دوو بەرە یەك تەرم !

دوو بەرە یەك تەرم !

538 خوێندراوەتەوە

ڕزگار عومەر

قسەکردن لەسەر هەر کاراکتەرێکی سیاسی لە کوردستان بێ باج نیە، بە تایبەتی ئەگەر دۆخی ئەم کاراکتەرە لەوە ترازابێت کە تەنیا کێشەیەکی ناوخۆی حیزبێك یان هەرێـمێك بێت، چونکە بەرەکان هەموو لە کەمینن نەك تەنیا لە یەکتر، بەڵکو لە هەر بۆچوونێك کە دەرچوونێك بێت لەو چوارچێوەیەی ئەوان دەیانەوێ ڕووداوەکانی پێ بخەنە ڕوو.
بەرەی دژە " لاهور" لە هەڵبەزو دابەزینێکی زۆر دایە لە ئەنجامی هەڵوێستی ناکۆك دژ بەیەك، لە هەر هەڵوێستێکی ناکۆکیشدا خیتابێکی پڕ لە پینە دەهۆننەوە کە زیاتر دەچێتەو بەرژەوەندی لاهور.

،،

بەرەی لاهور و زاتی خۆشی هەرگیز پلانیان نەبوو بۆ ڕۆژگارێکی وا، چونکە چاوەڕوانیەکی وایان نەبوو لە ئامۆزاکانی خۆیان بەم جۆرە و بەم پێوانەیە، بەم خێراییە ببن بە نەیاری سەرەکی و جێبەجێکەر.


ئەوانەی ئێستا لە ماڵی لاهورن لە ڕووی لۆجیستی و سەربازیەوە، لە ڕووی گەمارۆ دانەوە هێزێکی کەمن، بەڵام ڕەهەندێکی " باوەڕداری " یان هەیە، ئەم باوەڕداریە پڕۆسەیەکی هۆشیارکردنەوە یان هەڵمەتێکی ئایدیۆلۆژی دروست نەبووە (چونکە ئەو مەجالە بە لاهور نەدرا پلانەکان بە خێرایی لە دژی کرا) بەڵکو سروشتی ڕووداوەکان و جیاوازبوونی خیتابی سیاسی لاهور لە چەند ساڵی رابردوو گەراکەی دانا.
خیتابی جیاوازی لاهور لە ویژدانی هەوادارنی و بەشێك لە جەماوەری ژێرخانی یەکێتی تێنوێتی بوو بۆ گەڕاندنەوەی چۆڕێك لە شکۆمەندی شوناس ی یەکێتی کە لە ٢٠ ساڵی ڕابردوو "حەرەسە قەدیمەکان" هەر یەکە لەتێکی لەم شکۆمەندیە دەدا بە پارتی و بە حیزبە بە هێزەکانی شیعە لە بەغدا.
بلۆك بە بلۆکی خیتابی سیاسی و پەیامەکانی لاهور ئەگەر بە هەڕەمەکیش بووبێت بریتی بووە لە تۆخ کردنەوەی سۆزو غەریبیی هەوادارن بۆ ڕابردویەك کە پێیان وایە "سەربەخۆ بوون" لە چاو هەژموونی پارتی بەسەر تەواوی ستراتیژی یەکێتی دەبێ چاك بکرێتەوە.
بە دڵنیایی خیتابی سیاسی لاهور ڕەنگە لەزۆر بواردا هەڵگری هەمان پێکهاتەی ناسیۆنالیستی بووبێت، ڕەنگە لە زۆر شوێن مشت بووبێت لە وەهم ومەجاز، بەڵام ئەم خیتابە بە پێوەری " واقیع " بوون پێوانە ناکرێ، تاکە بەراورد کە بکرێتە پێوەر ئەوەیە:
کەئەم خیتابە لە یەك کاتدا هەم پاڵنەرو مۆتیڤ بووە هەم جۆرێك بووە لە " مۆرفین" بۆ جەستەی هیلاکی جەماوەری حیزبێك کە هەست بە بێ هێزیەکی زۆر دەکا. ڕاوەستانی ئەمڕۆی لاهور لە گۆشەیەکی خۆیدا بریتیە لەوەی دەزانێت کە پەلاماردانی ، گرتنی، کوشتنی هەر هەمووی بۆ نەیارەکانی بریتیە لە قومارێکی پڕ لە کێشمەکێش، چونکە هەموو ئەو ئاواتە ڕەمزیانەی بەشێکی زۆر لە جەماوەری یەكێتی (دژە پارتیەکان بە تایبەتی) پێوەی سەرگەرم بوون بۆ گەڕاندنەوەی شانازیە لە دەست چووەکان ڕاستەوخۆ بەر ئەم هێرشە دەکەوێت، هەروەها گرتنەوەی "مۆرفین" ێکە لە جەماوەرێك کە ڕەنگە ئەوەندەی تینووی " ئۆقرەیەکی " دەروونیە لە "بەلانس کردنەوە" هێز، ئەوەندە عەوداڵی شەڕێکی بەرەیی نەبوو لە گەڵ نەیارە بە هیزوو هەژمووندارەکان.

،،

ئەم دۆخە سەربازی نیە، تەنانەت ئەگەر ئەو هێزانەی دەوری ماڵی لاهوریان داوە چ بە یەك کاتژمێر ئەو شوێنە وێران بکەن چ هەفتەیەك شەڕ بکەن، لێرە نەیارانی لاهور کورتبینن، چونکە خۆیان وا یارمەتی بە‌هێزبوونی " کاریزمایی" ئەو کەسە دەدەن.


لەم ڕووداوە کە هێشتا دیمەنی کۆتایی سەرەداواکانی دیار نیە، دوو جۆر لە لەسەرکەوتن ی هەردوو بەرەی دژ بە یەك هەیە، یەكێك لەسەرکەوتنەکان سەربازی و پیلانگیریە (هەروەکو لاهور ئاماژە بە کودەتا دەکات لە قسەکانی خۆی) کە بە دەستگیر کردن یان کوشتن یان نەفی کردنی لاهور کۆتایی دێت، سەرکەوتنەکەیتری بەرەکەیتر " ڕەمزیە " و ناوی لاهور لە بەشێك لە زەینی گشتیدا دەبێتە " قارەمانێکی مەزڵوم " کە هەموو ڕابردووی ئەو (خراپ بووبێت یان باش) تەنیا بە تام و بۆی ئەم دۆخەی ئەخیردا فۆرمۆڵە دەکرێتەوە!
هەردوو بەرە هەمان جەستەیان لەسەر شانە، تەرمی لاهور بە مردوویی، تەرمی لاهور بە "ڕەمزیی" ، مردنێکی بایلۆژی و مانەوەیەکی ڕەمزیی! یەکێکیان دەنێژرێت ، ئەویتریان دەمێنێت! ئەوەی دۆخەکەی گەیاندۆتە ئەم دووڕیانە نە لاهورە نە هەوادارەکانیتی، بەڵکو کارەکتەری نەیارەکان و ئەو هەڵمەتە لاوازو دژ بە یەکانەی بەکاری دەهێنن دژ بەلاهور، ئەمیش لەسەر دانە بە دانەی ئەم ناکۆکیانە مانۆڕی سیاسی و دەروونی دەکات ، لەم ڕووداوەدا هەردوولا براوەن، بەرەی دژی لاهور وەکو ئەنجامی ماتماتیکی سەربازی، بەرەی لاهوریش دوای خامۆشی دەنگی تەقەی ڕاستی یان میدیایی دەبنە خاوەنی جۆرێك لە پیرۆزیی مەعنەوی و داستانی مەزڵومێکی سیاسی!