ئەسحابولکەھف کێن؟ئەو گروپەی موشەکیان نا بە ھەولێرەوە

فەریدڵشاد

میلیشیای وەهمی سیاسەتی نوێی قائانی دژی ئەمریكا لەعێراق

دوای چەند مانگێك له كوژرانی قاسم سولەیمانی فەرماندەی پێشووی فەیلەقی قودسی سەر بە سوپای پاسدارانی ئێران و ئەبو مەهدی موهەندیس جێگری پێَشووی حەشدی شەعبی لە كانوونی دووەمی ساڵی 2020، گۆرەپانی سیاسی عێراق لە دایكبوونی چوار گروپی نوێی چەكداری لەژێر ناوی مقاومەی ئیسلامی بەخۆیەوە بینی كە دیارترینیان گروپی چەكداری ئەسحابولكەهف بوو.
لە مانگی ئابی ساڵی 2020 هەریەك لە گروپە چەكدارەكانی "ئەسحابولكەهف و عوسبەتول سائرین و سیئار موهەندیس و سەرایەی سەورەی عشرین" دروست بوون كە لەلایەن ئێرانەوە پشتیوانی دەكرێن بە ئامانجی هێرشكردنە سەر بنەكەو بارەگاكانی ئەمریكا لەعێراق و تۆڵەكردنەوەی قاسم سولەیمانی و ئەبو مەهدی موهەندیس.
ئەم گروپانە تائێستا سەركردە و ناسنامەیان نادیارە و تەنها لەرێگەی راگەیەنراو و پێگەی ئەلیكترۆنییەوە چالاكییەكانیان بڵاودەكەنەوە، كێشەكی گەورەی بەردەم حكومەتی عێراقیش ئەوەیە ئەم گروپانە لە گروپی حەشدی شەعبی جیانەبوونەتەوە تا ناسنامەیان دیار بێت بەڵام لەلایەن حەشدی شەعبییەوە بەنهێنی هاوكاری دارایی و لۆجستی دەكرێن بۆ ئەوەی بە ئاسانی چالاكی دژی هێزەكانی ئەمریكا ئەنجام بدەن.

،،

ئەم گروپە چەكدارانە ناسراون بەگروپەكانی كاتیۆشا، ماوەیەكە چالاكییەكانیان زیادیكردووە بەتایبەت پێشتر بەرپرسیارێَتی خۆیان لە ئەنجامدانی چەندین هێرش بۆ سەر كاروانی ئۆتۆمبێل و پێگە سەربازیی و دیبلۆماسییەكانی ئەمریكا لەعێراق راگەیاندووە كە زۆربەی هێرشەكان لەلایەن گروپی ئەسحابولكەهفەوە بووە.

ئەمریكاش گروپە چەكدارییەكانی نزیك لە ئێرانی بە ئەنجامدانی ئەو هێرشانە تۆمەتبار كردووە و هیچ جیاوازییەكیان ناكات لەگەڵ هەندێك لە گروپەكانی حەشدی شەعبی.
بەپێی زانیارییەكان گروپی چەكداری ئەسحابولكەهف لە ناو گروپەكانی حەشدی شەعبی نزیكن لە گروپی چەكداری حزبوڵای عێراق كە فەرمان لە سوپای پاسدارانی ئێرانەوە وەردەگرن و پێشتر لەلایەن ئەبو مەهدی موهەندیسەوە سەرپەرشتنی دەكران و لەلایەن ئەمریكاوە خراونەتە لیستی تیرۆرەوە.
بەپێی راپۆرتە رۆژنامەوانییەكان ئیسماعیل قائانی جێگرەوەی قاسم سولەیمانی شێوازێكی نوێی بۆ بەرەنگاربوونەوەی ئەمریكا لە عێراق بە كار دەهێنێًت ئەویش دروستكردنی گروپی میلیشیای نوێیە بۆ هێرشكردنە سەر هێزەكانی ئەمریكا ئامانجیش لەوە دوورخستنەوەی مەترسی پێكدادانی راستەوخۆیە لەگەڵ واشنتۆن.
زیادبوونی چالاكی ئەم میلیشیا نوێیانە و بەهێز بوونیان. دوای ئەوە دێت كە ئەمریكا لەرێگە مستەفا كازمی سەرۆك وەزیرانی عێراقەوە بەنیازە هەژموونی گروپەكانی حەشدی شەعبی لەعێراق بەتەواوی لاواز بكات.
لەماوەی رابردوو بەتۆمەتی ئاراستەكردنی موشەك بۆ سەر باڵیۆزخانەی ئەمریكا لە بەغداد، چەندین چەكداری سەر بە گروپی ئەسحابولكەهف لەلایەن دەزگای هەواڵگری عێراق و هێزەكانی دژە تیرۆری عێراقەوە دەستگیركران.

فەریدڵشاد
توێژەری سیاسی