ناتۆ، چی دەکات لە کۆبانێ؟

ناتۆ، چی دەکات لە کۆبانێ؟

1734 خوێندراوەتەوە

نیاز حامید

مەرسەدی سوریی بۆ مافەکانی مرۆڤ، دوێنێ هەواڵێکی بلاوکردەوە سەبارەت بەبوونی ژمارەیەکی هێجگار زۆر لە زرێپۆشی ناتۆ لە دەوروبەری فڕگەی سەربازی کۆبانێ. هەواڵەکە شرۆڤەی زۆر هەڵدەگرێت بەتایبەتی لە رووی ناوەڕۆک و شکڵدا، لە تەوقیت و شوێندا.

 

،،

ناوهێنانی ناتۆ لە بری هێزی ئەمریكا ،گرنگی  و هۆکاری خۆی هەیە

 

بۆچی ناتۆ؟

هەموو ئاگادارین کە ئەو هێزە سەرەکییەی کە بەشداری و پشتیوانی شەرڤانانی هەسەدەی کرد بۆ شەڕی لەناوبردنی داعش، ئەمەریکا بوو، ناوهێنانی ناتۆ وەک بوونێکی هەقیقی لەسەر ئەرز، گرنگی خۆی هەیە و هۆکاری خۆشی هەیە.

  • دوای لە ناوبردنی داعش لە رۆژهەڵاتی فورات، ئیدی ئەمەریکا بۆ ئەوەی لە باکوری سوریا بەتەنیا نەبێت و شێوازێکی فەرمی وەربگرێت، بۆ لەمەودوا ئەو هێزانەی ئەمەریکا و فەرەنسا و بەریتانیا کە لە باکوری سوریان و هاوپەیمانی شەرڤانانی هەسەدەن، من وای بۆ دەچم بەناو ناتۆوە بێت.
  •  ئەمەریکا دەیەوێت چیدیکە ئەو بەتەنها لەبەردەم رایگشتی جیهانی و ناوخۆی ئەمەریکا وا دانەنرێت بەتاقی تەنیایەو بەتەنها بڕیار دەدات، ئەگەرچی پشکی شێر لە بریاردانی سیاسی و سەربازیی و ستراتیژیی لەدەست خۆیەتی.
  • ئەمەریکا لە کۆبونەوەی ناتۆ لەم دواییە (جگە لە تورکیا) مەترسییەکانی روسیای پێڕاگەیاندوون، ناوچەیەک، کە تێیدا بتوانن سنورێک بۆ پەلهاویشتنی روسیا دابنێن، باکوری سوریایەو هێزێکیش هەبێت کە بتوانن مامەڵەیان لەگەڵدا بکەن، هێزەکانی سوریای دیموکراسییە کە یەپەگەو یەپەژە بڕبڕەی پشتی ئەو هێزەیە.

 

  •  بوونی هێزێک بەناوی ناتۆوە، ئیدی روسیا ناتوانێت باس لەدەرکردنی ئەمەریکا بکات لاڤرۆڤ لە ئوردن ومیسر ولە زۆر شوێنی دیکە باسی لە دەرکردنی سوپای ئەمەریکاى لە سوریا دەکرد. بە بوونی ئەمەریکا لە ژێر چەتری ناتۆ، ئیدی ئەو پاساوەی نامێنێت و قورستر دەبێت ئەگەر داوایەکی ئاوا بکات.
  • دوێنی ئەمەریکا پاسدارانی کۆماری سێدارەی خستە لیستی تیرۆرەوە، ئەمە بەمانا دەوڵەتی ئێران بەتەواوی خرا لیستی تیرۆرەوە، بەمەش ئەمەریکا هەموو ئەندامانی ناتۆ مولزەم دەکات کە ئێران وەک دەوڵەتێکی تیرۆریستی ببینن، بوونی ناتۆش لە سوریا بەواتا وەستانەوە دژی تەواجدی ئێران لە سوریا.
  •  بوونی هێزەکانی ئەمەریکا لەژێر چەتری ناتۆ، ئیدی رێگای لەبەردەم تورکیا داخست، کە هەوڵبدات دژی شەرڤانان هەڕەشە بکات، چونکە بوونی ناتۆ لەباکوری سوریا پاساو لەدەست تورکیا ناهێڵێتەوە کە ئاسایشی نەتەوەیی لە مەترسیدایە، ئەو هێزەش کە تورکیا هەڕەشەی لێدەکات، لەسەر ئەرز هاوپەیمانی نا جاڕدراوی پراکتیکی ناتۆیە.

،،

هێزەکانی سوریای دیموکراسی لە ناو ناتۆ  وەک هاوپەیمانێک دەبینرێن، بۆیە دەستەکەوتەکان بۆ گەلی کورد لە چەند ساڵی داهاتوو ،گەورەتر دەبێت

 

 

  • لا ڤرۆڤ هەوڵدەدات هاوپەیمانێتییەک لە دژی بوونی ئەمەریکا دورست بکات، زۆر هەوڵیدا لێى سەرکەوتوو نەبوو، هاوپەیمانەکانی ئێران و تورکیایە کە دوو رژێمی شکستخواردووی ئیرهابین، ئێران ئەوەتا دوێنێ خرا لیستی تیرۆرەوە، تورکیاش لەبەردەم دوو بژاردە دانراوە، یا واز لە هاوپەیمانێتی روسیا وکڕینی ئیس ٤٠٠ دەهێنێت و یا ئەوەتا دەردەکرێت لە ناتۆ، بەمانایەکی دیکە روسیا گرەو لەسەر دوو دەوڵەت دەکات بۆ هاوپەیمانێتی، هەردولایان سەرچاوەی تیرۆرن، لە بیریشى نەکەین ئیسرائیل کە ئیمڕۆ هەڵبژاردنی پەرلەمانی هەیە ، رازی نابێت بەبونی ئێران و تورکیا لە سوریا.
  •  ئەمەریکا لە نزیکەوە هەڤدیتنی پۆتین و ئەردۆگانی شۆپاند کە دوێنێ بەڕێوەچوو، پێشتریش گوێیان لە چاوەشئۆغلو بوو لە واشنتۆن، ئەمەریکا ئەو راستیە دەزانێت، ئەردۆگان و رژێمەکەی لە خراپترین حاڵدان، بۆیە دوور نییە بکەوێتە ژێر کاریگەری روسیا، حەماقاتێک بکات لە دژی منبەج و یا ناوچەیەکی دیاریکراو لە رۆژهەلاتی فورات.  بوونی هێزێکی گەورە لە رۆژهەلاتی وفورات لە منبەج و کۆبانێ بەناوی ناتۆ، ئەو رێگایەی لێدەگرێت یا ئەگەر هەر بەردەوام بوو، خۆی دەبینێتەوە بەرامبەر ناتۆ، کە کارەساتهێن دەبێت بۆ ئەردۆگان.
  • پۆتین دەیەوێت لە رێگای هاندانی ئەردۆگانێکی لاوازەوە بەتایبەتی دوای دۆڕاندنی لە هەڵبژاردنەکانی ٣١ی ئازار، وەک باسمان کرد، زەربەیەک لە ئەمەریکا بدات بۆ ئەوەی پێگەی ئەمەریکا لاواز بکات و رایگشتی ناوخۆی لێبورژێنێت، بۆیە لە ژێر ناوی ناتۆ شیمانەی جێبەجێکردنی ئەم پیلانەی پۆتین لاواز دەبێت.
  • ئەمەریکا دەیەوێت سەرلەنوێ هەیکەلی ناتۆ لە ناوەڕۆکەوە لە ئاستی ستراتیژیی بگۆڕێت، چونکە وەک زۆرجار گەورە چاودێرانی ئەمەریکا لە ناوەندەکانی ستراتیژیی باس لە ئەرکەکانی تازەی ناتۆ دەکەن کە زۆر جیاوازترە لەو کاتەی کە شەڕی سارد هەبوو، تەنانەت زۆر جیاوازترە لەپاش لە ناوچوونی پەیمانی وارسۆ .
    هێزەکانی سوریای دیموکراسی جێگەیەکی گرنگ دەگرن لە ناو ناتۆ و وەک هاوپەیمانێک دەبینرێن، لەمەشدا دەستەکەوتەکان بۆ گەلی کورد و گەلانی ناوچەکە بۆ چەند ساڵی داهاتوو گەورەتر دەبێت.