فرە حزبی فاکتەرێکی گرنگی ناو پرۆسەی دیموکراتیە بۆ ئەوەی لە ڕێگای هەڵبژاردنەوە دوور لە توندوتیژی هێزەکان پێشبڕکێ بکەن بۆ ئەوەی دەستاو دەستکردنی دەسەڵات ئەنجام بدرێت، بەڵام وەک دەڵێن خوێش بەمانا ئەو جۆرە لە فرە حزبی لە عيراق و کوردستان حاڵەتێکی سروشتی نیە! هەر گەڕەکێک و حزبێکی بەردەکەوێت. هەڵتۆقینی ئەو هەموو حزبە لە عێراق و لە کوردستان، کە لەدوای ڕووخانی بەعس دروستبوو، تا ئێستاش حزبی نوێ دروست دەبێت. دۆخێکی سروشتی دوای ڕوخانی دەسەڵاتە ستەمکارەکانە، بەڵام بۆ ماوەیەک نەک بەردەوام حزبی نوێ دروستببێت، چونکە بۆ ئاشتی کۆمەڵایەتی و داهاتی گشتی و …… زیانی هەیە، ئەمە هەر لە عێراق و کوردستان نەبووە لە جێگای دیکەش بە ڕێژەیەکی زۆر حزب دروستبووە، بۆ نمونە دوای ڕووخان و کەوتنی ژەنەراڵ فرانکۆ لە ئیسپانیا نزیکی پێنج هەزار گروپ و دەستەو حزبی سیاسی دروستبوون، بەڵام بە تێپەڕبوونی کات و دوای چوونە هەڵبژاردنێک ئەم ژمارەیە تەواو کەم بویەوەو هەندێکی هەڵوەشەیایەوەو هەندێکی چونە ناو حزبی دیکە، بەڵام لە عێراق و کوردستان دوای چەند هەڵبژاردن لەبری کەم بوونەوە حزبی نوێ دروست دەبێت.

لە ڕاستیدا ئێستاش بەپێی ڕێژەی دانیشتوان بێت ئەو هەموو حزب و لیستە لە کوردستان حاڵەتێکی ناسروشتیە، چونکە چارەکە سەدەیەکە ئێمە مومارەسەی دیموکراتی و فرە حیزبی دەکەین هەڵەیە، کە تا ئێستا بە شێوەیەکی زانستی  لە مانای فرە حزبی تێنەگەشتبین، پێشم وایە زۆربەی زۆریان بەشی یەک کورسی تا دوو کورسی دەنگ ناهێنن بۆ خۆشیان دەزانن، بەڵام ئیتر بەجۆرێک لە دوکانی سیاسی و دروستکردنی ناوبانگی باڵۆنی ئەم حزبانە دروستدەبن، بۆیە بەدڵنیاییەوە ئەگەر یاسای ئەحزاب بە تەواوی ڕێکخرێت ئەم حزبانە توانای بەردەوامیان نیە، ئەگەر حزبێک ئێستا دڵنیا بێت لەوەی کە دەنگی پێویست ناهێنێ ئەقڵانیەت ئەوەیە بەشدار نەبێت لە هەڵبژاردن و ئەگەر خاوەنی مەنهەجێکی دروستە کاربکات بۆ هەڵبژاردنێکی دیکە، ئەگەر حزبێک توانای بردنەوەی یەک کورسی نەبێت لە ئاستی کوردستان، باشتر وایە یان خۆی هەڵوەشێنێتەوە یاخود بڕواتە ناو حزبێکەوە کە بیرکردنەوەی لەوەوە نزیک بێت.

هەرئەمەش لە قازانجی پرۆسەی سیاسی هەرێمە، ئاخر  چوار پارێزگا پێنج حزبی چەپی بۆ چیە، شەش حزبی ئیسلامی بۆ چیە، نۆ حزبی نەتەوەیی بۆ چیە. وا باشە پێش ئەوەی هەل و مەرج بڕیار لە چارەنوسیان بدات خۆیان بڕیار لە چارەنوسی خۆیان بدەن هەر ئەمەش ڕێگا دروستەکەیە ئەگینا دوای هەڵبژاردن خۆیان دەبیننەوە چۆن خۆبینینەوەیەک، کە کورسیەک نەهێنن ئەوکات لای خەڵک چۆن دەبینرێن !