جۆ بایدن چی بە پارتی‌و یەكێتی وت؟

دیبلۆماتیك

جۆ بایدن"ی سەرۆكی ئەمەریكا لەگەڵ پارتی‌و یەكێتی دا كۆ دەبێتەوەو بەوان دەڵێت، ئەمەریكا نكوڵی لە ڕەوایەتی مەسەلەی كورد ناكات‌و تا ئەوكاتە پشتیوانتان دەبێت كە خاوەنی سیاسەتێكی عەقڵانی بن.

لە 7 – 12 – 2002 داو چوار مانگ بەر لە ڕووخانی ڕژێمی بەعس لە عێراق، جۆ بایدن كە ئەو دەمە بەرپرسی پەیوەندییەكانی دەرەوەی كۆنگرێسی ئەمەریكا بووە، لە میانی ئامادەكاری بۆ لێدانی ڕژێمی بەعس، لە هاوینە هەواری سەڵاحەدین لەگەڵ وەفدێكی هاوبەشی پارتی‌و یەكێتی دا كۆ دەبێتەوە.

عیماد ئەحمەد، لە لاپەڕە 250 و لاپەڕەی پاشتری كتێبی " درەوشانەوەی مێژوو"دا كە تۆمارو نووسینەوەی بیرەوەرییەكانیەتی باسلەو كۆبوونەوەیە دەكات‌و دەڵێت:" وەفدی یەكێتی بەسەرۆكایەتی كاك بەرهەم‌و ئەندامێتی بەندەو وەفدی پارتیش بە سەرۆكایەتی كاك نێچیرڤان بارزانی بوو، لە كۆتایی كۆبوونەوەكەو باسوخواسەكاندا من پرسیارێكم لە بایدن كردو لێمپرسی لە شۆڕشی ئەیلوولەوە تا ساڵی 1975 بەگەرمی پشتیوانیتان لە كورد كرد، بەڵام دوایی لەبەرخاتری ڕژێمی ئەوكاتی ئێران پشتتان لە ئێمە كرد، ئەی ئێستا ئەمەریكا تا كوێ پشتیوانی لە كورد دەكات، ئایا ئەمجارەش لەبەر دڵی توركیا پشتمان تێناكات؟
" ناو هێنانی توركیا لە پرسیارەكەدا لەو ڕوانگەیەوە بووە كە وەكو عیماد ئەحمەد ئاماژەی پێداوە، ئەوكاتە هەندێك مەرجی هەبووە بۆ بەشداریكردن لە پرۆسەی ڕووخانی ڕژێمی بەعسدا".

عیماد ئەحمەد لە بیرەوەرییەكانیدا وەڵامی جۆ بایدن"ی بۆ پرسیارەكەی ئەو بەمجۆرە تۆمار كردووەو نووسیوویەتی:" بایدن زۆر بە ڕاشكاوی وەڵامی دامەوەو وتی، ئەمەریكا نكولی لە ڕەوایی مەسەلەی كورد ناكات، تا ئەو شوێنە پشتیوانی سەرڕاستی كورد دەبێت كە خاوەن سیاسەتێكی عەقڵانی‌و مەنتیقی بێت، خۆ ئەگەر كورد كەركووك دەكاتە پایتەختی كوردستان، ئەوا لەمەدا ئەمەریكا پشتیوانیتان لێناكات‌و لەگەڵتان نابێت".
عیماد ئەحمەد ئاماژەشی بەوە داوە كە بایدن بۆیە نمونەی كەركوكی هێناوەتەوە، چونكە پاش ڕێكەوتننامەی واشنتۆن پارتی‌و یەكێتی پرۆژەی دەستوورێكیان ئامادە كردووەو لەو پرۆژەیەدا كەركووك  وەك پایتەختی كوردستان دانراوە.