" نیشتیمان هیچ ڕۆژێك هی هەمووان نەبووە"

"نەوشیروان مستەفا ئەوەندە خۆشی لەچارەی خەڵكانی سەر بە گروپی زیندان نەدەهات‌و بەخەڵكی بە تواناو لێهاتووی نەدەزانین"

" نیشتیمان هیچ ڕۆژێك هی هەمووان نەبووە"

3531 خوێندراوەتەوە


سەرباری ئەوەی ستایشێكی زۆر دەكرێت‌و بەیەكێك لە كتێبە زۆر باش‌و ناوازەكانی بواری " یاداشت‌و بیرەوەری" ڕۆژانی خەباتی شاخ‌و پێشمەرگایەتی دێتە ئەژمار، بەڵام ناونیشانی كتێبی " ئەو ڕۆژانەی نیشتیمان هی هەمووان بوو"ی " هەڤاڵ كوێستانی" كە بیرەوەرییەكانی ڕۆژانی پێشمەرگایەتی نووسەرە، ڕەخنەیەكی زۆری لێدەگیرێت‌و بەشی زۆری نێوەرۆكی كتێبەكەش گوزارشت لەو ڕاستییە دەكات، كە ئەو ڕۆژانەش نیشتیمان هی هەمووان نەبووە.


لە پاش ڕاپەڕینی بەهاری ساڵی 1991وەو بەر لەوەش، لە جوغزی " یاداشت‌و بیرەوەری"دا، لە لایەن هەندێك لە كارەكتەرە دیارو بەشدارەكانی هەردوو شۆڕشی ئەیلوول‌و شۆڕشی نوێ"وە، چەندان كتێب نوسراون‌و بڵاو كراونەتەوە.


بیرەوەرییەكانی هەڤاڵ كوێستانی " ئەو ڕۆژانەی نیشتیمان هی هەموان بوو"، یەكێك لەجوانترین‌و باشترین ئەو كتێبانەیە لەم بوارەدا نوسراون‌و هاو وێنەی " ئەزمون‌و یاد"ی " پشكۆ نەجمەدین"ە.

،،

نەوشیروان مستەفا ئەوەندە خۆشی لەچارەی خەڵكانی سەر بە گروپی زیندان نەدەهات‌و بەخەڵكی ئەوەندە بە تواناو لێهاتووی نەدەزانین، بەڵام بۆ بەگژاچوونەوەی نەیارەكانی خۆی لەناو سەركردایەتی كۆمەڵەدا، خستنیە ژێر باڵی خۆیەوەو هەتا پێویستی پێیانبوو لە لەشەڕەكانی خۆیدا دژ بە نەیارەكانی بەكاری هێنان،


هەڤاڵ كوێستانی، لە هاوینی ساڵی 1979دا دەچێتە شاخ‌و لەناوەندو دەزگای ڕاگەیاندنی یەكێتی‌و ڕادیۆی گەلی كوردستان كار دەكات، بەو پێیەی ڕووداو و دیمەنەكانی كۆتایی كتێبەكەی باس لە گرتن‌و دادگاییكردنی سەركردەكانی ئاڵای شۆڕش " مەلا بەختیارو شێخ عەلی‌و پشكۆ نەجمەدین‌و خولە كەشكۆڵ" دەكات، بیرەوەرییەكانی،" ئەو ڕۆژانەی نیشتمان هی هەمووان بوو"، بەشێك لە ڕووداوە شاراوەو تاریكەكانی ناوەڕاستی ساڵی 1979 تا ناوەڕاستی ساڵی 1985ی تێدا خراوەتە ڕوو.


" ئەو ڕۆژانەی نیشتمان هی هەموان بوو" لە ئاستێكی بەرز‌و جوانی نوسیندا گوزارشت لە ڕووداوەكان‌و ئەو مێژووە دەكات كە نووسەر تێیدا پێشمەرگە بووە.
هەڤاڵ كوێستانی وەكو نوسەرو ئەدیبێكی شارەزا، بەزمانێكی سەرنجڕاكێش‌و كوردییەكی پاراو، بیرەوەرییەكانی نوسیوەتەوە‌و گوزارشتی لە ڕووداوەكان كردووە، بەزمانێكی ناسكی شیعری، بە هەناسەیەكی تا ئاستێكی زۆر بێلایەنانە، بەشێك لەدیوە ڕەش‌و نهێنی‌و ناشیرینەكانی شۆڕشی نووسیوەتەوە‌و
لەتەك تۆماركردنی ڕووداوە سیاسی‌و سەربازییەكان‌و ململانێ جۆراو جۆرەكانی ئەو مێژووەدا، لە نوسینەوەی بیرەوەریەكانییەوە بەجۆرێكیتر هەست بە سەلیقەی نووسین‌و ئاستی باڵای شاعیرییەتی ئەو دەكرێت.


ئەو لە ئاستێكی ئەدەبی باڵاو سەرنجڕاكێشدا وێنەی ئەو گوند‌و چیاو دۆڵ‌و ناوچانە دەكێشێت كە ڕووداوەكان تێیاندا ڕووی داوە، دیمەن‌و ڕووداوەكانی بەجۆرێك نوسیوەتەوە‌و وێنەی كێشاوەو بەجۆرێك وەسفی كردوون، هەندێكجار خوێنەر دەباتە دۆخێكەوە، وا هەستدەكات، چیرۆك، یان ڕۆمانێك دەخوێنێتەوە، نەك كتێبێكی سیاسی.


سەرەتای كتێبەكەی بەجۆرێكی ئەدەبی‌و سەرنجڕاكێشی وا دەستپێكردووە كە خوێنەر بەخێرای كەمەندكێشی خوێندنەوەیی‌و ئاوێزانبوونی دەكات.
نووسەری " ئەو ڕۆژانەی نیشتمان هی هەمووان بوو"، بەنوسینەوەو گێڕانەوەی چیرۆكی نێوان خۆی‌و باوكی‌و خۆی‌و خۆشەویستەكەی، ساحیرانە لە دەروازەی كتێبەكەوە دەتباتە ژوورەو سەرەتای هەربەشێكیشی بەجۆرێك داڕشتووە كە خوێنەر بەشەوقێكی زۆرەوە، خۆی دەدات بەدەست دێڕەكانەوە، بۆ زانینی ڕووداوەكانی ئەو بەشەو گەشتن بە بەشی دواتر، بەشەكانیشی بەجۆرێكی وا پێكەوە گرێداوە، تامەزرۆیانە لەپاش خوێندنەوەی بەشێك، مەیلی گەشتن بەبەشی دواترت هەبێت.


" جادەی ئەسحابەسپی‌و مزگەوتی دوو دەرگا، سیروانی دەلیل‌و جەباری سایەق تەكسی، ئەو شوانەی كە بەر لە گەشتنیان بەیەكەم مەفرەزەی پێشمەرگە لە قەرەداغ پێیان دەگات، حەمەی تەلەو شمشاڵەكەی، پێڵاوەكانی شەهید ئارام لە ماڵی پیرەژن‌و پیرە پیاوەكەی گوندی تەنگیسەردا، مام ئەحمەدو پورە كەسكێ"، لەو كارەكتەرو شوێنانەن بە جۆرێك باسیان دەكات‌و وێنەیان دەكێشێت كە لەپاش خوێندنەوەی كتێبەكە دەبنە بەشێك لەیادەوەری خوێنەر.


هەڤاڵ كوێستانی لەزۆر جێگەدا، لەگەڵ خستنەڕووی ڕووداوێك، یان باسكردنی كەسێك، یان شوێنێكدا، بە "فلاش باگ"، خوێنەر دەگەڕێنیێتەوە بۆ ڕووداوێكی هاو وێنەی ئەو دیمەنانەداو بەوەش جیا لە پێدانی زانیاری هاوپەیوەند، چێژێكی زیاتر دەبەخشێتە خوێنەر.


" خاڵی پشكنینی هیزۆپ لەگەڵ قەعقاع، سوتانی تەسكەرەو ڕەگەزنامەكەی لەبەردەم شوانەكەدا لەگەڵ ساتی دەركردنی ڕەگەزنامەكەی لە ساڵی 1970، چیرۆكی ئەویندارییەكەی حەمەی تەلەو چیای زەردە لەگەڵ چیرۆكی مێروولەكەی حەزرەتی سولەیمان، كوشتنی عومەری برای عوسمان زەڕایەنی‌و كوشتنی عوسمان عوزێری لەشۆڕشی ئەیلولدا، فەرمانی كوشتنی فوادی مەجید میسری لەگەڵ تیرۆر كردنی جەمال عیرفان، گوندی خەتێ‌‌و فتواكەی مەلای خەتێ‌"، ئەمانە لەو ڕووداو و چیرۆكانەن كە هەڤاڵ كوێستانی هونەرییانە لەگەڵ باسكردنی یەكەمیاندا، ڕووداوێكی هاو وێنەو پەیوەندیداری لەگەڵیدا هێناوەتەوە بەر باس.
چ ڕۆژێك نیشتیمان هی هەمووان بووە؟

،،

 نەوشیروان مستەفا لەكاتی گەڕانەوەیدا بۆ كوردستان لە ساڵی 1977 هیچ پەیوەندییەكی بە كۆمەڵەوە نەبووەو نەیشیوویستووە لەگەڵ كۆمەڵەدا كار بكات‌


هەر زوو، ناونیشانی كتێبەكە" ئەو ڕۆژانەی نیشتیمان هی هەمووان بوو"، كەوتە بەر ڕەخنەی خوێنەرانی‌و تەنانەت ئەو كەسانەشی كە تەنها ناونیشانی كتێبەكەیان بینی، یان بیستیان، دەستبەجێ ئەو ڕەخنەیان گرت.


لەو قۆناغ‌و مێژووەشدا كە كتیبَبەكەی هەڤاڵ كوێستانی بەشێكی دەگێڕێتەوە، هێزە سیاسیە كوردییەكان هەوڵی سڕینەوەی یەكتریان داوە، هێزێك ناوچەیەكی كوردستانی لەوی دیكەیان حەرام‌و قەدەغە كردووەو لەچەندین شەڕدا سەدانیان لەیەكتری كوشتووە، یەكتریان بە خیانەتكار تۆمەتبار كردووە، لەناو ئەو هێزەشدا كە خۆی خەباتی تێدا كردووە پڕبووە لە ململانێ‌و بارگرژی‌و گروپێك هەوڵی كۆتایی هێنان بە گروپێكی دیكەی داوە، ئەو لە كتێبەكەیدا هەموو ئەمانەی باسكردووەو لە لاپەڕە 200دا دەڵێت:" هێزەكانی ئێمە ئەوەندەی وزەی خۆیان لە شەڕی ڕژێمدا دەخستەگەڕ، ئەوەندەش لە شەڕەكانی دژی پارتی‌و نەیارەكانیتر، هێزەكانی پارتیش لەبەر دژایەتیكردنی ئێمە، نەیاندەپەرژایە سەر شەڕی ڕژێم، ئێمەو ئەوان، لەناو قولایی دۆڵەكانداو لە لاپاڵ‌و لە بەرزایی شاخەكاندا، ملمان بەبەر ملی یەكترییەوە نابوو، كەپكێك بەدەستی هەر لایەكمانەوە با، لایەكەی دی وایدەزانی، خوا لەو تاكە بەرزاییە بەو لاوە، شوێنێكی كەی، بۆ هەڵكردنی ئاڵای سەربەخۆیی‌و دامەزراندنی دەوڵەتی كوردی ڕۆنەنانەوە".


هەڤاڵ كوێستانی بە خستنەڕووی بەشێك لە ڕووە تاریك‌و ناشیرینەكانی ئەو قۆناغە، خۆی پێمان دەڵێت نەخێر ئەو ڕۆژانەش نیشتیمان هی هەمووان نەبووەو لە دوا دێڕەكانی بیروەرییەكانیشیدا، كە چیرۆك‌و ڕووداوی لێپرسینەوەو دادگاییكردنییەتی لە لایەن مام جەلالەوە سەر ئەوەی گوایە پەیوەندی بە "ئاڵای شۆڕش"ەوە هەیە نووسیوویەتی" ماڵئاوایی دەكەم‌و چەند دەتوانم زوو ئەو ژوورە جێدێڵم كە كە بۆمن بەدرێژایی ئەو وەختە، لە ژووری لێكۆڵینەەی ناو زیندان دەچوو، لە ژوورەكە دێمە دەرێ‌و هەموو شتەكان، دەڵێی كەڕەشانەی هەنگوینن، یەك لەیەكدی بەتاڵتر دەنوێنن، هەموو شتەكان بەتاڵ‌و ناخی منیش لە هەمووان بەتاڵتر، بەتاڵ لە هەموو ئەو خەونە ڕنگاو ڕەنگانەی 10 ساڵێك لەوەوبەر منیان بەژێر زەمینی ڕێكخستنە نهێنییەكانی كۆمەڵەدا كردو، ملی ئەو باریكە ڕێیانەیان پێگرتم كە بەم تونێلە بێ كۆتاییەیان گەیاندم".


فەرامۆشكردنی بەروار، لە بیرەوەرییەكانی هەڤاڵ كوێستانی دا
یەكێكی دی لەو شتانەی كە لە كتیبَی " ئەو ڕۆژانەی نیشتیمان هی هەمووان بوو"دا، جێگەی سەرنج‌و هەم ڕەخنەیە، ئاماژە نەدانە بە كات‌و بەرواری ڕووداوەكان، كە ئەمەش بۆ كتێبێكی مێژوویی یان لە نووسینەوەی بیرەوەریدا ناتەندروستە، جیا لەوەی كە دیاریكردن‌و ئاماژەدان بەكات بۆ خوێنەرو ئەو كەسانەی حەزیان بە خوێندنەوەو زانیاری تایبەت بەو قۆناغە مێژووە هەیە پێوویستە، لە هەمانكاتدا بۆ كتێبێك كە دەبێتە سەرچاوە بۆ ئەو مێژووە تەواو گرنگ‌و بە بایەخە.
هەڤاڵ كوێستانی لە هەندێك شوێندا تەنها بە ئاماژەدان بەساڵ، یان وەرزێك لەوەرزەكانی ساڵ، بەرواری ڕووداوەكانی باسكردووە، ئەگەر ئەمە بۆ كەسانی ئاشناو شارەزا بەو مێژووە بەس بێت، ئەوا بۆ خوێنەرانێك كە تەواو بەو قۆناغە مێژووەی شاخ ئاشنانین كیفایەت نییە.


مام جەلال‌و نەوشیروان مستەفا لە بیرەوەرییەكانی هەڤاڵ كوێستانی دا
بەماوەیەكی كەم پاش ئەوەی دەچێتە شاخ، لە "توژەڵە" كە بارەگای ئەوی لێیە، مام جەلال دەبینێت": دەگەینە بەردەمی‌و لەگەڵ باوەشێكی زۆر گەرمدا بەخێرهاتنمان دەكات، تا ساڵانێكی زۆری پێشمەرگایەتیش، هەستم بەگەرمی ئەو باوەشەی مام جەلال دەكرد".


لەوێ، مام جەلال، هەڤاڵ كوێستانی بە شاعیری شیعری ئاگرین بە میوانەكانی دەناسێنی، میوانەكانی هەردوو سەركردەی كوردانی ڕۆژهەڵات " شێخ عێزەدینی حوسەینی‌و سەلاحەدینی موهتەدی" دەبن.


دوو لاپەڕە لەدوای ئەو ڕووداوەی كە لە بیرەوەرییەكانیدا باسیكردووە، لە لاپەڕە 73‌و 74دا، هەڤاڵ كوێستانی باسلەوە دەكات كە لەو دیتنەیدا، مام جەلال پێشنیاری ئەوەی بۆ كردووە كە لەسەركردایەتی نوێیی باڵی" بزوتنەوەی سۆسیالیستی" دا، دایبنێن، چونكە لەوكاتەدا باڵی بزوتنەوەی سۆسیالیستی ناو یەكێتی بەسەركردایەتی ڕەسووڵ مامەند جیابوو بوونەوە.


" لەوەختێكی باشدا هاتی، ئێستا ئێمە خەریكی سەر لەنوێ ڕێكخستنەوەو دانانەوەی سەركردایەتی بزوتنەوەین، ئەمن پێمباشە ئەتۆ لە سەركردایەتی نوێی بزوتنەوە دانێین، نامەمان بۆ ژمارەیەك برادەریكەش ناردووە ئەوانیش لەو ماوەیەدا دێنە دەرێ‌و ئەو دەمی بە هەموومان دەتوانین بزوتنەوەی هەستێنینەوە" مام جەلال وا بە هەڤاڵ كوێستانی دەڵێ.


هەڤاڵ كوێستانی كە داواكەی مام جەلالی ڕەتكردووەتەوە، باسلەوە دەكات كە بزوتنەوەی سۆسیالیستی بە سەركردایەتی‌و بە بەپێشمەرگەو بەو ڕێكخستنەشەوە هەیان بووە، لەیەكێتی چوونەتە دەرێ‌و مام جەلال ئەوان بە جیابوونەوەی بزوتنەوەی نازانێ‌و ئەوان بە باڵە ناڕەسەنەكەی بزوتنەوە ناو دەبات.


وەكو خۆی باسیدەكات مام جەلال ویستوویەتی سەركردایەتییەكی نوێ بۆ بزوتنەوە دروستبكات‌و ئەوانەش دەبنە ئەندامی سەركردایەتی بزوتنەوە ئۆتۆماتیكی دەبنە ئەندامی سەركردایەتی یەكێتی‌و هێندەی ئەندامانی سەركردایەتی كۆمەڵە نوێنەریان لەهەر دەزگایەكی یەكێتیدا دەبێت" ئا لێرەوە‌و لەیەكەم دیدارمدا لەگەڵ مام جەلال چڕژێك " درزێك" كەوتە ئەو وێنەیەی من لەسیاسی‌و لەسەركردەی شۆڕشی نوێم كێشابوون".


هەڤاڵ كوێستانی لە لاپەڕە 84‌و 85دا باس لە ڕۆڵی مام جەلال دەكات لە بوونی نەوشیروان مستەفا بە سكرتێری كۆمەڵە‌و ئاماژەش بەوە دەكات كە نەوشیروان مستەفا لەكاتی گەڕانەوەیدا بۆ كوردستان لە ساڵی 1977 هیچ پەیوەندییەكی بە كۆمەڵەوە نەبووەو نەیشیوویستووە لەگەڵ كۆمەڵەدا كار بكات‌و زیاتر لەگەڵ عەلی عەسكەریدا هاوڕابوون كە هەموو ڕێكخستنەكانی ناو یەكێتی لەناویەكتردا بتوێننەوەو ڕێكخستنێكی تازەی لێدروستبكەن، بەڵام بە نابەدڵی داواكەی مام جەلالی قبوڵكردووەو بووەتە سكرتێری كۆمەڵە،" مام جەلال ئەوكاتە، جگە لە پەیوەندی شەخسی لەگەڵ هەندێك لە كۆنە جەلالییەكان، هیچ ڕێكخستنێكی لەناو كوردستاندا، نە لەشارو نە لە لادێشدا نەبوو، پێگەشی لەناو كۆمەڵەدا، بەتایبەتیش لە دوای نەمانی سەركردایەتی پێشووی كۆمەڵە شەهابی شێخ نوری‌و هاوڕێكانی، زۆر پتەو نەبووە، بۆیە مام جەلال كە ناتوانێت ڕاستەوخۆ دەست بەسەر كۆمەڵەدا بگرێ، وا باشترە ئەو " نەوشیروان مستەفا" بەچوونە ناو كۆمەڵە قایلكاو ڕۆڵی كۆنترۆڵكردن‌و ئیدارەدانی كۆمەڵەی پێبسپێرێت‌و، خۆیشی وەك كەسێكی بێلایەن سكرتێری یەكێتی بێ، ئیدی لەوە بەدواوە، ڕۆڵ‌و دەسەڵاتەكان لەنێوان خۆیاندا بەشێوەیەكی وا دابەشدەكەن كە دەرفەتی دەركەوتنی كاراكتەری نوێی تێدا ئاسان نەبێت".


پاش ئەوەی مام جەلال سەركردایەتییەكی نوێ بۆ " باڵی بزوتنەوەی سۆسیالیستی" پێكدەهێنێت‌و بەپێی بنەمای هاوسەنگیش لەنێوان هەرسێ باڵەكەی یەكێتیدا " خەتی گشتی- كۆمەڵە- بزوتنەوە"، دەبێت وەكو دوو باڵەكەیتر دوو نوێنەری بزوتنەوە لە مەكتەبی سیاسیی یەكێتیدابن، " دوو نوێنەرەكەی بزوتنەوە " جەمال ئاغاو عەلی حەوێز" مایەی ناڕەزایی سەركردایەتی كۆمەڵە بوو، ئەو دوانە لەو چەند كەسانە بوون كە بەم دواییانە بەنامەی مام جەلال هاتبوونە دەرەوە، سەركردایەتی كۆمەڵە نوێنەرەكانی بزوتنەوەیان بە شایستەی ئەو پۆستە نەدەزانی‌و پێیانوابوو ئەمە هەم هەیبەت‌و كەسایەتی مەكتەبی سیاسی بچووك دەكاتەوە‌و هەمیش وەك ناهەقییەكی گەورەیان دەبینی كە لە كۆمەڵەو لە یەكێتیش دەكرا".


هەڤاڵ كوێستانی لە لاپەڕە 119ی بیرەوەرییەكانیدا باسلەوە دەكات كە مام جەلال پێداگری لەسەر ئەو دوو ناوە كردووەو سەركردایەتی كۆمەڵەش ئامادەی قبوڵكردنی ئەو فەرزكردنەی مام جەلال نەبوون‌و كار گەشتووەتە ئەوەی مام جەلال هەڕەشەی دەستلەكاركێشانەوەو بەجێهێشتنی كوردستان‌و بەیان دەركردن بكات، " ئەگەر هەوڵی زۆری نەوشیروان مستەفا نەبوایە لە ڕازیكردنی سەركردایەتی كۆمەڵەدا ، بەقەبوڵكردنی داواكەی مام جەلال، یەكێتی ڕووبەڕووی كێشەیەكی زۆر قوڵ دەبووەوە، لەوێشەوە كەسایەتی مام جەلال‌و نەوشیروان مستەفام وەك تەواوكەری كەسایەتی یەكتری دەبینی تا دوو كەسایەتی جیاواز، جیاواز لە شێوەو ڕۆڵبینیندا، بەڵام تەواوكەری یەكتری لە ناوەرۆك‌و بەڕێوەبردنی شۆڕشدا".


هەڤاڵ كوێستانی باسلەوە دەكات كە مام جەلال‌و نەوشیروان مستەفا كەڵكیان لە ناكۆكییەكانی نێوان هەردوو "گروپی زیندان"‌و "كۆمیتەی هەرێمەكان" وەرگرتووەو بۆ لێدان لە لە دەستەی كۆمیتەی هەرێمەكان، ئەوان پشتگیری گروپی زیندانیان كردووە، ئەو لە لاپەڕە 93ی " ئەو ڕۆژانەی نیشتیمان هی هەموان بوو" دەنوسێت:" نەوشیروان مستەفا ئەوەندە خۆشی لەچارەی خەڵكانی سەر بە گروپی زیندان نەدەهات‌و بەخەڵكی ئەوەندە بە تواناو لێهاتووی نەدەزانین، بەڵام بۆ بەگژاچوونەوەی نەیارەكانی خۆی لەناو سەركردایەتی كۆمەڵەدا، خستنیە ژێر باڵی خۆیەوەو هەتا پێویستی پێیانبوو لە لەشەڕەكانی خۆیدا دژ بە نەیارەكانی بەكاری هێنان، مام جەلالیش ئەگەر چی زۆریش كەیفی بەژمارەیەك لەوانەی گروپی زیندان نەدەهات، بەڵام هەر بۆ لاسەنگكردنی تەرازوی هێز بەلای نەوشیروان مستەفادا دڵنەوایی دەكردن‌و لە پێدانی پلەو پۆستیشدا چاوی لێیانەوە بوو".


لە كۆنفرانسی یەكەمی كۆمەڵەدا كە ساڵی 1981 لە بناری چیای " مالیمۆس" بەستراوە، بەپێی ئەو بەرنامەیەی كۆنفرانس دیاریكردووە، دوو كەس، كە یەكێكیان دەربارەی لایەنە چاك‌و بەهێزەكەی كاندیدەكەو ئەوی دیكەیان ڕەخنەی لێگرتووە، قسەیان لەسەر هەر یەكێك لەو كاندیدانە كردووە كە خۆیان بۆ سەركردایەتی كۆمەڵە پاڵاوتووەو، هەڤاڵ كوێستانیش یەكێك لەو كەسانە بووە كە بۆ ڕەخنە گرتن لە نەوشیروان مستەفا چووەتە سەر سەكۆی قسەكردن‌و لە لاپەڕە 187دا نوسیویەتی:" ڕەخنەكانی من هەوڵێك نین بۆ كەمكردنەوە لەبایەخی كاك نەوشیروان، ئەو جیا لەوەی لە ڕووی فیكری‌و سیاسی‌و ڕۆشنبیریی‌و كارەكتەرو ئەزموونەوە بێ ڕكابەرە، گومانیشم لە دەرچوونی نییە، بۆیە رەخنەی لێدەگرم‌و ڕەخنەی یەكەمیشم زیاتر پرسیارە نەك ڕەخنە:


كە لەساڵی 1977دا، بۆیەكەمجار گەڕاوەتەوە كوردستان ئەگەر لەسەر داوای ئەندامانی سەركردایەتی كۆمەڵەو هاندانی مام جەلال نەبووایە، نەیدەویست لەگەڵ كۆمەڵەدا كار بكات، ئەویش هەمان ڕای شەهیدان عەلی عەسكەرو دكتۆر خالیدی هەبووە، لەوەدا كە هەموو باڵەكانی ناو یەكێتی هەڵوەشێننەوەو ڕێكخراوێكی تازەی لێ دروستكەن، پرسیارەكەی من ئەوەیە، ئەگەر كاك نەوشیروان دەسەڵاتی ڕەهای كۆمەڵەی بكەوێتە دەست، ئایا هەمان بەرنامە بە ئەنجام ناگەیەنێت، یان لەسەربەخۆیی كۆمەڵە بەردەوام دەبێت؟ ڕەخنەی دووەمیشم كە زیاتر ترسە تا ڕەخنە، ترسەكەش ئەوەیە پەیوەندی مام حەلال‌و كاك نەوشیروان زۆر بەهێزە، چەندیش بەهێزتر بێت، من كێشەم لەگەڵ ئەو پەیوەندییەدا نییە، بەڵام ئایا ئەوە ترسی ئەوەمان لا دروستناكات كە ئەو پەیوەندییە بەهێزە، ببێتە پردێك بۆ گواستنەوەی هەیمەنەی مام جەلال بۆ ناو كۆمەڵە؟".


" پارت‌و ڕێكخراوە ماركسی- لینینییەكان، لە دنیادا فەشەلیان هێناوە‌و چیتر خەڵك بە دوایان ناكەوێ، ئەگەر لە قۆناغێكدا ڕابەرایەتی جوڵانەوەی ڕزگاریخوازی هەندێك لە میللەتانی دنیایان كردبێ، ئێستا ئەو دەورەیان لەدەستداوە". نەوشیروان مستەفا سەرباری ئەوەی سكرتێری ڕێكخراوێكی ماركسی – لینینی بوو، كەچی بەمجۆرە ڕەخنەی لەو نامیلكە 40 لاپەڕەییە گرتووە كە هەڤاڵ كوێستانی لەسەروبەندی یەكەمین كۆنفرانسی كۆمەڵەدا سەبارەت بە پێوویستبوونی " پارتێكی چەپی كوردستانی" نووسیوویەتی.




 

author photo

ڕۆژنامەنوسی سیاسی و دیكۆمێنتەری سیاسی و مێژویی