یەكگرتوو چاوی لە حاجی كاروانە لەهەولێر كورسیەكی بۆ بباتەوە

حاجی كاروان: بەدڵنیایەوە من دەردەچم

یەكگرتوو چاوی لە حاجی كاروانە لەهەولێر كورسیەكی بۆ بباتەوە

1994 خوێندراوەتەوە


هەرچەندە هەڵبژاردنی پێشوو بۆ پەرلەمانی عێراق یەكگرتووی ئیسلامی كوردستان لە هەولێری پایتەخت نەیتوانی كورسی بەدەست بهێنێت بەڵام بەهۆكاری كاندیدكردنی بانگخوازێكی بەهێز، لە هەڵبژاردنی ئەمجارەدا ئەو حزبە دەیەوێت كورسیەك لە هەولێر بباتەوە .

حاجی كاروان پەرلەمانتار و بانگخوای ئاینیە لەشاری هەولێر و سەرۆكایەتی لیستی یەكگرتووی ئیسلامی كوردستان دەكات، دەیوێت لەژیانیدا ئەزموونێكی دیكە تاقی بكاتەوە و روو بكاتە پەرلەمانی عێراق.

ئەو بانگخوازە ئاینیە باس لە هۆكاری خۆ كاندیدكردنی دەكات بۆ پەرلەمانی عێراق و دەڵێت" بەلیستی ئیسلامی دڵخۆشم و هەر ئەوەش وایكردوە خۆم كاندید بكەم، ئەگەر لیستەكە تەنها حیزبێكی دیاریكراوبوایە خۆم كاندید نەدەكرد بەڵام ئەم لیستە بەهۆی بونی بزوتنەوە و چەند رێكخراوێكی ئیسلامیەوە لیستی زۆرینەی ئیسلامخوازانی كوردستانە "

،،

 ئەگەر تەنها یەكگرتوو بەیەك لیست بەشداری هەڵبژاردنەكانی بكردایەبەهیچ شێوەیەك خۆم كاندید نەدەكرد، بەڵام لەبەر ئەوەی بۆن و بەرامەیەكی ئیسلامی و بەرەیەكی ئیسلامخوازانەیە بریارم داوە خۆم كاندید بكەم


سەرۆكی لیستەی یەكگرتوو لەهەولێر بە ورەیەكی بەهێزەوە باس لە لیستەكەیان دەكات و پێی وایە لەهەڵبژاردنی ئەمجارەدا كە یەكگرتوو هەریەك لە بزووتنەوەی ئیسلامی و چاكسازی گەشە و كەسایەتییە ئیسلامییەكان پێكەوە كار دەكەن بۆ سەرخستنی لیستەكەیان و وەك خۆیان دەڵێن"لیستەكەیان تاكە لیستی ئیسلامخوازان و موسڵمانانە".

حاجی كاروان زۆر بەدڵنیاییەوە قسە بۆ دپلۆماتیك مەگەزین دەكات و دەڵێت " بەدڵنیایەوە من دەردەچم و ئەگەری زۆرە برایەكی دیكەش لەگەڵ من دەرچێت".

حاجی كاروان لەپاڵ ئەركەكەیدا وەك پەرلەمانتار، هێشتا وەك خۆی دەڵێت وازی لەكاری بانگەواز و خێرخوازی نەهێناوەو بەهۆی ئەوەی كە ڕێكخراوێكی تایبەتی هەیە بۆكاری خێرخوازی بەناوی (بەختەوەری) لەو ڕێگەیەوە كۆمەكی بۆ سەدان خێزانی هەژار كۆكردۆتەوە.

لە هەڵبژاردنی پێشودا بۆ پەرلەمانی كوردستان، زۆرترین دەنگی لیستەكەی بەدەست هێنا و بوە ئەندامی پەرلەمانی كوردستان.

ئەو متمانەی زۆری بەخۆی هەیە ئەوانەی بۆ پەرلەمانی كوردستان دەنگیان پێدا بۆ پەرلەمانی عێراقیش دەنگی پێ‌ بدەن.


ئەو بانگخوازە ئەوەش ئاشكرا دەكات كە لەئێستادا هەرچەندە كۆمەڵی ئیسلامیان لەگەڵدا نیە و بەیەك لیست بەشداریان نەكردووە بۆ پەرلەمانی عێراق، بەڵام هیوای سەركەوتنیان بۆ دەخوازێت و دوعای ئەوە دەكات كە بۆ هەڵبژاردنەكانی پەرلەمانی كوردستان كە بریارە 30ی9 ئەنجام بدرێت كۆمەڵی ئیسلامیش بێتە ئەو بەرەیەوە كەناویان ناوە بەرەی ئیسلامخوازان و بەیەكەوە شەر بۆ كورد و كوردستان بكەن.

ئەو پێی وایە ئەگەر ئیسلامییەكان یەك دەنگ و یەك رەنگ بن زۆرتر كاریگەریان دەبێت و زۆرتر لە ناوەوە و دەرەوە هەژموونیان دەبێت بەڵام تا پەرتەوازە بن، دەنگ و رەنگیشیان پەرتەوازە دەبێت و كەس حسابیان بۆ ناكات، هەر ئەمەشە وایكردووە حاجی زۆر پەرۆشی لیستی ئیسلامی بێت و وەك خۆی دەڵێت لەناو كۆمەڵێك لە زانایان و بانگخوازان ئەوەی وتووە كە ئەگەر تەنها یەكگرتوو بەیەك لیست بەشداری هەڵبژاردنەكانی بكردایە، بەهیچ شێوەیەك خۆی كاندید نەدەكرد بەڵام لەبەر ئەوەی بۆن و بەرامەیەكی ئیسلامی و بەرەیەكی ئیسلامخوازانەیە بریاری داوە خۆی كاندید بكات.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان