هەنگاوی داهاتوی شەش حیزبەكە چی دەبێت؟

نەخشەڕێگایەك لەدیدی نوسەر و ڕۆشنبیرانەوە

هەنگاوی داهاتوی شەش حیزبەكە چی دەبێت؟

5007 خوێندراوەتەوە

نوسەرو رۆشنبیران لەبارەی یەكگرتنی شەش لایەنەكە كە دژی دەرەنجامەكانی هەڵبژاردن بوون بۆ دپلۆماتیك مەگەزین دەدوێن، و داوای ئەوە دەكەن كە پێكەوە بن و پێكەوەش بایكۆتی پرۆسەی سیاسی عێراق بكەن گەرنا هەڵبژاردنەكانی هەرێمیش ئەدۆڕێنن.


رێبین هەردی نوسەرو رۆشنبیر پێی وایە ئەو شەش لایەنە بەتایبەت گۆران و هاوپەیمانی و یەكگرتوو و كۆمەڵ دەبێت پێكەوە لەپرۆسەی سیاسیی عێراق بكشێنەوە چونكە بەكشانەوەیان لەمە زیاتر زەرەر ناكەن كە ئێستە تێی كەوتوون و مافیان خوراوە.


بەڵام ئەو نوسەرە دوو بژاردەی هەیە بۆ ئەو لایەنانەی كە دژی دەرەنجامەكانی هەڵبژاردن بوون و پێیان وایە ساختەكارییەكی گەورە كراوە بژاردەكانیش:
یەكەم: یان ئەوەی كە پێكەوە فراكسیۆنێكی بەهێز درووست بكەن لە بەغداد و بەیەك تیم بەشداری لە پرۆسەی سیاسی عێراق بكەن و بە هەموو كەسێكی بڵێن تەنها یەكێتی و پارتی نوێنەری كورد نین.

،،

رێبین هەردی :

هەركام لەم شەش لایەنە ئەم بەرەیە جێ بهێڵێت و بەو دەرەنجامە رازی بێت ئەوا باجێكی قورس دەدات و هاوڵاتیان و دەنگدەرو ئەندامانیان سزایەكی قورسی دەدەن.


دووەم: یان ئەوەی ئەگەر بژاردەی یەكەم سەری نەگرت با بەهیچ شێوەیەك بەشداری لە پرۆسەی سیاسی و پەرلەمانی عێراقدا نەكەن و ئەو دەرەنجامانەی قبوڵ نەكەن كە فەرز كراوە بەسەریاندا و ئەم بژاردەیە لە بژاردەی یەكەم زۆر باشترە.


لەتیف فاتح فەرەج وەك نوسەرو رۆشنبیر هەمان رای رێبین هەردی هەیە لەوە روەوە كە گۆران و هاوپەیمانی و یەكگرتوو كۆمەڵ پەلە نەكەن لە بریاردان لە بارەی كشانەوەیان لە پرۆسەی سیاسی لە عێراق.


لەتیف فاتح پێی وایە بایكۆت رێگەی دیكە هەیە بۆ ئەوەی بیگرنە بەر وەك كۆكردنەوەی واژۆی ئەندام پەرلەمانەكان و سكاڵابردن بۆ دادگاری فیدراڵی و درستكردنی كەمپەین و رای گشتی لەسەر ئەو ساختەكارییەی كە كراوە بۆ ئەوەی زەختێك لە كۆمسیۆن بكەن كە دەرەنجامە راستەكان ئاشكرا بكات.


پێشی وایە هەڵبژاردنی ئەمجارەی نوێنەرانی عێراق سەرلەبەری لەژێژ پرسیاردایە و لە فاو تا زاخۆ رەخنەی جدی هەیە و ساختەكاری ئەنجامدراوە بۆیە دەبێت لایەنەكانی غەدرلێكراویش لەهەرێم بیر لەوە نەكەنەوە بەم دەرەنجامە بگەرێنەوە بۆ بەغداد.


كەمال رەوف وەك یەكێكی دیكە لە نوسەرو رۆژنامە نووسەكان بەهەمان شێوەی دوو رۆشنبیرەكەی پێشوو هەمان بۆچوونی هەیە و پێی وایە هەر هێزێك بەو دەرەنجانە رازی ببێت و بگەرێتەوە بۆ بەغدا ئەوا دەبێت باش ئەوە بزانێ كە هەڵبژاردنی پەرلەمانی كوردستانیش دەدۆرێنێ.

،،

لەتیف فاتح :

تا ئێستا ئەو شەش لایەنە بەتایبەت گۆران و یەكگرتوو و كۆمەڵ و هاوپەیمانی پێكەوەن دەبێت وریابن وەك رابردوو یەكێـتی و پارتی كڵاو نەكەنە سەریان و بەرەكەیان هەڵنەوەشێننەوە و بەجیا رەوانەی بەغدایان نەكەن.


كەمال رەوف ئەوەی زۆر پێ باشە كە ئەم لایانەش بچن بۆ بەغداد و هەوڵ بدەن لە پرۆسەی سیاسی عێراق بەشداربن بەڵام بەو دەرەنجامانە نا كە ئەمرۆ لە سایەی سیستەمی ئەلكترۆنیدا لە هەڵبژادندا سەپێنراوە بەسەریاندا.


ئەو نوسەرانە هاوران لەسەر ئەوەی كە نابێ بەهیچ شێوەیەك بەو دەرەنجامانە بگەرێنەوە بۆ بەغدا و هەرهێزێكیش بگەرێتەوە ئەوا داهاتووی لەهەرێم لەدەست دەدات، سەبارەت بە ئەگەری درووستكردنی هاوپەیمانییەتێكی پێیان وایە ئەو لایەنانەی كە بە بەرەی چاكسازیخواز و گۆرانخواز ناسراون و وەك یەكێتی و پارتی نین دەبێت بلۆكێكی بەهێز لە بەرامبەر بلۆكی یەكێتی و پارتی درووست بكەن.

كەمال رەوف لەسەر قسەكانی بەردەوام دەبێت و دەڵێت: دەسەڵات بەتەنها لەهەرێمی كوردستان بەرێوە ناچێت، هەر دەبێت لەرێگەی هاوپەیمانییەتی و دروستكردنی بلۆكەوە بەرێوە بچێت، بۆ كۆتایهێنان بە بلۆكی یەكێتی و پارتیش دەبێت لایەنەكانی دەرەوەی دەسەڵات بیر لە دروستكردنی ئەم هاوپەیمانییە بكەنەوە و پێكەوە بەشداری لە هەڵبژاردنەكانی هەرێمی كوردستان بكەن.


رێبین هەردی تاڕادەیەك بێ هیوایە لەم بەرە نیشتمانیە لەنێوان پارتەكانی دەرەی یەكێتی و پارتی درووست بكرێت چونكە وەك خۆی دەڵێت: پێش هەڵبژاردنەكانیش سەردانی لایەنەكانی وەك گۆران و كۆمەڵ و یەكگرتوو و هاوپەیمانیان كردووە بۆ دروستكردنی ئەم بەرەیە بەڵام رەتیان كردووەتەوە و بەجیا بەشداری هەڵبژاردنەكیان كردووە.

هۆكارەكەشی دەگەرێنێتەوە بۆ ئەوەی كە ئەو لایانانە هەست بە بەرپرسیارییەتی ناكەن و خەیاڵی گۆرانكاریان نییە و پەیوەندییەكی بەهێز لەنێوانیاندا نییە تاكو بەرەیەكی بەهێز درووست بكەن.

لەتیف فاتح فەرەجیش بەهەمانشێوە تورەیە لە لایەنەكانی دەرەوەی دەسەڵات و دەڵێت: ئەو شەش لایەنە پێشتر هەیانبووە هەموو ئیرادە و دەسەڵاتی رادەستی پارتی و یەكێتی كردووە ئیدی ئەمرۆ چۆن دڵخۆش بكەن كە لەبەرەی دژی دەسەڵاتدایە.!


بۆیە باشترین شت ئەوەیە كە پەیماننامەیەكی شەرف لەنێوانیاندا واژۆ بكرێت هیچ كام لەو لایەنانە جورئەتی ئەوە نەكات پەیمانەكە بشكێنێت و هەركامیشیان شكاندی بۆ رای گشتی و هاوڵاتیان ئاشكرا بكرێت، بەڵكو بەمە بەرەیەكی بەهێز لەبەرامبەر یەكێتی و پارتی درووست بكرێت.

،،

كەمال رەوف :

هەر هێزێك بەو دەرەنجانە رازی ببێت و بگەرێتەوە بۆ بەغدا ئەوا دەبێت باش ئەوە بزانێ كە هەڵبژاردنی پەرلەمانی كوردستانیش دەدۆرێنێ.

لەتیف فاتح دەشڵێت: تا ئێستا ئەو شەش لایەنە بەتایبەت گۆران و یەكگرتوو و كۆمەڵ و هاوپەیمانی پێكەوەن دەبێت وریابن وەك رابردوو یەكێـتی و پارتی كڵاو نەكەنە سەریان و بەرەكەیان هەڵنەوەشێننەوە و بەجیا رەوانەی بەغدایان نەكەن.

ئەمە هەر ئەو رایەی كەمال رەوفە كە پێی وایە بەمە ئیرداو ئومێد بۆ هاوڵاتیان دەگەرێتەوە جارێكی دیكە كە هەڵبژاردن ئەنجامدرا تاقەتیان هەیە بچنە سەر سندوقەكانی دەنگدان و دەنگ بدەن.

لەبارەی ئەگەرەكانی پشكردنە یەكتر و خیانەت لەیەكتری كردن، رێبین هەردی دەڵێت: هەركام لەم شەش لایەنە ئەم بەرەیە جێ بهێڵێت و بەو دەرەنجامە رازی بێت ئەوا باجێكی قورس دەدات و هاوڵاتیان و دەنگدەرو ئەندامانیان سزایەكی قورسی دەدەن.

رۆژی 12ی ئایار هەڵبژاردن بۆ پەرلەمانی عێراق بەرێوە چوو بەڵام دوای خستنەرووی دەرەنجامە سەرەتاییە نارەسمییەكان، گۆران و هاوپەیمانی و یەكگرتوو كۆمەڵ و بزووتنەوە شیوعی زۆر بەتوندی رووبەرووی ئەم دەرەنجامانە وەستانەوە پێیانوابوو كە ساختەكارییەكەی ئیجگار گەورە ئەنجامدراوە كە تا ئاستی خیانەت دەروات بۆیە بریاریاندا نەگەرێنەوە بەغدا تا هەڵبژاردن دووبارە نەكرێتەوە.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان