڕێكخراو له‌ وڵاتانی ده‌ره‌وه‌ ئه‌نجامی ده‌ده‌ن

،،

ئه‌و پاره‌یه‌ی له‌ ناوخۆی وڵات ده‌ستیان ده‌كه‌وێت ڕاسته‌وخۆ ڕه‌وانه‌ی ده‌ره‌وه‌ی ده‌كه‌ن و له‌وێ كاری بازرگانی وه‌ك خانوبه‌ره‌ و كۆمپانیای و پشكه‌كانیانی پێوه‌ ده‌كه‌ن".

مه‌شهه‌دانی بۆ ماڵپه‌ڕی (عربی 21) ئاماژه‌ به‌وه‌ش ده‌كات كه‌ به‌رپرسانی عیراقی پایته‌خته‌كانی وه‌ك به‌یروت و عمان ودوبه‌یی و شاره‌كانی توركیا و باشوری ڕۆژهه‌ڵاتی ئاسیا به‌ گرنگ بۆ وه‌به‌رهێنانه‌كانیان، له‌م دوایانه‌دا لێكۆڵینه‌وه‌یه‌كی ناحكومی موڵكه‌كانی وه‌زیرێكی ئێستای عیراقی له‌ كۆمه‌ڵگه‌یه‌كی گه‌وره‌ له‌ دوبه‌ی جێبه‌جێ ده‌كات، دروستكردنی كۆمه‌ڵگه‌كه‌ له‌لایه‌ن هاوكارێكی خۆیه‌وه‌ كه‌ (تێكۆشه‌رێكی دێرینه‌)سه‌رپه‌رشتی ده‌كرێت. مه‌شهه‌دانی له‌ كۆتایدا ده‌ڵێت:" لێكۆڵینه‌وه‌ و ئاشكرا كردنی گه‌نده‌ڵی ئاسانه‌، به‌ڵام له‌ ئێستادا ئه‌و كاره‌ قه‌ده‌غه‌یه‌، چونكه‌ زۆرینه‌ی سه‌ركرده‌كانی عیراق خاوه‌نی پشكی جێگیری خۆیانن له‌ وه‌زاره‌ته‌كاندا، زۆرینه‌ی پارته‌كانیش سورن له‌سه‌ر وه‌رگرتنی وه‌زاره‌ته‌ خزمه‌تگوزارییه‌كانی وه‌ك نه‌وت و كاره‌با، چونكه‌ ئه‌و وه‌زاره‌تانه‌ خاوه‌نی بڕێكی زۆری داهاتن".

سەرچاوە: سایتی العربی ۲۱