پرۆژە یاسای چاكسازی خانەنشینی لەپەرلەمان گیری خواردووە

فراكسیۆنەكانی پەرلەمان یەكتر تۆمەتبار دەكەن.!

پرۆژە یاسای چاكسازی خانەنشینی لەپەرلەمان گیری خواردووە

757 خوێندراوەتەوە

.

سەرەتای مانگی شوباتی ئەمساڵ بۆ یەكەمین جار پەرلەمانی كوردستان لەبارەی ئەو پرۆژە چاكسازییەی كە حكومەت ئاراستەی كردبوو كۆبوویەوە، هەرچەندە بەرای فراكسیۆنەكانی پەرلەمان بڕگەو مادەكانی پرۆژەكە لە خزمەتی بەرژەوەندی گشتیدان، بەڵام رێك نەكەوتن لەسەر تێپەراندنی.

فراكسیۆنی یەكگرتوو لەپەرلەمانی كوردستان یەكێتی و پارتی بە تۆمەتباری سەرەكی دەزانێت لە دواخستن و پەكخستنی ئەو پرۆژە چاكسازییەی كە زۆرێك لە بڕگەكانی لە بەرژەوەندی هاوڵاتیاندایە.

ئەبوبەكر هەڵەدنی ئەندامی پەرلەمانی كوردستان لە فراكسیۆنی یەكگرتووی ئیسلامی دەڵێت: ئەو پرۆژە چاكسازییە خەم و داواكاری لە مێژینەی هێزو لایەنە چاكساز ویستەكان بووە كە دەمێكە داوای پرۆژەیەكی لەو شێوەیە لە حكومەت و پەرلەمان دەكەن.

ئەبوبەكر هەڵەدنی ئەندامی پەرلەمانی كوردستان لە فراكسیۆنی یەكگرتوو

 

،،

دەستەی سەرۆكایەتی پەرلەمان كە تەنها یەكێتی و پارتین تاوانبار و هۆكاری سەرەكین لە دواخستنی ئەم پرۆژەیە و رێگەدەگرن لە دووبارە كۆبوونەوەی پەرلەمان بۆ گفتوگۆكردن لەبارەی پرۆژەكە.

بەڵام هەڵەدنی ئەوەش ناشارێتەوە هەرچەندە پرۆژەكە خاڵی باشی زۆرن بەڵام لەسەر چەند بڕگەیەك لە پەرلەمان گفتوگۆی چروپر كەوتۆتە نێوان فراكسیۆنەكان و نەیانتوانیوە رێك بكەون لەسەری، ئەمەش بووەتە هۆی ئەوەی پرۆژەكە جارێكی دیكە پێویست بكات رەوانەی پەرلەمان بكرێتەوە و گفتوگۆی لەبارەوە بكرێت.
ئەو ئەندام پەرلەمانەی یەكگرتوو دەشڵێت: دەستەی سەرۆكایەتی پەرلەمان كە تەنها یەكێتی و پارتین تاوانبار و هۆكاری سەرەكین لە دواخستنی ئەم پرۆژەیە و رێگەدەگرن لە دووبارە كۆبوونەوەی پەرلەمان بۆ گفتوگۆكردن لەبارەی پرۆژەكە.

 

فراكسیۆنی گۆران پێیان وایە یەكێتی و پارتی ئەترسن پرۆژەكە ببێـتە هۆی نان برینی بندیوارەكانیان، لەبەرامبەریشدا فراكسیۆنی پارتی، گۆران بەهۆكار دەزانێت لە دواكەوتنی كۆبوونەوەی پەرلەمان.

شێركۆ حەمەئەمین ئەندامی پەرلەمانی كوردستان لە فراكسیۆنی گۆران

 

،،

ئەو ئەندام پەرلەمانەی گۆران پێشی وایە یەكێـتی و پارتی و ئەوانەی كە خانەنشینی نایاساییان هەیە دەترسن لە پرۆژەكە و پێیان وایە دەبێتە هۆی ئەوەی موچە خۆری نایاسایی و بندیوارەكانیان دەربخات و موچەكانیان ببرێت، كە لە رێگەی حزبەكانیانەوە موچەیان بۆ بردراوەتەوە.

د.شیركۆ حەمەئەمین، ئەندامی پەرلەمانی كوردستان لە فراكسیۆنی گۆران بۆ دبلۆماتیك دەدوێت و دەڵێت: سەبارەت بەو پرۆژە چاكسازییە بە شتێكی زۆر باشی دەزانین كە لایەنەكانی پەرلەمان رێك بكەوین لەسەری بەڵام ناكرێت دەستكاری ئەو دەرماڵانە بكرێت كە بە یاسا رێكخراون".

ئەو ئەندام پەرلەمانەی گۆران پێشی وایە یەكێـتی و پارتی و ئەوانەی كە خانەنشینی نایاساییان هەیە دەترسن لە پرۆژەكە و پێیان وایە دەبێتە هۆی ئەوەی موچە خۆری نایاسایی و بندیوارەكانیان دەربخات و موچەكانیان ببرێت، كە لە رێگەی حزبەكانیانەوە موچەیان بۆ بردراوەتەوە.

لەبەرامبەردا پەرلەمانتارانی یەكێتی و پارتی بە پێچەوانەی ئەو دوو ئەندام پەرلەمانەی پێشوو خۆیان بە خاوەنی پرۆژەكە دەزانن و ئەستۆپاكی خۆیان دەردەخەن لەو تۆمەتباركردنەی فراكسیۆنەكانی دەرەوەی دەسەڵات بەرامبەریان.


هەرچی پارتی دیموكراتی كوردستانە پێی وایە ئەوە گۆرانە كە ئامادەی كۆبونەوەی لیژنەكان نابێت بۆ ئەوەی راپۆرت بنووسن بۆ پەرلەمان و داوای كۆبوونەوە بكەن تاكو گفتوگۆ لەسەر پرۆژەكە بكرێـت.

فەرحان تاهیر ئەندامی پەرلەمانی كوردستان لە فراكسیۆنی پارتی

،،

هەمیشە ناوی یەكێتی و پارتی پێكەوە دێنن بۆ تۆمەتباركردنیان گەرنا گۆرانیش ئامادەی لیژنەكان نابێت تاكو راپۆرت بۆ كۆبوونەوەی پەرلەمان بنووسرێت.

فەرحان جەوهەر ئەندامی پەرلەمانی كوردستان لە فراكسیۆنی پارتی بۆ دبلۆماتیك دەدوێت دەڵێت: ئەو پرۆژەیە هی یەكێتی و پارتییە و پارتی دیموكراتی كوردستان بەهەموو شێوەیەك لەگەڵیدایە و نایەوێت دوا بكەوێت، چونكە پرۆژەكە شتێكی زۆر باشە لە بەرژەوەندی هاوڵاتیاندایە.


ئەو ئەندامەی پارتی ئاماژە بەوە دەكات كە هەفتەی پێشوو سەرۆكی لیژنەی یاسایی كە پارتی دیموكراتی كوردستانە بە ناوی ڤالا فرید لەگەڵ سێ ئەندامی دیكەی لیژنەی یاسایی كە پارتین ئامادە بوون تاكو راپۆرت بنووسن بۆ كۆبوونەوەی پەرلەمان بەڵام فراكسیۆنەكانی دیكەی وەك گۆران و یەكێتی ئامادە نەبوون ئیدی پارتی چی بكات كە تۆمەتبار دەكرێت بە دواخستنی پرۆژەكە.


فەرحان جەوهەر دەشڵێت: وەك ئاوازی شیعری لێهاتوە هەمیشە ناوی یەكێتی و پارتی پێكەوە دێنن بۆ تۆمەتباركردنیان گەرنا گۆرانیش ئامادەی لیژنەكان نابێت تاكو راپۆرت بۆ كۆبوونەوەی پەرلەمان بنووسرێت.


هەرچی فراكسیۆنی سەوزیشە ئاماژە بەوە دەكەن هەفتەی داهاتوو كۆ دەبنەوە و پرۆژەكە لەگەڵ لایەنەكانی دیكە تێدەپەرێنن.

 


د.عێزەت سابیر سەرۆكی لیژنەی دارایی لە پەرلەمانی كوردستان لە فراكسیۆنی یەكێتی، بۆ دبلۆماتیك دەدەوێت دەڵێت: هەفتەی پێشوو رێژەی یاسایی تەواو نەبوو بۆ كۆبوونەوەی پەرلەمان، بۆیە هەفتەی دابێ‌ جارێكی دیكە داوای كۆبوونەوە دەكرێت و ئەگەری زۆرە پرۆژەكە تێ پەرێنرێت.

عێزەت سابیر ئەندامی پەرلەمانی كوردستان لە فراكسیۆنی یەكێتی

،،

ئەو پرۆژەیە هی یەكێتی و پارتییە و دەبێـتە هۆی كەمبوونەوەی گەندەڵی و دابەشكردنی موچەیەكی دادپەروەرانە لەنێو موچەخۆرانی هەرێمی كوردستان.


هەرچەندە فراكسیۆنی گۆران و یەكگرتوو پێیانوایە برگەی هەمواركردنەوەی موچەی خانەنشینی و پلە تایبەتەكان لە پرۆژەكە بووە هۆی كێشەی نێوان فراكسیۆنەكان و پرۆژەكەی لەبار برد بەڵام ئەو ئەندام پەرلەمانەی یەكێتی پێی وا نییە ئەو برگەیە هیچ كێشەیەكی درووست كردبێت و دەڵێت: مووچەی پلە تایبەتەكان كێشەی درووست نەكردووە و یەكێتی و پارتیش بەهیچ شێوەیەك ناترسن و ئامادەی كۆبوونەوە دەبن تاكو لەگەڵ لایەنەكان رێك بكەون و پرۆژەكە تێپەرێنن.


عێزەت سابیر ئەوەش دەڵێت كە ئەو پرۆژەیە هی یەكێتی و پارتییە و دەبێـتە هۆی كەمبوونەوەی گەندەڵی و دابەشكردنی موچەیەكی دادپەروەرانە لەنێو موچەخۆرانی هەرێمی كوردستان.

 

ئەبوبەكر هەڵەدنی دەشڵێت: تەنها یەكگرتوو خانەنشینی نییە بۆیە لەو رۆژە ناترسێت كە باسی پلە تایبەتەكان و خانەنیشنی نایاسایی دەكرێت لە پرۆژەكەدا.

هەروەها شیركۆ حەمە ئەمین، پەرلەمانتاری گۆڕان دەڵێت: ئەو كەسانەی كە خەڵكیان بە نایاسایی و بندیوار دامەزراندووە دەبێـت دوای تەواو بوونی ئەم كارەو جێ بەجێكردنی پرۆژەكە دادگای بكرێن و لێپێچینەوەیان لەگەڵدا بكرێت كە چۆن خەڵكیان دامەزراندووە بە بندیوار لەسەر پارەو موڵكی هاوڵاتیان.


هەرچەندە فراكسیۆنی یەكێتی رایدەگەیەنێت هەفتەی داهاتوو كۆ دەبنەوە بۆ ئەم بابەتە بەڵام فراكسیۆنی پارتی دوو دڵە و پێی وایە لایەنەكانی دیكە ئامادە نابن.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان