كۆمەڵە دامەزرێنەری راستەقینەی یەكێتییە

مام جەلال ماوی بوو، نەوشیروان باوەڕی بە چەكوش‌و داس نەبوو

كۆمەڵە دامەزرێنەری راستەقینەی یەكێتییە

1895 خوێندراوەتەوە

"ئەوە راستییەكی مێژوییە كە (كۆمەڵە) بە مام جەلالی سكرتێرییەوە دامەزرێنەری یەكێتی بوون، بەڵام ئەو راستیە وردە وردەو بەشێنەیی گۆڕاو لەباتی ئەو راستییە مێژووییە، حیكایەتێكی تر جێگیركرا". فەرەیدون عەبدولقادر یەكێك لە دامەزرێنەرانی كۆمەڵەی رەنجدەران لە بیرەوەرییەكانیدا وادەڵێت.
كێبی هەڵۆ سوورەكانی قەندیل بیرەوەرییەكانی فەرەیدون عەبدولقادرە، لەلایەن دەزگای سەردەم‌و لەدوتوێی (768) لاپەڕەدا لەساڵی (2017) چاپ‌و بڵاوكراوەتەوە. ئەم كتێبە بیرەوەرییەكانی نوسەر لەماوەی ساڵانی (1967 - 1991) لەگەڵ كۆمەڵێك وێنەو بەڵگەنامە لەخۆدەگرێت.

 
هەڵەكانی جەلالی‌و مەلایی
 
نوسەر لەسەرەتای كتێبەكەی‌و لەچەند شوێنێكی دیكەشدا دەگەڕێتەوە سەر باسی مێژوی كوردستان‌و روداوە سیاسییەكان دەخاتەوە بەر باس، یەكێك لەو بابەتانەی بەدرێژی باسی لێوەدەكات دابەشبونی پارتی دیموكراتی كوردستانە بەسەر هەردوو باڵی (جەلالی‌و مەلایی)دا. لەوبارەیەوە رەخنە لە باڵی مەكتەبی سیاسی (جەلالی)یەكان دەگرێت‌و دەڵێت: ساڵی (1964) بارزانی ناوبانگ‌و كاریزمایەكی زۆری پەیداكردبوو. لەڕوی بابەتییەوە پارتی وەك حیزبێكی خاوەن ئەرك‌و بەرپرسیارێتی هێشتا پێویستی زۆری بەوە هەبوو، كە سود لە ناوبانگ‌و هێزو كاریزمای بارزانی وەربگرێت، كەچی هەندێك خوێندنەوەیان بۆ كۆمەڵی كوردەواری‌و بۆ تواناو كاریزمای بارزانی هەڵە بوو، بابەتی‌و ژیرانە لە رۆڵی سەركردە نەدەگەیشتن.. ئەم دوبەرەكی‌و ململانێ‌ خوێناوییە باڵی (جەلالی) ناچاركرد لەژێر كاریگەری هەلومەرجێكی ئاڵۆزو نالەباردا، دەست بخانە ناو دەستی رژێمی بەغداوەو لەو سەنگەرەوە شەڕێكی چەند ساڵە دژی بارزانی‌و جوڵانەوە چەكدارییەكە بكات‌و بەمەش بكەوێتە بەرەیەكی نابەجێ‌‌و هەڵەوە.

 
ناوبراو، قامكی رەخنەكانی ئاراستەی باڵی مەلایی دەكات‌و بەوە تۆمەتباریان دەكات كە هاوكاری دەزگای هەواڵگری ئێران (ساواك)یان لەدژی كوردانی ئێران كردوە، لەوبارەیەوە ئاماژە بە بۆچونێكی د. عەبدولرەحمانی قاسملۆو عەبدوڵای حەسەنزادە دەكات كە دەڵێن: بۆ مێژو دەبێ‌ بوترێ‌ كەبەداخەوە هاوكاری سەركردایەتی بزوتنەوەی كوردی عێراق لەگەڵ رژێمی كوردكوژی (حەمەڕەزاشا)، گەیشتە ئەو جێگایە كە پێشمەرگەی كوردی عێراق لە نێوخۆی كوردستانی ئێراندا، شان بەشانی هێزەكانی شا، راوی كوردی ئێرانیان دەكردو لەكوردستانی عێراقیش تەڵە بۆ تێكۆشەرانی حیزبی ئێمە دادەنرا، بۆ ئەوەی بگیرێن‌و بەزیندویی بێت یان بەمردوویی بدرێنەوە بە جەلادەكانی رژێمی شا.

 

مەلامستەفای بارزانی ، جەلال تاڵەبانی

 

 
شۆڕش یان ئیستعراز؟

شۆڕشی ئەیلول كە لەماوەی ساڵانی (1961 1975) خایاند، یەكێكە لەو بابەتانەی لەم كتێبەدا ئاماژەی بۆ كراوەو نوسەر هەندێك لە روداوەكانی ساتی كۆتایهاتنی شۆڕش كە بە (نسكۆ یان ئاشبەتاڵ) ناودەبرێت دەگێڕێتەوەو دەڵێت: لەمانگی شوباتی (1975)دا، مام جەلال نامەیەكی نامەیەكی بۆ مەلا مستەفا ناردو تیایدا: دەڵێت لە روسەكان بریماكۆڤم بینیوەو پێی گوتم جواب بۆ بارزانی بنێرەو پێی بڵێ‌، یەك مانگ بەرگری بكەن‌و خۆڕابگرن، ئێمە لە ئێران زیاتر یارمەتیتان دەدەین. پاشان نوسەر دەڵێت: دوای بڵاوبونەوەی هەواڵی رێكەوتنامەی جەزائیر لەنێوان سەدام حسێن‌و شای ئێراندا، شیهابی شێخ نوریم بینی‌و پێیوتم: بارزانی زوو بانگ كراوە بۆ تاران‌و هەموو شتێكی پێ‌ وتراوەو رێكەوتن مانای خۆی هەیە. تەنانەت وتی بە دارا تۆفیق‌و حەبیب محەمەد كەریمم وت گەلێكی هەژاری وەك ئێمە، وا گەمارۆ دراو دەبێت رێوشوێنی جەنگی گەل‌و پارتیزانی بگرێتەبەر، كەچی گاڵتەیان پێدەكردم‌و دەیانوت تۆ ماویت.. هەروەها شیهاب دەیوت: شۆڕش چۆن وادەكرێ، (200 - 300) هەزار مرۆڤی كوردیان خزاندۆتە ناو شۆڕش، ئاخر ئەوە شۆڕشە یان ئیستیعراز؟

 
لەبارەی ئەوەی بۆچی بارزانی بەرگری نەكردو كۆتایی بە شۆڕش هێنرا؟ فەرەیدون دەڵێت: بارزانی لەهەمو سەركردەكانی پارتی‌و لەهەندێ‌ فەرماندەش رازی نەبوو، دەیزانی هەندێكیان كوڕی ئەو رۆژە سەختە نین، بۆیە ئیتر ئێمە هیوامان بە وەزعی بارزانی‌و بەبەرگری بارزانی نەما.
مام جەلال كوڕی ماڵی بارزانی بوو

 
لەمێژوی نیوسەدەی رابردوی كورددا، دوو ناو بەهۆی ناكۆكی‌و رۆڵی سیاسیانەوە زۆر دیارن، ئەوانیش مەلا مستەفای بارزانی‌و مام جەلالن، فەرەیدون عەبدولقادر دەڵێت: مام جەلال هەمووجار بۆی دەگێڕامەوە، نێوانی لەگەڵ مەلا مستەفای بارزانی زۆر خۆش بووە، لەهەموو سەركردەكانی تری پارتی نزیكتربوە لە بارزانی‌و خێزانەكەیەوە، سەرەڕای رەخنەی تایبەتی لەسەر شێوەی كارو لێكدانەوەكانی بارزانی، خۆشەویستی تایبەتی بۆی هەبووە. لەگەڵ خوالێخۆشبوو حەمایل خانی خێزانی بارزانی دا، نێوانی خۆش بوەو بەوتەی خۆی وەكو كوڕی ماڵەكە وابووە.

 

 

 
نەوشیروان لە داخی مام جەلال نەبووە كۆمەڵە

 كۆمەڵەی ماركسی لینینی كوردستان لە ساڵی (1970) دامەزراوەو دواتر ناوەكەی بوەتە كۆمەڵەی رەنجدەرانی كوردستان، نوسەر یەكێكە لە دامەزرێنەرانی كۆمەڵەو دەڵێت: لە (10/6/1970)و لە كۆبونەوەیەك لەماڵی ئێمە لە گەڕەكی راغیبەخاتون لە بەغدا یەكەمین كۆبونەوەی دامەزراندنی كۆمەڵە كرا بە ئامادەبونی: مام جەلال، شیهاب شێخ نوری، فازیل مەلا مەحمود، فوئاد قەرەدانی، دلێر سدیق، رەفعەتی مەلا، فەرەیدون عەبدولقادر.


نوسەر كاتێك باس لە سەرەتای دامەزراندنی كۆمەڵە دەكات، رایدەگەیەنێت فازڵی مەلا مەحمودیان ناردوە بۆ لای نەوشیروان مستەفاو داوایانلێكردوە لەگەڵیاندا كاربكات، لەوەڵامدا نەوشیروان وتویەتی: من نایەم‌و ئیش لەگەڵ مام جەلالدا ناكرێ‌.


هەر لەبارەی هەڵوێستی نەوشیروان مستەفاوە، نوسەر دەڵێت: تەنانەت خۆم لە نەوشیروانم بیست وتی راستە مام جەلال كەسێكی گرنگە، بەڵام لەم قۆناغەدا شتێكی باش نییە لەگەڵماندا بێت، چونكە بوونی ئەو وادەكات ئێمە پشت بەخۆمان نەبەستین. بەنمونە ئەگەر بمانەوێت سكرتێرتێك هەڵبژێرین، ئەوا تا مام جەلال لەناوماندا بێت ناشێ‌ كەسی تر هەڵبژێرین. ئەگەر بمانەوێ سەرۆكی شاندێك هەڵبژێرین هەر دەبێت ئەو سەرۆك بێت.. بەو جۆرە بەشێنەیی دەبین بە رەنگدانەوەی مام جەلال‌و بیروبۆچونەكانی ئەوو هیچی تر.

 
تاڵەبانی‌و نەوشیروان‌و سەركردایەتی كۆمەڵە


بەوتەی نوسەر هەر لە سەرەتای دامەزراندنی كۆمەڵەوە، لەلایەن هەموو ناوەندی كۆمەڵەوە مام جەلال بە سكرتێری كۆمەڵە پەسەندكرا، بەڵام "زۆربەی كات لە كاری راستەوخۆی كۆمەڵە دووربوو، بەهۆی ئەوەی دەچوە ناوچەی گەڵاڵە لەنزیك سەركردایەتی بارزانی‌و سەفەری دەرەوەی وڵاتیشی دەكرد". پاشان دەڵێت: مام جەلال زۆر لە بڵاوكراوەكانی كۆمەڵەی نوسیوەو بەشداری هەموو شتێكی كۆمەڵە بووە، لەهەمومان زیاتر خۆی بە ماركسی دەزانی، لەهەموشمان زیاتر باوەڕی بە (ماوی)بوون‌و كۆمەڵە نیشاندەدا.

 
لەبارەی نەوشیروان مستەفاو پەیوەندییەكانی لەگەڵ كۆمەڵە، نوسەر دەڵێت: نەوشیروان مستەفا لە دەرەوەی وڵات‌و تا ئەو رۆژەیش كە چۆتە دەرەوە، پەیوەندی تاكی بەهۆی سەركردایەتی (كۆمەڵە)وە بە (كۆمەڵە)وە هەبووە، لە لاوازترین ئەگەردا ئەگەر هیچ نەبێ‌ بە بیرو بەهاوڕێیەتی لە (كۆمەڵە) دوور نەبووەو لە بازنەی (كۆمەڵە)دا بووە.

 

 

جەلال تاڵەبانی و نەوشیروان مستەفا

 
سەبارەت بەسەرۆكایەتی كۆمەڵە لەلایەن نەوشیروان‌و بیروباوەڕی ناوبراوەوە، نوسەر دەڵێت: نەوشیروان مستەفا بە كردار سكرتێری كۆمەڵە بوو، بێ‌ ئەوەی لە پلینیۆم یا لە كۆنفراسێكی كۆمەڵەدا بۆ ئەو پلەیە هەڵبژێرابێت، تەنها بە حوكمی دەستپێشكەری لە كۆبونەوەی (شێنێ)ی تشرینی دووەمی ساڵی (1978)دا ئەو دەورەی وەرگرت... كاك نەوشیروان نەیدەشاردەوە كە هەرگیز باوەڕی بە دیكتاتۆرییەتی پرۆلیتاریاو باوەڕی بە ئارمی چەكوش‌و داس‌و بەهیچ هێماو تێزێكی بان چەپ نەبووە.

 

 
كۆمەڵە دژی شەڕی ناوخۆ بوو

 
بەشێكی دیاری مێژوی پارتە سیاسییەكانی كوردستان لە نیو سەدەی رابردودا بریتییە لە شەڕی خوێناوی كورد كوژی، بەڵام بەوتەی نوسەر كۆمەڵە لەسەرەتای دامەزراندنییەوە دژی كارە خراپەكان‌و شەڕی ناوخۆ بووە، چونكە: "ناشیرینترین رەفتاری سیاسی لای ئێمە ئەوە بوو، كە جیاوازی فیكری‌و سیاسی لە ریزەكانی گەل‌و لە ناكۆكییەكانیاندا بە زەبرو زەنگ چارەسەر بكرێت.. بۆیە زۆر لامان سەیرو سەمەرە بوو كە ئێمە بتوانین لەگەڵ دوژمنانی گەلەكەمان كۆك بین، كەچی لەگەڵ خۆمان‌و یەكتردا ناكۆك‌و دوژمن بین، بەجۆرێ‌ كاربگاتە ئەوەی لەشكركێشی دژی یەكترو شەڕی براكوژیمان لە گفتوگۆو تەبایی پێ‌ باشتربێت".


سەبارەت بەشەڕو ناكۆكییەكانی ساڵانی حەفتاكان‌و دواتر، نوسەر دەڵێت: ئۆباڵی ئەو خەتایە بەتەنها لە ئەستۆی هیچ لایەن‌و سەركردەیەكدا نییە، هیچ كەس بە تەنها لەو مەینەتیانە بەرپرسیار نییە. بۆیە رەوای هەق نییە كەسمان ئەو لێپرسراوێتیە لە ئەستۆی خۆمان داماڵین‌و بیخەینە گەردنی ئەم یان ئەو سەركردە، بەڵكو ئێمە پێكەوەو هەموومان شەریكی چاكەو خراپەكانین، شەریكی هەڵە گەورەكانیشین.


كۆمەڵە یەكێتی دامەزراند

 
لە حوزەیرانی (1975)دا یەكێتی نیشتیمانی كوردستان رادەگەیەنرێت، فەرەیدون عەبدولقادر كۆمەڵە بە دامەزرێنەری راستەقینەی یەكێتی دەزانێت‌و لەوبارەیەوە دەڵێت: پێموایە راستیەكە ئەوەیە كە (كۆمەڵە) بە مام جەلالی سكرتێرییەوە، خاوەنی بیرۆكەی دامەزراندنی (یەكێتی نیشتیمانی كوردستان)ە، بە دامەزرێنەری راستەقینەو بەكاری ئەو هەنگاوە مێژوییەی دامەزراندنی یەكێتی‌و هەڵگیرسانەوەی شۆڕشی نوێ‌ دادەنرێت... رەگ‌و ریشە داكوتان‌و پەلوپۆ هاویشتنی یەكێتی لە وڵات (كۆمەڵە) نەخشی سەرەكی تیا گێڕاوە..

 
لە بەشێكی دیكەی بیرەوەرییەكانیدا دەڵێت: ئەوە راستییەكی مێژوییە كە (كۆمەڵە) بە مام جەلالی سكرتێرییەوە دامەزرێنەری یەكێتی بوون، (كۆمەڵە)‌و دەستەیەك لە تێكۆشەرانی دەرەوەی وڵات كەهەندێكیان تا ئەوكاتەش ئەندامی (كۆمەڵە) بوون، بەشداربون لە دامەزراندنی یەكێتیدا، بەڵام ئەو راستیە وردە وردە و بەشێنەیی گۆڕاو لەباتی ئەو راستییە مێژووییە، حیكایەتێكی تر جێگیركراو (كۆمەڵە) وەك دامەزرێنەری ئەساسی یەكێتی باس نەدەكرا.

 
پارتی‌و هەكاری

 
سێ‌ ساڵ دوای دامەزراندنی یەكێتی، دەیان پێشمەرگەو سەركردەی یەكێتی لە ناوچەی هەكاری دەكوژرێن، لەبارەی ئەم روداوەوە، نوسەر دەڵێت: ئەو (800) پێشمەرگەیەی بەرەو هەكاری كەوتبونە رێ، سەركردایەتی پارتییان لە مەبەستی سەردانەكەیان ئاگاداركردبوو، تەنانەت نامەیان بۆ ئیدریس بارزانی‌و حەمایل خانی دایكی مەسعود بارزانی‌و رەشید سندی نوسیبوو، ئەوانیش لە وەڵامەكانیاندا رازیبون‌و نیازی خراپیان نیشان نەدابوو، بگرە گفتی ئەوەشیان دابوو كە دەست نەهێننە رێگەیان.

بەڵام لە (1/6/1978)دا سەركردایەتی پارتی بەهاندانی عەشیرەتەكانی سەر سنور پەلاماری هێزەمانی یەكێتی یان دا، پاشان سەرەك خێڵێكی وەك (شێخ موسا كەرەڤان)‌و عەشیرەتی (گۆیی)یان تێبەردان‌و بەمەش ئەو كارەساتە گەورەیەیان خوڵقاند. ئەو رەفتارەش مانایەكی ناخۆش‌و پڕ لە مەترسی نیشاندا، كە باوەڕو متمانە بەیەكتر كردنی لەناو هێزە كوردییەكاندا نەهێشت. بەمەش رێگا بۆ ئاگری شەڕێكی سەختی ناوخۆ خۆش بوو كە زیانێكی گەورەی بە جوڵانەوەكەو دۆزی كورد گەیاند.

 
شەڕكردن‌و سزادانی ئاش هەڵە بوون

 
لە ساڵی (1984) یەكێتی كۆتایی بە گفتوگۆكانی لەگەڵ حكومەتی عێراق دەهێنێت، سەبارەت بەو بڕیارە نوسەر دەڵێت: لەهەفتەی كۆتایی تشرینی دووەمی (1984)دا، كۆبونەوەیەك بۆ تاوتوێكردنی خولەكانی دانوستان‌و گفتوگۆی نێوان یەكێتی‌و حكومەت سازكرا، لەو كۆبونەوەیەدا هەندێك لە ئەندامانی سەركردایەتی كەوتنە جۆرێك لە مزایەدەی كرچ‌و كاڵ‌و دەست بەرزكردنەوە بۆ بڕیاری كۆتایهێنان بە دانوستان‌و بگرە (بەڵێ‌)یان بۆ بڕیاری هەڵگیرسانەوەی شەڕیش كرد. بەداخەوە لەدوایشدا كە شەڕ هەڵگیرسایەوە، زۆر لەوانە لە یەكێتی دوركەوتنەوەو ئەركی شەڕی نابەرابەری (یەكێتی)یان لەدژی عێراق، بەسەر ئێمەدا بەجێهێشت.

 
هەر لەهەمان ساڵدا ئاڵای شۆڕش بە سەركردایەتی مەلا بەختیار رادەگەیەنرێت، بەڵام سەركردەكانی ئەو رە‌وتە زیندانی دەكرێن، لەبارەی ئەو رەفتارەی سەركردایەتی یەكێتیەوە، فەرەیدون عەبدولقادر دەڵێت: كاری سیاسی‌و مرۆڤدۆستانە وابوو، دەبوو ئێمە خۆمان هێزەكانی پێشمەرگەمان وریا بكردایە بۆ پاراستنی ئاسایشی هێزەكەمان‌و هاوكات سەركردەكانی ئەوانیشمان بەنامەو نێردراو جارێكی تر لەو هێڵە سورە هۆشیارو ئاگادار بكردایەتەوە، نەك كتوپڕ هەڵكوتینە سەریان‌و دەسگیرو زیندانیان بكەین. لەكاتی ناچاریشدا ئەگەر گرتنیان پێویستیەكی گرنگی ئاسایشی شۆڕش‌و یەكێتی بوایە، دەبوو بەڕێزەوە رەفتاریان لەگەڵ بكرێ‌‌و هەر كارێكی نادروستیش گەر بگیرایەتە بەر تەنها بۆ گوشار بەكاربهێنرایە‌و لەو سنورە تێپەڕی نەكردایە.

 

 
هەڵەی قەواعیدو ناحەكیمی سەركردە

 
لە دەیەی هەشتاكاندا یەكێتی زنجیرەیەك شەڕ لەگەڵ هێزەكانی دیكەدا دەكات، نوسەر یەكێتی بەبێ‌ خەتا نازانێت، بەڵكو لەوبارەیەوە دەڵێت: دیارە یەكێتی بێ‌ خەتاو هەڵە نەبووە، لە ناوچەكانی هەولێرو سلێمانی‌و گەرمیان حەزی بە پەرەسەندنی هێزەكانی تر نەبوو. بۆیە سەركردایەتی یەكێتی نەیتوانی سەركەوتوبێت لە خاوكردنەوەی لایەنەكانی ترداو نەیتوانی بۆ هاوكاری‌و برایەتی رایانكێشێ‌.

 
بەبڕوای نوسەر هۆكارێكی دیكەی شەڕەكان، ناحەكیمی سەركردایەتی‌و هەندێكجاریش فەرماندەو بەرپرسەكانی خوارەوە بوون، لەوبارەیەوە دەڵێت: زۆرجار لە ئاستەكانی خوارەوەو لە ناوچە دورە دەستەكانی سەركردایەتی، هەڵەی فەرماندەكانی خوارەوە، سەركردایەتی یەكێتی بۆ دۆخێكی ئاڵۆزو شەڕاوی كێش دەكرد. لام وایە ئێمەی سەركردایەتی ئەگەر هێمنترو داناترو دوربینتر بوینایە، دەمانتوانی بە حیكمەتێكی زۆرترەوە بەر بەو پەلكێش كردنانە بگرین، كە بە زۆر رایاندەكێشاین بۆ شەڕو ململانێ‌.

 

 

 
كۆسرەت رەسوڵ دژی هێنانی پاسدار بوو

 
یەكێك لە روداوە دیارەكانی ساڵی (1988)، پەلاماردانی بیرە نەوتەكانی كەركوكە لەلایەن هێزەكانی ئێران‌و یەكێتیەوە، نوسەر بیرۆكەی هێنانی هێزەكە دەگێڕێتەوە بۆ نەوشیروان مستەفاو دەڵێت: ساڵی (1988) لە یەكێك لە سەردانەكانی بەغدا كە كاك نەوشیروان سەرۆكایەتی وەفدەی دانوستانی یەكێتی دەكرد، دانیشتنەكان زۆر سەخت‌و ناخۆش بوو، بۆیە كاك نەوشیروان زۆر توڕە بوو، كاتێ‌ گەڕاینەوە بۆ میوانخانەكە، بەناڕەحەتیەوە روی تێكردم‌و وتی: شەرتبێ‌ پاسداریان بۆ بێنمە دەشتی كەركوك‌و كارێكیان پێ‌ بكەم تاڵی بكەم بە گەرویاندا. وتم كاكەگیان ئاگاداربە لەم شوێنەدا هەموو قسەكانمان تۆماردەكرێت هیچ نەبێ‌ با بچینە باخچەكەوە لەوێ‌ ئەو قسانە بكە، لە باخچەكەدا وتی: من دەزانم قسەكانمان تۆماردەكرێ‌‌و دەبیسترێ‌، بە ئەنقەستیش بەو جۆرەو لەو شوێنەدا وا قسەم كرد، تا گوێیان لێی بێت.

 

 

کۆسرەت ڕەسوڵ عەلی، جێگری یەکەمی سکرتێری گشتی یەکێتی 

 
نوسەر رایدەگەیەنێت كۆسرەت رەسوڵ دژی ئەو بیرۆكەیە بووە، وردەكاری ئەو باسەش بەم جۆرە دەگێڕێتەوە: كە باسی لێدانی بیرە نەوتەكانی كەركوك كرا، رۆژێكیان لە ماڵی ئێمە كۆبونەوەیەكی مەكتەبی سیاسی كرا، كاك كۆسرەت ناڕازی بوو، پێی باش نەبوو، چونكە پێیوابوو ئەوە كێشمان دەكات بۆ باریكە رێی پێچاوپێچی وا كە ناتوانین بزانین كاردانەوەی سەدام حسێن چۆن‌و چەند دەبێت‌و بەكوێ‌ دەگات، مشتومڕەكان گەرم‌و توند بوون، كۆسرەت زویر بوو چوە دەرەوە، ناچار شوێنی كەوتم‌و بەزۆر رازیم كرد بگەڕێتەوە بۆ ناو كۆبونەوەكە.

 

author photo

ڕۆژنامەنوس 

بەکالۆریۆس لە ڕاگەیاندن