ترامپ لەچی دەترسێت؟

ترامپ لەچی دەترسێت؟

280 خوێندراوەتەوە

وتەیەكی دۆناڵد ترامپ سەرۆكی ویلایەتە یەكگرتوەكانی ئەمریكا كاردانەوەی زۆری بەدوای خۆیدا هێنا، كاتێك زۆر بە ئاشكرا ویستی خۆی بۆ دواخستنی هەڵبژاردنی سەرۆكایەتی وڵاتەكەی نیشاندا، كە وا بڕیارە لە مانگی تشرینی دووەمی ئەمساڵدا ئەنجامبدرێت.


ترامپ بۆ دواخستنی هەڵبژاردنەكان بیانووی ئەوەی هێنایەوە، كە هەڵبژاردن لە ڕێگای پۆستەوە، دەبێتە هۆی ئەوەی كە ساختەكاری و فێڵ ئەنجام بدرێت، بەڵام ئامانجی ڕاستەقینەی ترامپ لەم داوایەی چیە؟ بۆچی لەم كاتەدا ئەم بیرۆكەیەی ئاشكرا كرد؟ ئایا هەر بەڕاست ترس هەیە ساختەكاری لە هەڵبژارنەكانی ئەمریكادا ئەنجام بدرێت؟

پاڵنەرەكانی ترامپ

بەپێی تویتەكەی سەرۆك ترامپ، ئامانجی لەم داوایەی بۆ ئەوە دەگەڕێتەوە، كە ترس هەیە هەڵبژاردن لە ڕێگای پۆستەوە، ساختەكاری و فێڵی تێدا بكرێت، ئەمە لە كاتێكدایە كۆماری و دیموكراتەكان، هەر جۆرە فێڵ و ساختەكارییەك بە " ئەگەرێكی زۆر كەم" دادەنێن و هیچ بەڵگەیەك نیە كە ساختەكاری تێدا ئەنجام بدرێت.
بەڵام لە كۆنگرەیەكی ڕۆژنامەوانیدا كە ئێوارەی دوێنی پێشكەشی كرد، ترامپ پاڵنەرەكانی خۆی بۆ ئەو داوایەی شیكردەوە، لەسەرەتادا ڕایگەیاند كە دەنگدان لە ڕێگای پۆستەوەو دواتریش جیا كردنەوەی ئەنجامی دەنگدان، كاتێكی زۆری دەوێت، كە لەوەیە چەندین ڕۆژ و هەفتە بخایەنێت، ئاماژەی بەوەش كرد، ئەو دەیەوێت هەڵبژاردنەكان ئەنجام بدرێت، بەڵام نایەوێت " سێ مانگ چاوەڕوانی ئەنجامەكانی بكات، دواتریش ئاشكرا بكرێت كە كارتەكانی دەنگدان بزر بوون، ئەو كات هەڵبژاردن هیچ واتایەكی نامێنێت، بێگومان ئەمە ڕوودەدات و هەمووانیش باش دەزانن!".بەڵام دیموكراتەكان كە كێبڕكێی ترامپ دەكەن، پێیانوایە ئەمە یەكەم زەنگی گومانی پێشوەختەی ئەنجامی هەڵبژاردنەكانە، كە لە ئێستاوە لای خەڵكی گومان دروست دەكرێت، خەڵكی لە ئەگەری ساختەكاری دەپرسن و دەیانەوێت چیرۆكەكانی چۆنیەتی ساختەكردنەكە بزانن.


تەنها سەرۆك ترامپ نیە:
ترامپ تاكە كەس نیە كە گومانی هەیە، كە هەڵبژاردنەكان ساختەكاری تێدا ئەنجام بدرێت، بەڵكو چەندین كەسایەتی دیكەش گومانیان هەیە، ولیام بار وەزیری دادی ئەمریكا لە وەڵامی پرسیاری لیژنەی دادوەری ئەنجومەنی نوێنەران، ڕایگەیاند هیچ هۆكارێكی لەبەردەستدا نیە كە بیسەلمێنێت هەڵبژاردنەكان ساختەكاری تێدا دەكرێت، بەڵام لە هەمان كاتدا گومانی خۆی لە ساختەكاری نەشاردەوە، ئەگەر هەموو هەڵبژاردنە بە ژمارەیەكی زۆرەوە لە ڕێگای بەریدەوە ئەنجام بدرێت.
بەڵام كەمپینی هەڵبژاردنەكانی ترامپ دەڵێن، ترامپ باسی لە دواخستنی هەڵبژاردنەكان نەكردووە، بەڵكو تەنها پرسیاری لە ئەگەری ساختەكاری و فەوزا كردووە، كە دیموكراتەكان سورن لەسەر ئەوەی هەڵبژاردنەكان هەمووی لە ڕێگای پۆستەوە ئەنجام بدرێت، بۆ ئەمەش كۆرۆنایان كردۆتە بیانوو،هەڵبژاردنی لە ڕێگای پۆستەوە، واتە چاپكردنی كارتی دەنگدان بۆ هەموو دەنگدەرێك، جا بیەوێت دەنگ بدات یان نا.

ترس هەیە ئەنجام قبوڵ نەكرێت:

وتەكەی ترامپ كاردانەوەی زۆری بەدوای خۆیدا هێنا، ترسی ئەوە هەیە كە ترامپ لە ئەگەری دۆڕانی لەبەرامبەر بایدندا ئەنجامەكان قبوڵ نەكات، دیموكراتەكان پێیانوایە كە هەوڵەكانی ترامپ زیاتر بۆ سەرنجڕاكێشانە، لە ڕاستیدا دەیەوێت" متمانەی خەڵكی بە هەڵبژاردنەكان نەهێڵێت" كە وا بریارە لە سێی مانگی نۆڤەمبەری ئەمساڵدا ئەنجام بدرێت،چونكە سەرۆك ترامپ لە كۆتایی مانگی مارسەوە نزیكەی 70 جار گومانی خۆی لەسەر ساختەكاری نیشانداوە، تەنها لەم مانگەدا 17 جار باسی ئەگەری ساختەكاری كردووە.

،،

لە بەرامبەریشدا هیچ بەڵگەیەكی ئەوتۆ نیە، كە بیسەلمێنێت، دەنگدان لە ڕێگای پۆستەوە ساختەكاری تێدا ئەنجام دەدرێت، لە نوێترین ڕاپرسیدا كە تۆڕی (ئەی بی سی نیوز) بڵاوی كردۆتەوە، لە سەدە 51ی دیموكراتەكان لەگەڵ هەڵبژاردنن لە ڕێگای پۆستەوە، بەڵام كۆمارییەكان تەنها لە سەدە 20 یان لەگەڵ ئەو جۆرە هەڵبژاردنن، هەروەها لە توێژینەوەیەكی كۆنی زانكۆی ستارفۆردا باس لەوە كراوە كە لە نێوان ساڵانی 1996 بۆ 2018 لە سێ ویلایەتی ئەمریكادا دەنگدان لە ڕێگای پۆستەوە ئەنجام دراوە و هیچ كاریگەرییەكی حیزبی لەسەر نەبووە.


دیموكراتەكان و كەناڵەكانی نزیك لە خۆیان، باس لەوە دەكەن، ترامپ هەوڵدەدات پێشوەختە ترس بخاتە دڵی جەماوەرەوە، بەوەی ساختەكارییەكی زۆر ئەنجام دەدرێت، بەمەش لە ئەگەری شكستیدا دان بە ئەنجامەكانی هەڵبژاردندا نانێت.
ئەوان بۆ ئەم قسانەیان بەڵگەیەك دەهێننەوە، بەڵگەكەشیان ئەوەیە كە كریس واڵس پێشكەشكار لە كەناڵی فۆكس نیوز، داوای لە ترامپ كرد، بە" بەڵێ یان نەخێر" وەڵامی بداتەوە، بەوەی لەئەگەری شكستیدا ئەنجامەكان قبوڵ دەكات، بەڵام ترامپ ڕەتی كردەوە، بە وشەیەك وەڵام بداتەوە، ئەمەش واتەی ئەوەیە كە نزیكە ئەنجامەكان لەئەگەری دۆڕانی قبوڵ نەكات.


نهێنی كاتی بانگەشەكەی ترامپ

چاودێرانی سیاسی لە واشنتن هۆكاری بانگەشەكەی ترامپ لەم كاتەدا بۆ ئەوە دەگێڕنەوە كە پێشتر بایدن ترامپی تۆمەتبار كردووە، بەوەی بیر لە پیلانگێری دەكاتەوە، بۆ ئەنجامدانیشی داوای دواخستنی دەكات، ئەمە جگە لەوەی لە هەندێك لە ڕاپرسیەكاندا ترامپ لە دوای بایدنەوە دێت.
چاودێران ئاماژە بە دوو پاڵنەری سەرەكی دەكەن، كە وای لە ترامپ كردووە، داوای دواخستن بكات:
یەكەم: ئامارەكان باس لە داكشانی ئابووری وڵات دەكەن، كە ترامپ مەبەستی بوو ئابووری بەهێز بكاتە بانگەشەی هەڵبژاردنەكان و پشتی پێببەستێت، بەڵام لە ئێستادا لە چارەكی دووەمی ئەمساڵدا بە ڕێژەی 32.9 ئابوری ئەمریكا داكشانی بەخۆیەوە بینیوە، كە ئەمەش خراپترین داكشانە لەو ماوەیەدا، بۆیە ترامپ نایەوێت لەم دۆخەدا هەڵبژاردن بكات و كارتێكی گرنگی بانگەشەی لەدەستچووبێت.
دووەم: لە چەندین ڕاپرسیدا، ترامپ لە بەرامبەر بایدندا شكستی هێناوە، بەتایبەت لەو ویلایەتانەی كە ئەنجامی كۆتایی هەڵبژاردنەكان یەكلایی دەكەنەوە، بەشداربوانی راپرسیەكان لە مامەڵەی ترامپ ڕازی نین، بە تایبەت لە ڕووی مامەڵە كردن لەگەڵ كۆرۆنا و سیاسەتی دەرەوەی كە ئەمریكای لاواز كردووە.
لەلایەكی دیكەوە، هاوپەیمان و نزیكەكانی ترامپ ، پێیانوایە تویتەكانی ترامپ نائومێدی لای ڕكابەر دروست دەكات، بەڵام دیموكراتەكان پێیان وایە كە ترامپ دەیەوێت ژینگەیەكی لەباری پێشوەختە بۆ ڕەتكردنەوەی ئەنجامەكان بخوڵقێنێت.


كۆنگرێس بریار دەدات
دەستوری ئەمریكا تەنها ڕێگای بە كۆنگرێس داوە، كە كاتی هەڵبژاردنەكان دیاری بكات، هیچ دەسەڵاتێكی بەسەرۆك نەداوە، كاتی هەڵبژاردنەكان دیاری بكات، هەروەها لە دەستوردا زۆر بە ڕوونی باس لە ماوەی سەرۆكایەتی ئەمریكا دەكات، كە ماوەی سەرۆك چوار ساڵە، ناتوانێت لەوە زیاتر لە پۆستەكەی بمێنێتەوە، جا هەڵبژاردن بكرێت، یاخود نا.
ریتچارد هاسن، مامۆستای یاسا لە زانكۆی كالیفۆرنیا، دەڵێت:" سەرۆك هیچ دەسەڵاتێكی لە دیاری كردنی كاتی هەڵبژاردنەكان نیە،ئەوەی ترامپیش باسی دەكات، تەنها لێدوانێكە و هیچ بەهایەكی یاسایی نیە".


ئەگەر هەڵبژاردن دوابخرێت چی ڕوودەدات؟

ئەگەر كۆنگرێس بڕیاری دواخستنی هەڵبژاردنی دا، هەرچەندە ئەمە دوورە، بەڵام لە ئەگەری دواخستنی هەڵبژاردنەكان،بە پێی دەستوری ئەمریكا پێویستە ترامپ و مایك پێنسی جێگری كاتژمێر یانزەی شەوی 20ی كانوونی دووەمی 2021 كۆشكی سپی بەجێبهێڵن ، نانسی پێلوسی سەرۆكی ئەنجومەنی نوێنەرانی ئەمریكا پۆستی سەرۆكایەتی دەگرێتە ئەستۆ تا ئەو كاتەی هەڵبژاردن ئەنجام دەدرێت.