بزوتنەوەی گۆڕان، كەمپینێكی گەرم و ڕێكخەرێكی بێدەنگ

مایسترۆكانی بانگەشەی هەڵبژاردن

بزوتنەوەی گۆڕان، كەمپینێكی گەرم و ڕێكخەرێكی بێدەنگ

2799 خوێندراوەتەوە

لەوانەیە هیچ هێزێكی كوردستان بەهێندەی بزوتنەوەی گۆڕان كاندیدەكانی بەهێزنەبن، لەهەمان كاتیشدا جگە لە بارزانی كە بەهۆی دەرئەنجامەكانی ڕیفراندۆمەوە دورکەوتووەتەوە لە هەڵبژاردنەكان، هیچ هێزێك بەهێندەی ئەو بزوتنەوەیە كەسی یەكەم و ڕێكخەرە گشتیەكەی بێدەنگ نییە.

بزوتنەوەی گۆڕان لەم هەڵبژاردنەدا بەتەواوی غیابی ڕێكخەری گشتی پێوەدیارە و لەوانەشە لیژنەی باڵای هەڵبژاردن وای بەباش بزانن هەر دەرنەكەوێت و قسە نەكات.

عومەری سەید عەلی، سیاسیەكی بەئەزموون و پشودرێژە، بەڵام وتاربێژێكی خراپە و توانای قسەكردنی بۆ جەماوەر و میدیا لاوازە.


هەنگاوی زیرەكانەی گۆڕان و عومەری سەید عەلی، سپاردنی كەمپینی هەڵبژاردنەكە بوو بە ركابەرە سەرسەختەكەی لەناو بزوتنەوەی گۆڕاندا.


قادری حاجی عەلی، لە وتاردان و سەرنج راكێشانی میدیا و جەماوەردا كەسێكی كاریگەرە و ئێستا مایسترۆی یەكەمی كەمپینەكەی گۆڕانە.

،،

بزوتنەوەی گۆڕان لەم هەڵبژاردنەدا بەتەواوی غیابی ڕێكخەری گشتی پێوەدیارە و لەوانەشە لیژنەی باڵای هەڵبژاردن وای بەباش بزانن هەر دەرنەكەوێت و قسە نەكات. عومەری سەید عەلی، سیاسیەكی بەئەزمون و پشودرێژە، بەڵام وتاربێژێكی خراپە و توانای قسەكردنی بۆ جەماوەر و میدیا لاوازە.

ئەو بەباشی توانیویەتی بۆشایی غیابی عومەری سەید عەلی پڕ بكاتەوە و جگە لە گەرمكردنی كەمپینی هەڵبژاردن، دڵی لایەنگرە تۆراوەكانی گۆڕانیش ئاشت بكاتەوە.

لەسەرو ئەمانەشەوە بزوتنەوەی گۆڕان لەناو كاندیدەكانیدا چەندین كەسی بەهێز هەیە كە بۆ خۆیان راگەیاندكار و وتاربێژی حەماسین و دەزانن بۆ ڕازیكردنی دڵی جەماوەرەكەیان لە چ وەتەرێكی هەستیار دەدەن.


سەرۆكی لیستی گۆڕان لە پارێزگای سلێمانی د.یوسف موحەمەد سادق، سەرۆكی پێشوی پەرلەمانی كوردستانە، دەتوانرێت بە دووەم مایسترۆی كەمپینەكەی گۆڕان دابنرێت.

د.یوسف محەمەد، سیاسیەكی شەرمنە، بەڵام عیناد و ئازایە، توانای كۆكردنەوەی بەشێكی گەورەی دەنگەكانی گۆڕانی هەیە لە پارێزگای سلێمانی، ئەگەری زۆرە دەنگەكانی گۆڕان هەرچەنێك ببن نزیك بە نیوەی بۆ د.یوسف بڕوات.

جگە لەوە بزوتنەوەی گۆڕان لەناو كاندیدەكانیاندا خاوەنی چەند فیگەرێكی بەهێز و كاریگەری وەك هۆشیار عەبدوڵا، عەدنان عوسمان و غالب محەمەدن كە توانای ڕوبەڕوبونەوە و مێزگرد و وتاری جەماوەریان هەیە.

بەشێوەیەكی گشتی كەمپینی بزوتنەوەی گۆڕان، گەرموگوڕە و بەباشی بەڕێوەدەبرێت، بەڵام كێشەی گەورەی ئەوەیە كە شێوازەكەی تەقلیدییە و لە هەڵبژاردنی 25/7/2009 وە تائێستا هیچ گۆڕانێكی بەسەردا نەهاتووە، كە بریتیە لە كەمپینی هەڵپەڕكێ‌ و كۆبوونەوەی شەوانە و كەژاوەی ئوتۆمبیل و نیلی پۆشكردنی سلێمانی.

كێشەی سەرەكی لە كەمپینی ئەمجارەی بزوتنەوەی گۆڕاندا ئەوەیە كەس وەڵامی یاریەكانی ناداتەوە و بەبێ‌ وەڵامدانەوەشی بەشی زۆری كەمپینەكانی ئامانجی خۆی ناپێكێت.


وەك بڵێیت یەكێتی دەستەكەی گۆڕانی ئاشكراكردبێت، بۆ دامركاندنەوەی گەرموگوڕی كەمپینەكانی گۆڕان، شەڕی كەمپینی سەرشەقامی لەگەڵدا ناكات و شەقامەكانی بەجێهێشتووە بۆی، بەمەش گۆڕەپانەكە بۆ كەمپینی گۆڕان ساردە و یارییەكی یەكلایەنەیە كە شۆی تیا دروست نابێت.

بزوتنەوەی گۆڕان دەبێت ئاگاداری ئەوەبێت لەم هەڵبژاردنەدا خاوەنی تۆپخانە نییە، بەڵكو كەناڵێكی ئاسایی هەیە كە لەوانەیە بەهۆی لابردنی فریكوێنسێكەیەوە لەشوێنی پێشوی خۆی، لەزۆر ماڵدا بوونی نەبێت.

هەروەها لە هەڵبژاردنەكانی پێشوودا، دوو گەورە كەناڵی ئاسمانی كوردی خزمەتی كەمپینەكەیان كردووە كە كە كەناڵی ڕوداو و ئێن ئار تی بوون. یەكەمیان لە دژی یەكێتی و دوەمیشیان لەبەرخاتری كاك نەوشیروان، یارمەتی كەمپینی هەڵبژاردنی گۆڕانیان داوە.

،،

 بزوتنەوەی گۆڕان لەناو كاندیدەكانیاندا خاوەنی چەند فیگەرێكی بەهێز و كاریگەری وەك هوشیار عەبدوڵا، عەدنان عوسمان و غالب موحەمەدن كە توانای ڕبەڕوبونەوە و مێزگرد و وتاری جەماوەریان هەیە.

لە هەڵبژاردنی ئەمجارەدا هەردوو تەلەفزیۆنەكە پشتیانكردووەتە بزوتنەوەی گۆڕان و تەنانەت لە زۆرباریشدا دژی دەوەستنەوە و لێی دەدەن، بێگومان ئەمەش بەقازانجی كەمپینەكەی گۆڕان نییە.

هەروەها لەم هەڵبژاردنەدا نوخبەی رۆشنبیر و میدیای ئەهلی لە سلێمانی یەكدەست نین بۆ پشتیوانی كەمپینەكەی گۆڕان، بەشێكیان كڕاونەتەوە و بەشێكی دیكەشیان دابەشبوون بەسەر هێزە تازەكانی دیكەدا و بەشێكی دیكەشیان بێزارن و تەنها لە دورەوە سەیر دەكەن.


گوتاری سەرەكی كەمپینی گۆڕان لەم هەڵبژاردنەدا گوتاری مانەوەیە نەك هێرشبردن، سەركردەكانی گۆڕان زۆر مەبەستیانە لە غیابی نەوشیروان موستەفادا پارێزگاری لە دەنگەكانیان بكەن، دروشمە سەرەكیەكەشیان" گۆڕان ئیرادەیەكی بەردەوامە" گوزارشت لەوە دەكات كە بەپلەی یەكەم وەستانەوەیە بەرامبەر بە پارتی.

بزوتنەوەی گۆڕان تەركیزی لەسەر ئەوەیە وەك وتاری دژە پارتی بناسرێت كە لەسلێمانیدا رەواجی هەیە و لایەنگرانی بزوتنەوەی گۆڕان حەزی پێ‌ دەكەن.

خاڵی دوەمیش بریتیە لە گوتاری رەخنەكردنی ڕیفراندۆم و لێكەوتەكانی بە 16 ی ئۆكتۆبەریشەوە.

،،

گوتاری سەرەكی كەمپینی گۆڕان لەم هەڵبژاردنەدا گوتاری مانەوەیە نەك هێرشبردن، سەركردەكانی گۆڕان زۆر مەبەستیانە لە غیابی نەوشیروان موستەفادا پارێزگاری لەدەنگەكانیان بكەن. دروشمەسەرەكیەكەشیان" گۆڕان ئیرادەیەكی بەردەوامە" گوزارشت لەوە دەكات كە بەپلەی یەكەم وەستانەوەیە بەرامبەر بە پارتی.

بزوتنەوەی گۆڕان جەخت لەوە دەكات كە ئەوان لە بەرەی ڕیفراندۆم نەبوون و بەرپرسیارێتی ئەو دۆخەی دوای ڕیفراندۆمیش لە ئەستۆی ئەوانەیە كە بەبێ‌ گوێودانە خواستی ناوخۆیی و نێودەوڵەتی كردیان، بەڵام یەكێك لە كۆسپەكانی بەردەم ئەم گوتارە بریتییە لە دەنگدانی ڕێكخەری گشتی بەبەڵێ‌ و شانازی پێوەكردنی.

هەروەها كێشەی دیكەی ئەم گوتارەی گۆڕان ئەوەيە هێشتا بابەتە نەتەوەییەكان گرنگی خۆیان لە دەست نەداوە و كەسانێك هەن پەیوەستن پێوەی بەتایبەتی دەنگدەری سەرو  40 ساڵ.

یەكێك لەهەڵەكانی گوتاری دژە ڕیفراندۆمی بزوتنەوەی گۆڕان ئەوەبوو كە یەكگرتووی كرد بە پاڵەوانی نەتەوەیی لە دەڤەری سەوزدا.

 

author photo

ڕۆژنامەنوس و مامۆستای زانكۆ

سەرنوسەری دیپلۆماتیك مەگەزین

ڕۆژنامەنوسی تایبەتمەند لە ڕۆژنامەوانی بنكۆڵكاری