لایەنە نارازییەكان، دەرگای هاوپەیمانیان بەرووی یەكدا داخست

" باجی رێك نەكەوتنمان ئەدەین"

لایەنە نارازییەكان، دەرگای هاوپەیمانیان بەرووی یەكدا داخست

1208 خوێندراوەتەوە

 

گۆران ئامادەیی خۆی بۆ هاوپەیمانی دەردەبرێت، و كۆمەڵیش پێی وایە درەنگەو كار لە كار ترازاوە، یەكگرتووش گلەیی دەكات كە لایەنەكان زوو نەهاتنە پێش،  هاوپەیمانیش دەڵێت: "یەكگرتووش پەلەی كرد"

 
ئێوارەی ئەمرۆ بزووتنەوەی گۆران لە كۆنگرەیەكی رۆژنامەوانیدا بۆ كەناڵەكانی راگەیاندن ئامادەیی بزووتنەوەكەی بۆ هەموو جۆرە هاوپەیمانەتییەك دەبری، هەرسێ لایەنی هاوپەیمانی و یەكگرتوو و كۆمەڵیش پێیانوایە كات نەماوە بۆ درووستكردنی هاوپەیمانی و پەشیمانی خۆیان دەر دەبرین و دەڵێن: "باجی یەك نەكگرتنمان ئەدەین و دەنگدەرانمان تورە دەبن"

 

كۆنگرە رۆژنامەوانییەكەی ئەمرۆی بزووتنەوە گۆران

 

 

هاوپەیمانی: بریارەكەی گۆران درەنگ بوو، یەكگرتووش پەلەی كرد


سەبارەت بە درووستكردنی هاوپەیمانی و بریارەكەی گۆران، سۆزان خاڵە شەهاب لە هاوپەیمانی بۆ دیموكراتی و دادپەروەری دەڵێت: " تازە كار لەكار ترازاوە و كات نەماوە بۆ رێكەوتن و باجی ئەم یەك نەگرتنەشمان دەدەین و هەروەك چۆن یەكگرتوو پەلەی كرد لە درووستكردنی بەرەیەك لەگەڵ بزووتنەوەی ئیسلامی گۆرانیش زۆر درەنگ كەوت و دەبوو زووتر بریار بدات."

 

سۆزان خاڵە شهاب

 

 
یەكگرتوو: كەس بەدەم داواكارییەكەمانەوە نەهات


لەبەرامبەردا موستەفا عەبدوڵا ئەندامی ئەنجوومەنی جێبەجێكردن لە یەكگرتووی ئیسلامی دەڵێت: " جەنابی ئەمینداری گشتی یەكگرتوو مامۆستا سەڵاحەدین دەمێكە دەستپێشخەری كردووە بۆ لایەنەكان كە پێكەوە بەرەیەك بۆ هەڵبژاردنی پەرلەمانی كوردستان پێك بهێنین، بەڵام تەنها بزووتنەوەی ئیسلامی هاتە پێش و هەریەك لە گۆران و هاوپەیمانی و كۆمەڵ بێ دەنگ بوون و وەڵامیان نەداینەوە."

 

موستەفا عەبدوڵا

 

 

كۆمەڵ: چوار لایەنەكەش شەری كورسی دەكەن


سەبارەت بە هەڵوێستی كۆمەڵی ئیسلامی زانا رۆستایی سەركردە لەو حزبە دەڵێت: "هەڵوێستی كۆمەڵ تا ئێستا دیار نییە و دەكرێت لەرێگەی وتەبێژەوە رابگەیەندرێت، بەڵام دەركەوت چوار لایەنە نارازییەكەش بەرژەوەندی حزبی نەیهێشت بەرەیەك بۆ خەمی هاوڵاتیان پێك بهێنن و ئەوانیش وەك پارتە سیاسییەكانی دیكە شەری كورسی دەكەن و ئەمەش دەنگدەرەكانیان تورە دەكات."

 

 

زانا رۆستایی

 

گۆران: بەڵێ بریارەكەمان درەنگ وەخت بوو


لەبەرامبەر لێدوانی ئەم سێ لایەنەی پێشەوە گۆرانیش قسە لەسەر بریارەكەی دەكات و پێیوایە دەبوو زووتر ئەم بریارە بدەن.
شێروان ئیبراهیم ئەندامی جڤاتی نیشتمانی بزووتنەوەی گۆران دەڵێت: " منیش هاوڕام و بریارەكەی گۆران درەنگ وەخت بوو، بەڵام سبەیش ماوە لەبەردەمماندا بۆ پێكهێنانی هاوپەیمانەتییەك لەنێوان لایەنە نارازییەكانی هەڵبژاردن، و ئەگەر رێكیش نەكەوتین دەنگدەر تەنها دەنگ بەیەكێتی و پارتی نەدات ئیدی كێشە نییە، و ئەمەش باشترین بەدیلە"

 

شیروان ئیبراهیم

،،

هەڵەیەكی ستراتیژیان كرد كە گۆران و هاوپەیمانی و یەكگرتوو پێكەوە نەیانتوانیوە بەرەیەكی هاوبەش پێك بهێنن و لەبەرامبەر دەسەڵاتی یەكێتی و پارتی بوەستنەوە.

 

 

هەوەرها سۆزان خاڵە شەهاب، لەگەڵ ئەوەدا كە پێی وایە باجی پارچە پارچە بوونیان ئەدەن دەشڵێت: ئەگەر چوار لایەنە نارازییەكە یەكیان بگرتایەت ئەوا زۆرینەی دەنگەكانی پەرلەمانی كوردستانیان پێك دەهێنا و ئەگەری زۆر بوو بەبێ یەكێتی و پارتی حكومەتیان پێك بهێنایەت چونكە بەپێی یاسا هەر هاوپەیمانەتییەك زۆرینەی دەنگەكانی پەرلەمانی هێنا دەتوانێ بەتەنها حكومەت پێك بهێنێت.

 
ئەندامەكەی كۆمەڵیش زانا رۆستایی بەهەمانشێوەی ئەندامەكەی هاوپەیمانی باسی رابردوو دەكات و پێی وایە هەڵەیەكی ستراتیژیان كرد كە گۆران و هاوپەیمانی و یەكگرتوو پێكەوە نەیانتوانیوە بەرەیەكی هاوبەش پێك بهێنن و لەبەرامبەر دەسەڵاتی یەكێتی و پارتی بوەستنەوە.

 
دەشڵێت: دەكرا پێشتر هاوپەیمانەتییەكیان لە كۆمسیۆن تۆمار بكردایەت و دواتر بە شێنەیی لەسەر خاڵە جیاوازەكان كۆ بوونایەتەوە و رێك بكەوتنایەت، ئەگەر رێكیش نەكەوتنایەت ئاسایی بوو لە كۆمسیۆن پێش هەڵبژاردن هاوپەیمانەتییەكە هەڵ بوەشێنەوە، بەڵام ئەمرۆ كە كات نەماوە و كار لەكار ترازاوە ئیدی دەرگاكان داخراون و ناتوانن هیچ بكەن.

،،

بزووتنەوەی گۆرانیش پێی وایە دونیا كاول نەبووە و هیچ شتێك روو نادات كە رێك نەكەوتوون، چونكە گرنگ ئەوەیە یەكێتی و پارتی دەنگ نەهێنن و ببنەوە بە زۆرینە.

 

 
موستەفا عەبدڵاش دەڵێت: ئێمە لە یەكگرتووی ئیسلامی ئەگەر دەرگاكەش بكەینەوە تازە پێ ناچێت كاتی ئەوە مابێت بتوانین هاوپەیمانی درووست بكەین چونكە گۆران تا دوێنێ ئێوارەش دەیانگووت ئێمە بەتەنها دادەبەزین بەڵام ئەمرۆ بریار دەگۆرن و دەڵێن "ئامادەی هاوپەیمانین" بەلامانەوە سەیرە.

 
شێروان ئیبراهیم ئەندامەكەی جڤاتی نیشتمانی بزووتنەوەی گۆرانیش پێی وایە دونیا كاول نەبووە و هیچ شتێك روو نادات كە رێك نەكەوتوون، چونكە گرنگ ئەوەیە یەكێتی و پارتی دەنگ نەهێنن و ببنەوە بە زۆرینە و چوار لایەنە نارازییەكەش ئەگەر چوونە حكومەت هاوكاری یەك بن و یەكدی بەجێ نەهێڵن و ئەگەر بوون بە ئۆپۆزسیۆنیش دژی یەكتی و پارتی بجەنگێن و شەرێكی مەدەنی بكەن تا داوا رەواكانی هاوڵاتیان جێ بەجێ بكرێن.

 

 

هەرچەندە كۆمسیۆنی باڵای سەربەخۆی هەڵبژاردنەكانی هەرێمی كوردستان، دوێنی بۆ ماوەی دوو رۆژی دیكەش وادەی پێكهێنانی هەر جۆرە هاوپەیمانەتییەكی لەنێوان حزب و لایەنە سیاسییەكانی هەرێمی كوردستان درێژ كردەوە، بەڵام چوار لایەنە نارازییەكەی هەڵبژاردن گۆران و یەكگرتوو و كۆمەڵ و هاوپەیمانی نەیانتوانی سوود لەم دوو رۆژەش وەربگرن و دڵی دەنگدەرانیان خۆش بكەن و بە یەك لیست بەشداری لە هەڵبژاردنی پەرلەمانی كوردستان بكەن كە بریارە 30ی9 ئەنجام بدرێت.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان