مامۆستایانی نارازی: چاوەڕوانی درۆكانی حكومەتین

"چلەی هاوینیش دەچینە سەر شەقام"

مامۆستایانی نارازی: چاوەڕوانی درۆكانی حكومەتین

2311 خوێندراوەتەوە

 نەبوونی ناوی مامۆستایان لە لیستی نوێی مووچەی وەزارەتی دارایی جارێكی دیكە مامۆستایان نیگەران دەكاتەوە و مامۆستایەكی نارازیش دەڵێ: چاوەڕوانی درۆكانی حكومەتین و ئەگەر پێویست بكات چلەی هاوینیش بێت دەچینەوە سەر شەقام.

 
عادل حەسەن ئەندامی ئەنجوومەنی مامۆستایانی نارازیی سەبارەت بە نیگەرانییەكانی مامۆستایان و دواین هەڵوێستی ئەنجوومەنەكەیان بۆ دیپلۆماتیك مەگەزین دەدوێت و دەڵێت: "حكومەتی هەرێمی كوردستان و بە سەرۆك و جێگرەكەیەوە ناراست بوون لەگەڵ مامۆستایان، چونكە تا ئێستا چەندین جار بەڵێنیان داوە بە مامۆستایان و نەیانبردووەتە سەر"

 
عادل حەسەن دەشڵێت: یەكێك لەو چەندان ناراستییەی كە حكومەت بەرامبەر مامۆستایان كردوویەتی ئەوەبوو ساڵی پار سەرۆكی حكومەت گووتی: ئەگەر داهاتی نەوت زۆر بوو و نرخی نەوت بەرز بوویەوە ئەوا پاشەكەوتی مووچە نامێنێت و ئیدی مامۆستایان چاوەروانی ((بەپەلە))ی كەناڵەكانی راگەیاندن ناكەن تاكو موچەكانیان وەر بگرن، بەڵام نەك ئەوەمان نەبینی، ئەمرۆ جارێكی دیكە سەرۆكی حكومەت زۆر ناراستگۆیانە دەڵێت: حكومەت 30 رۆژ جارێك موچە دەدات، بەبێ ئەوەی بیر بكاتەوە ئەو موچەیەی ئەمرۆ دەیدات هی مانگی چوارە.

عادل حەسەن، ئەندامی ئەنجوومەنی مامۆستایانی نارازی



 

،،

" بەیاننامەكانی ئێمەش بەشێك لە رۆتینیاتی هەڵگرتووە و ئیدی دووبارە دەبنەوە وبۆیە دەبێت بیر لە رێگە چارەی دیكە بكەینەوە."

 

"چلەی هاوینیش دێینە سەرشەقام"


لە وەڵامی ئەو پرسیارەی دیپلۆماتیك كە بۆچی مامۆستایانی نارازی تەنها لە كاتی دەوامی خوێندكاراندا ماندەگرن و بایكۆت دەكەن و دێنە دەرەوەی هۆڵەكانی خوێندن؟ ئەو ئەندامەی ئەنجوومەنی مامۆستایانی نارازی ئەوە ئاشكرا دەكات هەرچەندە جارێ رێك نەكەوتوون ئەمجارە چی دەكەن و چۆن بایكۆت دەست پێ دەكەنەوە بەڵام دەشڵێت:" ئەگەر پێویست بكات چلەی هاوینیش بێت بۆ مافەكانمان دێنە سەر شەقام"

 

 
عادل حەسەن راستگۆیانە باس لە بەیاننامەكانی مامۆستایانی نارازی دەكات و دەڵێت: " بەیاننامەكانی ئێمەش بەشێك لە رۆتینیاتی هەڵگرتووە و ئیدی دووبارە دەبنەوە وبۆیە دەبێت بیر لە رێگە چارەی دیكە بكەینەوە."

 

،،

خودی وەزیر خۆی كێشەیە و پیاوێكە حزب دایناوە و حزبی بیر دەكاتەوە هیچ لەكارەكەی نازانێت و بێ ئەزموونە بۆیە هیچ چاوەرانییەكی لێ ناكەین جگە شتی ناباش چونكە ئەو نایەوێت خزمەت بە مامۆستایان بكات.

 


لە وەڵامی پرسیاری رێگە چارەی چی؟


ئەو مامۆستا نارازییە دەڵێت: لەم هاوینەدا كۆنفرانسێك دەبەستین كە تیایدا كۆمەڵێك كەسی شارەزاو پسپۆر بانگهێشت دەكەین لە بواری پەروەردە بەبێ ئامادەبوونی جەنابی وەزیر بۆ ئەوەی شەن و كەوی كێشەی مامۆستایان بكەن و بگەینە راپۆرتێكی كۆتایی تاكو رێگەیان نیشان بدات ساڵی دابێ چی بكەین.!
"وەزیری پەروەردە بێ ئەزموونە"

 
عادل حەسەن نیگەرانە لە خودی وەزیری پەروەردە و دەڵێت: خودی وەزیر خۆی كێشەیە و پیاوێكە حزب دایناوە و حزبی بیر دەكاتەوە هیچ لەكارەكەی نازانێت و بێ ئەزموونە بۆیە هیچ چاوەرانییەكی لێ ناكەین جگە شتی ناباش چونكە ئەو نایەوێت خزمەت بە مامۆستایان بكات.

 

"حزبەكان بێ جورئەتن"


ئەندامەكەی مامۆستایانی نارازی دەڵێت: هەموو حزبەكانی هەرێمی كوردستان بە راست و چەپەوە بێ جورئەتن و كاسیان لە ترسی یەكێـتی و پارتی ناوێرن بكەونە پێشی نارازییەكانی خەڵك، تاكو داواكانیان جێ بەجێ بكرێت.

 

،،

هەندێ مامۆستا لەنێو یەكێـتی مامۆستایان تەنها كار بۆ ئەوە دەكەن كە چۆن ببنە رێگر لەبەردەم كارەكانی مامۆستایانی نارازی، چونكە ئەو كەسانە حزب دایناوون و ناونراون " دوو رووەكانی نێو یەكێـتی مامۆستایان"

 

 

دوو رووەكانی نێو یەكێـتی مامۆستایان:


عادل حەسەن ئەوەش ناشارێتەوە كە هەندێ مامۆستا لەنێو یەكێـتی مامۆستایان تەنها كار بۆ ئەوە دەكەن كە چۆن ببنە رێگر لەبەردەم كارەكانی مامۆستایانی نارازی، چونكە ئەو كەسانە حزب دایناوون و ناونراون " دوو رووەكانی نێو یەكێـتی مامۆستایان"

 

سەبارەت بەو پرسیارەش ئەمرۆ مامۆستایانی نارازی چاوەروانی چی دەكەن، ئەو مامۆستا دەڵێت: لەرێگەی بەینامەكەی دوێنێ ئێوارەوەی مامۆستایانی نارازییەوە پەیامەكەمان گەشتە دەسەڵات و بەڵێنی پێداوین داواكارییەكەمان جێ بەجێ بكات.
عادل دەشڵێت: "هیوادارین حكومەت هەموو جارێك ئاوا زوو بێتە سەر خەت."

بایكۆتی پار ساڵی مامۆستایان، لەژێر چادرگەكانی بەردەم دادگای سلێمانی 

 

لەكۆتاییدا ئەو ئەندامەی ئەنجوومەنی مامۆستایانی نارازی دان بەوەشدا دەنێن كە بایكۆتكردنی هۆڵەكانی خوێندن ناچارییە، بەڵام ئەگەر حكومەت و دەسەڵاتداران ناچاریان بكەن بۆ ئەمساڵی خوێندن رێگەی دیكە دەگرنە بەر.

 

author photo

ماسته‌ر له‌ زانسته‌ رامیارییه‌كان

ئه‌ندامى كاراى سه‌ندیكاى ڕۆژنامەنووسانی کوردستان