مەسعود بارزانی: ئەمەریكا نا پاكی بەرانبەر شۆڕشی ئەیلوول كرد

مەسعود بارزانی: ئەمەریكا نا پاكی بەرانبەر شۆڕشی ئەیلوول كرد

688 خوێندراوەتەوە

نیازی ئەوەم نییە خۆم لە بەرپرسی نسكۆی 1975 دەركەم، ئامادەم بۆ لە ئەستۆگرتنی هەرچی بەرپرسیارێتییەك دەكەوێتە ئەستۆی تەنیا بارزانی‌و ئیدریسی برام‌و خۆم، ئەوانیتریش دەبێت بەخۆیاندا بچنەوەو هیوادارم بوێرن دان بە بەشە بەرپرسیارێتی خۆیاندا بنێن لەم نسكۆیەدا".
لە دوا دێڕەكانی باسكردنی هەرەسی شۆڕشی ئەیلوولدا، مەسعو بارزانی وای نووسیوە.


تێكچوونی پەیوەندییەكانی مەلا مستەفاو عەبدولكەرم قاسم

مەسعود بارزانی لە پێشەكی كتێبەكەدا، دەربارەی تێكچوونی پەیوەندی نێوان سەركردایەتی پارتی دیموكراتی كوردستان‌و عەبدولكەریم قاسم‌و هەگیرسانی شۆڕشی ئەیلوول دەڵێت:" زۆر نەخایاند عەبدولكەریم قاسم لە ڕاستە ڕێ لایداو دەستیدایە دوژمنایەتی گەلی كوردو مافە ڕەواكانی پشتگوێ خست، بەڵام دادپەروەرانە نییە هەموو ئەو تاوان‌و بەد ڕەفتارییانەی لەماوەی شۆڕشدا دەرهەق بە شۆڕشی كوردو گەلی كورد كران بدەینە پاڵ ئەو و بیخەینە ئەستۆی ئەو، دوو بەرە هەن ئەو بەرپرسییەیان بە هاوبەشی دەكەوێتە ئەستۆ".


مەسعود بارزانی پێ لەوە دەنێت كە سەركرایەتی پارتی حەكیمانە مامەڵەیان لەگەڵ عەبدولكەریم قاسمدا نەكردووەو بە هەڵەشەیی‌و سەرەڕۆیی بەرانبەر قاسم‌و حكومەتەكەی جوڵاونەتەوەو بەوەش بیانوویان داوەتە دەست عەرەبە شۆڤێنییەكان‌و تا عەبدولكەریم دژی كورد دنە بدەن،" دان بەوەدا دەنێم زۆرجار حەكیمانە‌و دوور بینانە مامەڵەمان لەگەڵ عەبدولكەریم‌و ڕژێمەكەیدا نەدەكردو بگرە هەڵەشەیی‌و سەرە ڕۆیشمان پێوە دیار بوو، بەمەش بیانووی بەهێزمان دایە شۆڤێنییە هەلپەرستەكانی دەورو پشتی ئەو كە هیچ دڵسۆزی‌و لایەنگریەكیان بۆی نەبوو، وە زۆرترین ڕادەی كینەو بوغزیان بەرانبەر گەلی كورد هەبوو، ئیتر كەڵكیان لەو بیانووە وەرگرت‌و لەوەدا سەركەوتن كە ڕایكێشن بۆناو سەنگەری خۆیان‌و دیوارێكی شك‌و گومانیان لە نێوان ئەو و مەلا مستەفای بارزانی دروستكرد".


مەسعود بارزانی، باسلەوەش دەكات كە تێكچوون‌و ئاڵۆزبوون‌و هەڵگیرسانی شەڕ لە نێوان پارتی‌و قاسمدا بووەتە هۆی ئەوەی كە شۆڤێنییەكان‌و بەعسیییەكان بەئاسانی بتوانن بە ئاسانی پیلان دژی عەبدولكەریم قاسم ساز بكەن‌و لایببەن‌و بیڕووخێنن.


"من لاموایە ئەگەر پارتی‌و بارزانی لەپاڵ عەبولكەریم قاسمدا بوونایە زۆر دوور بوو بتوانن بیڕووخێنن‌و كودەتاتەكەیان سەر بگرێ، هیچ شایان نەبوو بۆ بۆ شیوعی‌و پارتییەكان كە خۆیان لە عەبدولكەریم قاسم دوور خستەوەو مەیدانیان بۆ نەتەوە چییە شۆڤێنییەكان چۆڵ كرد"، مەسعود بارزانی لە بەرگی سێیەمی كتێبی " بارزانی‌و بزوتنەوەی ڕزگاریخوازی كورد"دا وا دەڵێت.


كتێبی" بارزانی‌و بزوتنەوەی ڕزگاریخوازی كورد"، كتێبێكی مەسعود بارزانییەو لە هەردوو بەشی كێبەكەدا بە چەند بەشی جیاواز باس لە خۆئامادەكردن‌و بەرپابوونی شۆڕشی ئەیلوول‌و گفتوگۆی سەكردایەتی شۆڕِش لەگەڵ بەعسییەكان لەپاش كودەتاكەیان بەسەر عەبدولكەریم قاسمداو جیابوونەوەی باڵی مەكتەبی سیاسی‌و بەیاننامەی یازدەی ئازاری نێوان مەلا مستەفاو سەددام‌و هەڵگیرسانەوەی شەڕی لەگەڵ حكومەتداو دواتریش هەرەسی شۆڕشی ئەیلوول دەكات.


سەددام چی بە ئیدریس بارزانی وت؟
لە سەرەتای ئەو بەشەی كتێبەكەیدا كە تایبەتە بە باسكردنی هەرەسی شۆڕشی ئەیلوول، وەكو هێمایەك بۆ هەڵگیرسانەوەی جەنگ لەگەڵ حكومەتی عێراقیدا لەپاش چوار ساڵی ڕێكەوتننامەی 11ی ئازارو ڕێكەوتنی نێوان عێراق‌و ئێران‌و وەكو ئاماژەی كەوتنی شۆڕشی ئەیلوول، مەسعود بارزانی ئەم قسەیەی سەددامی نووسیووە كە لە ڕۆژی 8ی ئازاری 1974 دا سەددام حسەین بە ئیدریسی برای وتووە،:" ئەگەر ناچارببین دەست لە شەتولعەرەب هەڵبگرین تاوەكو عێراقمان لە دەست نەچێت، هیچ دوو دڵی ناكەین".

ئەمەریكاو شای ئێران‌و شۆڕشی ئەیلوول
هەرچەندە شای ئێران بە ڕێنمایی ئەمەریكا بەردەوام هاوكاری مەلا مستەفاو شۆڕشی ئەیلوولی كردووە، بەڵام مەسعود بارزانی دەڵێت كە بارزانی ڕۆژێك لە ڕۆژان لە شا ئەمین نەبووەو لە هەموو كاتێكدا چاوەڕوانی ئەوەی لێدەكردووە كە نا پاكی لەگەڵدا بكات، " بۆیە هەلی ئەوەی نە دەدایە لە پشتەوە خەنجەری لێبدات، هەمیشە سوور بوو لەسەر ئەوەی پێوانەیەك لە نێوان خۆی‌و شادا بمێنێ، چونكە سڵی لێدەكردەوەو گومانی لێی هەبوو".


مەسعود بارزانی باسیلەوە كردووە كە ئەمەریكا لەسەر بەڵێنی خۆی بەرانبەر شۆڕشی ئەیلوول نەماوەتەوەو لە كۆتاییدا نامەردانە بەرانبەر شۆڕشی ئەیلوول مامەڵەی كردووە، مەسعود بارزانی دەڵێت:" بارزانی لە ساڵی 1972دا گفتێكی لە وڵاتە یەكگرتووەكانی ئەمەریكاوە وەرگرتبوو كەوا شا هەمیشە بە پشتیوانی مەسەلەكەو شۆڕش دەمێنێتەوە‌و دۆخ هەرچۆنێكی بەسەردا بێت، ئەو هەر لەسەر هەڵوێستەكەی خۆی دەبێت، بارزانیش پشتی بەم گفتەی ئەمەریكا بەستبوو، بەڵام دەركەوت ئەم گفتەی كسنجەری وەزیری دەرەوەی ئەوكاتەی ئەمەریكا بە زمانی وڵاتەكەی خۆیەوە دابووی، گفتێكی ڕاستەقینە نەبوو، بۆیە ئەو مامەڵەیە لە بەرانبەر شۆڕشدا لەوپەڕی سووكی‌و نامەردی بوو".

وەكو مەسعود بارزانی لە باسی هەرەسی شۆڕشی ئەیلوودا ئاماژەی پێداوە لە هاوینی ساڵی 1974 دا، كاتێك شەڕ لە كوردستان گەرم بووە، هەندێك زانیاری گەشتووەتە دەزگاكانی هەواڵزانیان وایان گەیاندووە كە گفتوگۆیەكی نهێنی لە نێوان ڕژێمی عێراق‌و ئێراندا هەیەو بەو نزیكانە ڕێكەوتنێك لە نێوان هەردوولادا دەبەسترێ، یەكێك لە نیشانەكانی ئەوەش كۆبوونەوەیەك بووە لە نێوان " سەعدون حەمادی" وەزیری دەرەوەی عێراق‌و " عەلی خەلعەتبەری" وەزیری دەرەوەی ئێران لە ئەستەنبووڵ، پاش ئەمەش گفتوگۆ لە نێوانیادا بەردەوام بووەو زانیوویشیانە كە ئیسرائیلیش ڕۆڵێكی گرنگی لەو گفتوگۆیەدا هەیە، ئەوەش لە كاتێكدا دەزگاكانی ئیسرائیل كاتیخۆی جەختیان لەسەر ئەوە كردبووەوە كە " شا"ی ئێران هەرگیز ناپاكی لە شۆڕشی كورد ناكات.
مەسعود بارزانی دەڵێت:" نامەیەكمان بۆ ئەمەریكا ناردو ئەو زانیارییانەمان تێدا باسكردو داوان لێكردن كە ئەو گفتەی خۆیان بەجێ بهێنن كە كاتیخۆی بە ئێمەیان دابوو، كاربەدەستانی ئەمەریكا بە توندی نكوڵییان لەوە كرد كە هیچ لێك نزیك كەوتنەوەیەك، یان هیچ پیلانێكی سیاسی لەكایەدا هەبێت كە زیان بە خەباتی كورد بگەیەنێت".


سەرباری جەختكردنەوە لە پشتگیریكردنی شۆڕشی كورد، بە وتەی مەسعود بارزانی، ئەمەریكییەكان وتووشیانە كە نامەیان ناردووە بۆ " شا"و ئەو زانیاریانەیان پێداوەو " شا"ش نامەی بۆ بارزانی ناردووەو لەوە دڵنیای كردووەتەوە كە هەرگیز دەست لە شۆڕشی كورد هەڵناگرێت‌و یارمەتی خۆی بۆ شۆڕش ڕاناگرێت.
"پاش نامەكەی ئەمەریكا بۆ " شا"ی ئێران، بۆ داپۆشینی مەرامەكانیان، شا یارمەتی خۆی بۆ شۆڕش زیاد كردو سنووری ئێرانیشیی بە ڕووی ژن‌و منداڵی كورددا كردەوە". مەسعود بارزانی وای نووسیوە.

مەلا مستەفا نامە بۆ كسنجەر دەنێرێت

جیا لە ئاگاداركردنەوەی ئەمەركییەكان لە ڕێكەوتنی نێوان عێراق‌و ئێران، وەكو مەسعود بارزانی باسیكردووە، بارزانی نامەیەكی لە 22 – 1 – 1975 بۆ " كسنجەر"ی وەزیری دەرەوەی ئەمەیكا ناردوەو تێیدا داوای لێكردووە كاری سەفەرێكی بۆ ئەمەریكا بۆ ئاسان بكات، تا لەوێ‌ مەسەلەكە لەگەڵ بەرپرسانی ئەمەریكادا باس بكات، " بەڵام كسنجەر بۆی ڕوون كردەوە ئەوە كارێكی گرانەو وتی ئامادەیە پێشوازی لە نوێنەرێكی بارزانی بكات، بارزانیش بڕیاری دا دكتۆر مەحمودو ئیدریس بنێرێ، بەڵام ئیمزاكردنی ڕێكەوتنەكەی جەزائیر ڕێی لەم هەوڵە گرت.

سامی عەبدولڕەحمان نامەی بارزانی دەبات بۆ ئەنوەر سادات

كاتێك كە لە مەترسیی‌و ڕێكەوتنی نێوان عێراق‌و ئێران دڵنیادەبنەوە، لە مانگی شوباتی 1975 واتە مانگێك بەر لە هەرەس، محەمەد مەحمود عەبدولرەحمان، "سامی عەبدولڕەحمان" دەچێتە قاهیرەو نامەیەك لە بارزانییەوە بۆ ئەنوەر سادات دەبات، لە نامەكەدا بارزانی داوا دەكات‌و دەڵێت ئێوەی عەرەب‌و كەسیتر نا، بكەونە نێوانەوە بۆ چارەسەری ئەو گیروگرفتەی كە لە نێوان ئێمەو عێراقدا هەیە، ساداتیش گفتی دابوو كە دی پێبكرێت لەو بارەیەوە بیكات.
بەوتەی مەسعود بارزانی، سەرباری هەوڵ‌و پەیوەندییەكانیان، بەڵام هەموو لا لەوەدا هاودەنگ بوون كە تاكە چارە ئامادەكردنی بە یەكگەشتنێكی سەددام‌و " شا" یە لە جەزائیر لەسەر وەختی كۆنگرەی ئۆپیكداو لەوێ لەسەر حسابی مافەكانی كورد ڕێبكەون.

مەلا مستەفا دەچێت بۆ تاران
بارزانی لە 26ی شوباتی 1975 لەسەر بانگهێشتی شا دەچێت بۆ تاران‌و "دكتۆر مەحمودو موحسین دزەیی" شی لەگەڵدا دەبێت.
مەسعود بارزانی دەڵێت:"بە هەموو ڕۆشنییەك دەركەوت كەوا " شا" بەرانبەر بارزانی داخی ئەوەی لەدڵ گرتووە كە بارزانی لە ئازاری 1970 لەگەڵ بەعس ڕێكەوت، وا ئێستا هەلی دەستكەوتووە بۆ ڕشتنی كۆڵی دڵی خۆی، هەلی بوونی بارزانیشی لە تاران هەڵبژارد تا بیكاتە بۆنەیەكی لەبار بۆ ڕاگەیاندنی ڕێكەوتننامەی جەزائیرو لە 6ی ئازاری 1975 ڕێكەوتنەكەی ڕاگەیاندو پاشان شا فەرمانی بۆ فەریق " ئەزهاری" دەركرد كە تۆپ‌و مووشەكەكان لە كوردستان بكشێنێتەوە".

موحسین دزەیی دەگەڕێتەوە
ئەوكاتە من لە نەغەدە بووم، ئیدریسی برام دوو نامەی بۆ نووسیم‌و ئەوەی پێڕاگەیاندم كە دەسەڵاتی ئێران تۆپەكانی لە كوردستان كێشاوەتەوەو " موحسین دزەیی" ش نۆی مانگ گەڕایەوەو ڕەهەندی پیلانەكەی بۆ لێكداینەوەو راِیسپاردین كە ئاگاداری خۆمان بین‌و خۆمان ڕابگرین، وتیشی ڕەنگە نەهێڵن بارزانی بۆ بارزان بگەڕێتەوە.
دەربارەی ئامانجی گەڕانەوەی موحسین دزەیی، مەسعود بارزانی نووسیوویەتی:" پاش ئەوەی كە شا كارتەكانی خۆی دەرخست، بارزانی بە پێوویستی زانی كەوا موحسین دزەیی بنێرێتەوە بۆ لامان، تا لە وردەكارییەكانی ڕووداوەكەو گۆڕانكارییە تازەكان ئگادارمان بكاتەوە، موحسین دزەیی نامەیەكی دكتۆر مەحمود عوسمانی بۆ هێنابووین كە تییدا مەترسی بارودۆخی نوێی بۆ باسكردبووین".
وەكو مەسعود بارزانی باسی دەكات لە دوای گەشتنەوەی موحسین دزەیی لە 9ی ئازاری ،1975 ئەندامانی سەركردایەتی كە لە " حاجی ئۆمەران" بوون كۆبوونەتەوەو ئەویش لە كۆبوونەوەیەدا بەشداری كردووە.
دەربارەی كۆبوونەوەكەو بۆچوونی ئەندامانی سەركردایەتی پارتی لە كۆبوونەوەكەدا سەبارەت بە شێوازی مامەڵەكردن لەگەڵ بارودۆخەكەدا، مەسعود بارزانی دەڵێت:" نە هاودەنگی لەسەر بڕیارێك هەبوو، نە نیمچە هاودەنگی‌و نە ڕێكەوتن لەسەر بەرنامەیەكی كار، هەندێك لە ئامادەبووان بە تەواوی تەپیبوون، هەندێكیتریان زەینیان پەرت‌و هەنێكیتریان موزایەدەیان دەكرد".
بارزانی دەربارەی بوونی بۆچوونێك كە لەناو بەشێك لە ئەندامانی سەركردایەتیدا هەبووەو ئەویشی لەگەڵدا بووە دەڵێت:" یەكێك لەو ڕاو بۆچوونە نا كردەنیانەی خرانە ڕوو كە هیچ ڕێتێچوونی بەدیهێنانی نەبوو، ئەوە بوو كە كە پێشنیاری دەكرد بە هەموو هێزمانەوە بگوازینەوە بۆ ئێران‌و لەوێ تا دوا پیاو و دوا هەناسە لە دژی لەشكری " شا" بجەنگین، من لەوكاتەدا كە توڕەیی‌و هەڵچوون بەسەرمدا زاڵ بوو ئەم بیرۆكەیەم بە دڵبوو، دەشمزانی بیرۆكەیەكی چەند پڕ مەترسیە".
وەكو مەسعود بارزانی باسیكردووە، پاش گفتوگۆیەكی دورو درێژ، سەركردایەتی پارتی لەو كۆبوونەوەیدا كۆمەڵێك خاڵی گەڵاڵە كردووەو داویانەتە موحسین دزەیی كە بیباتەوە بۆ مەلا مستەفا لە تاران.
- داوا كردن لە تاران كە بكەوێتە ناوبژی بۆ وەستانی شەڕ لە نێوان ئێمەو حكومەتی عێراقیدا.
- پرسیاركردن لە لە دەسەڵاتی ئێرانی ئاخۆ دەكرێت بەوە ڕازی بێت كە هەموو هێزەكانمان بكشێنینەوە بۆ ئێران.
- لە دەسەڵا تی ئێران بپرسرێ ئاخۆ هیچ لاری نییە ئەگەر لە ڕێگەی " شێخ محەمەد خالید"ەوە، یان لە ڕێگەیەكیتروە پەیوەندی بە حكومەتی عێراقییەوە بكرێت.
- تاوتوێكردنی خۆ ئامادەكردن‌و خۆ سازدان بۆ شەڕی پارتیزانی.
ئەمە چوار لەو خاڵە بنەڕەتیانەن كە سەركردایەتی پارتی لە كۆبوونەوەی " حاجی ئۆمەران"دا لەسەری ڕێكەوتوون‌و داویانەتە موحسین دزەیی تا بیباتەوە بۆ بارزانی لە تاران.

شا چی بە بارزانی وت

وەكو مەسعود بارزانی باسیدەكات لە 11ی مانگی ئازار "شا" پێشوازی لە بارزانی كردووەو پێووتووە "من ناچار بووم ئەم ڕێكەوتنە بكەم لەگەڵ بەعسییەكاندا، گەر نەمكردایە دەكەوتمە شەڕێكی بەربڵاو لەگەڵ بەعسییەكانداو سۆڤییەتیەكان هەموو قورسایی خۆیان دەخستە شەڕەكەوە".
بە وتەی مەسعود بارزانی شا بە بارزانی باوكی وتووە كە ڕێكەوتنەكە لە بەرژەوەندی گەلی ئێرانە، هەروەك چۆن ئێوە لە بەرژەوەندی خۆتان ڕێكەوتننامەی 11ی ئازاری 1970 تان كرد، تا ئاخری مانگی ئازار مۆڵەتتانە، لەم ماوەیەدا سنوور كراوەتەوە بۆ هەركەس دەیەوێت بمێنێتەوەو كە مۆڵەتەكە تەواو بوو سنوور دا دەخەین.

بارزانی لەتارانەوە دەگەڕێتەوە
ڕۆژێك پاش بینی مەلا مستەفا لە لایەن " شا"وە لە 12ی مانگ بارزانی‌و ئەوانەی لەگەڵیدا بوون گەڕانەوە، مەسعود بارزانی دەڵێت، بڕیاری سەركردایەتی ئەوە بوو بەردەوام بین لە بەربەرەكانێ، بروسكەیەكیش بۆ ئەمەریكا لێدرابوو بۆ ئەوەی پەستان بخاتە سەر ئێران بۆ هاوكاری نەكردنی سوپای عێراق، ئیسرائیلیش پێشتر گفتی دابوو ئەگەر "شا"ش سنووری خۆی بە ڕووی شۆڕشدا داخست، یارمەتی ئەو هەر بەردەوام دەبێت.
ئەمەریكاو ئیسرائیل كە دوو ئومێدی گەورەی مەلا مستەفاو سەركردایەتی پارتیبوون، پەیوەندی خۆیان لەگەڵ شۆڕشی ئەیلوولدا دەبڕن‌و ئەوەش دەبێتە كۆتایی تەمەنی شۆڕشی ئەیلوول‌و جاڕدانی مەلا مستەفای بارزانی بۆ ڕاگەیاندنی كۆتاییهێنان بە شۆڕش:" ئەمەریكا وەڵامی دایەوە كە وا هیچی پێناكرێت‌و بە یەكجاری پەیوەندی خۆی پێمانەوە بڕی، ئیسرائیلیش وەڵامی داینەوە كە ناتوانێت گفتەكەی خۆی بە جێبێنێت".
مەسعود بارزانی باسلەوە دەكات كە سۆڤیەتیش پشتگیری لە ڕێكەوتنی " جەزائیر"ی نێوان عێراق‌و ئێران كردووەو وایشیلێكدەداتەوە كە ئەو دوو دەوڵەتە شۆڕشی كوردیان بە خاڵێك لە خاڵەكانی " لێككەوتن"ی نێوانیان دەزانی‌و لەوانە بوو لە هەر كاتێكدا جەنگی ساری نێوانیان بكات بە جەنگی گەرم.

مەلا مستەفاو كۆتایی شۆڕش
دەربارەی دوا بڕیارو پاساوی مەلا مستەفا بۆ بڕیاردانی لە كۆتایهێنان بە شۆڕش، مەسعود بارزانی دەڵێت:" پاش ئەوە بارزانی وتی لە كۆبوونەوەی ئەو هەموو بێویژدانانە لە دژمان، دەترسم بەتەنیا خۆمان لە گۆڕەپانەكە بمێنینەوەو ئەمەش ببێ بە مایەی تیاچوونی مەسەلەكەمان‌و پاكتاوكردنی گەلەكەمان، من خۆم گەشتوومەتە ئەم تەمەنە، تەمەنم یارمەتیم نادات بۆ شەڕی پارتیزانی، بۆیە لاموایە بەرژەوەندیمان لەوەدا نیە بەردەوامبین لە شەڕ، هیچ زەرەرێكیشی تێدا نیە خەباتمان ماوەیەك پاش بكەوێت".
لەگەڵ باسكردنی هۆكاری بڕیاردانی باوكی بۆ وەستانی شەڕو كۆتایهێنان بە شۆڕش، مەسعود بارزانی دەڵێت:" باوەڕی من ئەوە بوو بەربەرەكانێ بكەین، من حەزم دەكرد لە حاجی ئۆمەران بمێنینەوەو تا دوا فیشەك‌و دوا پیاو شەڕ بكەین تا هەموومان لەناو دەچین، ئەمەم پێباشتر بوو لەوەی بچین بۆ ئێران، لەوانەیە سۆز كەفوكوڵی لاوی وایلێكردبم بۆچوونم وا بێت، بەڵام لە بەرانبەر بڕیاری باوكمدا هیچ چارەو دەسەڵاتێكم نەبوو، پاشانیش دەركەوت كە بڕیارەكەی باوكم چەن ڕەسەنایەتی‌و كەماڵی تێدا بووە".
مەسعود بارزانی ئاماژەوە بەوە دەدات كە بەبڕیاری كۆتایهێنان بە شۆڕش، باوكی ناو و ناوبانگی خۆی خستووەتە مەترسییەوەو خۆی خستووەتە بەر تانەو تەشەری خەڵكەوە:" ئەو بەم بڕیارە بوێرانەیە ناو و ناوبانگی خۆی دا بەدەم باوە‌و خۆی كردە مایەی تانەو تەشەری خەڵك، ئەوەی لا باشتربوو كە بە لاف‌و گەزافبازی هەنگاوێكی سەرەڕۆیانەی وا بنێ كە نە دەزانرا ئەنجامی چی دەبێت".
بەوتەی مەسعود بارزانی شۆڕشی ئەیلوول لە ڕووی سوپاییەوە نە شكاوە، بەڵكو ئەوەی ڕوویداوە شكان بووە لە ڕووی سیاسییەوە‌و بەهۆی ئەو شكانە سیاسییەشەوە ئەو پەناگە بێ مەترسییەی هەمایان بووە لە دەستیانداوەو دۆستەكانی دوێنێیان بوون بە دوژمن.
دەشڵێت:" ئەگەر بارزانی لەبارەی كەركوكەوە خۆی بدایە بەدەستەوەو ڕازی ببوایە كەركوك لە چوارچێوەی ئەو سنورەدا نەبێ كە بۆ ناوچەی ئۆتۆنۆمیان دیاری كردبوو مەسەلەكە نەیدەكێشایەوە بۆ ڕوودانی ئەو نسكۆیە".
لە دوا دێڕەكانی باسكردنی هەرەسی شۆڕشی ئەیلوولدا، مەسعود بارزانی دەنووسێت:" نیازی ئەوەم نییە خۆم لە بەرپرسی نسكۆی 1975 دەركەم، ئامادەم بۆ لە ئەستۆگرتنی هەرچی بەرپرسیارێتییەك دەكەوێتە ئەستۆی تەنیا بارزانی‌و ئیدریسی برام‌و خۆم، ئەوانیتریش دەبێت بەخۆیاندا بچنەوەو هیوادارم بوێرن دان بە بەشە بەرپرسیارێتی خۆیاندا بنێن لەم نسكۆیەدا.

 

author photo

ڕۆژنامەنوسی سیاسی و دیكۆمێنتەری سیاسی و مێژویی