ئاوات شێخ جەناب، ئاڵای سپی هەڵکرد..

دانپێدانانێکی بە ئازار.
پارەمان نیە بۆ موچە و پرسیاری موچە لە من مەکەن
بەغدا داوای هەموو شتێکمان لێ دەکات.
هەرێمی کوردستان لە ئابوری سەربەخۆوە، بۆ کاسەی بەتاڵ..
١٠ ساڵ لەمەوبەر، بەرپرسانی هەرێم بەناوی ئابوری سەربەخۆوە نەوتی کوردستانیان بە بۆری هەناردەی دەرەوە کرد، ئەوێ رۆژێ وتیان:
تەواو کوردستان نەجاتی بوو لەوەی چاوەڕێی بەغدا بکات
وتیان کوردستان چوە سەر نەخشەی جیهانی نەوت و کوردستان دەبێتە خاوەنی ئابوری سەربەخۆ.
ئەوێ رۆژێ وەزیرە سەر سپییەکەی کوردستان، ئاشتی هەورامی وتی، هەناردەی رۆژانەی نەوتی کوردستان دەگەیەننە یەک ملیۆن بەرمیل و بۆ هەتا هەتایە کوردستان پێویستی بە بەغدا نابێت..
ئەمڕۆ دوای ١٠ ساڵ لەو قسانە، وەزیری دارایی هەێم بە ئاشکرا وتی، کاسەکەی هەرێم بەتاڵە و هیچ پارەیەکیان نیە و چیتر حەز ناکات پرسیاری موچەشیان لێ بکرێت.



ئاوات شێخ جەناب لە کۆنگرەیەکی رۆژنامەوانیدا کاتێک پرسیاری موچەیان لێکرد، تەواو نیگەران بوو، بە رۆژنامەنوسەکەی وت، ئەسڵەن ئەو پرسیارە راست نیە، تۆ دەزانیت ئێمە نە داهاتی نەوتمان ماوە و نە داهاتی ناوخۆش وەک جارانە.
وتیشی، حکومەتی هەرێم هەموو داواکارییەکانی بەغدای جێبەجێکردوە، ئێستا داوای هەموو داهاتی نانەوتیش دەکەن، لەکاتێکدا بەپێی یاسای بودجە ٥٠٪ داواکراوە.
ئاوات شێخ جەناب وتیشی، لە ٢٠١٣ وە بەغدا هەرێمی خستۆتە ژێر گەمارۆوە، هیوادارم ئەم گەمارۆیە کۆتایی بێت.
هەر لەسەر دابەشکردنی موچە وەزیری دارایی وتی، ئێمە داهاتەکەی جارانمان نەماوە، داهاتی نەوتمان نەماوە، ئیتر بەچی موچە دابەش بکەین، پرسیار لە ئێمە مەکەن لەسەر موچە و دابەشکردنی موچە، لەمەودوا پرسیار لە وەزارەتی دارایی عێراق بکەن.
قسەکانی ئەمڕۆی وەزیر پێی بزانێت یان نا، دانپێدانانێکی رون و ئاشکرا بوو لەسەر سیاسەتی شکستخواردوی ١٠ ساڵی رابردوی هەرێم، لەژێر ناوی سەربەخۆیی ئابوری و گەیشتنی هەرێمی کوردستان بە نەخشەی جیهانی نەوت.
با واز لەوە بێنین ئەمڕۆ بەغدا چۆن دەستی لە بینەقاقای هەرێم گیرکردوە و کورد وتەنی پرسیاری قڕوش بە قڕوش دەکات، سەیرکەن دەسەڵاتدارانی هەرێم دەساڵە نەوت دەفرۆشن چیان بەسەر هەرێمەکە هێنا.
ئەوان ١٠ ساڵ نەوتیان فرۆشت، کەچی هەرێمەکە بە دانپێدانانی خۆیان ٣٠ ملیار دۆلار قەرزدار بوە، ئەرێ بەڕاست نەوتیان فرۆشتوە یان نەوتیان کڕیوە؟
هەندێک دەڵێن، قسەکانی ئەمڕۆی وەزیری دارایی ئاش بەتاڵە، ئەمە راست نیە، ئاشەکەی هەرێم بەتاڵ نیە و بەس، بەڵکو هەرێمەکە و خەڵکەکەی بون بەژێر باری قەرزی، ئاشی بەغدا و ئاشی کۆمپانیا نەوتیەکان و ئاشی تورکیا و دەیان وڵاتی ترەوە.
لەم نێوەندەدا، ئەوانەی سود مەند بون، بەرپرسەکان و کۆمپانیا زەبەلاحەکانیان بون، ئەوەش کە باجەکەی دەدات خەڵکی کوردستانە، کێ برسیە؟ کێ پێویستی بە موچەیە؟ کێ موچەی بڕاوە؟ کێ خەمی کرێی خانو و ئاو و کارەبا و کڕینی دەرمان و رۆژانەی منداڵەکەی و ژەمی ئێوارەیەتی، قابیلە ئەوە خەمی جەنابی والی و نەوەکانیان بێت؟