فەلسەفەو وەزیفەی حزب بۆ ڕێکخستنی کاروباری کۆمەڵگەیە لە فۆرمێکی ئیداری و سیاسیدا. فرە حزبی بۆ دەستاودەستکردنی دەسەڵات و، ڕێگە گرتنە لە زاڵبوونی تاک حزبی و مەیلی دیکتاتۆرانە، بۆ قۆرخکردنی ژیان و ئازادی خەڵک. 
کۆمەڵگەی کوردی بە ناسروشتی قۆناغەکانی ژیانی بڕیووە و، هەر ئەمەش کاریگەری لەسەر زیهنی سیاسی و کۆمەڵایەتی هەیە لە هەموو کایەکاندا. لە دەیەی شەستی سەدەی رابردوو، کە ترازان رویدا،  چیدی ئاوی ترازان رژا و هەر هێزەو ئەوی دیکە بە لادەرو و خائین ناوزەد دەکات، بەڵام کێشەکە لەوەدایە ئەم هێزانە نەیانتوانیووە ئەو ڕەخنانەی هەیان بووە لە هێزەکانی پێش خۆیان دووبارەی نەکەنەوە، بگرە لە هەندێ قۆناغدا خراپتریان کردووە. لانیکەم نەیانتوانیووە نمونەیەک نیشاندەن، کە رای گشتیی بسەلمێنن، کە فرە حزبی فرەگەرایی ئەگەر لە پێناوی چاکەی گشتیدا بێت، جێگای خۆی دەگرێت. بۆ نمونە ئۆپۆزسیۆن دەبوو لە ڕێگای شەقامەوە گوشار دروستبکەن، کە هێزی پێشمەرگە ببێتە یەک هێز یاخود ئاسەواری دوو ئیدارەیی نەهێڵن، بەڵام بچووک یارییان کرد و داواکانیان کورت کرایەوە لە وەرگرتنی میزانیەو پێدانی چەند پۆستێکی ناو حکومەت. 

ئەم داواکاریانەی ئۆپۆزسیۆنەکان وایکرد، کە ڕای گشتی باوەڕی بە ئۆپۆزسیۆن بوون نەمێنێت. ئەمەش بۆ دوو خاڵی گرنگ دەگەڕێتەوە:
١- لاوازی و پوختە نەبوونی هێزی بیرکردنەوەی ئۆپۆزسیۆن.
 ٢- قەیرانی سەرکردایەتی ئۆپۆزسیۆن.
 دواجار دەبێت ئەوە بزانین، تا نەبینە خاوەن ئۆپۆزسیۆنێکی مەدەنی بەهێزو دەسەڵاتێکی کارا، بۆ ئیدارەدانی گەمەی دیموکراتی و دەستاودەست کردنی دەسەڵات وخزمەتکرنی نیشتمان و هاونیشتمانیان، ئەوا بەردەوام لە خلیسکاندا دەبین هەتا سەرمان لەبەردەکە دەدات، سەرەڕای باوەڕی تەواوم بەفرەیی و دەستاو دەستکردنی دەسەڵات لەڕێگای هەڵبژاردنەوە، بەڵام ئەم جۆرو مۆدێلە لە فرە حزبی لە کوردستان ناتەندروستە ئاخر ناکرێ هەر ماڵێک و گرۆ و دەستەیەک بەبێ باکگراوندێکی فیکری و سیاسی و جەماوەری بڕوات بۆ خۆی حزبێک دروست کات تەنها لەپێناوی ناوبانگ ودەسکەوتدا بێ هیچ بیرکردنەوەیەک لە چاکەی گشتی جگە لەوە ئەم مۆدێلە لە فرە حزبی گورزی کوشندە لە یەکڕیزی و تەبایی دەوەشێنێت و بەردەوام دنیای کوردی پەرتەوازە دەکات و شتی دیکەشجگەلەوە هەربۆخۆی حیزب لەم وڵاتەی ئێمەدا وەزیفەی حیزب جێ بەجێ ناکات بەڵک و بەشتی دیکەی عەنتیکەوەخەریکە ، بۆیە ئەم مۆدێلەی فرە حزبی و حیزبایەتی لە کوردستان هەڕەشەیە نەک دەرفەت.