بەراورد لە نێوان سوپای میسر و توركیادا... كامیان بەهێزترن؟

بەراورد لە نێوان سوپای میسر و توركیادا... كامیان بەهێزترن؟

1488 خوێندراوەتەوە

لە ئێستادا بەهۆی قەیرانی لیبیاوە پەیوەندییەكانی نێوان میسر و توركیا ئاڵۆزی زۆری تێكەووتوە، توركیا بەهێزی سەربازی دەستوەردانی كردووە و میسریش هەڕەشەی بەرپەرچی پانخوازییەكانی توركیا دەداتەوە، لەم نێوەندەدا كەسانێك دەیانەوێت بزانن لەڕووی سەربازییەوە ئەم دوو وڵاتە كامیان بەهێزترن؟.

،،

لە مانگی شوباتی ڕابردوودا ماڵپەڕی (گڵۆباڵ فایر پاوەر) نوێترین پۆڵێنبەندی وڵاتانی جیهانی لەڕووی هێزی سەربازییەوە بڵاو كردەوە، لەو ڕاپۆرتەدا ئاماژە بەوە كراوە كە وڵاتی میسر پلەی 10یەمنی لەسەر ئاستی جیهان وەرگرتوە، توركیاش بۆ پلەی 11 یەمین پاشەكشەی كردووە.


میسر یەكەمین وڵاتی عەرەبیە كە لەسەر ئاستی جیهان پلەی دەیەمینی وەرگرتووە، ئەمە لە كاتێكدایە كە ساڵی ڕابردوو لە پلەی 12یەمندا بوو، هەرچی توركیاشە لە ڕیزبەندییەكەدا دوای میسر كەوت، كە ماوەی چەندین ساڵ بوو لە پێش میسرەوە بوو.


بۆ بەراورد كردنی سوپای هەردوو وڵات ئاماژە بە چەند ژمارەیەك دەكەین:
میسر خاوەنی 440 هەزار سەربازە، بەڵام توركیا خاوەنی 355 هەزارە، هێزی یەدەگی میسر لە480 هەزار سەرباز پێكدێت، بەڵام لە توركیا 380 هەزار سەربازە.
لەڕووی بودجەی دابین كراو بۆ سوپا، ئەوا توركیا بودجەیەكی زیاتری بۆ لایەنی سەربازی تەرخان كردووە، بەشێوەیەك 19 ملیار دۆلاری بۆ خەرجی سەربازی دیاری كردووە، بەڵام میسر 11 ملیار دۆلاری بۆ لایەنی سەربازی تەرخان كردووە.

هێزی ئاسمانی:
پەیوەست بە هێزی ئاسمانی و چەكی تایبەت بەو لایەنە، ئەوا ئەو دوو وڵاتە تاڕادەیەكی زۆر یەكسانن، میسر خاوەنی 1054 پارچە چەكە، توركیاش خاوەنی 1055 پارچەیە.
میسر خاوەنی 215 فڕۆكەی جەنگیە، لەكاتێكدا توركیا خاوەنی 206 فڕۆكەیە.
بەڵام لە ژمارەی هێلیكۆپتەردا، توركیا پێش میسر دەكەوێت و خاوەنی 497 هێلیكۆپتەرە، بەڵام میسر خاوەنی 294 دانەیە.

هێزی وشكانی:
میسر خاوەنی 4295 دەبابەی جەنگیە، بەڵام توركیا خاوەنی 2622یە، هەروەها سوپای میسر لە بوونی زڕیپۆشدا لە پێش سوپای توركیاوەیە، بەشێوەیەك میسر خاوەنی 11700 زرێپۆشە، بەڵام توركیا خاوەنی 8777 زرێپۆشە.
میسر خاوەنی 1139 یەكەی تۆپهاوێژە، بەڵام توركیا خاوەنی 1278 یەكەیە.
هەروەها میسر نزیكەی دوو هێندەی توركیا خاوەنی تۆپهاوێژی مەیدانیە(2189 بەرامبەر 1260).


هێزی دەریایی:
میسر لە ڕووی هێزی دەریاییەوە دوو هێندەی توركیا بەهێزە بەشێوەیەك خاوەنی 316 پارچەیە، بەڵام توركیا خاوەنی 149 یە.
میسر كەشتی فڕۆكە هەڵگری هەیە، بەڵام توركیا خاوەنی هیچ جۆرە كەشتیەكی لەو جۆرە نیە.
بەڵام لەڕووی ژێر دەریاییەوە، توركیا پێش میسر دەداتەوە و خاوەنی 12 ژێر دەریاییە، بەڵام میسر خاوەنی هەشت ژێر دەریاییە، هەروەها میسر لە ڕووی كەشتی دژە مین سێ هێندە لە توركیا بەهێزترە، ئەو خاوەنی31 كەشتیە، بەڵام توركیا خاوەنی 11 كەشتیە.
جێگری بەڕێوەبەری كۆمپانیای (ماكس سیكیوریتی) بۆ هەواڵگری ئەمنی ئیسرائیلی دەڵێت:" هێزی سوپای توركیا لە دەرەوەی سنوری خۆی سنوردارە، هەروەها میسریش بەهەمان شێوە، بەڵام قاهیرە لە ئەنكەرە ئازاد تر دەتوانێت هێزەكانی بەكاربهێنێت،چونكە سوپای میسر پابەندی لە توركیا كەمترە، ئەمەش بۆ ئەوە دەگەڕێتەوە توركیا خۆی لە قەیرانی سوریا و لیبیا ئاڵاندووە".


هەرچی پەیوەست بە توانای ئاسمانیەوە، توركیا كێشەی زۆری هەیە، كڕینی سیستەمی بەرگری S-400 ی ڕوسی لەلایەن توركیاوە، بووە هۆی ئەوەی كە ئەمریكا فڕۆكەی جەنگی F-35 بە توركیا نەفرۆشێ

،،

هەروەها لەڕووی بەرگری ئاسمانیەوە ،میسر سیستەمی هەمەجۆری هەیە و خاوەنی سیستەمی S300ی ڕوسی و پاتریۆتی ئەمریكایە.


توركیا زیاتر گرنگی بەهێرشی وشكانی دەدات لەگەڵ بەكارهێنانی فرۆكەی بێ فرۆكەوان،لەگەڵ كەشتی و بەكارهێنانی هەلیكۆپتەر، هەروەها توركیا كەشتیە جەنگیەكانی كە دژە موشەكیین، لەگەڵ ژێر دەریاییەكانی بەكاردەهێنێت، كە ئەوانیش هەر پێویستیان بە پاڵپشتی ئاسمانی هەیە.


بەڵام میسر گرنگی زۆری بەلایەنی ئاسمانی و دەریایی داوە، لە ساڵانی ڕابردوودا ئەم دوو لایەنەی بەخێرایی پێشخست، ئەمەش لە ڕێگای چەندین ڕێكەوتننامەی كڕینی چەكەوە لەگەڵ هەریەكە لە ڕوسیا و ئەمریكا و فەرەنسا ئەنجامدا.
هەروەها میسر خاوەنی دوو كەشتی وشكاوەكیە (ئاوی و وشكانی) كە لە جۆری میستراڵن، قاهیرە لە فەرەنسای كڕیوە، بەڵام توركیا دوای كەشتی (ئانادۆڵTCG) هیچ كەشتیەكی دیكەی لەو جۆرەی بەكارنەهێناوە.