پارێزگار و بەڕێوەبەری تەندروستی سلێمانی، لەسەر كۆرۆنا بۆچونی دژبەیەكیان هەیە

كێ‌ بەرپرسیارێتی كارەساتێكی تەندروستی لە سلێمانی هەڵدەگرێت؟

پارێزگار و بەڕێوەبەری تەندروستی سلێمانی، لەسەر كۆرۆنا بۆچونی دژبەیەكیان هەیە

844 خوێندراوەتەوە


لەسەر قەبارەی تەشەنەسەندنی ڤایرۆسی كۆرۆنا و مەترسیەكانی لەسەر ژیان و سەلامەتی هاوڵاتیانی پارێزگای سلێمانی، هەریەكە لە پارێزگاری سلێمانی و بەِڕێوەبەری تەندروستی سلێمانی،رای جیاوازیان هەیە و لە میدیاكانەوە لێدوانی دژ بەیەك دەدەن.

هەرچەندە پارێزگاری سلێمانی رایگەیاندووە دۆخی كۆرۆنا لە پارێزگای سلێمانی پێویست بە قەدەغەكردنەوەی هاتوچۆ ناكات،بەڵام د.سەباح هەورامی بەڕێوەبەری تەندروستی سلێمانی هۆشداری توند دەدات بە لەدەستدەرچونی دۆخەكە و بە پێویستی دەزانێت بۆ بەرگرتن لەڕودانی كارەساتی گەورە لە سلێمانیدا بۆماوەی هەفتەیەك قەدەغەی هاتوچۆ ڕابگەیەنرێت.


لەبەرەی هەڵكشانی قەبارەی نەخۆشیەكە و قوربانیەكانی لەشاری سلێمانیدا، بەڕێوەبەری تەندروستی سلێمانی، هۆشداریدا لەڕودانی كارەاتێكی گەورە لە پارێزگای سلێمانیدا و دەڵێت" هەفتەی داهاتوو دەبینن،چ كارەساتێك لە پارێزگای سلێمانیدا ڕودەدات".

لە بەرامبەردا، د.هەڤاڵ ئەبوبەكر،پارێزگاری سلێمانی دەڵێت"زیادبوونی رێژەی توشبوانی كۆرۆنا لەسلێمانی، لەئێستادا دەگەڕێتەوە بۆ زۆربوونی ئەو كەسانەی كەگومانیان لەسەرە هەڵگری ڤایرۆسەكە بن و سەردانی ناوەندە تەندروستییەكان دەكەن، نەك ئەوەی زۆربوونی ژمارەكە پەیوەست بێت بەوەی هەمان قەبارەی گەورە لەناو كۆمەڵگەدا هەیە"

ئەم بۆچونە دژبەیەكانەی پارێزگار لەگەڵ بەڕێوەبەری تەندروستیدا لەكاتێكدایە كە بەهۆی نەدانی مووچەوە پزیشكان و كارمەندانی تەندروستی مانیان گرتووە و نەخۆشخانەكان لە پارێزگای سلێمانی بەرەو شەلەلی تەواوەتی دەڕۆن و هەندێكیان بەتەواوی داخراون. ئەمە لەكاتێكدایە زیاتر لە 300 نەخۆشی فیعلی لە نەخۆشخانەكاندان و باری تەندروستی هەندێكیشیان ناجێگیرە.
پرسیارە سەرەكیەكە ئەوەیە،لە نێوان بۆچونی دژ بەیەكی ئەم دوو بەرپرسەی شاردا خەڵكی سلێمانی باوەڕ بە قسە و لێدوانی كامیان بكات و خی بۆ كام پێشهاتی تەندروستی ئامادە بكات،ئەوەكەی د.هەڤاڵ یان ئەوەی د.سەباح باسی دەكات؟

لە نێوان مەترسیەكانی پەیداكردنی بژێوی ژیان و ئەو كارەساتەی كە د.سەباح باسی دەكات كامیان هەڵبژێرین
مردن بە كۆرۆنا یان بێ كاری و بێ‌ نانی؟