هەرەشەی ئیستیقالەپێكردن لەو پەڕلەمانتارانەی یەكێتی كراوە كە واژوی یاداشتی پرساندنی سەرۆكی حكومەت و جێگرەكەیان كردووە

كێ‌ هەڕەشەی كردووە و بۆچی هەڕەشەی لێكردوون؟

هەرەشەی ئیستیقالەپێكردن لەو پەڕلەمانتارانەی یەكێتی كراوە كە واژوی یاداشتی پرساندنی سەرۆكی حكومەت و جێگرەكەیان كردووە

750 خوێندراوەتەوە

شانازی ئیبراهیم ئەحمەد بە پێنج پەڕلەمانتاری یەكێتی وتووە یان واژوەكانتان لەسەر یاداشتی پرساندنی سەرۆكی حكومەت و جێگرەكەی بكشێننەوە یان ئیستیقالەی بكەن.


لە مانگی رابردوودا بەدەستپێشخەری فراكسیۆنەكانی ئۆپۆزسیۆن لە پەڕلەمانی كوردستان 24 ئەندامی پەڕلەمان یاداشتێكیان دایە سەرۆكایەتی پەڕلەمان بۆ پرساندنی سەرۆكی حكومەت و جێگرەكەی و وەزیریی دارایی.


لە لیستە 24 كەسیەكەی پەڕلەماندا جگە لە فراكسیۆنی كمەڵ و یەكگرتوو و سەربەخۆكان 5 ئەندام پەڕلەمانی یەكێتی و 4 ئەندام پەڕلەمانی بزوتنەوەی گۆڕان هەبوون.


بەڵام هەرزوو پەڕلەمانتارەكانی یەكێتی و گۆڕان كەوتنە ژێر گوشاری حزبەكانیانەوە بۆ كشانەوەی ئیمزاكانیان.

،،

ئیمزای پێنج پەڕلەمانتارەكەی یەكێتی بۆ بانگهێشتی سەرۆكی حكومەت و جێگرەكەی و وەزیری دارایی بە تەواوەتی قوباد تاڵەبانی جێگری سەرۆك وەزیرانی توڕەو نیگەران كرد.


چونكە ئەگەر پرساندنەكە ڕویبدایە،ئەوا ئاشكرابوو كە مەسروور بارزانی بەهۆی زۆرینەی پارتی و هاوپەیمانەكانیەوە لە پەڕلەمان ڕزگاری دەبوو،بەڵام هیچ گرەنتیەك نەبوو كە قوباد تاڵەبانی لە بەردەم پەڕلەماندا ئیحراج نەكرێت و تەنانەت متمانەشی لێ‌ وەرنەگیرێتەوە.


نیگەرانیەكانی قوباد تاڵەبانی گەیشتە مەكتەبی سیاسی یەكێتی و لەسەر ئەو بنەمایەش مەكتەبی سیای بڕیاریدا كە دەبێت پەڕلەمانتارەكانی یەكێتی واژوەكانیان بكشێننەوە،بەڵام پەڕلەمانتارانی یەكێتی بەرهەڵستی بڕیارەكەیان كردبوو،ئامادەنەبوون ئیمزاكانیان بكشێننەوە.


بەپێی زانیاریەكانی دیبلۆماتیك مەگەزین لەلایەن شاناز ئیبراهیم ئەحمەد كارگێڕی مەكتەبی سیاسیەوە دوا لەو سێ‌ پەڕلەمانتارە كراوە یان ئیمزاكانیان بكشێننەوە یان ئیستیقالەكانیان پێشكەش بكەن، ئەمە پەڕلەمانتارەكانی بەتەواوی توڕەكردووە و رایان گەیاندووە ئیستیقالەكانیان ئامادەیە.


بەڵام ئاخۆ چی لەپشت هەرەشەكانی شاناز ئیبراهیم ئەحمەدەوەیە لە پەڕلەمانتارەكانی یەكێتی؟ لەكاتێكدا پێشتر دەنگی دژە پارتی و حكومەت بووە و هەمیشە لەبەرەی رەخنەگراندابووە.


ئایا هۆكارەكە بۆ پاراستنی قوبادی خوشكەزای دەگەڕێتەوە كە نەیویستووە لەبەردەم پەڕلەماندا ئیحراج ببێت،یان دوای گەیشتنی بە مەكتەبی سیاسی وازی لە دژایەتی و ڕوبەڕوبونەوەی ماڵی بارزانی و رەخنەگرتن لە حكومەت هێناوە؟

،،

بەپێی زانیاریەكانی دیبلۆماتیك مەگەزین لەلایەن شاناز ئیبراهیم ئەحمەد كارگێڕی مەكتەبی سیاسیەوە دوا لەو سێ‌ پەڕلەمانتارە كراوە یان ئیمزاكانیان بكشێننەوە یان ئیستیقالەكانیان پێشكەش بكەن، ئەمە پەڕلەمانتارەكانی بەتەواوی توڕەكردووە و رایان گەیاندووە ئیستیقالەكانیان ئامادەیە.


هەمان دۆخ كە ڕوبەڕوی فراكسیۆنی یەكێتی بویەوە، لە ناو بزوتنەوەی گۆڕانیش رویدا،واژوی پەڕلەمانتارانی گۆڕان و بەتایبەت عەلی حەمە ساڵح سەرۆكی لیستەكە ئیحراجیەكی گەورەی بۆ بزوتنەوەی گۆڕان دروستكرد و روبەڕوی رەخنەی پارتی كردنەوە و لەسەر ئەو بنەمایەش رێكخەری گشتی گوشاری خستە سەر عەلی حەمەساڵح تا ئیمزاكەی بكێشێتەوە،بەڵام ناوبراو رازی نەبوو، سەر ئەنجامی ئەوەش دەستبەرداری پۆستەكەی بوو وەك سەرۆكی فراكسیۆنی گۆڕان.


لەدوای رەتكردنەوەی دواكاری 24 پەڕلەمانتارەكە لەلایەن سەرۆكایەتی پەڕلەمانی كوردستانەوە،فراكسیۆنە ئۆپۆزسیۆنەكان جارێكی دیكە هەڵمەتی ئیمزا كۆكردنەوەیان دەستپێكرد،بەڵام ئەمجارەیان پێ‌ ناچێت هیچكام لە پەڕلەمانتارانی یەكێتی و گۆڕان یاداشتەكە ئیمزا بكەن.

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری