سندووقەكانی دەنگدان، لە دەستی تەزویرچیدا

لایەنە نارازییەكان: بەوردی ئاگامان لە سندووقەكان نەبووە

سندووقەكانی دەنگدان، لە دەستی تەزویرچیدا

784 خوێندراوەتەوە

دادگای باڵای عێراق بریار لە بەرژەوەندی شەش لایەنە نارازییەكەی هەرێم دەدات و ئەوانیش رایدەگەیەنن:" لەماوەی رابردوودا سندووقەكانی دەنگدان وەك پێویست لە ژێر چاودێری ئەواندا نەبوون."

 
بیست و یەكی حوزەیران بوو بەرۆژێكی هیوابەخش و مێژووی بۆ دەنگدەرانی هەڵبژاردنە پەرلەمانییەكەی 12ی ئایار لە عێراق، كاتێك دادگای باڵای عێراق بریارەكەی پەرلەمانی لەبارەی ئەژماركردنەوەی دەنگەكان بەدەست، بە دەستووری و یاسایی لەقەڵەمدا، بەڵام ئەوەی جێگەی پرسیارو قەلەقی هاوڵاتیان و لایەنەكانە ئەوەیە ئایا سندووقەكانی دەنگدان لەماوەی رابردوودا كە لە كۆگا جیا جیاكانی عێراق و هەرێمی كوردستان هەڵگیراون لەدەستێكی ئەمیندا بوون و پارێزراون.؟ یاخود نەخێر.؟

 


ئەمە لەكاتێكدا:


یەكەم: بە چاوی خۆمان بینیمان كە چۆن لە هەندێ شوێن سندووقەكانی دەنگدان رووبەرووی مەترسی و سووتاندن بوونەوە. كە گومان دەكرا دەستی ئەوانەی تێدا بووبێت كە تۆمەتبار بوون بە ئەنجامدانی تەزویر و ساختەكاری.
دووەم: و ئەمرۆ شەش لایەنە نارازییەكەی هەرێمی كوردستان كە دەرەنجامەكانی هەڵبژاردنیان رەد كردەوە لە راگەیاندنێكدا ئەوەیان بۆ كەناڵەكانی راگەیاندن ئاشكرا كرد كە ئەوان لە ماوەی رابردوودا بە وردی و وەك پێویست نەیانتوانیوە سندووقەكان بپارێزن و چاودێری تەواوی ئەو كۆگایانە بكەن كە سندووقەكانی تێدا هەڵگیراون.

 
ئەمەش زەنگێكی مەترسیدارە و سەرەتای پرۆسەی ئەژماكردنەوەی دەنگەكان بەدەست دەخاتە ژێر پرسیارێكی جدی كە ئایا بەراستی ئەمەی دەكرێت تەنها كات كوشتن و پەردە پۆشكردنی هەندێ گزی و ساختەكارییە یان بەجدی لەنێو سندووقەكاندا هیوایەك ماوە بۆ دەنگدەر و پرۆسەی دیموكراسی و هەڵبژاردن لە عێراق.

كەواتە لایەنە نارازییەكان وەك خۆشیان ئاماژەیان پێكردووە توانیان بەڵگەیەكی زۆر و سەلمێنراو كۆ بكەنەوە تاكو ئاراستەی دادگای بكەن و بیسەلمێنن كە ساختەكاری لە پرۆسەی هەڵبژاردندا كراوە، بەڵام قۆناغی دواتر بۆ ئەوان قورستر دەبێت كە چۆن چاودێری پرۆسەی ئەژماركردنەوەی دەنگەكان دەكەن و تا چەند لەم قۆناغەشدا سەركەوتوو دەبن.!

 

كۆنگرەی رۆژنامەوانی شەش لایەنە نارازییەكە

 

،،

ئەمانە كۆمەڵێك پرسیارن كە گرنگیان هێندەی جیاكردنەوەی دەنگەكان بە دەست كەمتر نییە و دەبێت ئەوانەی رەخنەیان لە پرۆسەكە هەبوو خۆیان بۆ هەموو ئەگەرەكان ئامادە بكەن.

 

 

 

گوومان لە دەستكاریكردنی سندووقەكان:


وەك لەسەرەتاوە ئاماژەمان پێكرد، كێشەكە بە بریاری دادگا كۆتایی نایەت كە دەنگەكان ئەژمار بكرێنەوە چونكە بە وتەی نارازییەكان ئەوەی كە ساختەكاری ئەنجامداوە هەر ئەویش سندووقەكانی هەڵگرتوون، ئایا بە ویستی خۆی وەك چۆن ساختەكاری ئەنجامدا ساختەكاریشی لە سندووقەكاندا نەكردووە؟ شەوێكی نوتەك دوور لە چاوی هەموان هەندێ لەو سندووقانەی بێ سەروشوێن نەكردوون؟


یاخود وەك چۆن بەهۆكاری ئاگر كەوتنەوە هەندێ سندووق سوتان ئایا بە هۆكارێكی دیكەی بەناو سروشتی یاخود دەستی، پێش دەستكردن بە پرۆسەی جیاكردنەوەی دەنگەكان یاخود لە كاتی پرۆسەكەدا هەندێ سندووقی دیكەش ئاگریان تێ بەر نابێت و پرۆسەكە پەكی بكەوێـت؟

 
ئەمانە كۆمەڵێك پرسیارن كە گرنگیان هێندەی جیاكردنەوەی دەنگەكان بە دەست كەمتر نییە و دەبێت ئەوانەی رەخنەیان لە پرۆسەكە هەبوو خۆیان بۆ هەموو ئەگەرەكان ئامادە بكەن.

 


هاردەكەی كۆمسیۆن تاكە بەڵگەی كۆتایی:

هەرچەندە لایەنە نارازییەكان نكوڵی ناكەن لەوەی كە دەشێ دەسەڵات بۆ پاراستنی دەنگەكان و عەیبدار نەبوونی دەستی بۆ سندووقەكان بردبێت و دەنگەكانی ئەوێشی شێواندبێت، بەڵام دڵیان بەو ((هاردە)) خۆشە كە كۆمسیۆن بەرەسمی نوسخەی بە هەموویان داوە و دەنگی راستی و درووستی دەنگدەرەكانیانی تێدایە.
چونكە دەبێت ئەو دەنگانەی كەوا ئەژمار دەكرێنەوە هاوتا بێت لەگەڵ دەنگەكانی نێو هاردەكە كە لای لایەنە سیاسییەكان هەیە و هەر زیادو كەمێك پرۆسەكە رووبەرووی پرسیار دەكاتەوە و گەورەترین بەڵگەش دەدات بەدەستەوە كە چ ساختەكارییەك كراوە و ئەمەش رەنگە پرۆسەكە قورستر بكات، ئەگەر سەریش نەكێشێت بۆ دووبارە ئەنجامدانەوەی پرۆسەی هەڵبژاردن لە عێراق.

 

 

 

  
،،

ئیدی دەبێت لەمەودوا لە بێ دەنگی و متبوونی دەسەڵات بترسین، چونكە بە بێ دەنگی و لەسەرخۆ پرۆسەی هەڵبژاردنی رووبەرووی گەورەترین كێشە كردەوە.

 

 هەڵوێستی دەسەڵات و گۆرانكارییەكان:


ئیدی دەبێت لەمەودوا لە بێ دەنگی و متبوونی دەسەڵات بترسین، چونكە بە بێ دەنگی و لەسەرخۆ پرۆسەی هەڵبژاردنی رووبەرووی گەورەترین كێشە كردەوە، و هەرچەندە یەكێتی لە رێگەی سەرۆك كۆمار و پارتی لەرێگەی حزبەوە سكاڵایان لەبارەی بریارەكانی پەرلەمان هەبوو بەڵام تا ئێستە كە دادگا بریاری لە دووبارە ئەژماكردنەوەی دەنگەكان داوە، دەسەڵات (یەكێتی و پارتی) بێدەنگیان هەڵبژاردووە كەس نازانێ بە روونی ئەمان بەتەمای چی و خەریكی چین.؟

 

هەندێ لە زانیارییەكان باس لەوە دەكەن ئەگەر ئەژماكردنەوەی دەنگەكان ببێتە هۆی گۆرانكاری لە دەرەنجامەكانی هەڵبژاردن، دەسەڵات ئەوەی كە بۆی نەكراوە لە رابردوودا بۆ رێگریكردن لە كەمكردنەوەی دەنگەكانی، پێ دەچێت ئەمجارەیان بە ئاسانی ئەم گۆرانكارییەی بۆ هەزم نەكرێت و بە درووستكردنی قەیران و پەشێوی لە رووی ئەمنییەوە هەموان سەرقاڵ بكات و پرۆسەكە بیری خەڵكی بەرنەوە.

 

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان