عەبدولڕەحمان مستەفا: گلەیی زۆر لە یەكێتی دەكەم

عەبدولڕەحمان مستەفا: گلەیی زۆر لە یەكێتی دەكەم

346 خوێندراوەتەوە

گلەیی لەیەكێتی دەكات‌و ڕایدەگەیەنێت كە فراكسیۆنی یەكێتی لە ئەنجوومەنی نوێنەرانی عێراق لۆبییان لە دژی ئەو كردووە تا هیچ پەرلەمانتارو فراكسیۆنێك دەنگی پێنەدەن بۆ بوون بە وەزیری داد.


عەبدولڕەحمان مستەفا، پارێزگاری پێشووتری كەركووك، لە تۆمارێكی ڤیدیۆییدا باس لە پرۆسەی كاندیدكردنی بۆ وەزیری دادی عێراق دەكات‌و ئەو سینایۆو ڕووداوانەش دەخاتە ڕوو كە پێش پرۆسەو لەكاتی پرۆسەی دەنگدان بە وەزیرەكانی كابینەكەی كازمی لە ئەنجومەنی نوێنەرانی عێراق بەڕێوە چووە.


دەربارەی چۆنیەتی كاندیدبوونی بۆ وەرگرتنی پۆستی وەزیری داد لە حكومەتەكەی كازمیدا، عەبدولڕەحمان مستەفا باسلەوە دەكات كە ئەو بەهیچ جۆرێك بیری لە خۆكاندیدكردن نەكردووەتەوەو كەمال كەركوكی، ئەندامی مەكتەبی سیاسی پارتی پێیڕاگەیاندووە كە كاندیدی كوردە بۆ وەرگرتنی پۆستی وەزیری داد، " كەمال كەكوكی پێیووتم بە ڕەزامەندی هەموو لایەنەكان بە تایبەتی پارتی‌و یەكێتی كاندید كراویت بۆ ئەو پۆستە، سەرەتا ڕەفزم كردو داوای لێبووردنم كرد، بەڵام جەختی كردەوە كە كاندیدی پارتی‌و یەكێتی‌و هەموو لایەنەكانی‌و ئەو وەزارەتەش بۆ كورد گرنگ‌و بەسوودە، بۆیە ڕازی بووم".


عەبدولڕەحمان مستەفا ئاماژە بەوەش دەكات كە مستەفا كازمی، سەرۆكوەزیرانی نوێی عێراقیش پەیوەندی پێوە كردووەو پێیووتووە كە ئەو كاندیدكراوە بۆ وەزیری داد و بۆ دیاریكردنیشی ڕەزامەندی هەموو لایەنەكان بەتایبەتی پارتی‌و یەكێتی وەرگرتووە.


عەبدولڕەحمان مستەفا دەشڵێت كە قوباد تاڵەبانیش پەیوەندی پێوەكردووەو پێووتووە تۆ كاندیدی هەموومانی،

،،

" كاك قوباد پێی وتم تۆ نوێنەرو بەشی هەموومانی، بەهەموو شێوەیەك پشتیوانیت دەكەین بۆ ئەوەی سەربكەویت لە كارەكەتدا، تەواو دڵنیای كردمەوە كە كاندیدی هەموو لایەنەكانم".


ئەو باس لە چیرۆكی چەند كاتژمێرێك بەر لە چوونیان بۆ پەرلەمان‌و پرۆسەی دەنگدانە بە كاندیدەكان دەكات كە لە كۆشكی كۆمارییەوە ئۆتۆمبێلی ژمارە شەش دیاری كراوە بۆ ئەوەی پێی بچێت بۆ پەرلەمان، وەكو خۆی دەڵێت بەر لە ڕۆشتنیان بەرەو پەرلەمان پێیان ڕاگەیاندووە كە گۆڕانكارییەك كراوە لە وەزارەتی داد داو وتویانە جارێك چاوەڕوان بكە.


" دواتر تەلەفۆنیان كردەوەو دووبارە بووەمەوە بە كاندیدی وەزارەتی دادو بەرەو پەرلەمان بەڕێكەوتین

،،

لە كاتی بەڕێوەچوونی پرۆسەی دەنگدانەكەدا پەرلەمانتارەكانی یەكێتی چالاكانە لەناو هۆڵەكەدا دەسوڕانەوەو لەگەڵ هەموو پەرلەمانتارەكاندا قسەیان دەكرد،

كاتێك دەنگدان گەشتە سەرەی من، حاڵەتێكی زۆر نامۆ لەناو پەرلەماندا دەستی پێكردو ژمارەیەكی زۆر كەم دەستیان بەرز كردەوە، دواتر دووسێ پەرلەمانتاری عەرەب هاتن بۆ لام‌و وتیان بەر لە دەنگدان لۆبییەكی زۆر بەهێز لەدژی تۆ كاری كردووە، بۆ ئەوەی دەنگ بە تۆ نەدرێت".


عەبدولڕەحمان مستەفا زۆرتر دەربارەی دەنگنەهێنانی لەناو ئەنجوومەنی نوێنەراندا دەدوێت‌و باسلەوە دەكات كە ئەو پەرلەمانتارە عەرەبانە پێیانووتووە كە

،،

پەرلەمانتارەكانی یەكێتی وتوویانە عەبدولڕەحمان مستەفا حەز بە یەكڕیزی‌و یەكپارچەیی خاكی عێراق ناكاتۆ دژیەتی" پەرلەمانتارەكانی یەكێتی بە پەرلەمانتارو فراكسیۆنەكانیان وتبوو ئەگەر دەنگ بە من بدەن، ئەوانیش دەنگ بە كاندیدەكانی ئەوان نادەن".


ئەو ڕایدەگەیەنێت كە لای سەیر بووە كە ئەوكارەی بەرانبەر كراوە" ئەگەر ئەو پۆستە هی یەكێتییە، دەبوو پێشتر ڕازی نەبووایە ناوی من وەكو پاڵێوراوی وەزراەتی داد بڕوات، یەك بەرپرسی یەكێتی داوای بكردایە پاشەكشەم دەكرد، ئەگەر نەمكردایە هەقی خۆیان بوو لەوە خراپتریشم پێ بكەن، بۆیە گلەییەكی زۆر زۆریان لێدەكەم".


عەبدولڕەحمان مستەفا دەشڵێت: " ڕۆژی دواتر مستەفا كازمی بانگی كردمەوە، پێمووت تۆ پێت ڕانەگەیاندم كە ڕێكەتنی لایەنەكا‌و بەتایبەت پارتی‌و یەكێتی لەسەر من كراوە، وتی بەڵێ هیچ لایەنێك لەسەر تۆ لاری نەبووەو دڵنیایان كردووەمەتەوە كە كاندییدی هەموویانی"