ئایا كاندیدكردنی سه‌ركرده‌ی حزبه‌كان په‌رله‌مان به‌هێز ده‌كات؟

ئایا كاندیدكردنی سه‌ركرده‌ی حزبه‌كان په‌رله‌مان به‌هێز ده‌كات؟

798 خوێندراوەتەوە

ئه‌م پرسیاره‌ بریتییه‌ له‌ گریمانه‌یه‌ك كه‌ كۆده‌نگییه‌كی حاشاهه‌ڵنه‌گری له‌ سه‌ره‌، به‌ شێوه‌یه‌ك هه‌موومان پێمانوایه‌ به‌ هێنانه‌ پێشه‌وه‌ی سه‌ركرده‌كان بۆ په‌رله‌مان، ده‌ستگاكه‌ به‌هێز ده‌بێت.

 
ئه‌م گریمانه‌یه‌ له‌ سه‌ر ئه‌و بیرۆكه‌یه‌ هه‌ڵچێنراوه‌ كه‌ هاتنی سه‌ركرده‌كان بۆ په‌رله‌مان له‌گه‌ڵ خۆیاندا ده‌سه‌ڵات و سه‌رمایه‌ی ڕه‌مزی خۆیان بۆ ده‌ستگاكه‌ ده‌گوازنه‌وه‌و به‌مه‌ش ده‌ستگاكه‌ قورسایی له‌ سه‌ر گه‌مه‌ سیاسیه‌كه‌ زیاتر ده‌بێت. ئه‌م گریمانه‌یه‌ له‌ ئه‌ده‌بیاتی زانسته‌ سیاسیه‌كانشدا ئاماده‌یه، هه‌ندێ لێكۆڵه‌وه‌ر ئه‌وه‌ ده‌رده‌خه‌ن كه‌ چۆن تا ساڵانی شه‌ست و حه‌فتاكانی سه‌ده‌ی رابردوو‌ پارتی كۆمۆنیست له‌ فه‌ره‌نساو ئیتالیا زۆرجار كادیرانی ئۆرگانه‌كانی خواره‌وه‌و ناوه‌ندی ده‌نارده‌ په‌رله‌مان نه‌ك سه‌ركرده‌كانی، ئه‌مه‌ش بۆ دوو ئامانج:


یه‌كه‌م، بۆ ئه‌وه‌ی حزب بتوانێت له‌ په‌رله‌مان ئه‌ندامه‌كانی كۆنترۆڵ بكات و ملكه‌چی دیسیپلینی حزبی و ڕێنمایه‌كانی بكات، چونكه‌ چه‌ند ئه‌ندام په‌رله‌مان سه‌رمایه‌ی حزبی كه‌متر بێت، ئه‌وه‌نده‌ زیاتر ملكه‌چی سه‌رووی خۆی ده‌بێت. ئامانجی دووه‌میش بریتییه‌ له‌ به‌هێزكردنی قورسایی ره‌مزی پۆستی حزبی به‌ سه‌ر پۆستی په‌رله‌مانتاری، چونكه‌ له‌و كاته‌ی گه‌ر پۆستی په‌رله‌مانتاری و حكومی له‌ رووی ره‌مزییه‌وه‌ ببێته‌ جێی چاوتێبڕین، له‌ لایه‌ك‌ ده‌بێته‌ هه‌ڵگیرسانی ململانێ له‌ نێوان سه‌ركرده‌كان بۆ به‌ده‌ستهێنانی پۆسته‌ په‌رله‌مانی و حكومیه‌كان و بێنرخبوونی پۆستی حزبی، له‌ لایه‌كی دیش وه‌لائی ده‌وڵه‌ت به‌ سه‌ر وه‌لائی حزبیدا زاڵ ده‌بێت و به‌مه‌ش حزب له‌ ئه‌گه‌ری پوكانه‌وه‌ی له‌ به‌رده‌م ده‌وڵه‌تدا به‌ دوور نابێت.

،،

هاتنی سه‌ركرده‌كان بۆ په‌رله‌مان له‌گه‌ڵ خۆیاندا ده‌سه‌ڵات و سه‌رمایه‌ی ڕه‌مزی خۆیان بۆ ده‌ستگاكه‌ ده‌گوازنه‌وه‌و به‌مه‌ش ده‌ستگاكه‌ قورسایی له‌ سه‌ر گه‌مه‌ سیاسیه‌كه‌ زیاتر ده‌بێت

 

 له‌م گۆشه‌نیگایه‌وه‌، ئایا به‌رده‌وامبوون له‌ سه‌ر ئه‌م گریمانه‌یه‌ له‌ كۆنتێكستی ئێستای جیهاندا كه‌ ئاشنایه‌ به‌ هه‌ڵكشانی ده‌سه‌ڵاتی ته‌نفیزی چه‌ند راسته‌‌؟ پاشان، ئایا له‌ كوردستان به‌ هێنانه‌ پێشه‌وه‌ی سه‌ركرده‌كان بۆ په‌رله‌مان، ئه‌م ده‌ستگایه‌ به‌هێز ده‌بێت؟ ئه‌م بابه‌ته‌ هه‌ولێكه‌ بۆ وڵامدانه‌وه‌ی ئه‌م دوو پرسیاره‌، به‌و هیوایه‌ی ببێته‌ سه‌ره‌تای گفوگۆیه‌كی جدی له‌ مه‌ڕ‌ یه‌كێك له‌ پرسه‌ هه‌ره‌ جه‌وهه‌ری و بنه‌ماییه‌كانی دونیای ئێمه‌ كه‌ ئه‌ویش پرسی په‌یوه‌ندی نێوان حزب و ده‌وڵه‌ته‌.

 

تەلاری پەرلەمانی هەرێمی کوردستان_عێراق

په‌رله‌مان و ده‌سه‌ڵاتی ته‌نفیزی

په‌رله‌مان له‌ ئه‌مریكا و ئه‌وروپا هێشتا جێی سه‌ركرده‌كانی حزبه‌، كه‌ هه‌میشه‌ له‌ هه‌وڵ و هه‌ڵپه‌ی پاراستی كورسییه‌ په‌رله‌مانتارییه‌كانیانن. وه‌لێ، بوونی سه‌ركرده‌كان له‌ په‌رله‌مان ڕێی له‌ غلۆربونه‌وه‌ی هه‌یمه‌نه‌و كه‌مبونه‌وه‌ی قورسایی ده‌ستگاكه‌ له‌ سه‌ر گه‌مه‌ی‌ سیاسی و كایه‌ی ده‌سه‌ڵاتی ته‌نفیزی نه‌گرتووه‌.

شیاوی باسه‌، په‌رله‌مان له‌ نیوه‌ی دووه‌می سه‌ده‌ی بیسته‌وه‌ هێدی هێدی ده‌سه‌ڵاتی كۆنترۆڵكردن‌و موباده‌ره‌ی یاسادانانی كه‌مده‌بێته‌وه‌ له‌ به‌رده‌م هه‌ژموونی ده‌سه‌ڵاتی ته‌نفیزی. هه‌لومه‌رجی دوای شه‌ڕی دووه‌می جیهانی دۆخێكی له‌بار بۆ به‌هێزبوون و هه‌ڵكشانی ده‌سه‌ڵاتی ته‌نفیزی ده‌خقوڵقێنێت چونكه‌ نشونمای ئابوری و دروستكردنه‌وه‌و بونیادنانه‌وه‌ی ئه‌وروپا ده‌بنه‌ دوو پێداویستی حه‌تمی. ئه‌مه‌ جگه‌ له‌وه‌ی، هه‌ر له‌م هه‌لومه‌رجه‌دا ده‌وڵه‌تی خه‌مخۆر (Etat providence) له‌ دایكده‌بێت. به‌ كورتی، دۆخی دوای شه‌ڕی دووه‌می جیهانی ژینگه‌یه‌كی مانا و رژێمێكی بیانووسازی كاریگه‌ر بۆ به‌هێزبوونی ده‌سه‌ڵاتی ته‌نفیزی دێنێته‌وه‌ كایه‌وه‌ چونكه‌ دواجار ئه‌م ژینگه‌یه‌ بیرۆكه‌ی <ده‌سه‌ڵاتێكی ته‌نفیزی به‌هێز> وه‌ك‌ مه‌رجی بنه‌ڕه‌تی هه‌ڵسانه‌وه‌ی ئابوری و به‌هێزبوونه‌وه‌ی خۆرئاوا له‌ لای ڕای گشتی دروست ده‌كات..

ئه‌ده‌بیاتی زانسته‌ مرۆییه‌كان به‌ تایبه‌تی ئابوری و به‌شێك له‌ زانسته‌ سیاسیه‌كان ده‌بنه‌ مه‌كینه‌ی شه‌رعیه‌تدان و بیانووهێنانه‌وه‌ بۆ به‌هێزبوون و هه‌ژموونی ده‌سه‌ڵاتی ته‌نفیزی و هه‌ر هه‌مان ئه‌ده‌بیاتش رۆڵێكی گرنگ له‌ دێواندنی په‌رله‌مان و كاری په‌رله‌مانی ده‌گێڕێت به‌ شێوه‌یه‌ك په‌رله‌مان له‌ زه‌ینی گشتدا ده‌كه‌نه‌‌ شوێنی <هه‌ڵه‌وه‌ڕی>، <چه‌قه‌چه‌ق>، یان شوێنی ده‌مه‌ته‌قێ. له‌ به‌رامبه‌ر ئه‌مه‌شدا، ده‌سه‌ڵاتی ته‌نفیزی به‌ شوێنی كار، چالاكی، هێز، قودره‌ت، تد وێناده‌كه‌ن.

،،

دۆخی دوای شه‌ڕی دووه‌می جیهانی ژینگه‌یه‌كی مانا و رژێمێكی بیانووسازی كاریگه‌ر بۆ به‌هێزبوونی ده‌سه‌ڵاتی ته‌نفیزی دێنێته‌وه‌ كایه‌وه‌ چونكه‌ دواجار ئه‌م ژینگه‌یه‌ بیرۆكه‌ی <ده‌سه‌ڵاتێكی ته‌نفیزی به‌هێز> وه‌ك‌ مه‌رجی بنه‌ڕه‌تی هه‌ڵسانه‌وه‌ی ئابوری و به‌هێزبوونه‌وه‌ی خۆرئاوا له‌ لای ڕای گشتی دروست ده‌كات..

نمونه‌ی په‌رله‌مانی فه‌ره‌نسا گرنگترین نمونه‌یه‌كه‌ كه‌ ده‌شێت لێره‌دا ئاماژه‌ی پێبكه‌ین. په‌رله‌مانی فه‌ره‌نسی پێش كۆماری پێنجه‌م، واته‌ پێش ١٩٥٨ به‌هێزترین و باڵاترین ده‌ستگابوو. به‌ شێوه‌یه‌ك په‌رله‌مانتاران له‌ هه‌موو كاتێكدا ده‌یانتوانی حكومه‌ت هه‌ڵبوه‌شێننه‌وه‌. بۆ نمونه‌، له‌ نێوان ١٨٧١ تا ١٩٤٠، واته‌ له‌ ماوه‌ی كۆماری سێیه‌مدا، ١٠٤ حكومه‌ت پێكهێنراوه‌و كه‌م كابینه‌ له‌ ساڵێك زیاتر توانیوێتی به‌رده‌وام بێت. هاوكات له‌ كۆماری چواره‌مشدا، واته‌ له‌ ١٩٤٠ بۆ ١٩٥٨ رێژه‌ی كابینه‌‌كان ده‌گاته‌ ٢٤. وه‌لێ، له‌ دوای ئه‌م مێژوه‌وه‌ په‌رله‌مان ته‌واو جڵه‌وده‌كرێت به‌ ناوی عه‌قڵانیكردنه‌وه‌و زۆرترین ده‌سه‌ڵات و توانای موباده‌ره‌ی ده‌ستگایی لێده‌سننه‌وه به‌ قازانجی ده‌سه‌ڵاتی ته‌نفیزی‌.

بۆ نمونه‌، تا ساڵی ٢٠٠٨ده‌سه‌ڵاتی ته‌نفیزی به‌ ته‌نها كارنامه‌ی په‌رله‌مان دیاریده‌كات، واته‌ تا ئه‌م به‌رواره‌ حكومه‌ت بڕیار له‌وه‌ده‌دا كه‌ دانیشته‌كانی په‌رله‌مان له‌ سه‌ر چ بابه‌ت و مژارێك بن. دواهه‌مین لێكۆڵینه‌وه‌ له‌ سه‌ر په‌رله‌مانی فه‌ره‌نسا به‌روونی بوومان ده‌رده‌خات كه‌ له‌ ٩٩% یاسا ده‌رچوو و په‌سه‌ندكراوه‌كانی په‌رله‌مان پرۆژه‌ی‌ یاسایین، واته‌ له‌ موباده‌ری حكومه‌تن و ته‌نها له‌ ١% یان پێشنیاری یاسایین، واته‌ له‌ موباده‌ری په‌رله‌مانتاران خۆیانن.

بۆیه‌ به‌ گشتی، ده‌توانین بڵێین گریمانه‌ی <په‌یوه‌ندی نێوان بوونی سه‌ركرده‌كان له‌ په‌رله‌مان و كارایی ده‌ستگاكه‌> گریمانه‌یه‌كی له‌رزۆكه‌و ئه‌گه‌ری سه‌لماندنی دروستێتی له‌ حاڵیحازردا زۆركه‌مه‌.

کاتی دەنگدانی ئەندامانی پەرلەمانی کوردستان لەسەر پڕۆژە یاسایەک ، خولی چوارەم

سه‌ركرده‌ی حزبه‌كان و په‌رله‌مان له‌ كوردستان

له زۆرێك له‌ گفتوگۆكانم و زۆرجاش له‌ میدیا ده‌بیستم و ده‌بینم كه‌ زۆرینه‌ی زۆر جه‌خت له‌وه‌ ده‌كه‌نه‌وه‌ كه‌ به‌ هاتنی سه‌ركرده‌كان بۆ په‌رله‌مان، ده‌ستگاكه‌ ده‌بێته‌ خودان هه‌یبه‌ت و كاریگه‌ری له‌ سه‌ر ده‌سه‌ڵاتی ته‌نفیزی زۆرتر ده‌بێت. زۆرینه‌ی ئه‌مان ئه‌وه‌یان له‌ یاد ده‌چێت كه‌ له‌ خولی یه‌كه‌می په‌رله‌مان (١٩٩٢) نزیكه‌ی ٣٠ ئه‌ندامی مه‌كته‌بی سیاسی و سه‌ركردایه‌تی هه‌ردوو حزب له‌ په‌رله‌مان بوون. وه‌لێ، هیچ یاسایه‌ك له‌م خوله‌دا په‌سه‌ند نه‌ده‌كرا گه‌ر بێتوو پێشووتر مه‌كته‌بی سیاسی هه‌ردوو حزب له‌سه‌ری كۆك نه‌بوونایه‌. په‌رله‌مان هیچ ده‌سه‌ڵاتێكی چاودێری به‌ سه‌ر حكومه‌تدانه‌بوو. به‌ پێچه‌وانه‌وه‌، حكومه‌ت خودی خۆی چاودێری خۆی ده‌كرد: جێگر وه‌زیر ده‌بووه‌ چاودێری وه‌زیر. خوێنه‌ری ئه‌م بابه‌ته‌ داوه‌ت ده‌كه‌م به‌ گرنگیدان و خوێندنه‌وه‌ی <پرۆتۆكۆله‌كانی په‌رله‌مان> كه‌ به‌ رای من باشترین‌و گرنگترین سه‌رچاوی مێژووین بۆ تێگه‌شتن له‌ په‌رله‌مان.

به‌ خوێندنه‌وه‌یان ده‌بینن كه‌ زۆرجار خودی په‌رله‌مانتاران دژی خستنه‌ ده‌نگدانه‌وه‌ی فڵانه‌ ده‌ق و فڵانه‌ ده‌قن، چونكه‌ پێیانوایه‌ ده‌بێت ئه‌مانه‌ له‌ مه‌كته‌بی سیاسی هه‌ردوو حزب پێشتر كۆده‌نگیان له‌ سه‌ر دروست بكرێت. نمونه‌كان بێشومارن، وه‌لێ من ته‌نها ئاماژه‌ به‌ یه‌ك نمونه‌ ده‌كه‌م كه‌ له‌ خودی خۆیدا زۆرمانادارو مه‌غزاداره‌. له‌ ساڵی ١٩٩٢ كۆی په‌رله‌مانتاران كۆكن له‌ سه‌ر دروستكردنی لیژنه‌یه‌ك بۆ ژنان، وه‌لێ رێكنه‌كه‌وتنی هه‌ردوو فراكسیۆن له‌ سه‌ری ناوی لیژنه‌كه‌ ڕێگه‌ له‌ دروستكردنی ده‌گه‌یه‌نێت. یه‌كێتییه‌كان ده‌یانه‌وێت ناوی بنێن <لیژنه‌ی ژنان>، پارتیه‌كانش < لیژنه‌ی ئافره‌تان>، گفتوگۆكه‌ زۆر ده‌كێشێت تا ئه‌و شوێنه‌ی شێركۆ بێكه‌س پێشنیاری <لیژنه‌ی خانمان>ده‌كات، فوئاد مه‌عسومش <لیژنه‌ی سه‌یدات>. بۆیه‌ ئه‌م لیژنه‌یه‌ ته‌نها دوای ١٣ ساڵ، واته‌ له‌ ٢٠٠٥، توانی بێته‌كایه‌وه‌.

،،

پارتی و یه‌كێتی له‌ ساڵی ١٩٩٢ه‌وه‌ به‌ شێوه‌‌یه‌كی سیسته‌ماتیكی ڕێگه‌یان له‌وه‌گرتووه‌ كه‌ ده‌ستگاكان ببنه‌ شوێنی ده‌سه‌ڵات و هه‌یمه‌نه‌ له‌ ترسی ئه‌وه‌ی وه‌لائی ئه‌ندامانی حزب به‌ره‌و ده‌ستگاكان بچن.

دیمەنێک لە بانگەشەی هەڵبژاردن لە شاری سلێمانی

نمونه‌ی خولی یه‌كه‌می (١٩٩٢) په‌رله‌مان گریمانه‌ی په‌یوه‌ندی هاتنی سه‌ركرده‌كان بۆ په‌رله‌مان و به‌هێزبوونی ده‌ستگاكه‌ به‌تاڵ ده‌كاته‌وه‌. سه‌ره‌ڕای ئه‌مه‌، هه‌ندێك له‌وانه‌یه‌ پێییان وابێت دواجار مه‌به‌ست له‌ سه‌ركرده‌كان كه‌سه‌ ده‌ستباڵاكانی هه‌ردوو حزبن، یان كه‌سانی بنه‌ماڵه‌كان. به‌ش به‌ حاڵی خۆم، هاتنه‌پێشه‌وه‌ی ئه‌مانش له‌ زه‌مینه‌سازی كارابوونی ده‌ستگاكه به‌ دوور ده‌زانم‌. چونكه‌ پارتی و یه‌كێتی له‌ ساڵی ١٩٩٢ه‌وه‌ به‌ شێوه‌‌یه‌كی سیسته‌ماتیكی ڕێگه‌یان له‌وه‌گرتووه‌ كه‌ ده‌ستگاكان ببنه‌ شوێنی ده‌سه‌ڵات و هه‌یمه‌نه‌ له‌ ترسی ئه‌وه‌ی وه‌لائی ئه‌ندامانی حزب به‌ره‌و ده‌ستگاكان بچن.

به‌ مانایه‌كی دی، نه‌یانهێشتووه‌ وه‌لائی ده‌وڵه‌ت به‌ سه‌ر وه‌لائی حزبدا ده‌ستباڵابێت. هه‌رچه‌ند ئه‌مه‌ش‌ هۆكار یه‌كه‌م و سه‌ره‌كی نییه‌ بۆ شرۆڤه‌كردنی لاتی و دۆخی په‌راوێزی ده‌ستگاكان. به‌تاڵكردنه‌وه‌ی ده‌ستگاكان له‌ مانا و ده‌سه‌ڵات په‌یوه‌ندیه‌كی په‌نهانه‌ی به‌ دیارده‌یه‌كی دییه‌وه‌ هه‌یه‌ كه‌ ئه‌ویش بریتیه‌ له‌و شته‌ی گه‌وره‌ كۆمه‌ڵناسی ئه‌ڵمانی نۆربێرت ئلیاس، كه‌ یه‌كێكه‌ له‌ گه‌وره‌ترین توێرسیانه‌كانی ده‌وڵه‌ت، ناوی ده‌نێت <یاسای مۆنۆپۆڵ>. پارتی و یه‌كێتی له‌ ساڵی ١٩٩٢ه‌وه‌ یاسایه‌ك بزوێنه‌ری كار، چالاكی و به‌ریه‌ككه‌وتنی رۆژانه‌یانه‌ كه‌ ئه‌ویش بریتیه‌ له‌وه‌ی یه‌كێكیان ئه‌وی دییان بسڕێته‌وه‌ و مۆنۆپۆڵی هه‌موو هه‌رێمه‌كه‌ له‌ ده‌ستبگرێت.

شه‌ڕی ناوخۆی ساڵانی نه‌وه‌ده‌كان درێژكراوه‌ی ناكۆكی ١٩٦٤، مه‌لای و جه‌لالی، نه‌قشه‌به‌ندی و قادری، یان شه‌ڕ بۆ دابه‌شكردنی داهاتی گومرگی ئیبراهیم خه‌لیل نه‌بوو وه‌ك ئه‌وه‌ی زۆرێك له‌ لێكۆڵه‌وه‌ره‌كانمان ئاماژه‌یان پێداوه‌، به‌ڵكو شه‌ڕبوو بۆ گه‌شتن به‌ دۆخی مۆنۆپۆڵ. من پێموایه‌ تا ئێستاش ئه‌م دوو حزبه‌ به‌ هه‌مان خه‌یاڵ و وه‌همه‌وه‌ سیاسه‌ت ده‌كه‌ن و چاویان له‌ سڕینه‌وه‌ی یه‌كتره‌. جا له‌ دۆخی شه‌ڕ بۆ مۆنۆپۆڵ، پارتی و یه‌كێتی به به‌‌رده‌وای هه‌وڵی كۆنترڵكردنی سه‌رچاوه‌ و سه‌رمایه‌كانیان له‌ ده‌ره‌وه‌ی ده‌ستگاكان داوه‌ و ده‌ستگاكانیان لێبێبه‌شكردووه‌.

بۆ نمونه‌، ده‌ستگاكانی ئێمه‌ نه‌ خودان مۆنۆپۆڵی سه‌ربازین، نه‌ خودان مۆنۆپۆڵی ئابوری، له‌ كاتێكدا هه‌ردووكیان مه‌رج و بنه‌مای دروستبوونی ده‌ستگا و ده‌وڵه‌تن. ئه‌وانه‌ی ئاشنای توێره‌كانی ده‌وڵه‌ت بن ده‌زانن ده‌وڵه‌ت، وه‌ك ئلیاس ده‌ڵێت، دواجار هیچ نییه‌ جگه‌ له‌م دوو مۆنۆپۆڵه‌. به‌ڵام، له‌ هه‌رێمی كوردستان هه‌ردوو مۆنۆپۆڵ له‌ ده‌ستی حزبدان و ده‌ستگاكان لێبێبه‌شن.

،،

بۆ نمونه‌، ده‌ستگاكانی ئێمه‌ نه‌ خودان مۆنۆپۆڵی سه‌ربازین، نه‌ خودان مۆنۆپۆڵی ئابوری، له‌ كاتێكدا هه‌ردووكیان مه‌رج و بنه‌مای دروستبوونی ده‌ستگا و ده‌وڵه‌تن. ئه‌وانه‌ی ئاشنای توێره‌كانی ده‌وڵه‌ت بن ده‌زانن ده‌وڵه‌ت، وه‌ك ئلیاس ده‌ڵێت، دواجار هیچ نییه‌ جگه‌ له‌م دوو مۆنۆپۆڵه‌. به‌ڵام، له‌ هه‌رێمی كوردستان هه‌ردوو مۆنۆپۆڵ له‌ ده‌ستی حزبدان

مه‌به‌ستمه‌ بڵێم، پارتی و یه‌كێتی هیچ مه‌یل و نیازی به‌هێزكردنی ده‌ستگاكانیان نییه‌. به‌ مانایه‌كی دی، هه‌وڵی كۆنترۆڵكردنی هه‌موو ئه‌و سه‌رچاوانه‌ی دۆخی كارایی ده‌ستگاكان ده‌توانن بسازێنن داوه‌.

له‌ كۆتایدا، كارایی په‌رله‌مان له‌ سه‌ر هاتنی سه‌ركرده‌كان نه‌وه‌ستاوه‌، به‌ڵكو په‌یوه‌ندی به‌ كۆمه‌ڵێ میكانزمی دییه‌وه‌ هه‌یه‌، وه‌ك ئازادی په‌رله‌مانتار له‌ به‌رامبه‌ری دسپلینی حزب و ڕێنماییه‌كانی، پیشه‌مه‌ندی په‌رله‌مانتار و ئاشنابوون به‌ وه‌زیفه‌كه‌ی، به‌ ‌ده‌ستگاییبوونی په‌رله‌مان، تد. كه‌ له‌ درێژه‌ی ئه‌م بابه‌ته‌ و داهاتوودا به‌ تێروته‌سه‌لی له‌ سه‌ریان ڕاده‌وه‌ستم.

 

author photo

دكتۆرا له‌ زانسته‌ سیاسیه‌كان

مامۆستای زانكۆی پاریس- دۆفین