میدیای سلێمانی لەسەردەمی لاهوری شێخ جەنگیدا

میدیای سلێمانی لەسەردەمی لاهوری شێخ جەنگیدا

2863 خوێندراوەتەوە

هێمن باقر

لە ئێستادا وەك دیفاكتۆ، لاهور شێخ جەنگی بەدەسەڵاترین سەركردەی سیاسییە لە دەڤەری سلێمانی، بەهۆی باڵادەستی سیاسی و ئابوری و سەربازی و ئەمنی،دەتوانرێت ئەم قۆناغەی ژیانی سیاسی لە سلێمانی بە قۆناغی لاهوری شێخ جەنگی بناسرێت. ئەوجا ئەوەیان بەدەستی خۆیەتی، قۆناغەكەی دەكاتە قۆناغێكی گەش لەڕوی ئابوری و سیاسی و دیموكراسییەوە یان دەیكاتە قۆناغێكی رەش و تاریك.

 

هەموو سەركردەیەكی عاقڵ، ئەگەر خۆی و خەڵكەكەی خۆش بوێت، لەسەردەمی دەسەڵات و فەرمانڕەوایەتیدا رێگە راستەكە هەڵدەبژێرێت و شتێك بۆ مێژوو كەسایەتی خۆی دەكات.چونكە مێژوو پڕە لە چیرۆكی دەسەڵاتدارەكان،بەڵام زۆر كەمتر باسی دەسەڵاتدارانێكی دادپەروەر و بە ویژدان و سەرۆكانێكی تێدایە كەخەمی ئاوەدانی و خۆشگوزەرانی خەڵكەكەی خۆیان هەبوبێت.

لە راستیدا دەمێكە لەدەرفەتێك دەگەڕێم كە لە نزیكەوە پێیی بلێم كە هەنگاوەكانی ئەوان لە بواری میدیایدا چ كارەساتێكی بەسەر رەوشی میدیا هێناوە لە سلێمانی،ئێستا كە خۆی بە سوپاسەوە دەرگاكەی كردۆتەوە،لێرەوە ناوەڕۆكی رەخنە و تێبینییەكانم ئاراستە دەكەم.

,,

بەشێكی ئەو فەوزا راگەیاندنەی كە لەدەڤەری سلێمانیدا هەیە پەیوەندی بە خودی لاهورى شێخ جەنگیەوە هەیە

 

لەیادی رۆژنامەگەری كوردردیدا بەرێز لاهور شێخ جەنگی پەیامێكی پیرۆزبایی بڵاوكردۆتەوە و جەختی كردووە لەوەی كە دەڤەرەكەی شانازی ئازادی رادەربڕین و رۆژنامەوانی هەیە و یەكەم میدیای ئازادیش هەر لەم ناوچەیە بووە.

هەروەها لە بەشێكی دیكەی پەیامەكەیدا جەختی لەوە كردۆتەوە كە پێویستە رۆژنامەوانان بە بەوێری و ئازایەتییەوە رەخنەكانیان بگرن و سڵ لە وتنی راستییەكان نەكەنەوە.

ئەوجا هەر لەسەر بنەمای ئەم بانگەوازەی بەرێزیان دەمەوێت بە راشكاوی رەخنە لە ستراتیژی میدیایی و بیركردنەوەی میدیای بەرێزیان بگرم. كە چ كارەساتێكی میدیایی لە دەڤەری سلێمانیدا خوڵقاندووە و بەشێكی ئەو فەوزای راگەیاندنەی كە لەدەڤەری سلێمانیدا هەیە پەیوەندی بە خودی خۆیەوە هەیە.

,,

هاتنە ناوەوەى دەزگاى زانیارى بۆ ناو کایەى میدیا و بازاڕ و وەرزش و هونەر و کلتور و سینەما و مزگەوت هەڵەیەکى کوشندەیە

 

لاهور شێخ جەنگی، بەر لەوەی ببێتە هاوسەرۆكی یەكێتی، بەرپرسی دەزگایەكی ئەمنی و هەواڵگری كوردستان بووە كە هەردوو دەزگای زانیاریی و دژەتیرۆرە.

كێشە سەرەكیەكە لەوێوە دەستی پێكرد كە دەزگای زانیاریی بڕیار دەدات تەنها چاودێری كایەی میدیا نەكات،بەڵكو خۆیی بێتە ناویەوە، لاهور شێخ جەنگی و ستافەكەی پێیان وایە هەواڵگری جیاناكرێتەوە لە میدیا و بازاڕ و وەرزش و هونەر و كایەی كولتووری و سینەما و مزگەوت، هەر لەبەر ئەوە ستراتیژەكەیان بەو جۆرە داڕشتووە لەبری ئەوەی لە دوورەوە چاودێریی بكەن،بڕیاریاندا خۆیان بێنە ناویەوە، دیارە هاتنە ناوەوەی دەزگای زانیاری و دژەتیرۆر بۆناو میدیا هەڵەیەكی كوشندەیە و لەزۆر لاوە بەمانای داگیركردنی كایەی میدیا دێت. بە بودجەیەكی زەبەلاح و ستراتیژێكی ئەمنییەوە. كە ئەمە كارەساتە گەورەكەیە.

ئەو میدیایانەی كە راستەوخۆ لەلایەن شێخ لاهورەوە دامەزراون و بەڕێوەدەبرێن تەنها كاری میدیای ناكەن بەڵكو هەموو میدیا و ژانرە میدیایەكانیان خستووەتە خزمەتی ئامانجە ئەمنی و هەواڵگرییەكانەوە و ململانێی ئەمنی و سیاسیان لەگەڵ دەزگا ئەمنییەكانی هەولێر و ركابەرە سیاسییەكانی پێدەكەن.

راستە دەزگای پاراستن و نوسینگەی بەرێز مەسرور بارزانی دەستپێشخەربوون لە دروستكردنی دەزگای میدیای ئەمنیدا و بە ئەمنیكردنی دامودەزگا ئەمنییەكان، بەڵام رۆشتن بەهەمان رێگەی پاراستندا دۆخی میدیای لە سلێمانی بەتەواوی هەرەس پێهێنا.

بەتایبەتی كە شێخ لاهور دەرگای واڵاكرد لەبەردەم ئەفسەرە ئەمنییەكانی خۆیدا كە بێنە ناو میدیاوە و بۆهەریەكەیان دەزگایەكی میدیای دروستكرد.

,,

هەندێک میدیاى ئەهلیتان کڕییەوە,کە لەناوخەڵکیدا ئیعتیبارێکیان هەبوو,بەم کارەتان سومعەى میدیاکە و کارەکتەرەکانیان شکێنرا.



 

 

هەنگاوی لەوە خراپتریش دەستبەسەراگرتن و كڕینەوەی هەندێ‌ دەزگای میدیای بوو كە بەشێك بوون لە میدیای ئەهلی سلێمانی و لەناو خەڵكدا ئیعتیبارێكی باشیان هەبوو.

ئەگەر هەڵسەنگاندنیان بەو جۆرە بوبێت كە بەم كارەیان دەزگایەكی میدیایی خاوەن جەماوەریان خستۆتە ناو سنوری بەرژەوەندییەكانیان بەهەڵەدا چوون،چونكە ئەو دەزگایانە تا ئەوكاتە خاوەن سومعەبوون كە ئازاد و بێلایەن بوون، لەدوای ئەوە تەنها یەك ئامانجتان دەسكەوت،خستنی سومعەی میدیای دەزگاكە و شكاندنی كارەكتەرەكانیان.

دیسانەوە لەمەش خراپترتان كرد،ئەویش ئەوبوو لەبری ئەوەی رۆژنامەنوسان وەك دۆست بهێڵنەوە و دۆستایەتی و پشتگیریان بكەن لەدورەوە حەزتان بە دروستكردنی پیاوی تایبەتی خۆتان كرد لەناو میدیادا. بە دڵنیایەوە ئەم دوانە جیاووازن لە یەكتریی و سنوری نێوانیان بە تەواوی جیاوازە

بەم دوایانەش كاتێك ستراتیژێك گەڵاڵە بووو لەلاتان كە پشتگیریی لە دروستكردنی میدیایەكی نیشتیمانی بكەن و ئێوە لە سومعەەی بەرزی میدیاكە سود مەند ببن، بەوپەڕی تواناوە پشتگیریمان كردی و بەرەوپێشچونی باشیش كرا.

بەڵام وادیاربوو كە بەگوێتاندا چپاندبویان كە سود لەم پرۆژەیە نابینن،بۆیە ستراتیژیكی كارەكەتان گۆڕی و پرۆسەكەتان بردەوە ناو دژە تیرۆر.

,,

بۆ خاتری شكۆی مێژووی رۆژنامەگەری كوردی لە شاری سلێمانی ، پاشەكشە بە دەزگای زانیاری و دژەتیرۆر بكە لە كایەی میدیادا و لەدورەوە پشتگیریی رۆژنامەوانان بكە.

 

لە رابردوودا یەك جار لە نزیكەوە بەرێزتانم دیوە،ئەزانم كەسێكی پڕ لە تموح و چالاكی و خەونیت، بە پێچەوانەی پۆستە ئەمنیەكەتەوە خاوەنی مامەڵەو رویەكی خۆشیت لەگەڵ دەوروبەرت،بایی ئەوەندەش نەرمیت تێدایە كە گوێ لە بۆچونی باشیش بگریت.

بۆیە بەو پەڕی راشكاوی پێت دەڵێم بۆ خاتری شكۆی مێژووی رۆژنامەگەری كوردی لە شاری سلێمانی و ئەو سەروەریانەش كە شانازی پێوەدەكەیت لە ئازادی رۆژنامەوانی لەم دەڤەرەدا، پاشەكشە بە دەزگای زانیاری و دژەتیرۆر بكە لە كایەی میدیادا. لەدورەوە پشتگیریی رۆژنامەوانان بكە.

تەنانەت زۆر ئاساییە میدیای فەرمی خۆشت هەبێت بە ئاشكرا،بەڵام رێگە مەدە لەبری دۆست پیاوت بۆ دروست دەكەن.

ئەو میدیاكارانەی دەبنە پیاوی تۆ، چاویان لە پارە و دەسەڵاتەكەتە و بۆ پارەش دەبنە پیاوی كەسانی تر.

پەیوەندی لەگەڵ رۆژنامەنوسانی ئازا و ئازاد بگرە و دەستی دۆستایەتی و كرانەوە و بەرگریان بۆ درێژ بكە، هەروەك ئەوەی لە پەیامەكەتاندا خستوتە ڕوو.

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری