پاپا فرانسیس پاپای ڤاتیكان، بە سەردانێكی سێ ڕۆژە گەیشتە عیراق و لەگەڵ سەركردە سیاسی و ئاینیەكان كۆبووییەوە ، وا بڕیاریشە كۆبوونەوەی جەماوەری ساز بكات،ئەم سەردانە لە پێشوازی كردنی و تا سەیر كردنی دەسەڵاتەكانی پاپا، بەشێكی زۆری ساختە بوون و دوور لە واقیعی عیراق و كوردستان بوون، هەروەها پاپاش دەسەڵاتداری ڕەهای جیهان نیە، تا عیراق بكاتە وڵاتی خۆشگوزەرانی و ئاشتی.
ئەو پێشوازییەی لە پاپا كرا، تا ڕادەیەكی زۆر دەرچوون بوو لە پرۆتۆكۆڵ و گرنگیەكی زۆری پێدرا، ئەمە تاكو ئێرە لەوەیە ئاسایی بێت، بەڵام ئەوەی ئاسایی نەبوو، شاردنەوەی واقعی عیراق بوو،چونكە لە ڕووی كۆمەڵایەتیەوە وێنەی جوانی عیراق نیشانی پاپا درا، بەڵام خاڵی لە واقعی عیراق، عیراق وڵاتی ناكۆكی ئاینی و ئاینزا و نەتەوەكانە، كە بێ گومان لای پاپا و كۆمەڵگەی نێودەوڵەتیش ڕوونە، عیراق لە سەردەمی ڕژێمی سەددامدا بە ئاگر و ئاسن جیاوازی و ناكۆكیەكان نەهێڵدرابوون، بەڵام دوای ڕوخانی ڕژێمەكە ئەم جیاوازییە دووبارە وەدەركەوتەوە و شەڕی تایەفی سەری هەڵدا، هەروەها لایەنە ناكۆكانیش درێغیان لە هەوڵی سڕینەوەی یەكتری نەكرد، كە تاكو ئێستا بە جۆرێك لە جۆرەكان بەردەوامی هەیە و فشاری هەمەجۆر دەخەنە سەر یەكتری، باشتر وابوو ئەم لایەنە نیشانی پاپا بدرێت و داوای لێبكرێت، ڕێگە چارەی بۆ بدۆزێتەوە، جا بە مادی بێت یان مەعنەوی و كرداری، چونكە شاردنەوەی كێشەكان نابنە مایەی چارەسەركردنی.
ساختەیەكی دیكە، كە لە عیراق و هەرێم هەستی پێكرا، شاردنەوەی مەینەتی هاوڵاتیان و بێخزمەتگوزاری وڵات بوو، لە بەغداد شەقامەكان بەخێرایی شۆردران و چیمەنەكان ڕەنگڕێژ كران، هەر شوێنێك بیانزانیایە كە پاپای پێدا تێپەڕ دەبێت قیرتاویان كرد ، هەروەها بە پەردە و پەڕۆ و وێنە، شوێنە بێ خزمەتگوزارییەكان داپۆشران، كە هیچ بوارێك بۆ شاردنەوەیان نەمابوو، لە هەولێریش شەقامەكان نۆژەنكرانەوە و بۆیاغی شۆستەكان كران، لەم ڕووەوە زیادەڕەوییەكی زۆر كرا، باشتر وابوو دۆخی خزمەتگوزاری وڵات و هەژاری هاوڵاتیەكانی نیشانی پاپا بدرایە، بۆ ئەوەی داوا لەكۆمەڵگەی نێودەوڵەتی بكات هاوكاری عیراق بكەن و لەو مەینەتە دەریبهێنن.
ئەگەر سەیری پاپا بكرێت، بەوەی دەسەڵاتی سیاسی و رۆڵی ڕەهای لە جیهاندا هەیە، ئەوەش هەڵەیەكی دیكەی گەورەیە، چونكە پاپا خۆی باوەڕی بە دەستوەردان لە كاروباری سیاسی نیە، هەروەها دەست لە كاروباری وڵاتانیش وەرنادات، بۆیە لە ڕووی سیاسیەوە رۆڵێكی ئەوتۆی نیە، تا بتوانێت لەو ڕووەوە پاڵپشتی عیراق بكات و كۆمەڵگەی نێودەوڵەتی ناچار بكات پاڵپشتی عیراق بكەن ، بەوەی چی دەتوانن ئەنجامی بدەن بۆ كۆتایی هاتنی كێشە سیاسی و دەستوەردانەكان لە كاروباری عیراق.
پاپا خۆی لە بنەڕەتدا ڕۆڵ و پێگەیەكی كاریگەری لەسەر ئاستی جیهان نیە، بەشێوەیەك بتوانێت لە كێشەو ناكۆكیەكان ڕۆڵ ببینێت، ئەوە پاپا كان بەردەوام كورسی بۆ یەكتری بەجێدەهێڵن و وڵاتانی جیهانیش بەدەست شەڕ و ناكۆكی و برسێتیەوە دەناڵێنن، بۆیە نابێت وا تێبگەین كە هاتنی پاپا دەبێتە مایەی خێر بۆ گەلانی عیراق،ئێمە لە ڕاستیدا پێویستمان بە هاتنی ڕەجەب تەیب ئەردۆگان سەرۆك كۆماری توركیا و حەسەن روحانی سەرۆك كۆماری ئیسلامی ئێرانە، تا ڕزگارمان بێت لەو نەهامەتیانەی كە بەهۆی ئەو دوو وڵاتەوە بەسەرمان هاتووە، هەر لە دەستوەردان لەكاروباری ناوخۆ تا بردنی خێر وبێری وڵات و گرتنەوەی ئاو و ئەنجامدانی ئۆپراسیۆنی سەربازی.
ماوەتەوە بڵێین، هاتنی پاپا لەڕووی سیاسی و وئابوری و خزمەتگوزاریەوە ، هیچ لە دۆخی عیراق ناگۆڕێت، تەنها پاڵپشتیەكی مەعنەویە بۆ برا مەسیحیەكان، بۆیە دەبێت لەو ڕوانگەیەوە سەیری بكرێت و چاوەڕێی گۆڕانكاری گەورەی لێنەكرێت.