عەفرین ... ئەو شارەی توركیا و تیرۆرستان بەردەوام تاوانی دەرحەق دەكەن

عەفرین ... ئەو شارەی توركیا و تیرۆرستان بەردەوام تاوانی دەرحەق دەكەن

229 خوێندراوەتەوە

شاری عەفرین لە ڕۆژئاوای كوردستان ماوەی زیاتر لە دوو ساڵە لەلایەن توركیا و گروپە تیرۆرستیەكانی نزیك لە ئەنكەرە داگیر كراوە، لەو ماوەیەدا زۆرترین تاوان دەرحەق بە دانیشتوانەكەی لە دزین و دەستدرێژی و ڕفاندن و كوشتن كراوە، ئەمە لە كاتێكدایە كە كۆمەڵگەی نێودەوڵەتی و هێزە هەرێمیەكان لە بەرامبەر ئەو هەموو تاوانانە بێدەنگیان هەڵبژاردووە و بۆ گروپە تیرۆرستیەكانیان جێهێشتووە بە ویستی خۆیان تاوانی مرۆیی تێدا ئەنجام بدەن.

ڕوانگەی سوری بۆ مافەكانی مرۆڤ لە نوێترین ڕاپۆرتیدا ئاماژەی بە چەندین تاوان كردووە، كە لەو شارە ئەنجامدراوە لەوانە:

دزینی سەروەت و سامان و هەژاركردنی هاوڵاتیان:
ڕوانگەی سوری بۆ مافەكانی مرۆڤ ئاشكرای كرد كە لە ڕۆژی 24ی تەمووزی 2020دا، چەكدارانی "فیرقەی حەمزە"ی سەر بە توركیا دزیان لە چەندین ماڵی گوندی "قدا" ی سەر بە ناحیەی راجۆ كردووە، ئامانجیان جگە لە دزین و دەستبەسەرداگرتنی ماڵ و موڵكیان، بۆ ئەوەیە كە خەڵكی ئەو ناوچەیە بێزار بكەن و لەو شوێنە ماڵەكانیان بگوازنەوە.


هەروەها فەسیلی " سلێمان شاه" كە بە " عشمات" ناسراون، لە ڕۆژی 24ی تەموزی ئەمساڵدا هەڵیانكوتاوەتە سەر گوندی یاخوری سەر بە ناحیەی معبتەلی، خەڵكەكەیان ناچار كردووە كە لە ماڵەكانیان بێنە دەرەوە و لە نزیك گوندەكەیان لە خێوەتدا بژین، بۆ ئەم كارەش ئەو گروپە تیرۆرستیە چەندین چەكداریان بەكارهێناوە، هەروەها دوای دەرچوونی خەڵكی لە ماڵەكانیان، چەكدارەكان ماڵەكانیان وەك مقەر بەكارهێناوە.

،،

لەلایەكی دیكەوە چەكدارانی سەر بە " سوپای شرقیە" هەڕەشەیان لە 50 خێزانی ئاوارەی ناوچەی ئۆپراسیۆنە سەربازییەكانی پارێزگاكانی ئیدلب و حەلەب كردووە، كە لە ماوەیەكی كورتدا شوێنەكانیان بەجێبهێڵن، ئەگەر نا بە زەبری هێز لە ماڵەكانیان دەریان دەكەن، ئامانج لەم كارەی ئەم گروپەش بۆ دەركردنی خێزانە كوردەكان و جێگیر كردنی خێزانی عەرەب و توركمانە،كە بۆ گۆڕینی دیمۆگرافیای ئەو ناوچانە پیادەی دەكەن.


لە ئەنجامی ئەو دزین و تاڵانكارییەی كە گروپە تیرۆرستیەكانی سەر بە توركیا لە عەفرین و ناوچەكانی دیكە دەستیان پێكردووە، ڕێژەی هەژاری لەناو هاوڵاتیاندا بەشێوەیەكی بەرچاو بەرزبۆتەوە، بەشێوەیەك گەیشتۆتە لە 47%، هەروەها ڕێژەی بێكاری لە سەدە 70ی تێپەڕاندووە.


لەناوبردنی شوێنە ئاینی و كەلەپورییەكان:
ڕوانگەی سوری ئاماژە بەوە دەكات، كە گروپە تیرۆرستیەكان بەردەوامن لە تێكدانی شوێنە مێژوویی و كەلەپورییەكان، لەو بارەیەوە ڕایگەیاند لە مانگی نیسانی ئەمساڵدا چەكدارانی " سوڵتان سلێمان شاه" دەستیان كردووە بە هەڵكۆڵین و تێكدانی ناوچەیەكی مێژووی لە گردی " ئارەندە" كە سەر بە ناحیەی " شیخ حدید"ە، ئەم گردە ڕۆژانە بەشێوەیەكی بەردەوام كاری هەڵكۆڵینی تێدا ئەنجام دەدرێت، كە ئامێری گەورەی هەڵكۆڵینی تێدا بەكاردەهێنرێت و بەشێوەیەكی هەڕەمەكی كاری تێدا دەكرێت، ئەمەش بۆتە هۆی ئەوەی كە زیانێكی زۆری پێبگات.
ئەو گروپانە دەیانەوێت لە ڕێگای هەڵكۆڵینی شوێنە مێژووییەكان دەستیان بە كەرەستە كەلەپورییەكان بكەوێت و دواتر بیفرۆشنەوە.
لەلایەكی دیكەوە مەزاری " شێخ حەمید" لە گوندی قستەڵ سەر بەناحیەی شران، هەڵدراوەتەوە ، كە شوێنێكی پیرۆزی كوردانی ئێزیدیە، هەروەها دانیشتوانی عەفرین چەكدارە تیرۆرستیەكان بەوە تۆمەتبار دەكەن، بە ئاسانكاری هەواڵگری توركیا، چاڵی قوڵ و وێرانكاری لە شوێنە مێژوویی و پیرۆزییەكان هەڵدەكەنن.


تێكدانی ژینگە:
گروپە تیرۆرستیەكان بەردەوامن لە كاری تێكدەرانە و تێكدانی ژینگە وباخی هاوڵاتیانی كورد، لە نوێترین تاوانیاندا ڕێگەیان بە هاوڵاتیانی هاوردەی شارەكانی دیكەی سوریا داوە، كە داری ناوچەكانی عەفرین ببڕنەوە.
لەو بارەیەوە ڕوانگەی سوری بۆ مافەكانی مرۆڤ بڵاوی كردەوە، كە لە مانگی ئاوری ئەمساڵدا، ئەو ماڵە هاوردانە بە ڕەزامەندی گروپی سەمەرقەند، دەستیان بە بڕینەوەی دارەكانی گوندی روتانلی سەر بە ناحیەی مەعبەتەڵی كردووە، هەروەها چەكدارەكانی سەر بە توركیا لە گەڕەكی مەحمودیەی سەنتەری شاری عەفرین چەندین داریان بڕیوەتەوە، ئەمە جگە لەوەی لە دەوروپشتی عەفرین چەكدارەكان بەردەوامن لە بڕینەوەی دارەكان بەتایبەت داری زەیتون.


خراپی ڕەوشی ئەمنی:
گروپە تیرۆرستیەكان لەگەڵ ئەوەی خۆیان گەورەترین مەترسی ئەمنین بۆ سەر دانیشتوانی عەفرین، لەگەڵ ئەوەشدا چەندین جار پێكدادان و تەقینەوەیان لەدژی یەك ئەنجامداوە، ڕۆژی 22ی تەموزی 2020 چەكدارانی " سوپای شرقیە" لەناو خۆیاندا دەستیان بە شەڕ و پێكدادان كردووە و هەموو جۆرە چەكێكیان لە دژی یەكدی بەكارهێناوە،لە ئەنجامی ئەو شەڕەدا هاوڵاتیەك شەهید دەبێت و منداڵەكەشی بە سەختی برینداربوو، هەروەها چەندین برینداری دیكەشی لە نێو هاوڵاتیان لێكەوتەوە.
هەروەها ئەم گروپانە لە ململانێ و شەڕەكانیاندا قازیفە بەكاردەهێنن، هەروەها ڕۆژی 24ی حوزەیرانی 2020 ماتۆرسكیلێكی بۆمبڕێژكراویان لەناو عەفریندا تەقاندووە، كە بووە هۆی شەهید بوونی دوو هاوڵاتی و برینجاربوونی 9 كەسی دیكە، هەروەها لە 20ی حوزەیراندا ئۆتۆمبێلێكی بۆمبڕیژكراو لە گەڕەكێكی عەفرین تەقیەوە، لە ئەنجامدا6 كەس برینداربوون كە لەناو بریندارەكاندا منداڵیش بوونیان هەیە، هەروەها زیانێكی زۆری مادیشی بە ناوچەكە گەیاند.