هەمزە عەبدوڵا، یەكەم سكرتێری پارتی‌‌و یەكەم قوربانی بیری چه‌پ له‌ناو پارتیدا

ئه‌و دامه‌زرێنه‌ره‌ی كه‌ حیزبه‌كه‌ی لێحه‌رام كرا

هەمزە عەبدوڵا، یەكەم سكرتێری پارتی‌‌و یەكەم قوربانی بیری چه‌پ له‌ناو پارتیدا

1977 خوێندراوەتەوە

له‌پاش پێنج ساڵ له‌ دامه‌زراندنی، له‌و حیزبه‌ دوور ده‌خرێته‌وه‌ كه‌ خۆی ڕۆڵی سه‌ره‌كی بینیوه‌ له‌ دروستكردنیداو ساڵێكیش دوای گه‌ڕانه‌وه‌ی مه‌لا مسته‌فا له‌ ڕووسیا، به‌یه‌كجاری حیزبه‌كه‌ی لێحه‌رام ده‌كرێت.


هەرچەندە ئەو یەكێك بوو لەدامەزرێنەرانی پارتی‌و بەشێكیش لەشارەزایانی مێژووی هاوچەرخ‌و ئەوانەی شارەزای مێژووی حیزبەكانی باشووری كوردستان، بەدامەزرێنەری سەرەكی ناو دەبەن‌و تا شۆڕشی چواردەی تەمموزی 1958و هاتنەوەی مەلا مستەفاش لەیەكێتی سۆڤییەت، جڵەوی سیاسی ئەو حیزبەی لەدەستدا بووە، بەڵام خۆری سیاسی هەمزە عەبدوڵا هەر زوو ئاوا دەبێت‌و دەبێتە یەكێك لە گومناوترین سەركردە سیاسییەكانی باشووری كوردستان.

هه‌مزه‌ عه‌بدوڵا، ساڵی 1943 ده‌چێته‌ مه‌هابادو قازی محه‌مه‌د ده‌بینێت، ساڵی دواتر دیسان ده‌چێته‌وه‌ بۆ مهابادو له‌ژێر كاریگه‌ری ئه‌و دۆخه‌دا كه‌ له‌وێ ده‌یبینێت، كه‌ڵكه‌ڵه‌ی ئه‌وه‌ی له‌ هزردا دروست ده‌بێت كه‌ ڕێكخراوێكی سیاسی له‌ كوردستانی باشوور دابمه‌زرێنێت

كاتێك كۆماری مهاباد دامه‌زراوه‌، داوای لێكراوه‌ كه‌ وه‌ك ئه‌وانه‌ی دی كه‌ له‌ كوردستانی باشووره‌و ڕۆشتوون بۆ ئه‌وێ، پله‌ی سه‌ربازی وه‌ربگرێت، به‌ڵام وه‌رینه‌گرتووه‌و گه‌ڕاوه‌ته‌وه‌ بۆ كوردستانی باشوورو خه‌ریكی دامه‌زراندنی ئه‌و حیزبه‌ بووه‌ كه‌ خۆی ناوی ( پارتی دیموكراتی كورد – عێراق)ی لێناوه‌.

،،

 به‌ وته‌ی ڕه‌فیق پشده‌ری، خاوه‌نی كتێبی ( كورد دوژمنی خۆت بناسه‌)، قازی محه‌مه‌د به‌ هه‌مزه‌ عه‌بدوڵای وتووه‌ ئێمه‌ لێره‌ حیزبێكمان هه‌یه‌ كه‌ سه‌رپه‌رشتی كۆماری كوردستان ده‌كات، تۆش بڕۆره‌وه‌ حیزبێك بۆ خۆتان دروست بكه‌،

دیتنی بوژانه‌وه‌ی بزوتنه‌وه‌ی كوردایه‌تی له‌ كوردستانی ڕۆژهه‌ڵات، تین‌و تاو ده‌داته‌ هه‌مزه‌ عه‌بدوڵا بۆ دروستكردنی حیزبێكی سیاسی له‌ باشووری كوردستان، به‌ وته‌ی ڕه‌فیق پشده‌ری، خاوه‌نی كتێبی ( كورد دوژمنی خۆت بناسه‌)، قازی محه‌مه‌د به‌ هه‌مزه‌ عه‌بدوڵای وتووه‌ ئێمه‌ لێره‌ حیزبێكمان هه‌یه‌ كه‌ سه‌رپه‌رشتی كۆماری كوردستان ده‌كات، تۆش بڕۆره‌وه‌ حیزبێك بۆ خۆتان دروست بكه‌، ڕه‌فیق پشده‌ری ئاماژه‌ به‌وه‌ ده‌كات كه‌ ئه‌م زانیارییه‌ی ڕاسته‌وخۆ له‌ ده‌می هه‌ریكه‌ له‌ عه‌بدولڕه‌حمانی زه‌بیحی‌و برایم ئه‌حمه‌دو شێخ له‌تیف‌و كاكه‌ زیادی كۆیه‌و خودی هه‌مزه‌ عه‌بدوڵاشه‌وه‌ بیستووه‌.

له‌پاڵ مه‌یلی هه‌مزه‌ عه‌بدوڵادا بۆ دروستكردنی حیزبێكی سیاسی، به‌شێك له‌سه‌ركرده‌كانی ( حیزبی شۆڕش) وای به‌باش ده‌زانن سوود له‌ تواناكانی هه‌مزه‌ عه‌بدوڵا ببینن.

هه‌مزه‌ عه‌بدوڵا، بۆ وه‌دی هێنانی ئامانجه‌كه‌یی‌و ڕه‌خساندنی زه‌مینه‌ی دروستكردنی حزبێكی پێشڕه‌و له‌ باشووری كوردستان، له‌ناو هه‌ردوو ( حیزبی شۆڕش‌و حیزبی ڕزگاری)یه‌وه‌ ده‌ست پێده‌كات، ئه‌م دوو حیزبه‌ له‌ ئه‌نجامی هه‌ڵوه‌شاندنه‌وه‌ی حیزبی ( هیوا)وه‌ درووست بووبوون.

له‌ كۆتایی به‌هاری ساڵی 1946دا هه‌مزه‌ عه‌بدوڵا ده‌گاته‌وه‌ سلێمانی‌و پاش چاوپێكه‌وتنی له‌گه‌ڵ ئیبراهیم ئه‌حمه‌دو گفتوگۆكردنی له‌گه‌ڵ به‌رپرسانی هه‌ردوو حیزبی شۆڕش‌و حیزبی ڕزگاری، دوای كۆمه‌ڵێك هه‌نگاوی جۆراو جۆر، لە16ی ئابی 1946دا به‌ ئاماده‌بوونی نوێنه‌رانی هه‌ردوو حیزبی ڕزگاری‌و شۆڕش‌و برایم ئه‌حمه‌د كه‌ ئه‌وكاته‌ به‌رپرسی لقی سلێمانی پارتی دیموكراتی ئێران بووه‌و به‌ ئاماده‌بوونی كاكه‌ زیاد ئاغاو نوێنه‌ری شێخ له‌تیفی شێخ مه‌حمودو عه‌لی عه‌بدوڵاو ته‌ها محێدین مه‌عروف‌و زۆركه‌سی دیكه‌ كۆنگره‌ی یه‌كه‌می پارتی ده‌به‌سترێت‌و له‌ كۆنگره‌كه‌دا مه‌لا مسته‌فا به‌سه‌رۆك‌و شێخ له‌تیفی شێخ مه‌حمود به‌ جێگری یه‌كه‌م‌و كاكه‌ زیاد به‌جێگری دووه‌م‌و هه‌مزه‌ عه‌بدوڵاش به‌ سكرتێر دیاری ده‌كرێن.

بەپێی گێڕانەوەی برایم ئەحمەد، هەمزە عەبدوڵا بەر لەوەی ببێتە سكرتێری پارتی، شیوعی بووەو كاتێكیش لە ساڵی 1946 لە ئێران بوون، مەلا مستەفاو هەمزە عەبدوڵا نامەیان بۆ ئەو ناردووەو وتوویانە حیزب درووست دەكەن، حیزبێكی وەكو حیزبی دیموكراتی ئێران،" مەلا مستەفا لەنامەكەیدا داوایلێكردم كە یارمەتی هەمزە عەبدوڵا بدەم".

له‌و ده‌مه‌دا، بەهۆی چالاكی سیاسییەوە نزیكایەتی لەنێوانی هەمزە عەبدوڵاو برایم ئەحمەددا درووست دەبێت‌و سەرئەنجامی نزیكایەتیەكەش ژن‌و ژنخوازی لەنێوان هەمزە عەبدوڵاو برایم ئەحمەددا لێدەكەوێتەوەو هەمزە عەبدوڵا یەكێك لەو دوو خوشكەزایەی كە لەگەڵیدا دەبێت دەداتە برایم ئەحمەد، واتە گەلاوێژخانی دایكی هێرۆخان، برایم ئەحمەدیش خوشكی خۆی دەداتە هەمزە عەبدوڵا.

،،

بەپێی گێڕانەوەی برایم ئەحمەد، هەمزە عەبدوڵا بەر لەوەی ببێتە سكرتێری پارتی، شیوعی بووەو كاتێكیش لە ساڵی 1946 لە ئێران بوون، مەلا مستەفاو هەمزە عەبدوڵا نامەیان بۆ ئەو ناردووەو وتوویانە حیزب درووست دەكەن، حیزبێكی وەكو حیزبی دیموكراتی ئێران،" مەلا مستەفا لەنامەكەیدا داوایلێكردم كە یارمەتی هەمزە عەبدوڵا بدەم".

سەرباری ئەوەی ئەم ژن‌و ژنخوازییەی نێوان هەمزە عەبدوڵاو برایم ئەحمەد، تاڕاده‌یه‌ك دەبێتە زیاتر بەهێزبوونی پارتی لەو وەختەداو هەر لەو سەروبەندەشدایە كە برایم ئەحمەد لقی كوردستانی باشووری ( ژێكاف) هەڵدەوەشێنیتەوەو بەفەرمی دێتە ڕیزەكانی پارتییەوە، بەڵام ئەم ژن‌و ژنخوازییە لەڕووی سیاسییەوە بۆ هەمزە عەبدوڵا هیچ كەڵكی نابێت‌و ناتوانێت ناكۆكییەكانی نێوانیان بڕەوێنێتەوەو لەپاش كۆنگرەی یەكەمی پارتیشەوە كە هەمزە عەبدوڵا بەسكرتێری حیزب هەڵدەبژێرێت، ئیدی ناكۆكییەكان بەتەواوی لەنێوان هەمزەو برایم ئەحمەددا دەگەشێنەوە.

بەوتەی بەهادین نوری، هەرچەندە پێشتریش ناكۆكی لەنێوان سەركردەكانیدا هەبووە، بەڵام ناكۆكی نێو ڕیزەكانی پارتی، لەپاش شۆڕشی چواردەی تەمووز زۆرتربووەو دژواری زیاتر ڕووی لەپارتی كردووە، بەهادین نوری پێیوایە لەو دەمەدا ناكۆكییەكانی نێوان سەركردەكانی ئەو حیزبە، پەردەیان لەسەر گۆڕانی مەكتەبی سیاسی پارتی هەڵماڵیوەو لەمیانی ئەو ململانێیانەشدا هیچكام لەدامەزرێنەرانی پارتی لەڕیزەكانی ئەو حیزبەدا نەماون، جگە لە هەمزە عەبدوڵا كە بەسكرتێری ماوەتەوەو بە كەسێكی چەپڕەوی نێو سەركردایەتی پارتیش ناسراو بووە.

وەكو ئەوەی بۆ زۆرێك لەسەركردەو بەرپرسەكان ژن‌و ژنخوازی دەبێتە زەواجی سیاسی‌و هەردووولا بۆ پتەوكردنی پایەی خۆیان لەناو حیزبداو رووبەڕووبوونەوەی نەیارەكانیان كەڵكی تەوای لێوەردەگرن، بەڵام پەیوەندی ژن‌و ژنخوازی‌ نێوان هەمزە عەبدوڵاو برایم ئەحمەد، نەك هەر پایەی ئەوانی لەناو پارتیدا بەهێز نەكرد، بەڵكو نەیتوانی ناكۆكی ئایدۆلۆژی نێوان ئەوان كاڵبكاتەوەو ململانێكانیان كۆتایی پێبهێنێت.


هەر چەندە پێشتر لە سكرتێری خرابوو، برایم ئەحمەد دوای بەربوونی لە زیندان چوو بوویە جێگەكەی، ساڵی 1951و له‌ كۆنگره‌ی دووه‌می پارتیدا هەمزە عەبدوڵاو گروپەكەی كە بەچەپڕەوەكانی ناو پارتی ناسرابوون لە لە حیزب دوور دەخرێنەوەو به‌رپرسیارێتییان لێوه‌رده‌گیرێته‌وه‌، " حەمید عوسمان"یش یەكێك بوو لەوانەی كە لەگەڵ هەمزە عەبدوڵادا لەپارتی دورخرایەوە، حەمید پێشتر یەكێكبوو لەسەركردە هەرە دیارەكانی حیزبی شیوعی لە عێراق‌و لەڕێگەی هەمزە عەبدوڵاوە هاتبووە ناو پارتی.

لەمانگی ئازاری ساڵی 1951لەشاری بەغداد دووەمین كۆنگرەی پارتی بە ئامادەبوونی 30 ئەندام دەبەسترێت‌و یەكێك لە بڕیارەكانی كۆنگرە وەلانانی هەمزە عەبدوڵاو هاوڕێكانی دەبێت‌، بەڵام ئەو بە بڕیارەكانی كۆنگرە رازینابێت، هەر لەو سەروبەندەدا حكومەت دەیگرێت‌و دەیەوێت بۆ توركیای دووربخاتەوە، بەڵام هەمزە لە زاخۆ لەدەست حكومەت هەڵدێت‌و دەگەڕێتەوە بۆ سلێمانی‌و ڕێكخستنێكی نوێ بەناوی " بەرەی پێشكەوتووی پاراتی دیموكراتی كورد" درووست دەكات لەم ڕێكخستنە نوێیەشدا هەریەكە لە ( شەهابی شێخ نوری‌و موحەڕەم محەمەد ئەمین‌و محەمەد كەریم فەتحوڵا)ی لەگەڵدا دەبن.

،،

دوای شۆڕشی 14ی ته‌مووزو گه‌ڕانه‌وه‌ی له‌ سۆڤییه‌ت، جارێكیتر مه‌لا مسته‌فا، هه‌مزه‌ عه‌بدوڵا ده‌كاته‌وه‌ به‌ سكرتێری پارتی، به‌لام پاش ساڵێك‌و به‌هۆی فشاری هه‌ندێك له‌ به‌رپرسانی پارتییه‌وه‌، مه‌لا مسته‌فا له‌ ساڵی 1959 له‌ به‌غداد هێز ده‌نێرێته‌ سه‌ر هه‌مزه‌ عه‌بدوڵاو له‌ پارتی ده‌ریده‌كات‌و ئه‌و حیزبه‌ی لێ حه‌رام ده‌كریچت كه‌ خۆی ڕۆڵی بنه‌ڕه‌تی له‌ دروستكردنیدا گێڕاوه‌.

پاش بڕیاری دوورخستنه‌وه‌ی له‌ پارتی، هه‌مزه‌ عه‌بدوڵا هه‌وڵی پێكهێنانی به‌ره‌یه‌كی سیاسی له‌گه‌ڵ حیزبی شیوعی عێراقیدا ده‌دات، به‌ڵام پاش ئه‌وه‌ی كه‌ مام جه‌لال نامه‌ی مه‌لا مسته‌فا ده‌بات بۆ هه‌مزه‌ عه‌بدوڵا، ئه‌و له‌گه‌ڵ باڵه‌كه‌ی دیكه‌ی پاریدا یه‌كده‌گرێته‌وه‌و دوای شۆڕشی 14ی ته‌مووزو گه‌ڕانه‌وه‌ی له‌ سۆڤییه‌ت، جارێكیتر مه‌لا مسته‌فا، هه‌مزه‌ عه‌بدوڵا ده‌كاته‌وه‌ به‌ سكرتێری پارتی، به‌لام پاش ساڵێك‌و به‌هۆی فشاری هه‌ندێك له‌ به‌رپرسانی پارتییه‌وه‌، مه‌لا مسته‌فا له‌ ساڵی 1959 له‌ به‌غداد هێز ده‌نێرێته‌ سه‌ر هه‌مزه‌ عه‌بدوڵاو له‌ پارتی ده‌ریده‌كات‌و ئه‌و حیزبه‌ی لێ حه‌رام ده‌كریچت كه‌ خۆی ڕۆڵی بنه‌ڕه‌تی له‌ دروستكردنیدا گێڕاوه‌.

هەرچەندە ساڵێك بەر لەكۆنگرەی سێیەم گەڕابوویەوە ناو پارتی‌و لەسەر پێشنیاری ئەویش ناوی حیزب گۆڕدرابوو بۆ ( پارتی دیموكراتی یەكگرتووی كوردستان) ، بەڵام لەمانگی كانونی ساڵی 1956 كۆنگرەی سێیەمی پارتی دەبەسترێت‌و كۆنگرە بڕیاری دوورخستنەوەی هەمزە عەبدوڵا لە حیزب دەدات، بەڵام لە كۆنگرەی چوارەمی پارتی لەساڵی 1959 بەیەكجاری هەمزە عەبدوڵاو حەمید عوسمان‌و ساڵح حەیدەری‌و نەژاد ئەحمەدو خەسرەو تۆفیق) لەحیزب دەركران‌، وەكو نەیارەكانی ئەوان گێڕاویانەتەوەو باسی دەكەن، پارتی بەیەكجاری لە شیوعییەكان پاككراوەتەوە.

،،

 لەوكاتەوە كە مەلا مستەفا چەكداری ناردە سەرمەكتەبی سیاسی لەبەغداو داگیری كرد، ئیدی خۆری هەمزە عەبدوڵاو چەپەكانی ناو پارتی ئاوابوو.


بەو پێیەی كە هەمزە عەبدوڵا كەسێكی چەپ بووەو بەهۆی ئەویشەوە كۆمەڵێك لەسەركردەی بیری چەپ كە پێشتر لە حیزبی رزگاریبوون هاتوونەتە ناو پارتیەوەو لەدیارترینیشیان حەمید عوسمان بوو، كە یەكێكبووە لەسەركردە دیارەكانی حیزبی شیوعی عێراقی، نزیكی هەمزە عەبدوڵا لەشیوعییەكانەوە وایكردبوو كە شیوعییەكان لەو ماوەیەی ئەو سكرتێری پارتی بوو، تا ڕاده‌یه‌كی زۆر كۆنترۆڵی پارتی بكەن‌و هەیمەنەی شیووعییەكانیش بەسەر پارتیدا تا هەڵگیرسانی شۆڕشی چواردەی تەمموزی 1958‌و هاتنەوەی مەلا مستەفا لەیەكێتی سۆڤییەت بەردەوامبوو، ئەم دۆخەش برایم ئەحمەدو هاوڕێكانی ئەوانەی بیری نەتەوەییان هەبوو نیگەران كردبوو، سەرباری ململانێكانی هەمزە عەبدوڵا‌و چەپەكان لەگەڵ برایم ئەحمەددا، مەلا مستەفاش كە تازە لەسۆڤییەت گەڕابوویەوە هەیمەنەی چەپ‌و شیوعییەكانی بەسەر پارتییەوە قبوڵ نەكردو ئیتر لەوكاتەوە كە مەلا مستەفا چەكداری ناردە سەرمەكتەبی سیاسی لەبەغداو داگیری كرد، ئیدی خۆری هەمزە عەبدوڵاو چەپەكانی ناو پارتی ئاوابوو.

بە وتەی بەهادین نوری كە لەوكاتەدا گەرمەی سیاسەتی بووەو یەكێك بووە لەسەركردە دیارەكانی حیزبی شیوعی عێراقی، كۆنە سەركردە تەقلیدییەكان‌و برایم ئەحمەد، هەڵەیەكی تازەی دزێویان كردووەو بۆ ڕزگاربوون لەهەمزە عەبدوڵای سكرتێری پارتی، پەنایان بۆ مەلا مستەفا بردووە، ئەو دەڵێت:" كۆنە سەركردە تەقلیدییەكان‌و لە پێشەوەیان برایم ئەحمەد، هەڵەیەكی دزێویان كردو لە ساڵی 1960دا پەنایان بۆ دەستڕۆشتن‌و تین‌و توانی بارزانی برد، بۆ ڕزگاربوون لە هەمزە عەبدوڵاو ئەوانەی لەگەڵیدا بوون‌و بە چەپڕەو ناو دەبران".

بەهادین نوری، پەنا بردنی برایم ئەحمەدو چەند سەركردەیەكی تر بۆ لای بارزانی، بەمەبەستی دوورخستنەوەی هەمزە عەبدوڵا، بە ڕێكخستنی چالاكییەكی نیمچە كودەتایی ناو دەبات‌و ئاماژە بەوە دەكات كە مەلا مستەفا بە پاڵپشتیكردنی برایم ئەحمەدو هاوڕێكانی بۆ دوورخستنەوەی هەمزە عەبدوڵا، بنەما دیموكراسییەكانی لەناو حیزبدا لەكەدارو پێشێل بكات.

،،

هەمزە عەبدوڵا كە لەناو پارتیدا بووەتە قوربانی بیری چەپ، لە یەككاتدا هەریەكە لەبرایم ئەحمەدو مەلا مستەفاش نەیاری بوون، رەنگە ئەوە هۆكاری سەرەكی بووبێت بۆ ئەوەی بەئاسانی لەبەرانبەر نەیارەكانیدا شكست بێنێت‌و لەدامەزرێنەری پارتییەوە ببێتە ئەوكەسەی كە حیزبەكەی لێحەرام بكرێ.

هەمزە عەبدوڵا كە لەناو پارتیدا بووەتە قوربانی بیری چەپ، لە یەككاتدا هەریەكە لەبرایم ئەحمەدو مەلا مستەفاش نەیاری بوون، رەنگە ئەوە هۆكاری سەرەكی بووبێت بۆ ئەوەی بەئاسانی لەبەرانبەر نەیارەكانیدا شكست بێنێت‌و لەدامەزرێنەری پارتییەوە ببێتە ئەوكەسەی كە حیزبەكەی لێحەرام بكرێ.

هەرچەندە زۆرتر بەهۆی ململانێكانی لەگەڵ برایم ئەحمەددا لەسكرتێری پارتی لادەبرێت‌و لەپارتی دووردەخرێتەوە، بەڵام لەململانێكانی نێوان باڵی مەكتەبی سیاسی بەڕێبەری ( برایم ئەحمەدو جەلال تاڵەبانی)‌و مەلا مستەفادا، هەمزە عەبدوڵا لەبەرەی باڵی مەكتەبی سیاسی دەبێت‌، بەڵام لەدوای ئاشتبوونەوەكەی باڵی مەكتەبی سیاسی‌و مەلا مستەفا له‌ ساڵی 1970 هەمزە عەبدوڵا لەگەڵ هەریه‌كە لە ( حیلمی عەلی شەریف‌و مەلا ماتۆڕو عەبدولستار تاهیر شەریف)دا ناگەڕێنەوە بۆ ناو شۆڕش‌و لەبەغدا دەمێننەوە..

جیاواز لەوانەی كەلەگەڵ برایم ئەحمەدو جەلال تاڵەبانیدا نەگەڕانەوە ناو شۆڕش، ئەو بەیەكجاری وازی لەسیاسەت هێناو كارێكیشی نەكرد كە خزمەت بێت بە حكومەتی عێراقی‌و حیزبی بەعس‌و زۆركەسیش لەبەرانبەر ئەم هەڵوێستەیدا ستایشی دەكەن‌و ئاماژە بەوە دەكەن ئەو كەسێكی بەتوانا بووەو ئەگەر مەیلی لێبوایە لای بەعس یان لەناو شۆڕشدا دەیتوانی حیزبێكی بەهێز درووست بكات.


هەمزە عەبدوڵا

ئه‌وهه‌مزه‌ عه‌بدوڵا عومه‌ر، ساڵی 1915 لە گوندی" ڕاژان)ی مه‌رگه‌وه‌ڕی دیوی كورستاتی ڕۆژهه‌ڵات له‌ دایكبووه‌.
له‌ته‌مه‌نی شه‌ش ساڵیدا، خێزانه‌كه‌یان به‌هۆی شاڵاوی ڕووسه‌وه‌ ئاواره‌ بوون‌و هاتوونه‌ته‌ ئاكرێ‌و مووسڵ.
ساڵی 1931 ئاماده‌یی زانستی له‌ موسڵ ته‌واو كردووه‌وساڵێك دواتر چووه‌ته‌ كۆلێژی مافی زانكۆی به‌غدادو له‌وێ هه‌ریه‌كه‌ له‌ شاكر فه‌تاح‌و برایم ئه‌حمه‌دی ناسیوه‌.
ساڵی 1947 ( نه‌عیمه‌ خانی) خوشكی برایم ئه‌حمه‌دی خواستووه‌.
دوو ساڵی كۆتایی تەمەنی لە شاری سلێمانی بەسەربردووەو لە13ی كانوونی ساڵی 1998دا كۆچی دوایی دەكات‌و لەسەر وەسیەتی خۆی لە سلێمانی بەخاك دەسپێردرێت.


سوود له‌م سه‌رچاوانه‌ وه‌رگیراوه‌:


یه‌ك: بیره‌وه‌رییه‌كانی به‌هادین نوری، به‌شی یه‌كه‌م -چاپی یه‌كه‌م - سلێمانی - 2001.
دوو: ناسنامه‌ی حیزبه‌ كورستانییه‌كان - مه‌سعود عه‌بدولخالق- چاپی یه‌كه‌م - 2009 - هه‌ولێر.
سێ: په‌ره‌سه‌ندنی ژیانی حیزبایه‌تی له‌ كوردستانی باشوور - محه‌مه‌د فتیح - 2014.

چوار: چاوپێكه‌وتنێكی دوورو درێژی سدیق ساڵح له‌ گه‌ڵ هه‌مزه‌ عه‌بدوڵا- ڕۆژنامەی كوردستانی نوێ – ژمارە – 2901.

 

author photo

ڕۆژنامەنوسی سیاسی و دیكۆمێنتەری سیاسی و مێژویی